Leai. O mea na tusia e Tavita e moni ma saʻo.

Mātau manatu na ia tusia i lenā fuaiupu ma mau talitutusa e faapea: “Ona ou usuina lea o viiga i lou suafa e faavavau, a o totogi aʻu tautoga i lea aso ma lea aso.” “Ieova e, loʻu Atua, ou te vivii atu iā te oe ma loʻu lotoatoa, ou te faamamaluina foʻi lou suafa e faavavau.” “Ou te vivii atu i lou suafa e faavavau, faavavau lava.”​—Sala. 61:8; 86:12; 145:1, 2.

E leʻi soona faatelē e Tavita na upu ma manatu e lē mafai ona ia oti. Na ia iloa na fetalai Ieova o le iʻuga o le agasala o le oti, ma na ia taʻutino mai o ia o se tagata agasala. (Kene. 3:3, 17-19; Sala. 51:4, 5) Na ia iloa na maliliu foʻi tane na finagalo malie i ai le Atua e pei o Aperaamo, Isaako ma Iakopo, ma na ia iloa foʻi e oo le oti iā te ia. (Sala. 37:25; 39:4) Ae na atagia mai i upu a Tavita o loo i le Salamo 61:8, lona faanaunauga ma lona maumauaʻi e viia le Atua e faavavau po o le ā lava le umi e ola ai.​—2 Samu. 7:12.

Na faatatau atu isi tusitusiga a Tavita i mea na tutupu i lona olaga e pei ona tatou mātauina i le ulutala o le Salamo 18, 51, ma le 52. O Tavita o se leoleo mamoe, ma na ia faamatalaina Ieova i le Salamo 23 o se leoleo mamoe e na te taʻitaʻia, faafouina, ma puipuia ana auauna. O le māfuaaga lenā na manaʻo ai Tavita e auauna iā Ieova “i aso uma o [lona] ola.”​—Sala. 23:6.

Ia manatua o Ieova na faagaeeina Tavita e tusia mea uma na ia tusia. O mea na ia tusia e aofia ai valoaga e faatatau i mea o le a tutupu i le lumanaʻi. O se faataʻitaʻiga i le Salamo 110, na faasino atu ai Tavita i le taimi o le a ʻnofo ai lona Alii i le itu taumatau’ o le Atua i le lagi ma maua le mana tele. O le ā o le a ia faia? O le a ia pule i fili o le Atua ma “faasalaina nuu” i le lalolagi. Na tupuga mai Tavita mai i le Mesia, o lē o le a pule mai i le lagi ma o le a avea ma “ositaulaga e faavavau.” (Sala. 110:1-6) Na faamaonia e Iesu o le valoaga o loo i le Salamo 110, e faasino atu iā te ia ma o le a faataunuuina i le lumanaʻi.​—Mata. 22:41-45.

Ioe, na faagaeeina Tavita e tusi e faatatau i le taimi na ia ola ai, ma le taimi o le a toe faatūina ai o ia i le lumanaʻi ma vivii ai iā Ieova e faavavau. O lenā faamatalaga ua fesoasoani iā i tatou e iloa ai e faasino atu le Salamo 37:10, 11, 29 i le tulaga o mea na iai i Isaraelu i aso anamua, ma le tulaga o mea o le a iai i le lalolagi aoao i le lumanaʻi pe a faataunuu e le Atua ana folafolaga. ​—Tagaʻi i le palakalafa e 8 o le mataupu “O le a Ta Faatasi ma Oe i le Parataiso” o loo i lenei lomiga.

O lea, ua faamaonia mai i le Salamo 61:8 ma isi mau, na manaʻo Tavita e viia Ieova i Isaraelu i aso anamua seʻia oo i le taimi na maliu ai. Ua faaalia ai foʻi mea o le a mafai ona faia e Tavita i le lumanaʻi, pe a toe faatūina o ia e Ieova mai i le oti.