1. O le ā “le filemu mai i le Atua,” ma e faapefea ona aogā iā i tatou? (Filipi 4:6, 7)

 E IAI le ituaiga filemu e lē iloa e le lalolagi: O “le filemu mai i le Atua,” po o le mauaina o le toʻafilemu ona o le iai o se faiā māfana ma lo tatou Tamā i le lagi. Pe a tatou maua lenā filemu, e tatou te lagona le malupuipuia. (Faitau le Filipi 4:6, 7.) E tatou te mauaina ai foʻi ni faiā māfana ma isi e alolofa iā Ieova. E tatou te olioli ai foʻi i se faiā māfana ma “le Atua o le filemu.” (1 Tesa. 5:23) Pe a tatou iloaina, maufaatuatuaina, ma usiusitaʻi i lo tatou Tamā, o le a faatoʻafilemu ai e le filemu mai i le Atua o tatou lotopopole pe a tatou feagai ma tulaga faigatā.

2. Aiseā e tatou te mautinoa ai e mafai ona tatou maua le filemu mai i le Atua?

² Pe e mafai moni lava ona tatou maua le filemu mai i le Atua pe a feagai ma puapuaga, e pei o le pipisi o se faamaʻi, mala, fetauaʻiga, po o sauāga? O na faigatā e faamataʻuina ai i tatou. Peitaʻi na faatonuina e Iesu ona soo: “Aua neʻi atuatuvale o outou loto pe faavaivai ona o le fefefe.” (Ioa. 14:27) E tatou te olioli ona o loo mulimuli o tatou uso ma tuafāfine i le fautuaga a Iesu. O le fesoasoani a Ieova, ua latou maua ai le filemu a o feagai ma tulaga e sili ona faigatā.

3. E faapefea ona aafia lo tatou filemu ona o faamaʻi pipisi?

³ E mafai e se faamaʻi ona matuā suia ai toetoe o vala uma o le olaga. Seʻi mātau aafiaga o le KOVITI-19 i le toʻatele o tagata. E tusa ai ma se suʻesuʻega, e silia ma le ʻafa o tagata na lipotia mai na faigatā ona momoe ona o le faamaʻi. O lenā faamaʻi na matuā faateteleina ai le popole, lotomafatia, faaaogāsesē  o le ʻava malosi ma fualaau, sauāga i aiga, ma le taumafai e pule i le ola. Pe afai o loo pipisi se faamaʻi i lou vaipanoa, e faapefea ona faaitiitia lou popole ma maua le filemu mai i le Atua?

4. E faapefea i le iloaina o le valoaga a Iesu e faatatau i aso e gata ai ona tatou maua ai le filemu?

⁴ Na valoia e Iesu o aso e gata ai, o le a iai faamaʻi pipisi “i lea mea ma lea mea.” (Luka 21:11) E faapefea i le iloaina o lenā mea ona tatou maua ai le filemu? E lē faateʻia i tatou pe a pipisi se faamaʻi. Ua tatou iloa o loo tutupu na mea e pei ona fetalai ai Iesu. O lea, e tatau ona tatou mulimuli i le fautuaga ua tuuina mai e Iesu, mo ē o loo ola i le taimi o le iʻuga: “Aua neʻi outou atuatuvale ai.”​—Mata. 24:6.

5. (a) E tusa ai ma le Filipi 4:8, 9, o le ā e tatau ona tatou tatalo ai a o tatou feagai ma se faamaʻi pipisi? (e) E faapefea ona e maua aogā i le faalogologo i faitauga Tusi Paia ua uma ona puʻeina?

⁵ E faigofie ona tatou lagona le lē mautonu ma le popole ona o se faamaʻi pipisi. O le mea lenā na tupu i se tuafafine e igoa iā Desi. b Ina ua maliliu le uso o lona tamā, tauusoga, ma se fomaʻi i le KOVITI-19, na fefe o ia ina neʻi pisia i le faamaʻi ma aafia ai lona tinā matua. Na popole foʻi o ia ina neʻi lē toe iai sana galuega ona o le faamaʻi, ma lē mafai ai ona faatau meaʻai ma totogi le fale. Na matuā popole lava le tuafafine ma lē mafai ai ona moe. Ae na ia toe maua le filemu. E faapefea? Na ia tatalo patino iā Ieova mo le fesoasoani ina ia maua ai le toʻafilemu ma ni mafaufauga lelei. (Faitau le Filipi 4:8, 9.) Na ia faalogologo a o fetalai mai Ieova, e ala i faitauga Tusi Paia ua uma ona puʻeina. Na ia faapea mai: “O le mālū o leo o ē o loo faitauina le Tusi Paia, na faatoʻafilemu ai oʻu popolega ma faamanatu mai ai iā te aʻu le alofa mutimutivale o Ieova.”​—Sala. 94:19.

6. E faapefea ona fesoasoani iā te oe au lava suʻesuʻega ma le auai i sauniga a le faapotopotoga?

⁶ O le pipisi o se faamaʻi, e mautinoa o le a faalavelavea ai nisi o vala o lau faasologa masani. Ae ia aua neʻi faalavelavea ai au lava suʻesuʻega po o le auai i sauniga. O tala o mea moni na tutupu o loo maua i a tatou lomiga ma vitiō, e faamanatu atu ai iā te oe le faamaoni pea o o tatou uso ma tuafāfine e ui i luʻi faapena na latou fesagaʻia. (1 Pete. 5:9) E fesoasoani sauniga iā i tatou, e faatumu ai o tatou mafaufau i manatu faalaeiau mai i le Tusi Paia. E tatou te maua ai foʻi avanoa e faalaeiau ai i isi ma faalaeiauina ai i tatou. (Roma 1:11, 12) A o e mafaufau i auala na fesoasoani ai Ieova i ona tagata tapuaʻi ina ua latou mamaʻi, fefefe, pe lagona le tuua toʻatasi, o le a faamalosia ai lou faatuatua ma o le a e mautinoa ai e fesoasoani foʻi Ieova iā te oe.

7. O le ā le lesona e te aʻoaʻoina mai i le aposetolo o Ioane?

 ⁷ Ia taumafai e fesootaʻi ma ou uso ma tuafāfine. O le pipisi o se faamaʻi, e ono manaʻomia ai ona tausisi i le vā faatulagaina e oo lava i taimi e faatasitasi ai ma o tatou uso tapuaʻi. O taimi faapena, atonu e oo ai iā i tatou faalogona na oo i le aposetolo o Ioane. Na manaʻo Ioane e feiloaʻi ma lana uō o Kaio. (3 Ioa. 13, 14) Ae na iloa e Ioane e puupuu se taimi e la te lē fevaaiaʻi ai ma lana uō o Kaio. Peitaʻi, na faia e Ioane le mea e na te mafaia e ala i le tusi atu iā Kaio. Pe afai e lē mafai ona e asiasi i ou uso ma tuafāfine, ia taumafai e vili i ai, lafo i ai se feʻau tusitusia, pe faaaogā fesootaʻiga i le Initaneti e talanoa i ai. Pe a fesootaʻi e lē aunoa ma o tatou uso ma tuafāfine, o le a e lagona ai le malupuipuia ma le filemu. Ia fesootaʻi atu i toeaina aemaise lava pe a e lagona le popole, ma talia a latou faalaeiauga alofa.​—Isa. 32:1, 2.

8. E faapefea ona aafia lo tatou filemu ona o se mala?

⁸ Pe afai na e mafatia ona o se lologa, mafuiʻe, po o se mū, atonu e iai ni mea na matuā faapopoleina ai oe na umi se taimi o e fesagaʻia. Pe afai na maliu se tasi e pele iā te oe pe faaleagaina au meatotino, atonu na e lagona ai le faavauvau, leai o se faamoemoe, po o le ita. E lē faapea ai ua e naunau i meafaitino po ua itiiti lou faatuatua. E faigatā le luʻi na e fesagaʻia, ma atonu e faatalitalia e nisi e te tali atu i se auala lē lelei. (Iopu 1:11) Ae e ui i tulaga faigatā na e fesagaʻia, e mafai lava ona e maua le filemu. E faapefea?

9. Ua faapefea ona sauniunia e Iesu i tatou mo mala?

⁹ Ia manatua le valoaga a Iesu. E tatou te lē pei o nisi i le lalolagi e manatu e lē taitai ona latou aafia i mala. Ae e tatou te faatalitalia e faateteleina mala, ma e mafai ona tatou aafia i nisi o na mala. Na fetalai Iesu i ona soo o le a iai “mafuiʻe tetele,” ma o le a tutupu isi mala a o leʻi oo mai le iʻuga. (Luka 21:11) Na ia valoia foʻi o le a ʻfaatuputeleina le amioleaga,’ lea ua faamaonia i le sasao faaafi o solitulafono, sauāga, ma osofaʻiga a tagata faatupu faalavelave. (Mata. 24:12) E toʻatele auauna faamaoni a Ieova ua aafia i mala. E leʻi fetalai Iesu ua māfua ona tatou aafia i na mala, ona ua tuulafoaʻia i tatou e Ieova. (Isa. 57:1; 2 Kori. 11:25) Atonu e lē puipuia faavavega e Ieova i tatou mai i mala uma, ae e na te foaʻiina mai so o se mea e tatou te manaʻomia ina ia maua ai pea le toʻafilemu.

10. E faapefea i lo tatou sauniuni lelei mo mala ona faaalia ai e tatou te maufaatuatuaina le Atua? (Faataoto 22:3)

¹⁰ E faigofie ona tatou toʻafilemu i le taimi e tupu ai se faalavelave faafuaseʻi, pe afai na tatou muaʻi sauniuni lelei. Ae po o lo tatou sauniuni lelei, e faaalia ai e tatou te lē maufaatuatuaina Ieova? E leai. O le mea moni, o lo tatou sauniuni lelei mo mala, e faaalia ai e tatou te maufaatuatuaina le tausiga a Ieova iā i tatou. E faapefea? Ua lapataʻia i tatou e le Afioga a le Atua ina ia sauniuni mo mala e ono tutupu. (Faitau le Faataoto 22:3.) Ua sauniunia e lē aunoa i tatou e le faalapotopotoga a le Atua mo mala e tutupu faafuaseʻi, e ala mai i mataupu i mekasini, sauniga a le faapotopotoga, ma faasilasilaga. c Pe e tatou te maufaatuatuaina Ieova? Afai o lea, e tatou te usitaʻia lapataʻiga i le taimi lenei a o leʻi tutupu mala.

11. O le ā e te aʻoaʻoina mai i le faaaʻoaʻoga a Margaret?

¹¹ Mātau le mea na tupu i se tuafafine e igoa iā Margaret. Na faatonuina o ia e tuua lona  fale, ina ua sasao se afi tele i le vaipanoa na nofo ai. Talu ai na toʻatele tagata na sosola i lenā taimi, o lea na poloka ai auala ma lē mafai ai ona ō taavale. Na matuā mafiafia le asu uliuli i lenā vaipanoa, ma e leʻi mafai ai ona minoi le taavale a Margaret mo sina taimi. Ae na faasaoina lona ola ona o lona sauniuni lelei. Na ia teuina i lana tamaʻi ato se faafanua o loo faailoa mai ai se auala e ui ai pe a tutupu faalavelave faafuaseʻi. Na iai foʻi le taimi muamua na ui ai le tuafafine i lenā auala, ina ia faigofie ai ona ia mātauina pe a tupu se faalavelave faafuaseʻi. Maʻeu le aogā o le sauniuni lelei o Margaret ma faasaoina ai lona ola!

12. Aiseā e tatou te mulimuli ai i lapataʻiga mo le saogalemu?

¹² Ina ia puipuia i tatou ma tausi le filemu, atonu e faatonuina i tatou e pule o malo ina ia usitaʻia vavao, tuua fale, pe faia isi gaoioiga aogā. O isi tagata e tuai ona usiusitaʻi pe faifaiaga, ona e lē mananaʻo e tuua a latou meafaitino. Ae o le ā le auala e tatau ona tali atu ai Kerisiano? Ua faapea mai le Tusi Paia: “Ia outou gauaʻi ona o le Alii i foafoaga uma a tagata, e tusa lava po o se tupu ona ua sili o ia, po o kovana ua ia aauina atu.” (1 Pete. 2:13, 14) Ua saunia foʻi e le faalapotopotoga a le Atua taʻiala mo lo tatou saogalemu. O loo tatou maua pea faamanatu, ina ia faailoa atu i toeaina faamatalaga lata mai e faatatau iā i tatou e fesootaʻi mai ai pe a tupu faafuaseʻi se mala. Po ua uma ona e faia lenā mea? Atonu e tuuina mai foʻi iā i tatou faamatalaga ina ia nonofo i le fale, pe ō ese mai i se nofoaga, ma le auala e maua ai fesoasoani mo mea e manaʻomia, faapea le taimi ma le auala e fesoasoani ai i isi. Pe a tatou lē usiusitaʻi, o le a lamatia ai o tatou ola ma ola o toeaina. Ia manatua, o loo leoleoina e nei tane faamaoni o tatou ola. (Epe. 13:17) Na faapea mai Margaret, “Ou te matuā talitonu o loʻu mulimuli i faatonuga mai i toeaina ma le faalapotopotoga, na faasaoina ai loʻu ola.”

13. O le ā na fesoasoani i Kerisiano na sosola i isi nofoaga ina ia maua pea le fiafia ma le filemu?

¹³ E toʻatele uso ma tuafāfine ua sosola ese mai i nofoaga na nonofo ai ona o se mala, po o se taua, ua latou faia le mea sili e faamasani ai i nofoaga fou ua faamautū ai, ma na vave ona latou toe faaauau i le auaunaga iā Ieova. Na latou faaaʻoaʻo i Kerisiano i le uluaʻi  senituri, e ala i le faaauau pea ona latou “folafola atu le tala lelei o le afioga a le Atua.” (Galu. 8:4) Na fesoasoani le talaʻiga e latou te taulaʻi ai pea i le Malo nai lo o faigatā na latou fesagaʻia. O lea na latou maua ai pea le olioli ma le filemu.

14. E faapefea ona aafia lo tatou filemu ona o sauāga?

¹⁴ E mafai e sauāga ona aveesea ai mai iā i tatou le tele o mea e tatou te maua ai le filemu. E tatou te lagona le fiafia ma le faamalieina pe a tatou maua le saʻolotoga e faatasitasi ai, ma talaʻi ai e aunoa ma le fefe neʻi puʻea i tatou. Ae pe a aveesea lenā saʻolotoga, atonu e tatou te lagona le popole ma le fefe po o le ā o le a tupu. O ni faalogona masani na. Peitaʻi, e tatau lava ona tatou faaeteete. Na faailoa mai e Iesu e mafai e sauāga ona tautevateva ai ona soo. (Ioa. 16:1, 2) O lea la, e faapefea ona tatou maua pea le filemu a o feagai ma sauāga?

15. Aiseā e lē tatau ai ona tatou fefefe i sauāga? (Ioane 15:20; 16:33)

¹⁵ Ua faapea mai le Afioga a le Atua: “E sauāina foʻi i latou uma e naunau e ola ma le faamaoni i le Atua ma aufaatasi ma Keriso Iesu.” (2 Timo. 3:12) E leʻi faigofie ona talia e se uso e igoa iā Andrei lenā mea, ina ua faasā la tatou galuega i lo latou atunuu. Na ia faapea ifo: ʻE matuā toʻatele Molimau a Ieova i lenei atunuu. E faapefea e le malo ona puʻea i matou uma?’ O na mafaufauga na faapopoleina ai pea o ia nai lo o le maua ai o le filemu. O nisi uso na latou tuuina atu iā Ieova le mataupu, nai lo o le taumafai e mafaufau e lē mafai ona puʻea i latou. Na iloa e na uso atonu o le a puʻea i latou, ma e latou te leʻi lagona le popole e pei o Andrei. O lea, na filifili ai Andrei e faaaʻoaʻo i uiga o na uso, ma maufaatuatuaina atoatoa Ieova. Na ia lagona ai le toʻafilemu ma le olioli e ui i luʻi. E mafai foʻi ona tupu lenā mea iā i tatou. E ui na fetalai Iesu e tatou te faatalitalia sauāga, ae na ia faamautinoa mai foʻi e mafai ona tatou tumau ma le faamaoni.​—Faitau le Ioane 15:20; 16:33.

16. O ā faatonuga e tatau ona tatou usiusitaʻi i ai pe a feagai ma sauāga?

¹⁶ Pe a faasā pe iai ni taofiofiga i la tatou galuega, atonu o le a tuuina mai ni faatonuga e le ofisa o le lālā ma toeaina. O na faatonuga e puipuia ai i tatou, faamautinoa e tatou te  maua pea meaʻai faaleagaga, ma fesoasoani iā i tatou e talaʻi pea i le tele e mafai ai. Ia tatou faia le mea sili e usiusitaʻi ai i faatonuga e tuuina mai, e tusa lava pe e tatou te lē malamalama atoatoa i le māfuaaga ua aumaia ai na faatonuga. (Iako. 3:17) Ia aua lava neʻi faailoa atu faamatalaga e faatatau i o tatou uso ma tuafāfine po o mea fai a le faapotopotoga, iā i latou e lē tatau ona iloaina.​—Fai. 3:7.

17. O le ā ua tatou maumauaʻi e fai e pei ona faia e le ʻauaposetolo i le uluaʻi senituri?

¹⁷ O se tasi o māfuaaga autū e faasagatau ai Satani i tagata o le Atua, ona o loo latou “faia le galuega o le molimau atu e uiga iā Iesu.” (Faaa. 12:17) Aua lava neʻi o tatou fefefe iā Satani ma lana lalolagi. O le talaʻi ma le aʻoaʻo atu, e tatou te maua ai le olioli ma le filemu e ui i teteega. Ina ua faatonuina e taʻitaʻi Iutaia i le uluaʻi senituri le ʻauaposetolo ina ia taofia la latou galuega talaʻi, na filifili na tane faamaoni e usiusitaʻi i le Atua. Na faaauau pea ona latou talaʻi ma na latou maua ai le fiafia. (Galu. 5:27-29, 41, 42) Pe a iai ni taofiofiga i la tatou galuega, e ao ona tatou faautauta a o tatou talaʻi. (Mata. 10:16) Pe a tatou faia le mea sili, e tatou te maua ai le filemu ona o le faafiafiaina o le finagalo o Ieova ma le faia o so tatou sao i lenei galuega faasaoola.

18. O le ā e tatau ona tatou manatua e faatatau i le Puna o le filemu?

¹⁸ Ia mautinoa e mafai ona tatou maua le filemu, e tusa lava pe e tatou te fesagaʻia taimi e sili ona faigatā. E tatau ona tatou manatua, o le filemu e tatou te manaʻomia i na taimi, o le filemu mai i le Atua po o le filemu e na o Ieova e mafai ona aumaia. Ia faalagolago iā te ia pe a feagai ma se faamaʻi pipisi, mala, po o sauāga. Ia piiama atu pea i lana faalapotopotoga. Ia taulaʻi atu pea i le lumanaʻi matagofie o le a tatou olioli ai. Pe a e faia faapea, “ona iā te [oe] lea o le Atua o le filemu.” (Fili. 4:9) O le a tatou talanoaina i le suʻesuʻega o loo sosoo mai, auala e tatou te fesoasoani ai i uso ma tuafāfine o loo feagai ma puapuaga, ina ia latou maua le filemu o le Atua.