Pe na e faitauina māe‘ae‘a lomiga fou o Le Olomatamata? Se‘i vaai pe mafai ona e taliina fesili o loo mulimuli mai:

O ā faamaoniga faale-Tusi Paia o le tigā alofa mai o le Atua iā i tatou?

A o faapologaina tagata Isaraelu anamua i Aikupito, e leʻi tau ina silasila mai le Atua i o latou mafatiaga, ae na ia mafatia foʻi. (Eso. 3:7; Isa. 63:9) Ua faia i tatou i le faatusa o le Atua, ma e mafai ona tatou faaalia le tigā alofa. E faaalia e le Atua le tigā alofa iā i tatou, e ui e tatou te ono manatu e lē tatau ona ia faia faapea.​—wp18.3, itu. 8-9.

Na faapefea i aʻoaʻoga a Iesu ona fesoasoani i tagata e aveesea ai o latou uiga faaituʻau?

Sa faaalia e le toʻatele o tagata Iutaia i aso o Iesu uiga faaituʻau. Na faamamafa mai e Keriso le tāua o le lotomaulalo, ma taʻusalaina le faamaualuga o se tasi i lona ituaiga. Na ia ʻaiʻoi atu i ona soo ina ia vaai i isi o ni o latou uso.​—w18.06, itu. 9-10.

O le ā e tatou te aʻoaʻoina mai i le māfuaaga e leʻi faataga ai e le Atua Mose e ulu atu i le Nuu Folafolaina?

Sa iai se faiā māfana a Mose ma Ieova. (Teu. 34:10) Ina ua lata ina faaiʻu le 40 tausaga o iai le nuu o Isaraelu i le toafa, na toe faitio foʻi le nuu i le leai o se vai. Na faatonuina e le Atua Mose e tautala i le papa. Peitaʻi, na tā e Mose le papa. Atonu na toʻatamaʻi Ieova ona e leʻi usitaʻi Mose i Ana faatonuga, pe e leʻi faamamaluina foʻi e Mose o Ia ona o le vavega. (Nu. 20:6-12) Ua tatou aʻoaʻoina mai i inei le tāua o le usiusitaʻi iā Ieova ma faamamaluina o ia.​—w18.07, itu. 13-14.

E faapefea ona sesē sa tatou faaiʻuga e fai ona o le faamasino o isi e tusa ma foliga vaaia?

E tolu vala e masani ona aafia ai le vaaiga a tagata: o le atunuu po o le ituaiga, tulaga tau tamaoaiga, ma tausaga o se tasi. E tāua ona tatou vāai i isi e pei o le auala e silasila ai le Atua iā i latou, e na te lē faailogaina tagata. (Galu. 10:34, 35)​—w18.08, itu. 8-12.

O ā nisi o auala o loo fesoasoani ai Kerisiano matutua i isi?

E tautele pea i le Atua se Kerisiano matua ua suia sona faaeaga, ma faia le mea sili ina ia fesoasoani ai i isi. Atonu e fesoasoani atu o ia i paaga lē talitonu, ē ua lē toe auai i sauniga ma tala‘iga, faia su‘esu‘ega faale-Tusi Paia, ma faalautele lana faiva.​—w18.09, itu. 8-11.

O ā Meafaigaluega mo le Aʻoaʻo Atu o loo faaaogā e Kerisiano?

O loo iai pepa o faamatalaga ma valaaulia, o sāvali e valu ua faatulagaina lelei, faapea lomiga o Le Olomatamata ma le Ala Mai! E iai foʻi polosiua, tusi autū e lua e faia ai suʻesuʻega faale-Tusi Paia, ma vitiō e fā, e aofia ai le vitiō Aiseā e Su‘esu‘e ai le Tusi Paia?​—w18.10, itu. 16.

E tusa ai ma le Faataoto 23:23, e faapefea i se Kerisiano ona “faatau mai le upu moni”?

E tatou te lē totogiina ni tupe ina ia maua ai le upu moni. Ae e manaʻomia ona tatou faaalu le taimi ma faia taumafaiga ina ia maua ai le upu moni.​—w18.11, itu. 4.

O le ā e tatou te aʻoaʻoina mai i le auala na feutagaʻi ai Hosea ma lana avā o Komeri?

E ui sa faaauau ona mulilua Komeri, ae na faamagalo o ia e Hosea ma faamaoni pea iā te ia. Pe a faia e le paaga a se Kerisiano le faitaaga, e mafai e le Kerisiano ona faamagaloina lana paaga. O le toe faia o feusuaʻiga ma le paaga na faitaaga, ua faalēaogāina ai le faavae faale-Tusi Paia sa mafai ai ona tatala le faaipoipoga.​—w18.12, itu. 13.