Pe e mafai ona e taliina fesili nei e faavae mai i lomiga o Le Olomatamata 2019?

O le ā le uiga o le folafolaga a le Atua: “O so o se auupega ua faia e faasagatau iā te oe e lē manuia”? (Isa. 54:17)

E tatou te maufaatuatuaina le Atua, e na te puipuia i tatou mai i na auupega malolosi e pei o le “ita o ē e sauā.” (Isa. 25:4, 5) E lē taulau o tatou fili i le faia o se mea e tumau ona tatou afāina ai.​—w19.01, itu. 6-7.

Na faapefea ona atagia le faamasinotonu o Ieova i ana feutagaʻiga ma le nuu o Kanana, ma tagata Isaraelu lē usiusitaʻi?

Na faasala e le Atua i latou na faia faiga taufeusuaʻiga matagā, ma faileagaina fafine ma tamaiti. Na faamanuia e Ieova i latou na usiusitaʻi iā te ia, ma latou feutagaʻi ma isi i se auala tonu.​—w19.02, itu. 22-23.

O le ā e tatou te faia pe afai o loo tatou iai i se faatasiga, ae faia e se tagata lē talitonu se tatalo?

E tatou te faaalia le filemu ma le faaaloalo, ae e tatou te lē faapea atu “amene,” pe uulima foʻi a o faia le tatalo. E mafai foʻi ona faia sa tatou lava tatalo lē leoa.​—w19.03, itu. 31.

O le ā le matuiā o le faigaaiga faamalosi i tamaiti?

O faigaaiga faamalosi e faia i tamaiti o se agasala i le tamaitiiti na faaleagaina, agasala i le faapotopotoga, agasala i faipule silisili ma le Atua. E usitaʻia e toeaina tulafono a le atunuu, e ala i le lipotia o se tasi ua tuuaʻia i le faaleagaina o tamaiti.​—w19.05, itu. 9-10.

E faapefea ona e suia pe faaleleia le malosi e pulea ai lou mafaufau?

O vala tāua: Ia tatalo iā Ieova. Manatunatu loloto ma le sini o le iloilo o oe lava. Ia filifili ma le atamai au aumea.​—w19.06, itu. 11.

O le ā e tatou te faia i le taimi lenei e sauniuni ai mo sauāga?

E manaʻomia ona faamalosia la tatou faiā ma Ieova. Ia tatou mautinoa e alofa Ieova iā i tatou, ma e na te lē tuulafoaʻia i tatou. Ia faitau le Tusi Paia i aso taʻitasi ma tatalo e lē aunoa. Ia e mautinoa o le a taunuu moni faamanuiaga o le Malo. Ia tauloto mau ma pese o viiga.​—w19.07, itu. 2-4.

O le ā e tatou te faia e fesoasoani ai i tagata o lo tatou aiga ia faasaoina?

E tāua le faaalia o le tigā alofa, ia molimau e ala i au faaaʻoaʻoga lelei i le amio, ma ia onosaʻi ma faautauta.​—w19.08, itu. 15-17.

E faapefea ona faafouina i tatou e pei ona folafola mai e Iesu i le Mataio 11:28?

Ua iā i tatou ovasia Kerisiano e alolofa, uō e sili ona lelei ma le galuega e sili ona lelei.​—w19.09, itu. 23.

E faapefea ona aumaia e le Atua le faanaunauga ma le malosi e tatou te gaoioi ai? (Fili. 2:13)

A o tatou faitau i le Afioga a le Atua ma manatunatu loloto i ai, o le a faamalosia ai i tatou e le Atua, e ala i le foaʻi mai o le faanaunauga ma le malosi e gaoioi ai. E faaleleia o tatou tomai e ala i lona agaga paia.​—w19.10, itu. 21.

O ā laasaga atamai e tatau ona tatou uia a o leʻi faia se filifiliga tāua?

O laasaga e lima: Ia faia ni saʻiliʻiliga māeʻaeʻa. Ia tatalo mo le atamai. Ia iloilo uunaʻiga. Ia iloa lelei ou sini. Ia iloa mea e mafai ona e faia.​—w19.11, itu. 27-29.

Pe e faamata na māfua le aʻoaʻoga o le ola pea o le agaga pe a oti le tagata, ona o le tala a Satani na fai iā Eva?

E foliga mai e leai. Na taʻu atu e Satani iā Eva e lē oti o ia, e leʻi uiga atu ai e na o lona tino e oti. E leʻi iai ni tagata e aʻoaʻoina aʻoaʻoga sesē faalotu na faasaoina i le Lolo. O le talitonuga i le ola pea o le agaga pe a oti, atonu na amata a o leʻi faataapeapeina e le Atua tagata na fausiaina le olo i Papelu.​—w19.12, itu. 15.