1-2. Aiseā e fiafia ai auauna a le Atua? (Iakopo 1:​22-25)

 E FINAGALO Ieova ma lona Alo pele ia tatou fiafia. Ua faapea mai le tusitala o le Salamo 119:2: “E fiafia i latou o ē e tausi i ana faamanatuga, o ē e saʻili atu iā te ia ma o latou lotoatoa.” Na faamautinoa atili e Iesu lenā manatu i lona faapea mai: “Amuia i latou e faalogo i le afioga a le Atua ma tausi i ai!”—Luka 11:28.

² O tagata tapuaʻi o Ieova o ni tagata fiafia. Aiseā? E tele māfuaaga, ae o se tasi o māfuaaga tāua, ona e tatou te faitauina e lē aunoa le Afioga a le Atua ma taumafai e faatatauina mea ua tatou aʻoaʻoina.—Faitau le Iakopo 1:​22-25.

3. O ā aogā e tatou te maua pe a faatatauina mea e tatou te faitauina i le Afioga a le Atua?

³ E tele aogā e tatou te maua i le avea ai ma ē e “usiusitaʻi i le upu.” O se faaaʻoaʻoga, o se tasi lea o auala tāua e tatou te faafiafiaina ai le finagalo o Ieova, ma e mautinoa e tatou te maua ai le fiafia. (Fai. 12:13) A o faatatauina mea ua tatou faitauina i le Afioga paia a le Atua, e mafai ona faaleleia ai faiā i totonu o aiga, ma faamalosia ai faauōga ma uso ma tuafāfine. Atonu ua tupu lenā mea iā te oe. E lē gata i lea, e tatou te ʻalofia ai le tele o faafitauli e feagai ma i latou e lē mulimuli i taʻiala a Ieova. O le mea moni, e tatou te ioe i upu a le tupu o Tavita. Ina ua uma ona ia taʻua tulafono, faatonuga, ma faamasinoga a Ieova, na ia faapea atu: “E tele foʻi le taui pe a tausi i ai.”—Sala. 19:​7-11.

4. Aiseā e lē faigofie ai le avea ma ē e usiusitaʻi i le Afioga a le Atua?

 ⁴ O le mea moni, e lē faigofie i taimi uma le avea ma ē e usiusitaʻi i le Afioga a le Atua. E ui i le pisi o a tatou faasologa, ae e tatau ona faatulaga se taimi e faitau ma suʻesuʻe ai le Tusi Paia, ina ia tatou malamalama ai i mea o loo faafinagaloina e Ieova. Seʻi o tatou iloiloina fautuaga o le a fesoasoani iā i tatou e faitauina ai e lē aunoa le Tusi Paia. O le a tatou iloiloina foʻi vala e fesoasoani iā i tatou e manatunatu ai i mea o loo faitauina, ma auala e mafai ona faatatauina ai i o tatou olaga.

IA FAATULAGA SE TAIMI E FAITAU AI LE TUSI PAIA

5. O ā tiute tauave e alu uma ai le tele o lo tatou taimi?

⁵ O le toʻatele o auauna a Ieova e matuā pisi lava. E tatou te faaalu le tele o le taimi e faataunuu ai tiute tauave tāua o loo faamatalaina i le Tusi Paia. O se faataʻitaʻiga, o le toʻatele o i tatou e faigaluega totogi ina ia tausia ai i tatou lava ma o tatou aiga. (1 Timo. 5:8) O le toʻatele o uso ma tuafāfine e tausia o latou tauaiga e mamaʻi pe matutua. Ae o i tatou uma lava, e manaʻomia ona tausia o tatou lava soifua mālōlōina ma e tele le taimi e alu ai. E lē gata i lea, e iai foʻi o tatou tiute tauave i le faapotopotoga. O se tasi o o tatou tiute tauave tāua, o le faia lea o se sao maelega i le galuega talaʻi. E ui i le tele o o tatou tiute tauave, ae e faapefea la ona tatou faatulaga se taimi e faitau ai e lē aunoa le Tusi Paia, manatunatu loloto i ai, ma faatatauina?

6. E faapefea ona e faamautinoa e te faitauina le Tusi Paia? (Tagaʻi foʻi i le ata.)

⁶ O le faitauina o le Tusi Paia, o se tasi “o mea e sili ona tāua” mo se Kerisiano, ma e manaʻomia ona faamuamua. (Fili. 1:10) Ua faapea mai le Salamo 1:​1, 2 e faatatau i se tagata e fiafia: “E naunau o ia i le tulafono a Ieova, e faitau lē leoa o ia i Lana tulafono i le ao ma le pō.” E manino mai, e manaʻomia ona faatulaga se taimi e faitauina ai le Tusi Paia. O le ā le taimi e sili ona lelei e faitau ai le Tusi Paia? Atonu e eseese uma a tatou tali, ae o le mea tāua, o le filifili lea o se taimi e  mafai ai ona e faitauina e lē aunoa le Tusi Paia. Ua faapea mai se uso e igoa iā Victor: “Ou te fiafia e faitau le Tusi Paia i taeao. E ui lava ou te lē fiafia e vave ala i taeao, ae o le taimi lelei lenā auā e lē tele ni mea e tosina ese ai. O loo ala loʻu mafaufau ma faigofie ona ou uaʻi i laʻu faitauga Tusi Paia.” Pe afai o le mea lenā o loo tupu iā te oe, ia fesili ifo: ʻO le ā le taimi e sili ona lelei mo aʻu e faitau ai le Tusi Paia?’

IA MANATUNATU I MEA UA E FAITAUINA

7-8. O le ā e ono taofia ai i tatou mai i le mauaina atoatoa o aogā mai i mea e tatou te faitauina? Ia faataʻitaʻi.

⁷ E ui lava e tatou te faitau e lē aunoa i se mea, ae o le mea moni e tatou te lē o manatunatu loloto i ai. Pe na iai se taimi na e faitau ai i se tusi ae mulimuli ane e te lē o manatua mea na e faitauina? O i tatou uma lava e mafai ona tupu ai lenā mea, ae o le mea e faanoanoa ai, e mafai foʻi ona tupu pe a tatou faitauina le Tusi Paia. Atonu o lo tatou sini o le faitauina o ni mataupu o le Tusi Paia i aso taʻitasi, ma e faamālō atu ai i na taumafaiga. E tatau ona tatou faataatia ni sini ma taumafai malosi e pipii i ai. (1 Kori. 9:26) O le faitauina o le Tusi Paia o se amataga lelei, ae ua na o se amataga. Ina ia maua atoatoa aogā mai i le faitauina o le Tusi Paia, e iai isi mea e manaʻomia ona tatou faia.

⁸ Seʻi mafaufau i le faataʻitaʻiga lenei: E manaʻomia e laau le timu ina ia ola ai. Ae pe a mamafa timuga i se taimi puupuu, o le a lolovaia le laueleele ma o le a leai se aogā mo laau. E manaʻomia e le palapala se taimi e mitiia ai le timu na paʻū, ma o le a fesoasoani i le ola aʻe o laau. I se tulaga talitutusa, e lē tatau ona faatopelau le faitauina o le Tusi Paia auā o le a leai ai se taimi e tatou te manatunatu loloto, manatua, ma faatatauina mea na tatou faitauina.—Iako. 1:24.

9. O le ā e tatau ona tatou faia pe afai o la tatou masaniga o le faatopelau ona faitauina o le Tusi Paia?

⁹ Pe na iai se taimi na faatopelau ai ona e faitauina le Tusi Paia? O le ā e tatau ona e faia? Ia faitau i se auala e mafai ai ona e manatunatu i mea o loo e faitauina, po o mea ua  uma ona e faitauina. E lē tatau ona e manatu i ai o se mea e faigatā ona fai. Atonu e te filifili e faatele se taimi e faitau ai le Tusi Paia, ina ia mafai ai ona e manatunatu loloto i mea ua e faitauina. Pe atonu foʻi e te filifili e faitau na o ni nai fuaiupu, ae faaaogā le taimi o loo totoe e manatunatu loloto ai. Ua faapea mai Victor lea na taʻua muamua: “E pupuu lava aʻu faitauga Tusi Paia, atonu e tasi lava se mataupu e faitau. Talu ai ou te faitauina le Tusi Paia i taeao, e mafai la ona ou manatunatu loloto i mea na ou faitauina a o faagasolo le aso.” Po o le ā lava le auala e te faaaogāina, e tāua ona e faitau i se auala e mafai ona e maua ai le tele o manatu aogā.—Sala. 119:97; tagaʻi i le pusa “ Fesili e Manatunatu Loloto i Ai.”

10. Ia faataʻitaʻi le auala e te ono faatatauina ai mea ua e aʻoaʻoina. (1 Tesalonia 5:​17, 18)

¹⁰ Po o le ā lava le taimi ma le tele e te faitauina ai le Tusi Paia, ia mafaufau po o ā auala e te faatatauina ai mea ua e faitauina. A o e faitauina se vaega o le Tusi Paia, ia fesili ifo, ʻE faapefea ona ou faatatauina nei manatu i le taimi lenei po o le lumanaʻi?’ O se faaaʻoaʻoga, seʻi faapea o lea ua oo lau faitauga Tusi Paia i le 1 Tesalonia 5:​17, 18. (Faitau.) Pe a māeʻa ona e faitauina na fuaiupu, e mafai ona e mafaufau po o le ā le tele ma le loloto o au tatalo. E mafai foʻi ona e mafaufau i mea e te lotofaafetai ai. Atonu e iai ni mea patino se tolu e te faafetai atu ai iā Ieova. O le faaalu o sina taimi e uaʻi totoʻa atu ai i na manatu, o le a fesoasoani iā te oe e avea ai o sē e faalogo ma usiusitaʻi i le Afioga a le Atua. Seʻi manatunatu i aogā o le faia e lē aunoa o na mea i aso taʻitasi, a o faitauina isi vaega o le Tusi Paia. O le faia faapea, o le a atili ai ona fesoasoani iā te oe e avea ma sē e usiusitaʻi i le Afioga a le Atua. Ae e faapefea pe afai e tele mea e manaʻomia ona e galue e faaleleia?

IA FAASOLOSOLO ONA FAATATAUINA MEA UA E FAITAUINA

11. Aiseā e tatou te ono lagona ai le lotovaivai i nisi taimi pe a faitauina le Tusi Paia? Aumai se faataʻitaʻiga.

¹¹ A o e faitauina le Tusi Paia, atonu e iai taimi e te ono lagona ai le lotovaivai ona ua e iloa e tele mea e manaʻomia ona faaleleia. O se faataʻitaʻiga, seʻi faapea ua oo lau faitauga Tusi Paia i fautuaga e ʻalofia ai le faailoga tagata. (Iako. 2:​1-8) Ua e iloa ai e manaʻomia ona faaleleia le auala e feutagaʻi ai ma isi, ma ua e filifili e faia ni suiga. Malo lava! I le aso e sosoo ai, ua e faitau i se vaega o loo faamatilatila ai le tāua o le pulea o le auala e tautala ai. (Iako. 3:​1-12) Ua e tomānatu, na iai taimi na e faia ai ni faamatalaga  e lē logolelei. O lea, ua e taumafai malosi e faia ni tala e atiaʻe ai. I le aso e sosoo ai, ua oo lau faitauga Tusi Paia i se lapataʻiga e faatatau i le faauō atu i le lalolagi. (Iako. 4:​4-12) Ua e mātauina foʻi, e manaʻomia ona filifili lelei mea e te faitau, matamata, ma faalogologo i ai. Ae i le aso e sosoo ai, atonu ua e lagona ua faigatā tele ona e faia nei suiga e tele.

12. Aiseā e lē tatau ai ona e lotovaivai pe afai e te iloa mai i lau faitauga Tusi Paia e manaʻomia ona e faia ni suiga? (Tagaʻi foʻi i le faamatalaga pito i lalo.)

¹² Aua le lotovaivai pe afai e manaʻomia ona faia ni suiga ma faaleleiga. O se faamaoniga lenā e iloa ai e lelei faanaunauga o lou loto. O le lotomaulalo, o le a faia ai e se tasi se iloiloga faamaoni o ia lava a o faitauina le Tusi Paia, ma iloa ai mea e manaʻomia ona faaleleia. a Ia manatua foʻi, o le ofuina o “le tagata fou” o se gaoioiga e faifai pea. (Kolo. 3:10) O le ā o le a fesoasoani iā te oe e avea ai pea ma sē e usiusitaʻi i le Afioga a le Atua?

13. O le ā se auala e mafai ona e faatatauina ai vala ua e aʻoaʻoina? (Tagaʻi foʻi i le ata.)

¹³ Nai lo o le taumafai e faatatauina mea uma ua e faitauina i le taimi e tasi, ia faasolosolo ona e faatatauina na manatu taʻitasi. (Faata. 11:2) E te ono faataʻitaʻia le auala lenei: Ia fai se lisi o mea e manaʻomia ona e galue i ai, ona e filifili lea po o fea o na mea o le a e galue muamua ai, ma i se taimi mulimuli ane ona e galue lea e faaleleia isi mea o loo i le lisi. O lē fea o na mea o le a e amata ai?

14. O le ā se vala e mafai ona amata ona e galue i ai?

¹⁴ Atonu e te amata i se vala e faigofie ona e faaleleia, pe atonu foʻi e te filifili e galue i se vala o loo matuā manaʻomia ona faaleleia. Afai ua e mautinoa i le vala o le a e galue i ai, ia faia ni saʻiliʻiliga i lomiga pe e te ono faaaogā le Tusi Taʻiala mo Saʻiliʻiliga a Molimau a  Ieova. Ia tatalo iā Ieova mo lana fesoasoani e faaleleia le vala o loo e galue i ai, ma ia talosaga atu mo ʻle faanaunauga faapea le malosi e galue ai.’ (Fili. 2:13) Ona taumafai lea e faatatauina na vala. Pe a faaleleia le vala muamua, o le a uunaʻia ai foʻi oe e galue e faaleleia isi vala. O le mea moni, pe a faaleleia se tasi o vala o le olaga o se Kerisiano po o se uiga faa-Kerisiano, o le a faigofie foʻi ona e faaleleia isi vala.

IA FAATAGA LE AFIOGA A LE ATUA E ʻGALUE IĀ TE OUTOU’

15. O le ā le eseesega o tagata o Ieova ma le toʻatele o isi o loo faitauina le Tusi Paia? (1 Tesalonia 2:13)

¹⁵ E toʻatele tagata ua faapea mai, e tele taimi ua latou faitauina ai le Tusi Paia. Ae pe e moni e latou te talitonu i le Tusi Paia? Po ua latou faatatauina aʻoaʻoga a le Tusi Paia ma faia suiga manaʻomia i o latou olaga? O le mea e faanoanoa ai, o le tele o taimi e lē faia ai faapea e tagata. Peitaʻi, e telē se eseesega ma tagata o Ieova. I le pei o Kerisiano i le uluaʻi senituri, ua tatou ʻtalia le Tusi Paia, o le afioga a le Atua.’ Ua tatou maumauaʻi e ola e ōgatusa ma tapulaa a le Tusi Paia.—Faitau le 1 Tesalonia 2:13.

16. O le ā e fesoasoani iā i tatou e avea ai o ni ē e usiusitaʻi i le Afioga a le Atua?

¹⁶ E lē faigofie i taimi uma le faitauina ma le faatatauina o le Afioga a le Atua. Atonu e faigatā ona maua se taimi e faitau ai. Pe atonu e faatopelau ona tatou faitauina le Tusi Paia, ma ua lē tele manatu aogā e tatou te maua ai. E tatou te ono lagona foʻi le lotovaivai pe afai e tele vala e manaʻomia ona faaleleia. E tusa lava po o ā luʻi e te fesagaʻia, e mafai lava ona e manumalo mai ai ona o le fesoasoani a Ieova. Ia tatou naunau e talia lana fesoasoani ma avea o ni ē e usiusitaʻi i le Afioga a le Atua, ae ʻalofia le avea o ni ē e faalogologo ma faagalogalo. O le mea moni, o le tele e tatou te faitau ai le Afioga a le Atua ma faatatauina i o tatou olaga, o le tele foʻi lenā o lo tatou fiafia.—Iako. 1:25.