I le amatamataga o vaitausaga o le 1940, na suʻesuʻe ai oʻu mātua ma Molimau a Ieova. E ui e leʻi faaauau le suʻesuʻega, ae na maua pea e loʻu tinā kopi o Le Olomatamata ma le Ala Mai! I le 1950, na faia ai se tauaofiaga faavaomalo i le aai o Niu Ioka, ma na auai ai lo matou aiga.

E leʻi umi ae asiasi mai le uso o Lawrence Jeffries iā i matou, ma sa naunau e fesoasoani iā te aʻu e aʻoaʻoina le upu moni. I le taimi muamua, ou te leʻi ioe i le solitū o Molimau a Ieova i faiga faapolotiki ma le lē auai i vaegaʻau. Na ou fai atu iā te ia, pe afai e mumusu tagata uma i Amerika e auai i taua, o le a osofaʻia ma pulea e le fili le atunuu atoa. Ae na ia tali mai ma le onosaʻi: “Pe afai e auauna tagata uma i Amerika iā Ieova le Atua, o le ā sou manatu i le mea e na te faia pe a osofaʻia e le fili i latou?” O lona manatu e faatatau i lenā mataupu faapea isi mataupu, na ou iloa ai le sesē o oʻu manatu sa iai, ma na ou fia iloa atili ai e uiga i upu moni o le Tusi Paia.

Na ou faaaluina le tele o itula e faitau ai i lomiga tuai o Le Olomatamata ma le Ala Mai!, lea na tuu e loʻu tinā i le potu pito i lalo o lo matou fale. O i inā na ou iloa ai o le upu moni lea, ma ou taliaina ai loa se suʻesuʻega mai i le uso o Jeffries. Na amata foʻi ona ou auai e lē aunoa i sauniga. Na ou fiafia i mea na ou aʻoaʻoina, ma na avea aʻu o se tagata talaʻi o le tala lelei. Ina ua ou malamalama“[ua] latalata mai le aso tele o Ieova,” na suia ai loa oʻu sini. (Sefa. 1:14) Nai lo o le toe sini e alu i le iunivesite, ae na ou manaʻo e fesoasoani i isi ina ia aʻoaʻoina upu moni o le Tusi Paia.

Iā Iuni 13 i le 1956, na ou faauu ai mai i le kolisi, ma i le tolu aso mulimuli ane, na ou papatiso ai i se fonotaga matagaluega. Ou te leʻi faatalitalia e tele faamanuiaga o le a ou maua, mai i le faaaogā  o loʻu ola e aʻoaʻoina ai e faatatau iā Ieova ma faasoa atu i isi e uiga iā te ia.

Ina ua mavae le ono masina talu ona ou papatiso, na ou paeonia sauatoa ai. I Le Faiva o le Malo o Tesema 1956 na iai le mataupu, “Can You Serve Where the Need Is Great?” Na ou manaʻo e faia ai soʻu sao, ina ia fesoasoani ai i oganuu o loo tele ai le manaʻoga.​—Mata. 24:14.

Na ou siitia i se faapotopotoga i Edgefield i South Carolina, ma e na o le toʻafā tagata talaʻi sa iai. Ae ina ua ou siitia atu i inā, na toʻalima ai loa iā te aʻu. Na faia a matou sauniga i le potu mālōlō o le fale o se uso. E 100 itula ou te faaaluina i masina taʻitasi i le faiva i le fanua. Na ou pisi i le taʻimua i le galuega talaʻi ma le faia o vaega i sauniga. O le mea moni, o le tele lava ou te faia ai mea i le auaunaga, o le tele foʻi lenā o loʻu aʻoaʻoina e faatatau iā Ieova.

E iai se fafine na ou faia lana suʻesuʻega faale-Tusi Paia. O ia e ana se fale maliu i Johnston lea e lē mamao tele atu mai i Edgefield. Na agalelei o ia ma ofoina mai se avanoa ou te galue faavaitaimi ai, ma faataga i matou e faaaogā se tamaʻi fale ina ia faia ai sauniga.

Na siitia ese mai i Brooklyn i Niu Ioka le uso o Jolly Jeffries ae sau i Edgefield. O ia o le atalii o Lawrence lea na faia laʻu suʻesuʻega. Na ma paeonia faatasi, ma na ma nonofo i se tamaʻi kalaveni a se uso.

Na matuā lāiti totogi o tagata faigaluega i South Carolina, lea e pe ā ma le lua pe tolu tālā e maua i le aso. I se tasi aso, e na o ni nai sene lava sa totoe na mafai ona faatau ai saʻu meaʻai mai i se faleoloa. A o oʻu savali ese, ae alu atu se tamāloa ma fesili atu: “E te fia faigaluega? Ou te totogiina oe i le tasi le tālā i le itula.” E tolu aso na ou galue ai e faamamā se nofoaga sa faia ai galuega faufale. O lea na ou mautinoa ai, e finagalo Ieova ou te nofo pea i Edgefield. Peitaʻi, sa mafai pea ona ou auai i le tauaofiaga faavaomalo sa faia i le 1958 i le aai o Niu Ioka.

I le aso lona lua o le tauaofiaga, e iai se mea faapitoa na tupu ai. Na ou feiloaʻi ai iā Ruby Wadlington, ma sa auauna o se paeonia sauatoa i Gallatin i Tennessee. Talu ai na ma fiafia uma i le auaunaga faamisionare, o lea na ma auai ai i le fono sa faia mo ē fia ō i le Aʻoga o Kiliata. Mulimuli ane na amata ona ma fetusiaʻi. I se tasi taimi, na valaaulia ai aʻu e faia se lauga lautele i le faapotopotoga i Gallatin. O i inā na ou talosaga ai loa iā Ruby e ma te faaipoipo. Na iʻu ina ou siitia i le faapotopotoga a Ruby, ma na ma faaipoipo i le 1959.

Ina ua 23 oʻu tausaga, na tofia ai aʻu o se auauna o le faapotopotoga (lea ua taʻua nei o le sooupu a le ʻautoeaina) i Gallatin. O matou le faapotopotoga na muamua asia e Charles Thompson, o se ovasia o le matagaluega. E ui i le tele o ona tomai, ae sa ia fesili mai pea i soʻu manatu i mea na manaʻomia e uso, ma le auala na tausia ai e isi ovasia  o matagaluega na manaʻoga. O i inā na ou iloa ai, e leai se afāina o le fesili ma malamalama i faamatalaga uma a o leʻi faia se faaiʻuga.

Iā Me i le 1964, na valaaulia ai aʻu e auai i le Aʻoga o le Faiva o le Malo lea na faia i South Lansing i Niu Ioka, mo le tasi le masina. Na faalaeiauina aʻu e uso na faia le aʻoga, ina ia atiaʻe se faanaunauga malosi e aʻoaʻoina le tele o mea ma ia tuputupu aʻe o se tagata faaleagaga.

Iā Ianuari i le 1965, na valaaulia ai i maʻua ma Ruby e galulue i le galuega femalagaaʻi. Na tofia i maʻua e galulue i se matagaluega, e amata mai i Knoxville i Tennessee ma e toeitiiti oo i Richmond i Virginia. E aofia ai faapotopotoga i North Carolina, Kentucky, ma West Virginia. E na o faapotopotoga e iai uso ma tuafāfine uli na ou asia, ona o le malosi o le faailogalanu i lenā taimi i le itu i saute o le Iunaite Setete. O lea, e leʻi mafai ai ona faapotopoto faatasi uso uli ma uso papaʻe. Talu ai e leʻi tele ni meafaitino a uso, o lea sa tatau ai ona ma fesoasoani atu iā i latou. O se lesona tāua lenei na ou aʻoaʻoina mai i se uso ua leva ona avea ma ovasia o le matagaluega: “Pe a e asiasi i faapotopotoga, ia avea oe o se uso ae aua e te pei o se pule. E mafai ona e fesoasoani iā i latou, pe a latou vaai iā te oe o so latou uso.”

Sa ma asia ma Ruby se tamaʻi faapotopotoga, ma na ia suʻesuʻe ai ma se tinā talavou e iai sana tama teine e tasi le tausaga. Ina ua māeʻa le asiasiga, e leʻi iai se tasi i le faapotopotoga na mafai ona faaauauina le suʻesuʻega. O lea na faaauau e Ruby le suʻesuʻega e ala i le tusia o ni tusi. Ina ua ma toe asia lenā faapotopotoga, na auai lea tinā talavou i sauniga uma. Sa mafai ona faaauau lana suʻesuʻega, ina ua siitia atu i le faapotopotoga ni tuafāfine paeonia faapito se toʻalua, ma e leʻi umi ae papatiso lenā tinā talavou. Pe ā o le 30 tausaga mulimuli ane ai i le 1995 i le Peteli i Patterson, na alu atu ai se tuafafine talavou ma feiloaʻi iā Ruby. Ae ma iloa ane ai o le tama teine lea a le tinā talavou sa suʻesuʻe ma Ruby. Na auai lea tuafafine talavou ma lana tane i le vasega lona 100 o le Aʻoga o Kiliata.

O le matagaluega lona lua na ma galulue ai, e aofia ai aai i le ogatotonu o Florida. O le taimi lea ua ma manaʻomia se taavale, ma na ma faatauina ai loa se taavale taugofie. Peitaʻi, i le vaiaso muamua ae leaga le tane vai, ma e leʻi iai se ma tupe e faaleleia ai. Na ou faafesootaʻia se uso atonu e mafai ona fesoasoani mai. Na mafai e se tasi o ana tagata faigaluega ona toe faia le taavale, ae e na te leʻi tāpā se totogi. Na ia faapea mai, “E leai se mea e te popole ai fua.” Na ia aumaia faameaalofa foʻi se tupe mo i maʻua. Maʻeu se faaaʻoaʻoga matagofie o le auala e tausia ai e Ieova ana auauna! Na faamanatu mai ai iā i maʻua le tāua o le faaalia o le limafoaʻi.

Pe a ma asia se faapotopotoga, e ma te nonofo i fale o uso, ma e avea i latou o ni uō mamae iā i maʻua. I se tasi aso, na galo ai ona ou aveesea mai i le laau lomitusi (typewriter) se lipoti a se faapotopotoga e leʻi uma ona tāina. Ou te toe foʻi atu i le fale i le afiafi, na ou iloa ai sa taalo i le laau lomitusi le atalii o le uso sa ma nonofo ai, e na o le tolu ona tausaga. Atonu na mafaufau le tamaitiiti, o lea sa ia “fesoasoani” iā te aʻu e faauma le lipoti. E tele tausaga o oʻu ula iā te ia e uiga i le mea na tupu.

I le 1971, na ou maua ai se tusi ua tofia aʻu o se ovasia o le itumalo i le aai o Niu Ioka. Na faateʻia i maʻua, ma e na o le 34 oʻu tausaga ina ua ma siitia atu i inā. Sa faafeiloaʻi ma le māfana i maʻua e le ʻauuso, ma o aʻu le tagata uli muamua ua avea ma o latou ovasia o le itumalo.

Na ou fiafia e aʻoaʻo atu e uiga iā Ieova i fonotaga matagaluega sa faia i faaiʻuga o vaiaso taʻitasi. E tele atu tomai o isi ovasia o matagaluega nai lo o aʻu. Na faia e se tasi o i latou le lauga o loʻu papatisoga. O le isi uso o Theodore Jaracz, lea na mulimuli ane avea o se sui o le Vaega Pule. Sa auauna i le Peteli i Brooklyn le toʻatele o isi uso e iai tomai. Na ou matuā lotofaafetai ona o le auala agalelei na matou feutagaʻi ai ma isi ovasia o matagaluega, faapea sui o le aiga Peteli, ma ou te leʻi lagona ai e pei ua faaesea aʻu. O lenā mea na ou iloa ai o i latou o ni leoleo mamoe alolofa e faalagolago i le Afioga a le Atua, ma lagolagoina ma le faamaoni le faalapotopotoga. O o latou  uiga lotomaulalo, na faafaigofie ai ona ou auauna o se ovasia o le itumalo.

I le 1974, na tofia ai e le Vaega Pule isi ovasia o matagaluega e galulue o ni ovasia o itumalo. O lea sa ou toe galue ai o se ovasia o le matagaluega i South Carolina. Ae o se taimi lea na matuā fiafia ai, auā ua mafai ona toe faapotopoto faatasi uso uli ma uso papaʻe i faapotopotoga ma matagaluega.

I le faaiʻuga o le 1976, na tofia ai aʻu i se matagaluega i Georgia, lea e iai i le ogatotonu o Atlanta ma Columbus. Ou te manatua lelei se lauga o le maliu na ou faia mo ni tamaiti uli se toʻalima na maliliu, ina ua susunu e ni tagata lo latou fale. Na taofia i le falemaʻi le tinā o ia tamaiti ona o le tugā o ona manuʻaga. Na vaaia le gasolo atu pea i le falemaʻi o le toʻatele o uso uli ma uso papaʻe e faamāfanafana i mātua, ma na manino mai ai le malosi o le alofa o le ʻauuso. O lenā uiga, e mafai ona fesoasoani i auauna a le Atua e feagai ai ma tulaga e sili ona faigatā.

I le 1977, na talosagaina ai i maʻua e ō atu i le Peteli i Brooklyn mo ni nai masina, e fesoasoani i se poloketi. A o lata ina māeʻa le poloketi, na matou feiloaʻi ai ma ni sui se toʻalua o le Vaega Pule. Na la fesili mai pe e ma te lotomalilie e galulue tumau i le Peteli. Na ma taliaina lenā valaaulia.

E 24 tausaga na ou galue ai i le Matagaluega o le Auaunaga, lea e masani ona taulima ai e uso ni fesili faigatā ma lavelave. A o faagasolo tausaga, ua saunia mai ai e le Vaega Pule taʻiala e ōgatusa ma mataupu silisili o le Tusi Paia. Na fesoasoani nei taʻiala i le taliina o fesili, toleniina o ovasia o matagaluega, toeaina, ma paeonia. O na toleniga na fesoasoani i le tuputupu aʻe faaleagaga o le toʻatele, ma o se vala ua matuā faamalosia ai le faalapotopotoga a Ieova.

I le 1995 e oo i le 2018, na ou asia ai ofisa o lālā o se sui o le ofisa ulu, lea sa taʻua o le ovasia o le sone. Na matou feiloaʻi ma Komiti o Lālā, tagata Peteli, ma misionare, ina ia faalaeiau ma fesoasoani iā i latou i so o se luʻi na latou fesagaʻia. I le taimi e tasi, na faalaeiauina ai foʻi i maʻua ina ua latou faamatala mai mea na tutupu iā i latou. O se faataʻitaʻiga, ina ua ma asiasi i Rwanda i le 2000, na matuā pāʻia o ma loto i le tutumau ma le lototetele o uso ma sui o le aiga Peteli, ina ua tafiesea se ituaiga o tagata i le 1994. E toʻatele na maliliu ai ē e pele iā i latou. E ui lava i na faigatā, ae na faaalia pea e uso le faatuatua, olioli, ma le iai o se faamoemoe.

Ua silia nei ma le taʻi 80 o ma tausaga, ma ua 20 tausaga o oʻu auauna o se sui o le Komiti o le Lālā i le Iunaite Setete. E leʻi aʻoaʻoina lava aʻu i se iunivesite. Peitaʻi, e sili atu aʻoaʻoga ua ou maua mai iā Ieova ma lana faalapotopotoga, lea ua faaauupegaina ai aʻu e aʻoaʻo isi i upu moni o le Tusi Paia ma aogā tumau e latou te maua ai. (2 Kori. 3:5; 2 Timo. 2:2) Ua ou vaaia le auala ua fesoasoani ai le feʻau o loo i le Tusi Paia e faaleleia ai olaga o tagata, ma latou atiaʻe ai se faiā ma Lē na foafoaina i latou. (Iako. 4:8) E ma te faaaogāina ma Ruby so o se avanoa e faalaeiau ai isi ina ia faatāua le faaeaga ua latou maua, o le aʻoaʻoina e faatatau iā Ieova ma faasoa atu i isi upu moni o le Tusi Paia. Maʻeu se faaeaga sili ua tatou maua o ni auauna a Ieova!