E ui e leʻi iai soo e toʻa 70 i le taimi na faavaeina ai e Iesu le Talisuaga Afiafi a le Alii, ae e lē faapea ai e leʻi taliaina e Iesu i latou po ua latou tuulafoaʻia foʻi o ia. Nai lo o lenā, na finagalo Iesu ia iai na o ia ma ona aposetolo i lenā faatasiga.

Na tofia e Iesu le toʻa 12 ma le toʻa 70 e avea ma ona soo. Na filifilia e Iesu mai i ona soo tane e toʻa 12 e avea ma ona aposetolo. (Luka 6:​12-16) Sa iai o ia i Kalilaia ina ʻua ia faapotopoto le toʻa 12,’ ma “aauina atu i latou e talaʻi le Malo o le Atua ma faamālōlō tagata.” (Luka 9:​1-6) Mulimuli ane a o iai o ia i Iutaia, ʻna ia tofia le isi toʻa 70, ma aauina atu i latou taʻitoʻalua.’ (Luka 9:51; 10:1) Na talaʻi atu foʻi isi soo o Iesu i vaipanoa eseese.

Na faamanatuina pea e tagata Iutaia na avea ma soo o Iesu le Paseka i tausaga taʻitasi, faatasi ma o latou aiga. (Eso. 12:​6-11, 17-20) A o lata i le taimi na maliu ai Iesu, na ia agaʻi atu ma ona aposetolo i Ierusalema. Peitaʻi, e leʻi faatonuina e Iesu ona soo uma mai i Iutaia, Kalilaia ma Perea, ina ia latou iai i se faatasiga tele e faamanatu le Paseka. O le mea moni, na finagalo Iesu ia iai na o ia ma ona aposetolo i lenā faatasiga. Na ia fetalai atu iā i latou: “Ua ou matuā naunau lava e ʻai lenei Paseka ma outou, a o leʻi oo i oʻu puapuaga.”—Luka 22:15.

E iai le māfuaaga tāua na faia ai faapea e Iesu. Ua toeitiiti maliu Iesu “o le Tamaʻi Mamoe a le Atua, o lē e aveeseina le agasala a le lalolagi!” (Ioa. 1:29) O le a tupu lenā mea i Ierusalema, le nofoaga ua leva ona ofo atu ai taulaga i le Atua. O le maliu o Iesu o le a saunia ai se laveaʻiga e sili atu, nai lo o le laveaʻiina o tagata Isaraelu lea na faaatagia mai i lo latou aai i le mamoe o le Paseka, i le pō na faasaʻolotoina ai i latou mai i Aikupito. (1 Kori. 5:​7, 8) O le taulaga a Iesu na avea ai aposetolo e toʻa 12 ma uluaʻi sui o le faapotopotoga Kerisiano. (Efe. 2:​20-22) O loo taʻua i le tusi o Faaaliga, o le aai paia o Ierusalema e iai ona “maa faavae e 12,” ua tusia ai “igoa e 12 o aposetolo e toʻa 12 o le Tamaʻi Mamoe.” (Faaa. 21:​10-14) O le a faia se sao tāua o aposetolo faamaoni i le faataunuuina o le finagalo o le Atua. O lea, ua talafeagai le iai na o Iesu ma ona aposetolo i le Paseka mulimuli, ma le Talisuaga Afiafi a le Alii lea na sosoo ai.

E leʻi auai le toʻa 70 ma isi soo i lenā faatasiga. Peitaʻi, o le a maua pea e soo faamaoni uma aogā mai i le Talisuaga Afiafi a le Alii lea na faavaeina e Iesu. Mulimuli ane, o soo uma o le a avea ma Kerisiano faauuina, o le a aofia i latou i le feagaiga mo se malo e pei ona fetalai ai Iesu i ona aposetolo i lenā pō.—Luka 22:​29, 30.