1-2. Aiseā e tatau ai ona tatou suʻesuʻeina le faaaʻoaʻoga a Samasoni?

 O LE ā e tau i ai lou mafaufau pe a taʻua le igoa Samasoni? Atonu e te mafaufau o se tagata e sili ona malosi. Ae na faia e Samasoni se filifiliga leaga lea na iʻu ai i mafatiaga. Peitaʻi, na taulaʻi Ieova i le talaaga faamaoni o Samasoni, ma ua Ia faamauina i le Tusi Paia ina ia tatou maua ai aogā.

² Na faaaogā e Ieova Samasoni ina ia faataunuu ni mea mataʻina e fesoasoani ai i Lona nuu o Isaraelu. Ina ua mavae le faitau selau o tausaga talu ona maliu Samasoni, na faagaeeina ai e Ieova le aposetolo o Paulo e faaaofia le igoa o Samasoni i le lisi o tane e mataʻina lo latou faatuatua. (Epe. 11:​32-34) E mafai ona faalaeiauina i tatou i le faaaʻoaʻoga a Samasoni. Na ia faalagolago iā Ieova e oo lava i taimi e sili ona faigatā. I lenei mataupu, o le a tatou talanoaina ai le faaaʻoaʻoga a Samasoni, ma pe e faapefea ona aogā iā i tatou.

3. O le ā le tofiga na maua e Samasoni?

³ E fanau mai Samasoni o loo pule ma le sauā tagata Filisitia i le nuu o Isaraelu. (Faama. 13:1) O la latou pulega sauā, na matuā mafatia ai tagata Isaraelu. Na filifilia e Ieova Samasoni “e taʻimua i le faaolaina o Isaraelu mai i lima o tagata Filisitia.” (Faama. 13:5) O se tofiga e sili ona faigatā! Ae ina ia faataunuu lenā tofiga, e manaʻomia ona faalagolago Samasoni iā Ieova.

4. Na faapefea ona fesoasoani Ieova iā Samasoni ina ia saʻoloto mai i tagata Filisitia? (Faamasino 15:​14-16)

 ⁴ Seʻi mātau le faaaʻoaʻoga o le maufaatuatuaina e Samasoni o Ieova, ma le lagolagosua na saunia e le Atua. I se tasi taimi, na sauni ai se ʻautau a Filisitia e puʻe Samasoni i le vaipanoa o Leʻi i Iuta. O le fefefe o tane o Iuta na latou filifili ai e tuuina atu Samasoni i tagata Filisitia. O lea, na latou saisaia ai Samasoni i maea fou e lua ma tuuina atu o ia i o latou fili. (Faama. 15:​9-13) Peitaʻi, na ʻosofia Samasoni e le agaga o Ieova’ ma matala ese ai maea na saisai ai ona lima. Ona ia “maua lea o le ivi auvae fou o le asini poʻa,” ma fasiotia ai tagata e toʻa 1,000 o Filisitia.—Faitau le Faamasino 15:​14-16.

5. O le ā ua faailoa mai i le faaaogāina e Samasoni o le ivi auvae o se asini?

⁵ Aiseā na faaaogā ai e Samasoni le ivi auvae o se asini? O se auupega e lē masani ona faaaogā i taua. E mautinoa na iloa e Samasoni, o lona faalagolago iā Ieova na ia taulau ai ae e lē o le auupega na ia faaaogāina. Na faaaogā e lenei tane faatuatua le mea na ia maua e faataunuu ai le finagalo o Ieova. E manino mai, o le faalagolago o Samasoni iā Ieova na ia taulau manuia ai.

6. O le ā e tatou te aʻoaʻoina mai iā Samasoni i le faataunuuina o se tofiga?

⁶ E mafai foʻi ona fesoasoani mai Ieova e faataunuu o tatou tofiga, e tusa lava pe e foliga mai e lē mafai ona tatou faataunuuina. E mafai ona ia faia faapea atonu i ni auala e tatou te leʻi faatalitalia. E pei ona fesoasoani Ieova iā Samasoni, e tatou te maufaatuatuaina e na te faia foʻi faapea pe a tatou faalagolago iā te ia mo le fesoasoani.—Faata. 16:3.

7. O le ā se faaaʻoaʻoga e faamatilatila ai le tāua o le saʻili o le taʻitaʻiga a Ieova?

⁷ E faaalia e le toʻatele o uso ma tuafāfine le maufaatuatuaina o Ieova a o galulue i faugāfale. I le taimi muamua, e masani ona tusia e uso ata o le tele o Maota mo Sauniga fou ma isi fale ma latou fausiaina. Peitaʻi, ona o le faatuputupulaʻia o le faalapotopotoga a Ieova ua manaʻomia ai ona faia ni  suiga. Na saʻili uso taʻimua mo le taʻitaʻiga a Ieova, ma faataʻitaʻi nisi o auala fou e pei o le faatauina mai o fale ma toe faafou. Ua taʻua e Robert o lē na galue i le tele o faugāfale i le lalolagi aoao, “E leʻi faigofie i le taimi muamua ona faamasani i nei auala fou.” Na ia toe faapea mai, “E matuā telē le eseesega o nei faiga mai i le tele o tausaga ua teʻa. Peitaʻi, na lotomalilie uso e talia nei suiga ma o se faamaoniga e iloa ai na faamanuia e Ieova nei suiga.” O se tasi na o faataʻitaʻiga o le auala e taʻitaʻia ai e Ieova ona tagata ina ia faataunuu lona finagalo. E mai i lea taimi i lea taimi, e tāua ona tatou fesili ifo, ʻPo ou te saʻili le taʻitaʻiga a Ieova ma ou lotomalie e faia suiga ina ia ou auauna iā te ia?’

8. O le ā na faia e Samasoni ina ua ia lagona le matuā fia inu?

⁸ Atonu na e faitauina nisi o tala o mea mataʻina na faia e Samasoni. Na saeluaina e Samasoni le leona, ma fasiotia tagata e toʻa 30 o Filisitia i le aai o Asekelona e aunoa ma le fesoasoani a se tasi. (Faama. 14:​5, 6, 19) Na iloa e Samasoni e lē mafai ona ia faia na gaoioiga mataʻina pe ana leai le fesoasoani a Ieova. E faamaonia lenā manatu i le taimi na matuā lagona ai e Samasoni le fia inu, ina ua uma ona ia fasiotia tagata Filisitia e toʻa 1,000. O le ā na ia faia? Nai lo o le faalagolago i lona lava malosi e faamalie lona fia inu, ae na ia ōle atu iā Ieova mo le fesoasoani.—Faama. 15:18.

9. Na faapefea ona tali mai Ieova i le talosaga a Samasoni mo se fesoasoani? (Faamasino 15:19)

⁹ Na tali Ieova i le talosaga a Samasoni mo se fesoasoani e ala i le saunia faavavega o se vaipuna. Ina ua inu o ia, “ona toe foʻi atu ai lea o lona malosi ma ua toe ola ai.” (Faitau le Faamasino 15:19.) E foliga mai na iai pea lenā vaipuna mo le tele o tausaga mulimuli ane, i le taimi na faagaeeina ai le perofeta o Samuelu e tusia le tusi o Faamasino. Pe a vaaia e tagata Isaraelu lenei vaipuna, atonu e faamanatu atu ai iā i latou o le a saunia e Ieova le fesoasoani i le taimi e manaʻomia, pe a latou faalagolago iā te ia.

10. O le ā e aofia ai i le saʻilia o le fesoasoani a Ieova? (Tagaʻi foʻi i le ata.)

¹⁰ E manaʻomia foʻi ona tatou saʻili iā Ieova mo le fesoasoani, e tusa lava po o ā tatou taleni ma tomai po o mea ua tatou faataunuuina i le auaunaga. E tatau ona tatou talia ma le lotomaulalo, e pau le auala e tatou te taulau manuia ai o le faalagolago iā Ieova. E pei ona maua e Samasoni le malosi ina ua ia inu i le vai na saunia e Ieova, o le a tatou maua foʻi le malosi faaleagaga pe a tatou faaaogā sauniuniga uma a Ieova mo i tatou.—Mata. 11:28.

11. E faapefea ona tatou faalagolago atoatoa iā Ieova mo le fesoasoani, ma o le ā na faia e se tasi o ulugalii?

¹¹ Mātau le faaaʻoaʻoga a Aleksey o se tasi o o tatou uso i Rusia o loo fesagaʻia sauāga ogaoga. O le ā na fesoasoani iā te ia e onosaia ai tulaga e sili ona faigatā? Na faaauau ona la tausisi ma lana avā i se faasologa lelei faaleagaga. Na ia faapea mai: “Na ou taumafai pea e pipii i laʻu faasologa faaleagaga o le faia o aʻu lava suʻesuʻega ma le faitauina o le Tusi Paia i aso taʻitasi. O taeao uma e ma te talanoaina ai ma laʻu avā le mau o le aso ma tatalo iā Ieova.” O le ā ua tatou aʻoaʻoina mai i lenei faaaʻoaʻoga? Ia tatou faalagolago iā Ieova nai lo o le faalagolago i lo tatou lava malosi. E faapefea? Ia faamalosia lo tatou faatuatua, e ala i le faia o se faasologa lelei o le suʻesuʻeina o le Tusi Paia ma isi gaoioiga  faaleagaga. O le iʻuga, o le a matuā faamanuia e Ieova a tatou taumafaiga e auauna iā te ia. E pei ona faamalosia e Ieova Samasoni, e mautinoa foʻi o le a Ia faamalosia i tatou.

12. O le ā le vala e ese ai le faiā a Samasoni ma Talila mai i isi fafine Filisitia?

¹² O Samasoni o se tagata e lē lelei atoatoa e pei o i tatou, o lea na iai taimi na ia faia ai filifiliga lē lelei. O se tasi o na filifiliga na iʻu ai i iʻuga faanoanoa. Ina ua auauna Samasoni o se faamasino mo sina taimi, na ia ʻalofa ai i se fafine i le vanu o Soreka, o lona igoa o Talila.’ (Faama. 16:4) Ae e muamua atu i lenā, na faamau Samasoni ma se fafine Filisitia ona o se faatonuga “mai iā Ieova,” auā na Ia “saʻilia se avanoa e tau ai ma Filisitia.” Mulimuli ane, na nofo Samasoni i le fale o se fafine talitane i le aai o Kasa. O le avanoa lenā na faamalosia ai e le Atua Samasoni ina ia fafaʻi ese faitotoʻa o le pā o le aai, ma faavaivaia ai le aai. (Faama. 14:​1-4; 16:​1-3) Peitaʻi, e foliga mai o Talila o se tagata Isaraelu. O le faaipoipo atu la i ai o Samasoni, o le a lē maua ai se avanoa e tau ai ma tagata Filisitia e pei ona finagalo i ai Ieova.

13. O le ā na faia e Talila iā Samasoni?

¹³ Na talia e Talila se tupe telē mai i tagata Filisitia ina ia faalataina ai Samasoni. Po ua soona faatuatuaina e Samasoni Talila ma faatauasoina ai o ia ona o lona alofa iā te ia ma lē iloa ai le mea o le a faia e Talila? Po o le ā lava le māfuaaga, ae na faatauanau atu pea Talila iā Samasoni e faailoa atu le māfuaaga o lona malosi ma na iʻu ai i lona faia faapea. E faanoanoa ona o le filifiliga na faia e Samasoni, na alu ese ai lona malosi ma lē  maua ai le finagalo malie o Ieova mo se taimi.—Faama. 16:​16-20.

14. O le ā na tofo i ai Samasoni ona o lona faatuatuaina o Talila?

¹⁴ Na tofo Samasoni i tigā ona o lona faatuatuaina o Talila nai lo o Ieova. Na puʻea Samasoni e tagata Filisitia ma faatauasoina o ia. Na faafalepuipuiina o ia i Kasa e tagata na ia faalumaina i le taimi ua teʻa, ma avea o ia ma sē e faatauvaa e oloina saito. Mulimuli ane, na faalumaina o ia i se fiafia na faia e tagata Filisitia. Na latou ofoina atu se taulaga tele i lo latou atua faapaupau o Takono, ona na latou manatu o Takono lea ua tuuina mai Samasoni i o latou lima. Ua latou aumaia Samasoni i la latou fiafia ina ia fai ma mea e “toē i ai.”—Faama. 16:​21-25.

15. Na faapefea ona faaalia e Samasoni na ia faalagolago pea iā Ieova? (Faamasino 16:​28-30) (Tagaʻi i le ata i le faavaa.)

¹⁵ E ui i le matuiā o le mea sesē na faia e Samasoni, ae e leʻi faavaivai ai. Na ia saʻili se avanoa e faataunuu ai lona tofiga mai i le Atua, o le faasagatau i tagata Filisitia. (Faitau le Faamasino 16:​28-30.) Na ʻaiʻoi atu Samasoni iā Ieova: “Seʻi oʻu tauimasui i tagata Filisitia.” Na tali e le Atua moni le ʻaiʻoiga a Samasoni ma toe faafoʻisia lona malosi uigaese. E sili atu ona toʻatele tagata Filisitia na fasiotia e Samasoni i lenā taimi nai lo o se isi lava taimi.

16. O le ā e tatou te aʻoaʻoina mai i le mea sesē na faia e Samasoni?

¹⁶ E ui na tofo Samasoni i āuga tigā o lana mea sesē, ae na ia taumafai pea e faia le finagalo o Ieova. E tusa pe e tatou te faia se mea sesē ma faasaʻo i tatou pe aveese se faaeaga, aua neʻi o tatou faavaivai. Ia manatua, e nofosauni Ieova e faamagalo i tatou. (Sala. 103:​8-10) E ui i a tatou mea sesē, ae e mafai ona faaaogā pea i tatou e Ieova e pei ona ia faia iā Samasoni.

17-18. O le ā se manatu faalaeiau e te aʻoaʻoina mai i le faaaʻoaʻoga a Michael? (Tagaʻi foʻi i le ata.)

¹⁷ Seʻi mātau le faaaʻoaʻoga a se uso talavou e igoa iā Michael. Na pisi o ia i mea faaleagaga i le avea o se auauna o le faiva ma se paeonia sauatoa. Peitaʻi, na ia faia se mea sesē ma aveesea ai ona faaeaga i le faapotopotoga. Na ia faapea mai, “O le taimi lenā na matuā ou pisi ai lava i le auaunaga iā Ieova, ae na faafuaseʻi lava ona aveese oʻu faaeaga. Na ou mautinoa e lē mafai ona tuulafoaʻia  aʻu e Ieova, ae na ou taumānatu po o le a toe faaleleia le ma faiā, ma pe e mafai ona ou toe auauna atoatoa iā te ia e pei o le taimi muamua.”

¹⁸ O le mea e faafetai ai, e leʻi faavaivai Michael. Na ia toe faapea mai: “Na ou uaʻi i le toe faaleleia o le ma faiā ma Ieova e ala i le tatalo e lē aunoa, suʻesuʻe ma manatunatu loloto.” Mulimuli ane na toe maua faaeaga o Michael i le faapotopotoga, ma ua auauna nei o ia o se toeaina ma o se paeonia sauatoa. Na ia faapea mai: “O le lagolagosua ma faalaeiauga na ou maua aemaise lava mai i toeaina, na fesoasoani iā te aʻu e iloa ai o loo alofa pea Ieova iā te aʻu. Ua mafai nei ona ou toe auauna i le faapotopotoga ma se lotofuatiaifo mamā. Ua ou aʻoaʻoina mai i le mea na tupu iā te aʻu, e faamagalo e Ieova so o se tasi e salamō moni.” E tusa pe na tatou faia ni mea sesē, ae e mafai ona tatou mautinoa o le a faaaogā ma faamanuia foʻi i tatou e Ieova, pe a faia taumafaiga uma e faasaʻo o tatou ala ma faalagolago pea iā te ia.—Sala. 86:5; Faata. 28:13.

19. E faapefea ona faamalosia oe i le faaaʻoaʻoga a Samasoni?

¹⁹ Na tatou talanoaina i lenei mataupu nisi o mea mataʻina i le olaga o Samasoni. E ui e lē lelei atoatoa Samasoni, ae e leʻi faavaivai o ia i ana taumafaiga e auauna iā Ieova e oo lava i le taimi ina ua uma ona ia faia se filifiliga sesē, o le faatuatuaina o Talila. Na faamagalo e Ieova Samasoni ma toe faaaogā o ia i se auala mataʻina. Na silasila pea Ieova iā te ia o se tane na matuā malosi lona faatuatua, ma faaaofia o ia i le lisi o auauna faamaoni o loo i le Eperu mataupu e 11. Maʻeu le faalaeiauina o i tatou i le iloaina, o loo tatou auauna i se Tamā alofa i le lagi o lē e naunau e faamalosia i tatou, aemaise lava i taimi e tatou te vaivai ai! O lea i le pei o Samasoni, ia tatou ʻaiʻoi atu iā Ieova: “Faamolemole ia e manatua mai aʻu, ma ia e faamalosia aʻu.”—Faama. 16:28.