1. A o toeitiiti lava maliu Iesu, o le ā na ia fetalai atu ai i le tagata solitulafono na iai i ona autafa? (Luka 23:39-43)

 NA MATUĀ tigāina Iesu ma tamāloloa solitulafono e toʻalua na iai i ona autafa, a o faasolo ina uma o latou ola. (Luka 23:32, 33) Na taufaifai nei tamāloloa iā Iesu, ma e manino mai ai e lē o i laʻua o ni ona soo. (Mata. 27:44; Mare. 15:32) Ae na suia uiga o le isi tagata solitulafono. Na ia faapea mai: “Iesu e, ia e manatua mai aʻu pe a e oo i lou Malo.” Na tali atu Iesu: “E moni ou te fai atu iā te oe i le asō, o le a ta faatasi ma oe i le Parataiso.” (Faitau le Luka 23:39-43.) Atonu na faalogo le tagata solitulafono i le feʻau e faatatau i “le Malo o le lagi” lea na talaʻia e Iesu i le taimi o lana faiva. Peitaʻi, e leʻi avea o ia ma soo o Iesu. E leʻi fetalai foʻi Iesu o le a ola lenā tamāloa i le Malo i le lagi. (Mata. 4:17) Na uiga atu Iesu i le Parataiso i le lalolagi i le lumanaʻi. E faapefea ona faamaonia lenā manatu?

2. E faapefea ona tatou iloa o le tagata solitulafono na faaalia le salamō o se tagata Iutaia?

² E foliga mai o le tagata solitulafono na faaalia le salamō o se tagata Iutaia. Na ia faapea atu i le isi tagata solitulafono: “Pe e te lē mataʻu ea i le Atua, ina ua faasala faatasi i tatou?” (Luka 23:40) E tasi le Atua na tapuaʻi i ai tagata Iutaia, ae e tele atua na tapuaʻi i ai tagata o nuu ese. (Eso. 20:2, 3; 1 Kori. 8:5, 6) Pe ana faapea o na tagata solitulafono e mai i nuu ese, semanū la e faapea le fesili, “Pe e te lē mataʻu ea i o tatou atua?” Na auina mai foʻi Iesu i “mamoe o le aiga o Isaraelu ua leiloloa,” ae e lē o tagata o nuu ese. (Mata. 15:24) Na faailoa atu e le Atua i tagata Isaraelu, e na te toe faatutūina ē ua feoti. Atonu la na iloa e le tagata solitulafono na faaalia le salamō lenei manatu, ma  na faaalia mai i ana upu, na manatu o ia o le a toe faatū e Ieova Iesu e pule i le Malo o le Atua. E manino mai la, na faamoemoe lenei tamāloa e toe faatūina o ia e le Atua.

3. O le ā atonu na manatu i ai le tagata solitulafono na faaalia le salamō, ina ua taʻua e Iesu le Parataiso? Ia faamatala. (Kenese 2:15)

³ Pe afai o le tagata solitulafono na faaalia le salamō o se tagata Iutaia, sa tatau la ona ia iloa e faatatau iā Atamu ma Eva ma le Parataiso na tuu ai e Ieova i laʻua. Na iloa lelei la e le tagata solitulafono o le Parataiso na fetalai ai Iesu, o se faatoʻaga matagofie i le lalolagi.​—Faitau le Kenese 2:15.

4. I le fetalaiga a Iesu i se tasi o tagata solitulafono, o le ā e tatau ona uunaʻia ai i tatou e mafaufau i ai?

⁴ O le fetalaiga a Iesu i le tagata solitulafono, e tatau ona uunaʻia ai i tatou e manatunatu i le ituaiga olaga o le a iai i le Parataiso. O le mea moni, e mafai ona tatou aʻoaʻoina se mea e faatatau i le Parataiso mai i le pulega filemu a le tupu o Solomona. E tatou te faatalitalia o le a galulue Iesu, o lē e sili atu nai lo o Solomona, ma ē e latou te pule faatasi ina ia faamatagofie mea uma i le lalolagi. (Mata. 12:42) E mananaʻo foʻi “isi mamoe” e iloa mea e manaʻomia ona latou faia, ina ia agavaa ai e ola e faavavau i le Parataiso.​—Ioa. 10:16.

5. O le ā le ituaiga olaga e te faatalitalia i le Parataiso?

⁵ O le ā e oso aʻe i lou mafaufau, pe a e manatunatu pe faapeʻī le olaga i le Parataiso? Atonu e te faaata i lou mafaufau se faatoʻaga matagofie e pei o le faatoʻaga o Etena. (Kene. 2:7-9) Atonu e te manatuaina le valoaga i le tusi o Mika, o le a nonofo tagata o le Atua “i lalo o lona vine ma lalo o lona mati.” (Mika 4:3, 4) Atonu e te manatua foʻi folafolaga a le Tusi Paia, o le a fau ma soloi meaʻai i le Parataiso. (Sala. 72:16; Isa. 65:21, 22) Atonu e te faaata lou iai i se togālaau matagofie, o loo iai i ou luma se laulau e tumu i meaʻai susua. O loo e mānavaina se ʻea mamā ma manogi lelei mai i laau ma fugālaau. E te faalogoina foʻi le taliē fiafia mai o aiga ma uō, ma i latou ua toe faatutūina mai. O na mea uma e lē o se miti. E mautinoa o le a tutupu na mea uma i le lalolagi Parataiso. O le a faia foʻi i le Parataiso galuega e faafouina ai.

6. O ā mea o le a tatou faia i le Parataiso? (Tagaʻi i le ata.)

⁶ Na foafoaina i tatou e Ieova ina ia tatou maua le fiafia i a tatou galuega. (Fai. 2:24) O le a tatou matuā pisi lava i le Pulega a Keriso i le Afe Tausaga. O le a manaʻomia e i latou e faasaoina mai i le puapuaga tele ma le faitau miliona o ē e toe faatutūina mai, ni lavalava, meaʻai, ma fale e nonofo ai. E tatou te maua le fiafia pe a galulue mamafa i le saunia o mea manaʻomia mo i latou. E pei lava ona galueaʻiina e Atamu ma Eva le faatoʻaga i Etena, o se faaeaga foʻi mo i tatou le galueaʻiina o le  Parataiso i le lalolagi. Seʻi faaata foʻi lo tatou matuā olioli i le aʻoaʻoina o le faitau miliona o le a toe faatutūina mai, o ē e lē tele lo latou iloa e faatatau iā Ieova ma lona finagalo. Maʻeu foʻi lo tatou olioli e aʻoaʻo auauna faamaoni a Ieova na soifua a o leʻi afio mai Iesu i le lalolagi!

7. O le ā ua tatou mautinoa i ai, ma aiseā?

⁷ E tatou te mautinoa o le a filemu, maua mea uma e tatou te manaʻomia, ma maopoopo le olaga i le Parataiso i le lumanaʻi. Aiseā? Talu ai ua uma ona aumaia e Ieova se faaataga o le ituaiga olaga o le a iai i le pulega a lona Alo. Ua tatou iloa lenā mea i le tala e faatatau i le pulega a le tupu o Solomona.

8. Na faapefea ona faataunuuina i le taimi ua teʻa folafolaga o loo i le Salamo 37:10, 11, 29? (Tagaʻi i le “Fesili Mai le ʻAufaitau” i lenei lomiga.)

⁸ Na faagaeeina le tupu o Tavita e tusi e faatatau i le olaga o le a iai, pe a pule le tupu atamai ma faamaoni i le lumanaʻi. (Faitau le Salamo 37:10, 11, 29.) E masani ona tatou faitau i tagata le Salamo 37:11, pe a talanoa e faatatau i le Parataiso. E talafeagai lelei lenā manatu, auā na sii mai e Iesu lenā mau mai i lana Lauga i Luga o le Mauga, e faailoa mai ai e iai sona faataunuuga i le lumanaʻi. (Mata. 5:5) Ae na faailoa mai foʻi i upu a Tavita le ituaiga olaga o le a iai i aso o le tupu o Solomona. Ina ua pulea e Solomona Isaraelu, na olioli tagata i se olaga filemu ma taulau manuia i se laueleele “o loo tafe ai le suāsusu ma le meli.” Na fetalai le Atua: “Pe afai tou te savavali pea i aʻu tulafono . . . , ou te tuuina le filemu i le atunuu ma e tou te taooto e aunoa ma se isi e faamataʻu mai iā te outou.” (Levi. 20:24; 26:3, 6) Na faataunuuina na folafolaga i le taimi o le pulega a Solomona. (1 No. 22:9; 29:26-28) Na iai foʻi le faamoemoe, o le a “lē toe iai” tagata amioleaga. (Sala. 37:10) O lea la, o folafolaga o loo i le Salamo 37:10, 11, 29, na faataunuuina i aso anamua ma o le a faataunuuina foʻi i le lumanaʻi.

9. O le ā le faamatalaga a le tupu tamaʻitaʻi mai i Seepa e faatatau i le pulega a le tupu o Solomona?

⁹ Na faalogo le tupu tamaʻitaʻi mai i Seepa i  le filemu ma le taulau manuia o tagata Isaraelu, ona o le pulega a Solomona. O lea na malaga ai lenā tupu tamaʻitaʻi i Ierusalema ina ia iloa pe e moni le tala ua ia faalogo i ai. (1 Tu. 10:1) Ina ua ia molimauina le matagofie o le malo o Solomona, na ia faapea mai ai: “E itiiti lava mea na taʻu atu iā te aʻu. . . . E fiafia ou tagata ma e fiafia au auauna o ē o loo tutū e lē aunoa i ou luma, ma faalogo i lou atamai!” (1 Tu. 10:6-8) Peitaʻi o mea matagofie na tutupu i le pulega a Solomona, ua na o sina faaataga o mea o le a faia e Ieova mo tagata i le pulega a Lona Alo o Iesu.

10. O ā itu e sili atu ai Iesu nai lo o Solomona?

¹⁰ E sili atu Iesu nai lo o Solomona i vala uma o le olaga. O Solomona o se tane e lē lelei atoatoa na faia ni mea sesē ogaoga, ma na iʻu ai ina matuā faigatā le olaga o tagata tapuaʻi o le Atua. Ae o Iesu o se Tupu e lelei atoatoa, e leai sana agasala. (Luka 1:32; Epe. 4:14, 15) Na manumalo Iesu i tofotofoga ogaoga a Satani. Ua faamaonia e Keriso e lē mafai ona ia faia se agasala, po o so o se mea e faaleagaina ai ona tagatānuu faamaoni. Maʻeu se faaeaga o le avea o ia ma o tatou Tupu!

11. O le ā le lagolagosua o le a maua e Iesu?

¹¹ O le a galulue faatasi Iesu ma le 144,000 o ē o le a latou pule faatasi, e tausia manaʻoga o tagata ma faataunuu le fuafuaga a Ieova mo le lalolagi. (Faaa. 14:1-3) A o latou soifua i le lalolagi o ni tane ma ni fafine, na latou tofo i le tele o luʻi ma mafatiaga. O lea, o le a avea i latou o ni pule e tigā alofa. O le ā le matafaioi a i latou o le a pule faatasi ma Iesu?

12. O le ā le galuega o le a tuuina atu e Ieova i le 144,000?

¹² E sili atu ona telē le galuega ua tofia i ai Iesu ma ē o le a latou pule faatasi, nai lo o le galuega na tuuina atu iā Solomona. E faitau miliona tagata na tausia e le tupu o Solomona i le atunuu e tasi. Peitaʻi o i latou o le a pule i le Malo o le Atua, o le a fesoasoani i le tausia o le faitau piliona o tagata o le a ola i le lalolagi aoao. Maʻeu se faaeaga mataʻina o le a tuuina atu e Ieova i le 144,000!

13. O le ā e aofia ai i le matafaioi tutasi o le a faia e i latou e pule faatasi ma Iesu?

¹³ O le a auauna le 144,000 o ni tupu ma ni ositaulaga, e pei o Iesu. (Faaa. 5:10) I le Tulafono faa-Mose, o le matafaioi patino a ositaulaga o le puipuia o le soifua mālōlōina lelei o tagata Isaraelu. Ae na latou faamautinoa foʻi, e tausia lelei le itu faaleagaga o tagata. O le Tulafono, o “le ata o mea lelei i le lumanaʻi.” O lea e talafeagai pe a faapea atu, o le a fesoasoani ē o le a pule faatasi ma Iesu i se matafaioi tutasi, o le tausia o manaʻoga faaletino ma faaleagaga o tagata o le Atua. (Epe. 10:1) O le a tatou iloa i le lumanaʻi le auala e fesootaʻi mai ai na tupu ma ositaulaga, i tagatānuu o le Malo o le a ola i le lalolagi. Po o le ā lava le faatulagaga a Ieova, ae e tatou te mautinoa, o le a maua e i latou e ola i le Parataiso i le lalolagi le taʻitaʻiga e latou te manaʻomia.​—Faaa. 21:3, 4.

14. O le ā le faiā a “isi mamoe” ma le “lafu mamoe itiiti”?

¹⁴ Na faasino atu Iesu i ē o le a latou pule faatasi, o “le lafu mamoe itiiti.” (Luka 12:32) Na ia faasino atu foʻi i se isi vaega e taʻua o “isi mamoe.” Ua faia aʻe e nei vaega e lua se lafu mamoe e tasi ma e autasi. (Ioa. 10:16) O loo galulue faatasi nei vaega e lua, ma o le a faaauau pea ona latou galulue seʻia oo ina avea le lalolagi ma Parataiso. I lenā taimi, o le a iai i le lagi “le lafu mamoe itiiti,” ae o le a maua e “isi mamoe” le faamoemoe e ola e faavavau i  le lalolagi. Ae e iai mea e manaʻomia ona faia e “isi mamoe” i le taimi lenei, ina ia agavaa ai e ola e faavavau i le Parataiso.

15. (a) E faapefea ona galulue faatasi “isi mamoe” ma uso o Keriso? (e) E faapefea ona tatou faaaʻoaʻo i le uso o loo i le fale talavai? (Tagaʻi i le ata.)

¹⁵ Na oti le tagata solitulafono na faaalia le salamō, ae e na te leʻi maua le avanoa e faaalia ai lona lotofaafetai iā Iesu. Peitaʻi e tele avanoa ua maua e i tatou o “isi mamoe,” e faaalia ai le lotofaafetai mo mea ua faia e Iesu. O se faataʻitaʻiga, e tatou te faaalia le alofa iā te ia i le auala e tatou te feagai ai ma ona uso faauuina. Na fetalai Iesu o le a ia faamasinoina i tatou, e fua i le auala e tatou te feutagaʻi ai ma ona uso. (Mata. 25:31-40) E tatou te lagolagoina uso o Keriso, e ala i le maelega e fesoasoani iā i latou i le talaʻiga ma le faia o isi ma soo. (Mata. 28:18-20) E tatou te faaaogā lelei la lomiga e suʻesuʻe ai le Tusi Paia, e pei o le tusi Se Olaga Fiafia e Faavavau! Pe afai e lē o iai sau suʻesuʻega faale-Tusi Paia, aiseā la e lē fai ai ma ou sini le ofoina atu o se suʻesuʻega i le tele e mafai ai?

16. O le ā e tatou te faia e sauniuni ai ina ia avea ma tagatānuu o le Malo o le Atua?

¹⁶ E lē manaʻomia ona tatou faatali seʻiloga e tatou te ola i le Parataiso, ona faatoʻā avea lea o i tatou o ni ē e finagalo i ai le Atua e ola i inā. O le taimi lenei e tatou te galulue ai ina ia tautatala ma gaoioi ai ma le faamaoni, ma ia paleni o tatou olaga. Ia faamaoni foʻi iā Ieova, i a tatou paaga faaipoipo, ma o tatou uso Kerisiano. O le tele lava e tatou te faatatauina ai tapulaa a le Atua a o tatou ola i lenei lalolagi amioleaga, o le atili faigofie foʻi lenā ona tatou ola i na tapulaa i le Parataiso. E mafai foʻi ona tatou atiaʻe tomai ma uiga e iloa ai, o loo tatou sauniuni e ola i se lalolagi Parataiso. Tagaʻi i le mataupu “Po ua E Nofosauni e ʻFai ma Ou Tofi le Lalolagi’?” o loo i lenei lomiga.

17. Pe e tatau ona tatou lotovaivai ona o agasala na tatou faia i le taimi ua teʻa? Ia faamatala.

¹⁷ E tatau foʻi ona tatou taumafai e aveese faalogona nofosala, ona o ni agasala matuiā na tatou faia i le taimi ua teʻa. O le mea moni, e lē mafai ona tatou faaaogāina le taulaga togiola e fai ma faamolemolega e ʻfaia ai pea  le agasala ma le loto i ai.’ (Epe. 10:26-31) Ae e tatou te mautinoa pe afai ua tatou salamō moni mai i a tatou agasala matuiā, saʻili le fesoasoani ua saunia e Ieova, ma suia a tatou amioga, ua ia matuā faamagaloina la i tatou. (Isa. 55:7; Galu. 3:19) Ia manatua fetalaiga a Iesu i le ʻau Faresaio: “Ua ou sau e valaau i ē agasala ae lē o ē amiotonu.” (Mata. 9:13) E matuā malosi le taulaga togiola, e mafai ona faamagalo ai a tatou agasala uma.

18. O le ā se mea e te manaʻo e talanoa faatasi ai ma le tagata solitulafono na maliliu faatasi ma Iesu?

¹⁸ Pe e mafai ona e faaata oe i le Parataiso, o loo e talanoa ma le tagata solitulafono na talanoa ma Iesu? E mautinoa e lua te faaalia le lototalisapaia mo le taulaga togiola a Iesu. E te ono fesili i ai po o le ā na tupu i toe itula o le soifuaga o Iesu i le lalolagi, ma ona faalogona ina ua tali atu Iesu i lana talosaga. Atonu o le a ia fesili mai foʻi iā te oe, pe e faapeʻī le ola ai i aso e gata ai i le lalolagi a Satani. O se faaeaga mo i tatou le suʻesuʻe o le Afioga a le Atua ma tagata e pei o lenā tamāloa!​—Efe. 4:22-24.

19. Aiseā o le a matuā pisi ai o tatou olaga i le Parataiso? (Tagaʻi i le ata i le faavaa.)

¹⁹ O le a matuā pisi o tatou olaga i le Parataiso. O le a tele ituaiga tagata e tatou te feiloaʻi i ai, ma galuega faamalieloto o le a tatou faia. Ae o le mea e sili ona tāua, o le a faatuputeleina pea lo tatou iloa e faatatau i lo tatou Tamā alofa i le lagi ma olioli i mea ua ia saunia. E lē gata mai mea e tatou te aʻoaʻoina e faatatau iā te ia, ma o le a tele foʻi mea e tatou te aʻoaʻoina e faatatau i ana foafoaga. O le umi e tatou te ola ai, o le malosi foʻi lenā o lo tatou alofa mo le Atua. Maʻeu lo tatou lotofaafetai iā Ieova ma Iesu ona ua la folafola mai e mafai ona tatou ola e faavavau i le Parataiso!