Na taʻua e Paulo i le 1 Korinito 15:8: “Na mulimuli lava faaali mai o ia iā te aʻu, e peiseaʻī o se tama fanau lē au.” Na tatou faamatalaina lenei mau i le taimi ua teʻa e faapea, e foliga mai na faasino atu Paulo i se faaaliga na ia vaaia o Iesu i lona tulaga mamalu i le lagi. E peiseaʻī na maua e Paulo se faaeaga o le fanaufouina pe toe faatūina e ola i le lagi, e ui lava e leʻi oo i le taimi e amata ai lenā toetū. I le māeʻa ai ona iloiloina o lenei mau, ua manaʻomia ai ona faia se fetuunaʻiga.

E moni o loo uiga atu le faamatalaga a Paulo i le taimi na faaliliuina ai o ia. Peitaʻi, o le ā na uiga i ai Paulo ina ua ia faapea mai, o ia “o se tama fanau lē au”? Atonu e tele mea na ia faasino i ai.

Na faafuaseʻi ma mataʻutia le faaliliuina o ia. O le fanau lē au, o se mea e tupu faafuaseʻi. A o malaga atu Saulo (o lē na mulimuli ane taʻua o Paulo) i Tamaseko ina ia sauāina Kerisiano i inā, e na te leʻi faatalitalia o le a ia vaaia se faaaliga o Iesu ua toe faatūina mai. E lē gata na faateʻia Paulo i le faaliliuina o ia, ae na faateʻia foʻi Kerisiano o le a ia sauāina i lenā aai. O le mataʻutia tele o le mea na oo iā Paulo, na iʻu ai ina tauaso mo sina taimi.​—Galu. 9:1-9, 17-19.

E “sesē le taimi” na faaliliuina ai o ia. O le faaupuga “o se tama fanau lē au” i le uluaʻi gagana Eleni, e mafai foʻi ona faaliliuina i “se tasi ua sesē le taimi ua fanau mai ai.” Ua faapea mai le The Jerusalem Bible: “E pei sa ou fanau mai i se taimi e leʻi faatalitalia e se tasi.” I le taimi na faaliliuina ai Paulo, ua leva ona afio Iesu i le lagi. E leʻi pei Paulo o i latou na ia taʻua i fuaiupu na muamua atu, o ē na vaaitino iā Iesu a o leʻi afio i le lagi. (1 Kori. 15:4-8) Peitaʻi, na maua e Paulo le avanoa e vaai ai iā Iesu e ala i se faaaliga faafuaseʻi, e ui lava e foliga mai na “sesē le taimi” na tupu ai lenā mea.

Na ia manatu iā te ia lava o sē e faatauvaa. E tusa ai ma manatu o nisi o le ʻaufaitofā, o le faaupuga na faaaogā e Paulo, e mafai ona uiga atu i lagona o le leai o se aogā. Pe afai o lea, o lona uiga na ia manatu e lē agavaa o ia mo le tofiga na ia mauaina. O lea na ia faapea mai ai: “O aʻu o lē e aupito faatauvaa o le ʻauaposetolo, ma e lē tatau ona taʻua aʻu o se aposetolo, auā na ou sauā i le faapotopotoga a le Atua. Ae ona o le agalelei faifua o le Atua, ua ou faapenei ai.”​—1 Kori. 15:9, 10.

O lea, sa mafai ona uiga atu Paulo i le auala faafuaseʻi ma mataʻutia na faaali mai ai Iesu iā te ia, o le sesē o le taimi na faaliliuina ai o ia, po o lona tulaga faatauvaa faaleagaga ae na ia maua pea se faaaliga mataʻina. Po o le ā lava le tulaga, ae na matuā talisapaia e Paulo lenei avanoa. Na atili faamautinoa ai i lona mafaufau, ua toe faatūina Iesu mai i le oti. E lētioa tele ina taʻua e Paulo le mea mataʻutia na tupu iā te ia, pe a talaʻi atu i isi e faatatau i le toetū.​—Galu. 22:6-11; 26:13-18.