I le 2 Korinito 12:2, 3, na taʻua ai e Paulo se tagata na “ave faafuase‘i i le lagi lona tolu.” O ai lenā tagata? Na faamamafa atu e Paulo i lana tusi i le faapotopotoga i Korinito, na tofia o ia e le Atua e fai ma aposetolo. (2 Kori. 11:5, 23) Na sosoo ai ma lona taʻua o “vaaiga ofoofogia ma faaaliga mai i le Alii.” E leʻi taʻua e Paulo isi uso Kerisiano i lenā mataupu. O lea, e foliga mai na faatatau lana faamatalaga iā te ia lava, o le tagata na mauaina na vaaiga ma faaaliga.​—2 Kori. 12:1, 5.

O lona uiga, e lē gata na “ave faafuase‘i” Paulo “i le lagi lona tolu,” ae na ‘ave faafuase‘i foʻi o ia i le parataiso.’ (2 Kori. 12:2-4) Na faaaogā e Paulo le upu “faaaliga,” e atagia mai ai na faaali atu iā te ia ni mea o le a tutupu i le lumanaʻi.

O le ā na mafaufau i ai Paulo ina ua ia taʻua “le lagi lona tolu”?

E eseese uiga o le upu “lagi” i le Tusi Paia. O se faaaʻoaʻoga, e mafai ona faatatau atu i le lagi faaletino. (Kene. 11:4; 27:28; Mata. 6:26) O nisi taimi e faatatau atu i pulega faaletagata. (Tani. 4:20-22) E mafai foʻi ona faasino atu i le pulega a le Atua, e pei o le Malo o le Atua.​—Faaa. 21:1.

Na vaaia e Paulo “le lagi lona tolu.” O le ā le uiga o lana faamatalaga? E masani ona taʻua faatolu e le Tusi Paia se mea, ina ia faamatilatila pe ia matuā faamamafa ai se manatu. (Isa. 6:3; Eseki. 21:27; Faaa. 4:8 ) E foliga mai la ina ua taʻua e Paulo le faaupuga “le lagi lona tolu,” na ia faamatilatila mai ai se pulega e sili ona lelei ma sili ona maualuga, o le pulega lea o le Malo faa-Mesia o loo nofotupu ai Iesu Keriso ma le 144,000. (Tagaʻi i Le Olomatamata o Oketopa 15, 2004, itu. 8, pala. 5.) E pei ona tusia e le aposetolo o Peteru, o loo tatou faatalitali “i le lagi fou” e tusa ai ma le folafolaga a le Atua.​—2 Pete. 3:13.

O le ā na uiga i ai Paulo ina ua ia taʻua le upu “parataiso”?

E eseese foʻi uiga o le upu “parataiso.” (1) Pe a fua i le nofoaga na ola ai Atamu ma Eva, e mafai ona faatatau atu le “parataiso” i le Parataiso i le lalolagi i le lumanaʻi. (2) E mafai foʻi ona faatatau atu i le tulaga faaleagaga o le a olioli ai tagata o le Atua i le lalolagi fou. (3) E mafai foʻi ona faasino atu i tulaga matagofie i le lagi, po o “le parataiso a le Atua” o loo taʻua i le Faaaliga 2:7.​—Tagaʻi i Le Olomatamata, Iulai 15, 2015, itu. 8, pala. 8.

O lea, i le 2 Korinito 12:4, e mafai ona faatatau atu le faamatalaga a Paulo i na tulaga uma e tolu, a o ia faamatalaina le mea na tupu iā te ia.

Seʻi aotele manatu autū o lenei mataupu:

O “le lagi lona tolu” i le 2 Korinito 12:2, e foliga mai e faatatau atu i le Malo faa-Mesia lea o loo nofotupu ai Iesu Keriso ma le 144,000, ma o “le lagi fou” foʻi lenā.​—2 Pete. 3:13.

E taʻua foʻi lenā pulega o “le lagi lona tolu,” auā o le Malo o le Atua o se pulega e sili ona lelei, ma sili ona maualuga.

O le “parataiso” lea na “ave faafuase‘i” i ai Paulo i le faaaliga, e foliga mai e faasino atu i le (1) parataiso faaletino i le lalolagi i le lumanaʻi, (2) parataiso faaleagaga i le lalolagi fou, lea o le a sili atu ona telē nai lo o le parataiso faaleagaga i le taimi lenei, ma le (3) o “le parataiso a le Atua” i le lagi, lea o le a iai faatasi ma le lalolagi fou.

O lona uiga, o le parataiso o se tuufaatasiga lea o le lagi fou ma le lalolagi fou. O se faatulagaga fou, lea o le a aofia ai le pulega o le Malo o le Atua i le lagi, faapea foʻi ma tagata e auauna iā Ieova i le parataiso i le lalolagi.