1. O le ā le faamasinoga e lē o toe umi ona faia lea?

 UA TATOU ola i se vaitaimi e sili ona mataʻina. E lē o toe umi ona faamasinoina lea e Iesu o tagata soifua uma. Na faamatala e Iesu i ona soo, a o leʻi oo i le taimi o le faamasinoga, o le a iai se “faailoga” faavaloaga o lona faatasi mai lea e lē vaaia, ma “le taufaaiʻuiʻuga o le faiga o mea a le lalolagi.” (Mata. 24:3) O loo faamauina lenā valoaga i le Mataio mataupu e 24 ma le 25, Mareko mataupu e 13, ma le Luka mataupu e 21.

2. O le ā o le a talanoaina i lenei mataupu, ma o le ā le aogā mo i tatou?

² E ala i talafaatusa e tolu, na aumai ai e Iesu ni lapataʻiga e aogā mo i tatou. O talafaatusa i mamoe ma ʻoti, o taupou faautauta ma taupou vālea, ma taleni. E fesoasoani na talafaatusa iā i tatou e malamalama ai, e fua le auala e faamasino ai tagata taʻitoʻatasi i a latou amioga. A o tatou talanoaina na talafaatusa, ia taumafai e mātau lesona ma le auala e faatatauina ai. O le a talanoaina muamua le talafaatusa i mamoe ma ʻoti.

O MAMOE MA ʻOTI

3. O afea o le a faamasinoina ai e Iesu tagata?

³ I le talafaatusa i mamoe ma ʻoti, na fetalai Iesu e fua le auala o le a ia faamasinoina ai tagata, i le auala e latou te tali mai ai i le tala lelei, ma pe na latou lagolagoina ona uso faauuina. (Mata. 25:​31-46) I le taimi o le “puapuaga tele” a o toeitiiti lava gāpā le taua o Amaketo, o le a faia ai e Iesu lenā faamasinoga. (Mata. 24:21) E pei lava ona tuueseese e se leoleo mamoe ia mamoe mai i ʻoti, e faapena foʻi ona  tuueseese e Iesu i latou e lagolagoina faamaoni ona uso faauuina ma i latou e lē faia faapea.

4. E tusa ai ma le Isaia 11:​3, 4, aiseā e tatou te mautinoa ai o le a faamasinoina ma le tonu e Iesu tagata? (Tagaʻi foʻi i le ata .)

⁴ Ua tatou iloa mai i valoaga o le Tusi Paia, i le avea ai o Iesu ma Faamasino ua tofia e Ieova, e tonu le auala o le a ia faia ai lana faamasinoga. (Faitau le Isaia 11:​3, 4.) E na te iloiloina amioga, uiga, ma faamatalaga a tagata, e aofia ai ma le auala e latou te feutagaʻi ai ma ona uso faauuina. (Mata. 12:​36, 37; 25:40) E silafia e Iesu i latou na lagolagoina ona uso faauuina ma a latou galuega. a O se tasi o auala autū e lagolagoina ai e i latou e pei o ni mamoe uso o Keriso, o le galuega talaʻi. O i latou e faia faapea, o le a faamasinoina o ni “ē e amiotonu” ma maua le faamoemoe e “ola e faavavau” i le lalolagi. (Mata. 25:46; Faaa. 7:​16, 17) Maʻeu le matagofie o le taui o le a maua e i latou e tumau pea ma le faamaoni! O lo latou faia faapea a o faagasolo le puapuaga tele ma pe a uma foʻi, o le a faamauina ai o latou igoa i “le tusi o le ola.”—Faaa. 20:15.

5. O le ā e tatou te aʻoaʻoina mai i le talafaatusa i mamoe ma ʻoti, ma o ai e aogā i ai?

⁵ Ia faamaoni. E faatatau atu le talafaatusa a Iesu i mamoe ma ʻoti iā i latou e iai le faamoemoe e ola i le lalolagi. E latou te faaalia le faatuatua, e lē gata i le lagolagoina o uso o Keriso i le galuega talaʻi, ae e latou te talia atoatoa foʻi le taʻitaʻiga a le pologa faamaoni ma le faautauta lea ua filifilia e Iesu. (Mata. 24:45) E tatau foʻi iā i latou e maua le faamoemoe e ola i le lagi ona utagia le lapataʻiga o loo aumaia i le talafaatusa. Aiseā? Talu ai e iloilo totoʻa e Iesu a latou amioga, uiga, ma faamatalaga. E tatau foʻi ona faamaonia atu lo latou faamaoni. Na faamatalaina foʻi e Iesu isi talafaatusa e lua o loo iai ni lapataʻiga e patino i le ʻaufaauuina, ma o loo maua na talafaatusa i le Mataio mataupu e 25. Seʻi o tatou iloiloina le talafaatusa i taupou faautauta ma taupou vālea.

O TAUPOU FAAUTAUTA MA TAUPOU VĀLEA

6. Na faapefea ona faaalia e taupou e toʻalima le faautauta? (Mataio 25:​6-10)

⁶ I le talafaatusa a Iesu i taupou, na ia taʻua ai ni taupou e toʻasefulu na ō atu e faafeiloaʻi se alii faaipoipo. (Mata. 25:​1-4) Na latou mananaʻo e ō faatasi ma le alii faaipoipo i le ʻaiga o le faaipoipoga. Na faamatalaina e Iesu le toʻalima o na taupou o ni ē e “faautauta,” ae o le isi toʻalima o ni ē e “vālea.” O taupou faautauta na nofosauni ma mataala. Na latou nofosauni e faatali pea mo le alii faaipoipo e tusa lava pe e taunuu mai i le leva o le pō. O lea, na latou aumai ai ni molī suāuu faapea ni suāuu faaleoleo ina neʻi tuai mai le alii faaipoipo. Na latou sauniuni e faamumū pea a latou molī. (Faitau le Mataio 25:​6-10.) Ina ua taunuu le alii faaipoipo, ona latou ō faatasi lea ma taupou faautauta i le ʻaiga o le faaipoipoga. I se tulaga talitutusa, e mafai e Kerisiano ua nofosauni ona aufaatasi atu i le Alii Faaipoipo o Iesu i lona Malo i le lagi, pe afai e tumau ona latou mataala ma faamaoni seʻia oo i le taimi e afio mai ai. b (Faaa. 7:​1-3) Ae e faapefea taupou vālea e toʻalima?

7. O le ā na tupu i taupou vālea e toʻalima, ma aiseā?

 ⁷ E leʻi pei taupou vālea e toʻalima o taupou faautauta, auā e latou te leʻi nofosauni i le taunuu mai o le alii faaipoipo. Na toeitiiti pepē a latou molī, ma e latou te leʻi aumaia foʻi ni suāuu faaleoleo. Na latou ō e faatau mai ni suāuu auā na latou iloa ua toeitiiti taunuu le alii faaipoipo. A o latou ō atu e faatau, ae taunuu mai loa o ia. O le taimi lenā ʻna ō ai loa taupou ua uma ona sauni faatasi ma ia i le ʻaiga o le faaipoipoga, ona tapuni ai loa lea o le faitotoʻa.’ (Mata. 25:10) Ina ua toe foʻi mai taupou vālea ma mananaʻo e ō atu i le ʻaiga o le faaipoipoga, na faapea atu le alii faaipoipo iā i latou, “Ou te lē iloa outou.” (Mata. 25:​11, 12) E leʻi nofosauni na taupou e faatalitali mo le alii faaipoipo e tusa lava po o le ā le umi. O le ā le lesona mo le ʻaufaauuina?

8-9. O le ā le lesona e aʻoaʻoina e le ʻaufaauuina mai i le talafaatusa i taupou? (Tagaʻi foʻi i le ata.)

⁸ Ia nofosauni ma ia mataala. E leʻi fetalai Iesu o le a iai ni vaega se lua o le ʻaufaauuina, o le tasi vaega ua nofosauni e faatalitali mo le taimi e afio mai ai Iesu i le puapuaga tele, ae o le isi vaega e latou te lē o faia faapea. Nai lo o lea, na uiga atu lana fetalaiga i le mea o le a tupu i le ʻaufaauuina, pe afai e latou te lē tumau faamaoni seʻia oo i le iʻuga. Pe afai o le tulaga lenā, o le a latou lē mauaina lo latou taui. (Ioa. 14:​3, 4) O se tulaga e ao ona tatou mataala ai. E tusa pe e tatou te faamoemoe e ola i le lagi po o le lalolagi, ae e tatau ona tatou utagia le lapataʻiga mai i le talafaatusa i taupou. E tatau iā i tatou uma ona mataala pea ma nofosauni e tumau seʻia oo i le iʻuga.—Mata. 24:13.

⁹ Ina ua māeʻa ona faamatala e Iesu le talafaatusa i taupou e faamatilatila ai le manaʻomia ona nofosauni ma mataala, ona ia faamatala lea o le talafaatusa i taleni. O loo taulaʻi atu lenā talafaatusa i le tāua o le galue mamafa.

 O TALENI

10. Na faapefea ona faaalia e pologa e toʻalua le faamaoni? (Mataio 25:​19-23)

¹⁰ I le talafaatusa i taleni, na taʻua ai e Iesu ni pologa se toʻatolu. E toʻalua na faamaoni i lo la matai ae e toʻatasi e leʻi faamaoni. (Mata. 25:​14-18) Na faaalia e pologa e toʻalua lo la faamaoni e ala i le galulue mamafa e faateleina oloa a lo la matai. A o leʻi faimalaga le matai, na ia tuuina atu i pologa ni taleni, o se vaega tupe tele. Na galulue mamafa pologa faamaoni e toʻalua ma faaaogā tatau tupe na tuu atu iā i laʻua. O le ā le iʻuga? Ina ua toe foʻi mai le matai, ua faaluaina le aofaʻi o le tupe na avatu iā i laʻua. Na faamālō atu le matai iā i laʻua ma na la ʻolioli faatasi ma lo [la] matai.’ (Faitau le Mataio 25:​19-23.) Ae e faapefea le pologa lona tolu? O le ā le auala na ia faaaogā ai le tupe na tuu atu e le matai iā te ia?

11. O le ā na tupu i le pologa “paiē,” ma aiseā?

¹¹ E tasi le taleni na maua e le pologa lona tolu ae o ia o se tagata “paiē.” Na faatalitalia e le matai e na te faaaogā tatau le taleni na tuu atu iā te ia. Nai lo o lea, na ia tanuina lenā taleni i le palapala. Ina ua toe foʻi mai le matai, e leʻi avatu e le pologa iā te ia ni taleni faaopoopo mai i le taleni e tasi na tuu i ai. E leʻi lelei le uiga na faaalia e lenā pologa. Nai lo o le faatoese atu ona e na te leʻi faateleina oloa a lona matai, ae na tuuaʻia e le pologa le matai “o se tagata e tagisā.” E leʻi fiafia le matai i lenā pologa. E lē gata i lea, na aveese le taleni mai iā te ia ma tuliese mai i le aiga o le matai.—Mata. 25:​24, 26-30.

12. I aso nei, o ai ua faaata mai e pologa faamaoni e toʻalua?

¹² Ua faaata mai e pologa faamaoni e toʻalua, Kerisiano faauuina faamaoni. Ua valaaulia i latou e lo latou Matai o Iesu, ina ia ʻolioli faatasi ma lo latou matai.’ O le a latou mauaina lo latou taui i le lagi, o le uluaʻi toetū. (Mata. 25:​21, 23; Faaa. 20:5e) Peitaʻi, o le faaaʻoaʻoga leaga a le pologa paiē, ua aumaia ai se lapataʻiga mo Kerisiano faauuina. I le ā le itu?

13-14. O le ā le lesona e aʻoaʻoina e le ʻaufaauuina mai i le talafaatusa i taleni? (Tagaʻi foʻi i le ata.)

 ¹³ Ia galue mamafa ma ia filigā. I le talafaatusa i taleni ma le talafaatusa i taupou, e leʻi valoia e Iesu o le a avea le ʻaufaauuina o ni ē e paiē. Nai lo o lea, na ia faamatala le mea o le a tupu pe afai e mou atu lo latou maelega. O le a lē mafai ona latou “faamautinoa le valaauina ma le filifilia [o i latou],” ma e lē mafai foʻi ona latou ulu atu i le Malo o le lagi.—2 Pete. 1:10.

¹⁴ Ua faamanino mai i talafaatusa a Iesu i taupou ma taleni, e tatau i Kerisiano faauuina uma ona nofosauni, mataala, galulue mamafa, ma filigā. Ae pe na taʻua e Iesu se isi mea e fai ma lapataʻiga mo le ʻaufaauuina? Ioe, o loo taʻua lenā lapataʻiga i le Mataio 24:​40, 41, ma e fesootaʻi atu foʻi i le faamaufaailogaina faaiʻu o le ʻaufaauuina.

O AI I LATOU O LE A “AVEA”?

15-16. Ua faapefea ona faamatilatila mai i le Mataio 24:​40, 41 e manaʻomia e le ʻaufaauuina ona mataala pea?

¹⁵ A o leʻi taʻua talafaatusa e tolu, na faamatalaina e Iesu le faamasinoga faaiʻu o le ʻaufaauuina e faaalia ai ē ua filifilia. Na ia taʻua ni tane se toʻalua o loo galulue i le fanua ma ni fafine se toʻalua o loo galulue i le mea e olo ai saito. E foliga mai e tutusa galuega na faia e na tane, ma e tutusa foʻi galuega na faia e na fafine, “ae na fetalai Iesu e avea le tasi ae tuulafoaʻia le isi.” (Faitau le Mataio 24:​40, 41.) O lea, na ia ʻaiʻoi atu ai i ona soo: “O le mea lea, ia faaauau ai ona outou mataala, auā tou te lē iloa po o le ā le aso e sau ai lo outou Alii.” (Mata. 24:42) Na taʻua foʻi e Iesu se manatu e talitutusa, ina ua uma ona ia faamatalaina le talafaatusa i taupou. (Mata. 25:13) E foliga mai e fesootaʻi na manatu. E na o le ʻaufaauuina faamaoni o le a ʻave’ ma talia e Iesu i le lagi.—Ioa. 14:3.

¹⁶ Ia mataala. O so o se tasi o le ʻaufaauuina e lē faaauau ona mataala faaleagaga, o le a lē aoaoina faatasi ma “ē ua filifilia.” (Mata. 24:31) O lea, o auauna uma a le Atua e tusa lava po o le ā lo latou faamoemoe, e tatau ona latou utagia le lapataʻiga a Iesu, ina ia faaauau ona mataala ma tumau faamaoni.

17. Aiseā e lē tatau ai ona tatou popole i le taimi e filifili ai Ieova e faauuina nisi i lona agaga paia?

¹⁷ Talu ai ua tatou iloa lelei Ieova, e tatou te maufaatuatuaina la le auala e na te faamasinoina ai tagata. E tatou te lē popole pe afai e filifili Ieova e faauuina nisi o ana auauna faamaoni i le taimi lenei. c E tatou te manatua le talafaatusa a Iesu e faatatau i tagata na galulue i le togāvine i le itula e 11. (Mata. 20:​1-16) E tutusa le totogi o i latou na valaauina e galulue i le togāvine i le afiafi ma i latou na galulue i le taeao. I se tulaga talitutusa, e tusa lava po o le ā le taimi e filifilia ai le ʻaufaauuina, ae o le a maua lo latou taui i le lagi pe afai e latou te tumau ma le faamaoni.

IA UTAGIA LAPATAʻIGA

18-19. O ā lesona ma lapataʻiga na tatou talanoaina?

¹⁸ O ā manatu sa tatou talanoaina? O i latou e faamoemoe e ola e faavavau i le lalolagi, ua faamatilatila mai i le talafaatusa i mamoe ma ʻoti le tāua ona tumau ma le faamaoni iā Ieova i le taimi lenei ma le puapuaga tele. A o toeitiiti lava gāpā le taua o Amaketo, o le a faamasinoina ai e Iesu ē e faamaoni, o ni ē ua tatau i ai “le ola e faavavau.”—Mata. 25:46.

 ¹⁹ Sa tatou talanoaina foʻi ni talafaatusa se lua ia e aumaia ai ni lapataʻiga mo le ʻaufaauuina. I le talafaatusa a Iesu i taupou faautauta ma taupou vālea, e toʻalima i latou na faaalia le atamai. Na latou nofosauni ma mataala, ma faatalitali mo le alii faaipoipo e tusa lava po o le ā le umi. Peitaʻi, e leʻi nofosauni taupou vālea. O lea, e leʻi faatagaina i latou e le alii faaipoipo e ulu atu i le ʻaiga o le faaipoipoga. E tatau foʻi ona tatou nofosauni e faatalitali e tusa lava po o le ā le umi, seʻia oo i le taimi e faaoo mai ai e Iesu le iʻuga o lenei faiga o mea. Sa tatou talanoaina foʻi i le talafaatusa i taleni ni pologa faamaoni se toʻalua na galulue mamafa ma filigā. Na la galulue mamafa mo lo la matai, ma na ia talia ma le fiafia i laʻua. Peitaʻi, na teena le pologa paiē. O le ā le lesona? E tatau ona tatou pisi pea i le auaunaga iā Ieova seʻia oo i le iʻuga. Sa talanoaina foʻi e tāua i le ʻaufaauuina ona mataala pea, ina ia ʻave’ ai i latou e Iesu ma maua lo latou taui i le lagi. E latou te tulimataʻia ma le naunautaʻi le taimi e ʻaoaoina ai i latou ina ia faatasi’ ma Iesu i le lagi. Pe a māeʻa le taua o Amaketo, o le a avea i latou ma tamaʻitaʻi faaipoipo a le Tamaʻi Mamoe.—2 Tesa. 2:1; Faaa. 19:​7, 9.

20. O le ā o le a faia e Ieova mo i latou e utagia ana lapataʻiga?

²⁰ E ui lava ua lata tele mai le faamasinoga a Ieova, ae e leai se māfuaaga e tatou te fefefe ai. Pe afai e tatou te tumau ma le faamaoni, e foaʻi mai e lo tatou Tamā o i le lagi “le mana lea e sili atu i le malosi o tagata,” ina ia mafai ai ona tatou “tutū i luma o le Atalii o le tagata.” (2 Kori. 4:7; Luka 21:36) E tusa lava pe e tatou te faamoemoe e ola i le lagi po o le lalolagi, ae e tatou te faafiafiaina lo tatou Tamā pe a utagia lapataʻiga o loo aumaia i talafaatusa a Iesu. O le agalelei faifua o Ieova, o le a ʻtusia ai o tatou igoa i le tusi’ o le ola.—Tani. 12:1; Faaa. 3:5.