Ina ua faatonuina e Ieova le uluaʻi tagata ina ia ʻfaatumu le lalolagi ma ia galueaʻiina,’ na ia faailoa mai ai o le a avea le lalolagi atoa ma parataiso. (Kene. 1:28) O i latou o le a ola e faavavau, e tatau foʻi ona usitaʻia lenā faatonuga. I lenā taimi o le a lē pei foliga o le lalolagi o se parataiso, ona ua lē toe iai se faatoʻaga o Etena. O le a tele galuega e manaʻomia ona tatou faia ina ia faamamāina ai vaega o le lalolagi ua faaleagaina.

O lenei mea ua faamanatu mai ai iā i tatou galuega na faia e tagata Isaraelu ina ua toe foʻi i Papelonia. Na tuufua lo latou laueleele mo le 70 tausaga. Ae na valoia e Isaia o le a latou toe faamatagofie lo latou laueleele, ona o le faamanuia a Ieova. Na faailoa mai i le valoaga: “O le a avea lona fanua valevalenoa e pei o Etena, ma lona fanua laugatasi o le toafa e pei o le faatoʻaga a Ieova.” (Isa. 51:3) Na taunuu moni lenā mea i aso o tagata Isaraelu. O le faamanuia foʻi  a Ieova, o le a mafai ai e ē o le a fai ma o latou tofi le lalolagi ona taulau i le faamatagofieina o le lalolagi. O lea, o le taimi lenei e faailoa atu ai lou naunau e faia sou sao i lenā galuega tele.

O se tasi o auala e tatou te faia ai faapea, o le taumafai lea e tausia pea le mamā o o tatou fale ma fanua. E tatou te faia faapea e tusa lava pe e lē tumamā o tatou tuaoi. E mafai foʻi ona tatou fesoasoani i galuega faamamā, ma galuega faaleleia mo le Maota mo Sauniga ma le Maota mo Fonotaga. Pe afai e talafeagai ma lou tulaga, atonu e mafai foʻi ona e talosaga e tauofo e fesoasoani i galuega laveaʻi i taimi o mala. O lou faia faapea e faailoa atu ai ua e nofosauni e fesoasoani pe a tulaʻi mai se manaʻoga. Ia fesili ifo, ʻPe e mafai ona ou aʻoaʻoina ni tomai ou te faaaogāina i le lumanaʻi pe a fai ma oʻu tofi le lalolagi?’

Ina ua faatoʻā uma ona toe faatūina le afafine o Iairo, na fetalai atu Iesu e avatu se meaʻai i le teineitiiti. (Mare. 5:42, 43) Atonu e leʻi faigatā ona saunia meaʻai mo lenā teineitiiti e 12 tausaga. Ae seʻi mafaufau la i le galuega tele e manaʻomia ona faatinoina pe a faataunuuina e Iesu lana folafolaga ʻe faalogo i latou uma o loo i tuugamau i lona leo, ma latou ō mai ai.’ (Ioa. 5:28, 29) E ui e lē o saunia mai e le Tusi Paia ni faamatalaga maʻoti, ae e mautinoa o le a manaʻomia e i latou e toe faatutūina mai ni meaʻai, fale, ma lavalava. E mafai ona e faamaonia atu i le taimi lenei o loo e nofosauni e fesoasoani atu. O nisi nei o fesili e mafai ona iloiloina.

Pe a faasilasila o le a asia la outou faapotopotoga e le ovasia o le matagaluega, pe e te tauofo atu e valaaulia mo se taumafataga? Pe a toe tofia i le fanua se auauna faapitoa faataimi atoa, o se faataʻitaʻiga o se sui o le Peteli po o se ovasia o le matagaluega ua lē toe faaauau, pe e mafai ona e fesoasoani atu e saʻili se fale e nofo ai? Pe a faia se tauaofiaga itumalo po o se tauaofiaga faapitoa i lou vaipanoa, pe e te tauofo e fesoasoani a o leʻi faia le tauaofiaga po ua uma foʻi, pe faaavanoa atu oe e faafeiloaʻi sui usufono?

E tusa ai ma le Galuega 24:15, e tatou te faatalitalia o le a toe faatutūina mai le faitau piliona o tagata. O le toʻatele o i latou, e leʻi aʻoaʻo e faatatau iā Ieova a o leʻi maliliu. O le a latou maua lenā avanoa pe a toetutū mai. a O auauna faamaoni a le Atua ua iai le poto masani, o le a fesoasoani i le aʻoaʻoina o i latou. (Isa. 11:9) O loo tulimataʻia e Charlotte o sē na talaʻi i Europa, Amerika i Saute ma Aferika lenā faaeaga. Na ia faapea mai ma le fiafia: “Ou te tulimataʻia le taimi o le a ou aʻoaʻoina ai ē o le a toe faatutūina mai. Pe a ou faitau e faatatau i se tasi na soifua i le taimi ua teʻa, ou te mafaufau: ʻMaʻimau pe ana iloa e lenei tagata Ieova, atonu e ese le iʻuga e oo i ai.’ Matuā ou naunau lava e aʻoaʻoina i latou o le a toetutū mai e faatatau iā Ieova, ma le fiafia e maua i le auauna iā te ia.”

E oo lava i auauna faamaoni a Ieova na soifua a o leʻi afio mai Iesu i le lalolagi, o le a tele mea e manaʻomia ona latou aʻoaʻoina. Seʻi faaata lo tatou olioli, ma o se faaeaga le faamatalaina atu iā Tanielu o le faataunuuga o valoaga na ia tusia ae e leʻi malamalama i ai. (Tani. 12:8) E mafai foʻi ona tatou fesoasoani i le aʻoaʻoina o Ruta ma Naomi, pe e faapefea ona aofia o laʻua aiga i le gafa o le Mesia. Maʻeu lo tatou olioli i le faia o so tatou sao i se polokalame tau aʻoaʻo atu i le lalolagi aoao, e aunoa ma omiga ma faatosinaga a lenei lalolagi amioleaga!

E faapefea ona e faamaonia atu i le taimi lenei o loo e nofosauni e faia sou sao i lenā polokalame tau aʻoaʻo atu? O se tasi o auala, o lo tatou taumafai lea e faaleleia o tatou tomai i le auala e aʻoaʻo atu ai ma faia e lē aunoa so tatou sao i le galuega talaʻi i le lalolagi aoao. (Mata. 24:14) E tusa po ua faatapulaa mea e mafai ona tatou faia ona o le soifua matua po o isi tulaga, ae e mafai ona atagia atu i au taumafaiga ua e nofosauni e aʻoaʻo ē o le a toe faatutūina mai.

O lea, o le fesili tāua, Po o e tulimataʻia le taimi e fai ai ma ou tofi le lalolagi? Po o e naunau atu i le taimi o le a galulue ai e faaleleia le lalolagi, faapea le saunia o mea e manaʻomia ma le aʻoaʻoina o ē e toetutū mai? E mafai ona e faamaonia atu i le taimi lenei ua e nofosauni e ola i lenā lalolagi, e ala i le faia o galuega e talitutusa ma galuega o le a faia pe a fai ma ou tofi le lalolagi!