1. O le ā le aafiaga iā i tatou o le manatunatu loloto i le folafolaga a Ieova e faatatau i le ola e faavavau?

 UA FOLAFOLA mai e Ieova o i latou e usiusitaʻi iā te ia o le a maua le “ola e faavavau.” (Roma 6:23) Pe a tatou manatunatu loloto i lenā folafolaga, o le a atili faamalosia ai lo tatou alofa mo ia. Seʻi mafaufau i le mea lenei: E matuā alofa lo tatou Tamā i le lagi iā i tatou, ma e lē mafai ona ia tuulafoaʻia i tatou.

2. E faapefea ona fesoasoani iā i tatou le folafolaga e faatatau i le ola e faavavau?

² E fesoasoani le folafolaga a le Atua e faatatau i le ola e faavavau, e tatou te onosaia ai luʻi o loo tatou fesagaʻia. E tusa lava pe faamataʻu i tatou i le oti e o tatou fili, e lē mafai ona tatou faavaivai ai. Aiseā? O se tasi o māfuaaga, pe a tatou feoti a o tatou faamaoni pea iā Ieova, o le a ia toe faatūina mai i tatou ma le faamoemoe e lē mafai ona tatou toe feoti. (Ioa. 5:28, 29; 1 Kori. 15:55-58; Epe. 2:15) Aiseā e tatou te mautinoa ai e mafai ona tatou ola e faavavau? Seʻi iloilo nisi o māfuaaga.

3. Aiseā e tatou te mautinoa ai e mafai e Ieova ona faatumauina e faavavau o tatou ola? (Salamo 102:12, 24, 27)

³ E tatou te iloa e mafai e Ieova ona faatumauina e faavavau o tatou ola, ona o ia o le Puna o le ola ma e soifua foʻi o ia e faavavau. (Sala. 36:9) Ua faamaonia mai i nisi o mau o le Tusi Paia, na soifua Ieova talu mai le vavau ma e soifua pea o ia.  Ua faapea mai le Salamo 90:2, o Ieova “e mai i le vavau e oo i le faavavau.” E tai faapena foʻi le manatu o loo taʻua i le Salamo 102. (Faitau le Salamo 102:12, 24, 27.) Na tusi foʻi le perofeta o Sapakuka e faatatau i lo tatou Tamā i le lagi: “Ieova e, pe e te lē mai le faavavau ea? Loʻu Atua e, o Lē e Paia iā te aʻu, e te lē maliu lava.”​—Sapa. 1:12.

4. Pe e tatau ona tatou popole pe a faigatā ona tatou malamalama i le manatu na soifua Ieova talu mai le vavau? Ia faamatala.

⁴ Pe e faigatā iā te oe ona malamalama i le manatu, “e soifua e faavavau” Ieova? (Isa. 40:28) E lē fou lenā manatu. Na faapea mai Eliu e faatatau i le Atua: “E lē mafaitaulia ona tausaga.” (Iopu 36:26) O lo tatou lē malamalama i se mea, e lē faapea ai e sesē lenā mea. O se faataʻitaʻiga, e ui atonu e tatou te lē malamalama atoatoa i le auala e gaoioi ai le malamalama, ae e lē faapea ai e leai se malamalama. I se tulaga talitutusa, e ui atonu e tatou te lē malamalama atoatoa pe na faapefea ona soifua Ieova mai i le vavau ma e soifua pea o ia, ae e lē faapea ai e lē soifua e faavavau le Atua. O mea moni e faatatau i Lē na foafoaina mea, e lē faalagolago i mea e tatou te malamalama pe lē malamalama ai. (Roma 11:33-36) Na soifua le Atua a o leʻi iai le vateatea, e aofia ai puna o le malamalama e pei o le lā. Ua tatou mautinoa o Ieova “o Lē na faia le lalolagi i lona mana.” Ioe, na soifua o ia a o ia leʻi ʻfofolaina le lagi.’ (Iere. 51:15; Galu. 17:24) O le ā se isi māfuaaga e tatou te mautinoa ai, e mafai ona tatou ola e faavavau?

5. O le ā le faamoemoe na maua e le uluaʻi ulugalii?

⁵ Na foafoaina e Ieova meaola i le lalolagi ina ia ola mo se taimi puupuu, e ese mai ai le uluaʻi ulugalii. Na ia saunia mo i laʻua se faamoemoe matagofie o le lē mafai ona feoti. Peitaʻi na lapataʻia e Ieova Atamu: “O le laau e iloa ai le lelei ma le leaga, aua neʻi e ʻai ai, auā o le aso e te ʻai ai, e te oti ai lava.” (Kene. 2:17) Pe ana usiusitaʻi Atamu ma Eva iā Ieova, e la te lē feoti. E talafeagai ai la le manatu e faapea, na ono faataga e Ieova i laʻua e la te aai i “le laau o le ola.” O lenā tulaga e la te maua ai se faamautinoaga mai iā Ieova, o le a la ʻola e faavavau.’ b​—Kene. 3:22.

6-7. (a) O ā isi faamaoniga e iloa ai e leʻi faia tagata ina ia feoti? (e) O ā ni mea e te tulimataʻia e fai i le lumanaʻi? (Tagaʻi i ata.)

⁶ E mataʻina saʻiliʻiliga na faia e nisi o saienitisi e faapea, e sili atu ona tele faamatalaga e mafai ona teu i o tatou faiʻai nai lo o mea e mafai ona tatou aʻoaʻoina a o tatou feola. I  le 2010, na taʻua ai i se mekasini, e tutusa le tele o faamatalaga e mafai ona teu i o tatou faiʻai ma le 3 miliona itula o polokalame i le televise, ma e silia ma le 300 tausaga le umi e matamata ai i na polokalame. E sili atu ona tele faamatalaga e mafai ona teu i o tatou faiʻai nai lo o na fuainumera. Peitaʻi ua faaalia ai na foafoaina e Ieova o tatou faiʻai, ina ia mafai ona teu ai le tele o faamatalaga, nai lo o mea e mafai ona tatou aʻoaʻoina i le 70 po o le 80 tausaga e tatou te ola ai.​—Sala. 90:10.

⁷ Na tuuina e Ieova iā i tatou se faanaunauga malosi ina ia ola pea. Ua faapea mai le Tusi Paia e faatatau i le tagata, ua ʻtuu e le Atua le faavavau i o latou loto.’ (Fai. 3:11) O se tasi lenā o māfuaaga e tatou te vaai ai i le oti o se fili. (1 Kori. 15:26) Pe a maua i tatou i se maʻi tugā, e lē tau ina tatou talia o lenā tulaga ma faavaivai ai. E masani lava ona tatou ō e vaai se fomaʻi pe inu se fualaau. E tatou te faia mea uma e mafai, ina ia tatou lē feoti ai. Pe a maliu se tasi e pele iā i tatou, e tusa pe e laʻitiiti pe matua, pe e tatou te lē lagona ai ea le matuā faanoanoa ma lagona tigā? (Ioa. 11:32, 33) Ioe, e lē mafai e Lē na foafoaina mea ona tuuina iā i tatou le faanaunauga e ola ai e faavavau, pe ana faapea e lē o lana fuafuaga lenā. Ae ua iai iā i tatou isi faamautinoaga e tatou te talitonu ai, e mafai ona tatou ola e faavavau. Seʻi o tatou iloiloina nisi o mea na faia e Ieova i le taimi ua teʻa ma le taimi lenei, e faamaonia ai e leʻi suia lana uluaʻi fuafuaga.

8. O le ā le faamautinoaga e tatou te maua mai i le Isaia 55:11, e tusa ai o le fuafuaga a le Atua mo i tatou?

⁸ E ui na agasala Atamu ma Eva ma oo ai le oti i a la fanau, ae e leʻi suia ai lava le fuafuaga  a Ieova. (Faitau le Isaia 55:11.) O lana fuafuaga ia ola pea e faavavau tagata faamaoni. E faamaonia lenā manatu pe a tatou talanoaina mea na fetalai ma faia e Ieova ina ia faataunuu ai lana fuafuaga.

9. O le ā ua folafola mai e le Atua? (Tanielu 12:2, 13)

⁹ Ua folafola mai e Ieova o le a ia faatutūina ē ua maliliu, ma tuuina atu iā i latou le avanoa ia maua ai le ola e faavavau. (Galu. 24:15; Tito 1:1, 2) Na mautinoa e le tane faamaoni o Iopu, e matuā naunau Ieova e toe faatutūina ē ua maliliu. (Iopu 14:14, 15) Na iloa e le perofeta o Tanielu, e iai le faamoemoe e toe faatutūina mai ai ē ua maliliu ma maua ai le avanoa e ola e faavavau. (Sala. 37:29; faitau le Tanielu 12:2, 13.) Na iloa foʻi e tagata Iutaia i taimi o Iesu, e mafai e Ieova ona tuuina atu i ana auauna faamaoni “le ola e faavavau.” (Luka 10:25; 18:18) E tele taimi na taʻua ai e Iesu lenā folafolaga, ma na toe faatūina o ia e lona Tamā.​—Mata. 19:29; 22:31, 32; Luka 18:30; Ioa. 11:25.

10. O le ā ua faamaonia mai i toetū na tutupu i le taimi ua teʻa? (Tagaʻi i le ata.)

¹⁰ O Ieova o Lē na foaʻi mai le ola, ma e iai iā te ia le mana e toe faatutūina mai ai tagata. Na tuuina atu e Ieova i le perofeta o Elia le mana e toe faatūina ai le tama a le fafine Sarefata ua oti lana tane. (1 Tu. 17:21-23) Mulimuli ane, na fesoasoani le Atua i le perofeta o Elisaia e toe faatūina le tama a le fafine Sunema. (2 Tu. 4:18-20, 34-37) O le faatutūina o na tagata ma isi toetū, e faamaonia ai e iai iā Ieova le mana e toe faatutūina ai tagata. A o iai Iesu i le lalolagi, na ia faamaonia atu ai na tuuina mai e lona Tamā iā te ia lenā mana. (Ioa. 11:23-25, 43, 44) Ua iai nei Iesu i le lagi, ma ua tuuina atu iā te ia “le pule uma i le lagi ma le lalolagi.” O lea, ua mafai ai ona ia faataunuuina le folafolaga, o le toe faatutūina mai o “i latou uma o loo i tuugamau” ma le faamoemoe e ola e faavavau.​—Mata. 28:18; Ioa. 5:25-29.

11. E faapefea i le togiola ona tatou maua ai le avanoa e ola e faavavau?

¹¹ Aiseā na faataga ai e Ieova lona Alo pele e maliu tigāina? Na faailoa mai e Iesu le māfuaaga ina ua ia fetalai: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, ae ia maua le ola e faavavau.” (Ioa. 3:16) O le foaʻiina mai e le Atua o lona Alo e fai ma togiola ina ia magalo ai a tatou agasala, ua mafai ai ona tatou maua le ola e faavavau. (Mata. 20:28) Na faamatala e le aposetolo o Paulo lenei vaega tāua o le fuafuaga a le Atua ina ua ia tusi: “Ua oo mai le oti ona o le tagata, ua toe faatutūina foʻi o ē ua oti ona o le tagata. Auā e pei ona oti uma lava iā Atamu, e faapena foʻi ona toe faaolaina uma lava e ala i le Keriso.”​—1 Kori. 15:21, 22.

12. E faapefea ona faataunuuina e le Malo le fuafuaga a Ieova mo i tatou?

¹² Na aʻoaʻoina e Iesu ona soo e tatalo ina ia oo mai le Malo o le Atua, ma ia faia le finagalo o le Atua i le lalolagi. (Mata. 6:9, 10) O se tasi o vala o le fuafuaga a le Atua mo tagata, ia ola e faavavau i le lalolagi. Ina ia faataunuuina lenā mea, na tofia ai e Ieova lona Alo e avea ma Tupu o le Malo faa-Mesia. O loo aoaoina e le Atua le 144,000 mai i le lalolagi, ina ia galulue faatasi ma Iesu e faataunuu le finagalo o le Atua.​—Faaa. 5:9, 10.

13. O le ā o loo faia e Ieova i le taimi lenei, ma e faapefea ona e aafia ai?

¹³ O loo aoaoina e Ieova “se motu o tagata e toʻatele” ma toleni i latou e avea ma tagatānuu o lona Malo. (Faaa. 7:9, 10; Iako. 2:8) E ui o loo latou ola i se lalolagi e fevaevaeaʻi  ona o le fefe ma taua, ae o i latou e faia aʻe ai lenei vaega, o loo taumafai malosi e manumalo mai i le feitagaʻi i le vā o atunuu, ituaiga, ma tagata taʻitoʻatasi. Ua latou tuʻi a latou pelu e fai ma uʻamea o suōtosina i se uiga faafaatusa. (Mika 4:3) E latou te lē auai i taua lea e fasiotia ai le toʻatele, ae e latou te fesoasoani i tagata ina ia maua “le ola moni” e ala i le aʻoaʻoina o i latou e faatatau i le Atua moni ma ana fuafuaga. (1 Timo. 6:19) Atonu e tetee nisi o o latou tauaiga iā i latou pe faalētonu foʻi lo latou tamaoaiga ona o lo latou lagolagoina o le Malo o le Atua, ae e faamautinoa e Ieova e latou te maua mea e manaʻomia. (Mata. 6:25, 30-33; Luka 18:29, 30) Ua faamautinoa mai i na mea moni, e moni le Malo o le Atua ma o le a gaoioi pea e faataunuu le fuafuaga a Ieova.

14-15. O le a faapefea ona faataunuuina atoatoa le folafolaga a Ieova, o le a faaumatia e faavavau le oti?

¹⁴ Ua avea nei Iesu ma Tupu o le Malo o le Atua i le lagi, ma o le a ia faataunuuina folafolaga uma a Ieova. (2 Kori. 1:20) Talu mai le 1914, ua pule Iesu i ona fili. (Sala. 110:1, 2) Ua toeitiiti ona manumalo aʻiaʻi lea o ia ma ē e latou te pule faatasi, ma faaumatia tagata amioleaga.​—Faaa. 6:2.

¹⁵ I le Pulega a Iesu i le Afe Tausaga, o le a toe faatutūina ai ē ua maliliu ma o le a lelei atoatoa tulaga o tagata usiusitaʻi. Pe a māeʻa  le tofotofoga faaiʻu, o i latou e faamasinoina e Ieova o ni ē e amiotonu, o le a “fai lava le lalolagi mo [i latou], e nonofo ai pea i latou e oo i le faavavau.” (Sala. 37:10, 11, 29) O le a “faaumatia” foʻi “le fili mulimuli, o le oti lea.”​—1 Kori. 15:26.

16. O le ā le māfuaaga autū e tatou te auauna ai iā Ieova?

¹⁶ Ua tatou aʻoaʻoina i lenei mataupu, o lo tatou faamoemoe o le ola e faavavau e faavae mai i le Afioga a le Atua. E mafai ona fesoasoani lenā faamoemoe iā i tatou, e tumau ma le faamaoni ai i nei aso e sili ona faigatā. Ae ina ia faafiafiaina Ieova, e tatau ona sili atu mea e uunaʻia ai i tatou nai lo o le tau ina faanaunau e ola e faavavau. O le māfuaaga autū e tatou te faamaoni ai pea iā Ieova ma Iesu, ona e tatou te matuā alolofa iā i laʻua. (2 Kori. 5:14, 15) O lenā alofa e uunaʻia ai i tatou e faaaʻoaʻo iā i laʻua, ma faailoa atu i isi lo tatou faamoemoe. (Roma 10:13-15) Pe a tatou faaalia le lē manatu faapito ma le agalelei, o le a avea ai i tatou ma ituaiga tagata e finagalo Ieova e avea ma ana uō e faavavau.​—Epe. 13:16.

17. O le ā le filifiliga e tatau ona fai e le tagata lava ia? (Mataio 7:13, 14)

¹⁷ Po o le a tatou iai faatasi ma ē o le a maua le ola e faavavau? Ua tuuina mai e Ieova le avanoa e tatou te maua ai le ola e faavavau. O lea, ua iai iā i tatou le filifiliga pe e tatou te tumau pea i le ala e tau atu i le ola. (Faitau le Mataio 7:13, 14.) E faapeʻī le olaga pe a tatou ola e faavavau? O le a talanoaina le tali o lenā fesili i le mataupu o loo sosoo mai.