Na ou fanau i le 1934 i ni mātua na siitia mai i Suisilani ma na nonofo i Timmins, o se aai e iai maina e eli ai le koale i Ontario i Kanata. I le pe tusa o le 1939, na amata ai ona faitau loʻu tinā i mekasini o le Watchtower, ma auai i sauniga a Molimau a Ieova. E masani ona alu ma ave aʻu ma nai oʻu tei e toʻaono. E leʻi umi ae avea o ia ma Molimau a Ieova.

E leʻi fiafia loʻu tamā i le filifiliga a loʻu tinā, ae na naunau loʻu tinā i le upu moni ma na maumauaʻi e pipii pea i ai. Na faaauau ona ia faia faapea, e ui lava na faasā le galuega a Molimau a Ieova i Kanata i le tau amatamataga o le vaitausaga o le 1940. Na faaalia pea e loʻu tinā le agalelei ma le faaaloalo i loʻu tamā, e ui i ana faamatalaga faatigā iā te ia. O lana faaaʻoaʻoga lelei, na fesoasoani iā te aʻu ma oʻu tei e talia ai le upu moni. Na matou fiafia, talu ai a o faagasolo taimi na suia uiga o lo matou tamā, ma na faaleleia le auala e feutagaʻi ai ma i matou.

Iā Aokuso i le 1950, na ou auai ai i le fonotaga o le Theocracy’s Increase i le aai o Niu Ioka. Na matuā uunaʻia aʻu e faatele soʻu sao i le auaunaga iā Ieova, ina ua ou feiloaʻi i uso ma tuafāfine mai i so o se vaipanoa o le lalolagi, ma faalogologo i faatalanoaga faalaeiau a i latou na faauu mai i le Aʻoga o Kiliata. Na atili ai ona ou maumauaʻi e auai i le auaunaga faataimi atoa. O lea, ina ua ou toe foʻi i lo matou aiga, na faatumu ai loa laʻu talosaga e fia avea ma paeonia sauatoa. Peitaʻi, na tusi mai le ofisa o le lālā i Kanata, e manaʻomia ona ou papatiso muamua. O lea na ou papatiso ai loa iā Oketopa 1 i le 1950. Ina ua mavae le masina, na avea ai loa aʻu ma paeonia sauatoa, ma o loʻu tofiga muamua o Kapuskasing. E matuā mamao lava lenei aai mai i le mea na iai lo matou aiga.

 I le tau e totogo ai mea i le 1951, na valaaulia ai e le ofisa o le lālā Molimau a Ieova e mafai ona tautatala i le gagana Falani, ia siitia atu i le itumalo o Quebec o loo toʻatele ai tagata e tautatala i lenā gagana. Na telē le manaʻoga i inā. Ona e lua gagana ou te tautala ai, o le gagana Falani ma le faa-Peretania, o lea, na ou talia ai le valaaulia ma tofia loa aʻu e galue i Rouyn. E leai se tasi i inā ou te masani ai, e pau le mea na ou maua e na o le tuatusi lea na ou taʻua muamua. E ui i lenā, na sologa lelei le tulaga o mea. Na avea i maʻua ma Marcel o ni uō lelei, ma na ou olioli i loʻu faaeaga i Quebec mo le isi fā tausaga na sosoo ai. Mulimuli ane, na avea aʻu ma paeonia faapito.

A o oʻu iai i Quebec, na ou matuā fiafia ina ua valaaulia aʻu e auai i le vasega lona 26 o le Aʻoga o Kiliata i South Lansing, i Niu Ioka. Na faia la matou faauuga iā Fepuari 12 i le 1956, ma na tofia aʻu e galue i le vaipanoa ua taʻua nei o Ghana b i Aferika i Sisifo. Peitaʻi, na manaʻomia ona ou toe foʻi muamua i Kanata mo “ni nai vaiaso,” ina ia faamautū lelei aʻu pepa malaga.

E uma ane ua fitu masina o oʻu faatali i Toronto mo aʻu pepa malaga. I lenā taimi atoa sa ou nofo i le aiga o Cripps. Mulimuli ane ma masani ma le la tama teine o Sheila ma amata ai le ma faigāuō. A o oʻu sauni e fesili iā Sheila pe e ma te faaipoipo, ae maua mai loa ma loʻu visa. O lea na ma tatalo faatasi ai, ma filifili e tatau ona ou alu i loʻu tofiga. Ae na ma fetusiaʻi pea e iloa ai se taimi talafeagai e ma te faaipoipo ai. E leʻi faigofie lenā filifiliga, ae na ma iloa mulimuli ane na saʻo le filifiliga na ma faia.

Na atoa le masina o oʻu faimalaga i nofoaafi, vaa laʻuoloa, ma vaalele, faatoʻā ou taunuu i Accra i Ghana. Na tofia aʻu e galue o se ovasia o le itumalo. Na aofia ai le malaga atu i vaipanoa uma o Ghana faapea lona tuaoi o Ivory Coast (lea ua taʻua nei o Côte d’Ivoire) ma Togoland (lea ua taʻua nei o Togo). Na ou faaaogāina  le taavale a le lālā, ma o le tele o taimi na ou alu ai na o aʻu. Na ou matuā fiafia lava pe a ou asiasi i uso.

I faaiʻuga o vaiaso taʻitasi, na fai ai oʻu faaeaga i fonotaga matagaluega. Talu ai e leʻi iai ni Maota mo Fonotaga, o lea, na fausia ai e uso se fale e faaaogā ai ofe e fai ai pou ae ato i launiu, ina ia malu ai mai i le aasa o le lā. E leʻi iai foʻi ni pusa aisa e tuu ai meaʻai. O lea, na avatu ai manu ola, ae na faatoʻā tapē lava i le taimi e fai ai meaʻai mo ē na auai i le fonotaga.

E iai ni mea mālie na tutupu i taimi o na fonotaga. A o fai le lauga a Herb Jennings, c o se uso misionare, ae alu ane loa ma se povi i luma o le pulelaa. Na taofi le lauga a Herb, ma ua tū le povi ua lē iloa le mea e alu i ai. Na toē le aofia ina ua ō atu ni uso malolosi e toʻafā e puʻe le povi ma ave i tua.

I aso o le vaiaso, na faaali ai le ata The New World Society in Action i nuu na latalata ane. Ina ia faaali le ata, na faaaogā se ʻie paʻepaʻe na faatautau i le vā o ni laau se lua. Na matuā fiafia tagata o le nuu, ona o le taimi muamua lea ua latou matamata ai i se ata tifaga. Na latou patipati ma le fiafia a o faaalia i le ata ni vaaiga o nisi o loo papatisoina. Na telē se aogā o lenā ata i ē na matamata ai, e iloa ai e autasi Molimau a Ieova po o fea lava le vaega o le lalolagi e iai.

Ina ua mavae tausaga e lua talu ona ou iai i Aferika, na ou tulimataʻia le avanoa e auai ai i le tauaofiaga faavaomalo i le 1958 sa faia i le aai o Niu Ioka. Na ou matuā fiafia lava ina ua ma toe feiloaʻi ma Sheila. Na ia malaga mai i Quebec, lea na auauna ai o se paeonia faapito. E ui na ma fetusiaʻi, ae ona o lea ua ma toe feiloaʻi, na ou fesili ai loa pe e ma te faaipoipo ma na ia tali mai ioe. Na ou tusi atu i le uso o Knorr d pe e mafai ona auai Sheila i le Aʻoga o Kiliata, ma mulimuli ane ma galulue faatasi i Aferika. Na ia tali mai, e mafai. Na taunuu Sheila i Ghana, ma na ma faaipoipo i Accra, iā Oketopa 3 i le 1959. Na ma tofo i le faamanuia a Ieova ona o le faamuamua o ia i o ma olaga.

I le 1961, na tofia i maʻua e galulue i Cameroon. Na ou matuā pisi lava ina ua talosaga mai  uso pe e mafai ona ou fesoasoani i le faatūina o le ofisa fou o le lālā. Na tele mea na tatau ona ou aʻoaʻoina i le avea ai o se uso e vaaia le lālā. I le 1965, na tō ai Sheila. O le mea moni e leʻi faigofie mo i maʻua le faaata le avea ai o ni mātua. A o sauniuni atu o ma mafaufau ma loto i le avea ma mātua ma tapena le ma malaga e toe foʻi i Kanata, ae tulaʻi mai loa se tulaga na ma matuā mafatia ai.

Na fafano le maʻitaga o Sheila, ma na faailoa mai e le fomaʻi o le ma pepe lea na fafano o le tama. Ua silia i le 50 tausaga talu ona tupu lenā mea, ae e lē taitai galo iā i maʻua. E ui na ma matuā mafatia i le mea na tupu, ae na ma galulue pea i lo ma faaeaga lea na matuā pele iā i maʻua.

Na masani ona feagai uso i Cameroon ma sauāga ona e leʻi faia sa latou vaega i mataupu faapolotiki. Na matuā faigatā le tulaga o mea i taimi o faigāpalota e iloa ai po o ai o le a avea ma peresitene. Iā Me 13 i le 1970, na tupu ai se mea e matou te leʻi faatalitalia, o le faasā lea o le galuega a Molimau a Ieova. Na ave faamalosi e le malo le lālā fou lea faatoʻā lima masina talu ona faaaogā. E leʻi atoa se vaiaso ae tuliesea misionare uma mai i le atunuu, e aofia ai i maʻua ma Sheila. Na faigatā ona ma tuua le ʻauuso ona e ma te alolofa tele iā i latou, ma na ma popole foʻi po o le ā o le a tupu iā i latou.

I le ono masina na sosoo ai, na ma auauna ai i le ofisa o le lālā i Falani. O i inā na ou faia ai le mea e gata ai le mafai, e fesoasoani ai pea i uso i Cameroon. Iā Tesema i lenā lava tausaga, na tofia ai i maʻua i le lālā i Nigeria lea na vaavaaia le galuega i Cameroon. Na faafeiloaʻi ma le māfana i maʻua e uso ma tuafāfine i Nigeria, ma na ma auauna i inā mo le tele o tausaga.

I le 1973, na ma faia ai se filifiliga e matuā faigatā. Na feagai Sheila ma le tele o faafitauli tugā i le soifua mālōlōina. A o ma auai i se tauaofiaga i Niu Ioka, na tagi o ia ma faapea mai: “Ua leai soʻu malosi e toe faaauau ai i le auaunaga. Ua ou lē lavā ma maʻi i le tele o taimi.” I lenā taimi, ua silia ma le 14 tausaga o ma auauna faatasi i Aferika i Sisifo. Na ou matuā talisapaia lana auaunaga faamaoni, ae na manaʻomia ona ma faia ni suiga. Ina ua uma ona ma talanoa ma tatalo faatauanau i lea mataupu, na ma filifili ai loa e toe foʻi i Kanata ina ia maua ai e Sheila togafitiga mo lona maʻi. O le tuua o lo ma tofiga o ni misionare ma le auaunaga faataimi atoa, o ni filifiliga e sili ona faigatā na ma faia ma na matuā ootia ai o ma loto.

Ina ua ma taunuu i Kanata, na maua saʻu galuega i se kamupani a saʻu uō lelei lea e faatau ai taavale, i se aai i le itu i mātū o Toronto. Na ma mautotogi i se fale, faaaogā meafale na iai, ma o le faia faapea na leai ai ni a ma aitalafu. Na ma mananaʻo e faafaigofie o ma olaga, ma faamoemoe atonu o le a iai se taimi o le a ma toe auai ai i le auaunaga faataimi atoa. Na matuā faafiafiaina i maʻua ina ua vave ona taunuu lenā mea, nai lo o le mea na ma faatalitalia.

 Na amata ona ou tauofo e galue i Aso Toonaʻi i le fausiaina o se Maota mo Fonotaga i Norval i Ontario. E leʻi umi ae tofia aʻu e avea ma ovasia o le Maota mo Fonotaga. Na faasolosolo ona toe malosi Sheila, ma na ma manatu ai ua mafai ona ia galue i lenei faaeaga. O lea, iā Iuni i le 1974, na ma ō ai e nonofo i le fale e pipii i le Maota mo Fonotaga. Na ma matuā fiafia lava ina ua ma toe auai i le auaunaga faataimi atoa.

O le mea e faafetai ai ona na faasolo lava ina toe malosi Sheila. I le lua tausaga mulimuli ane ai, na ma taliaina se tofiga e galulue i le galuega femalagaaʻi. O le matagaluega na ma galulue ai o Manitoba, o se itumalo i Kanata e lauiloa i le maʻatiʻati o le mālūlū. E ui i lea, o la matou mafutaga ma le ʻauuso i inā, na ma lagona ai le māfana ma le alofagia o i maʻua. Na ma iloa ai e lē tāua le mea o loo tatou auauna ai, ae o le mea e tāua, o le auauna pea iā Ieova po o fea lava e tatou te iai.

Ina ua mavae le tele o tausaga talu ona ma iai i le galuega femalagaaʻi, na valaaulia i maʻua e auauna i le Peteli i Kanata i le 1978. E leʻi umi, ae tupu se mea na ou aʻoaʻoina ai se lesona tāua e ui lava na tigā. Na tofia aʻu e faia se lauga e tasi ma le ʻafa itula le umi i le gagana Falani, i se faatasiga faapitoa i Montreal. O le mea e faanoanoa ai, na faigatā i le aofia ona uaʻi mai i laʻu lauga, ma na fautuaina ai aʻu e se uso mai i le Matagaluega o le Auaunaga. O le mea moni, sa tatau ona ou iloaina i lenā taimi e lē o aʻu o se failauga tomai, ae na faigatā ona ou taliaina lana fautuaga. E leʻi iʻu lelei la ma talanoaga, ma na ou manatu ua soona faitio le uso nai lo o le faamālō mai i laʻu lauga. Na sesē laʻu gaoioiga na fai ona na ou fesiligia le auala na aumai ai le fautuaga, ma sesē laʻu vaaiga i le tagata na aumaia le fautuaga.

I nai aso mulimuli ane ai, na talanoa mai ai se sui o le Komiti o le Lālā iā te aʻu e faatatau i le mea na tupu. Na ou taʻutino atu e leʻi lelei le auala na ou tali atu ai i le fautuaga na aumai, ma na ou faatoese atu foʻi. Ina ua uma lenā, na ou talanoa i le uso na aumaia le fautuaga ma na ia faamagaloina aʻu. O lenā mea na tupu, na ou aʻoaʻoina ai se lesona i le tāua o le faaalia o le lotomaulalo, ma e lē mafai ona galo iā te aʻu. (Faata. 16:18) E tele taimi na ou tatalo ai iā Ieova e faatatau i lenei mataupu, ma ua ou maumauaʻi ia saʻo pea laʻu vaai i fautuaga ou te mauaina.

Ua silia ma le 40 tausaga o oʻu auauna pea i le Peteli i Kanata, ma e talu mai le 1985, na ou maua ai le faaeaga e auauna o se sui o le Komiti o le Lālā. Iā Fepuari i le 2021, na maliu ai si aʻu avā pele o Sheila. E lē gata o loo oʻu mafatia pea ona o le maliu o si aʻu avā, ae o loo oʻu feagai foʻi ma faafitauli tau i le soifua mālōlōina. Peitaʻi, ou te maua pea le fiafia ona o loʻu pisi pea i le auaunaga iā Ieova, ma ʻe seāseā ona ou mātauina ai le gasologa o aso.’ (Fai. 5:20) E ui lava i le tele o luʻi na ou fesagaʻia, ae e lē mafaatusalia i le tele o mea ua ou maua ai le fiafia. Ua matuā tauia loʻu olaga ona o le faamuamua o Ieova, ma auauna faataimi atoa iā te ia mo le 70 tausaga. Ou te tatalo foʻi ina ia faamuamua pea e uso ma tuafāfine talavou Ieova, auā ua ou mautinoa e faatoʻā mafai ona tauia ma fiafia o latou olaga, pe a auauna iā Ieova.