1. O le ā e tatau ona faia e se uso Kerisiano ina ia taulau ai?

 NA APOAPOAʻI atu le tupu o Tavita iā Solomona: “Ia e faamalosi ma ia e faatamatane.” (1 Tu. 2:​1-3) O loo faia e uso Kerisiano i aso nei le mea sili e faatatau ai lenā fautuaga. Ina ia taulau i lea vala, e tatau ona latou usitaʻi i tulafono a le Atua ma faatatau mataupu silisili o le Tusi Paia i vala uma o o latou olaga. (Luka 2:52) Aiseā e matuā tāua ai mo uso talavou ona avea o ni Kerisiano taʻumatuaina faaleagaga?

2-3. Aiseā e tāua ai i se uso talavou ona avea ma Kerisiano taʻumatuaina?

² E faataunuu e uso Kerisiano tiute tauave tāua i le aiga ma le faapotopotoga. Uso talavou, e mautinoa ua outou mafaufau i o outou tiute tauave i le lumanaʻi. Atonu o loo e faanaunau e avea o se paeonia, auauna o le faiva, po o se toeaina i le faapotopotoga. Atonu o loo e manaʻo foʻi e faaipoipo ma fai se fanau. (Efe. 6:4; 1 Timo. 3:1) E mafai ona e ausia na sini ma taulau, pe a avea oe o se Kerisiano taʻumatuaina. b

³ O le ā e fesoasoani iā te oe e avea ai o se Kerisiano taʻumatuaina? E iai tomai aogā e manaʻomia ona e aʻoaʻoina. O le ā la e te faia i le taimi lenei e sauniuni ai ma taulau i so o se tiute tauave i le lumanaʻi?

4. O fea e maua ai ni faaaʻoaʻoga lelei e mafai ona e faaaʻoaʻo i ai? (Tagaʻi foʻi i le ata.)

⁴ Ia mātau faaaʻoaʻoga lelei e faaaʻoaʻo i ai. E tele faaaʻoaʻoga lelei o loo i le Tusi Paia o tane i aso anamua, e mafai  ona faaaʻoaʻo i ai uso talavou. Sa latou alolofa i le Atua ma taulimaina tiute tauave eseese i le tausia o ona tagata. E te maua foʻi faaaʻoaʻoga lelei o uso taʻumatuaina i lou aiga ma lau faapotopotoga. (Epe. 13:7) E lē gata i lea, e mafai ona e mulimuli i le faaaʻoaʻoga lelei atoatoa a Iesu Keriso. (1 Pete. 2:21) A o e iloiloina a latou faaaʻoaʻoga, ia mātau o latou uiga mataʻina ona mafaufau lea i auala e faaaʻoaʻo ai iā i latou.—Epe. 12:​1, 2.

5. E faapefea ona e atiaʻe le mafaufau lelei, ma aiseā e tāua ai? (Salamo 119:9)

⁵ Ia atiaʻe ma “leoleo . . . le mafaufau lelei.” (Faata. 3:21) O le tagata e mafaufau lelei, e na te iloiloina laasaga uma a o leʻi faia se gaoioiga. O lea, ia galue mamafa e atiaʻe ma faatumauina le mafaufau lelei. Aiseā? O le toʻatele o tama talavou o le lalolagi e taʻitaʻia i o latou lava manatu, pe taaʻina foʻi a latou gaoioiga i o latou faalogona. (Faata. 7:7; 29:11) E mafai foʻi ona taaʻina oe i auala eseese o fesootaʻiga. Ae e faapefea ona e maua le mafaufau lelei? Ia aʻoaʻoina mataupu silisili o le Tusi Paia ma mafaufau i aogā iā te oe, ona faaaogā lea o na mataupu silisili e faia ai filifiliga e faafiafiaina ai Ieova. (Faitau le Salamo 119:9.) O lou atiaʻe o lenei tomai aogā, o se laasaga tāua lea i le avea ai o oe ma Kerisiano taʻumatuaina. (Faata. 2:​11, 12; Epe. 5:14) Seʻi iloilo la auala e aogā ai le mafaufau lelei i vala nei e lua: (1) le auala e feutagaʻi ai ma tuafāfine ma le (2) o le faia o filifiliga i laʻei ma teuga.

6. E faapefea ona fesoasoani le mafaufau lelei i se uso talavou e faaalia ai le faaaloalo i tuafāfine?

⁶ O le mafaufau lelei e fesoasoani iā te oe e faaalia ai le faaaloalo i tuafāfine. O se tulaga masani ma talafeagai mo uso talavou le fia faauō i se tuafafine Kerisiano. Peitaʻi, o se uso talavou e iai le mafaufau lelei e na te lē faia pe tusia se faamatalaga, pe faia foʻi so o se gaoioiga e faailoa atu ai ni faalogona fetosinaaʻi i so o se tuafafine, seʻi vaganā ua iai se tasi e manaʻo e faaipoipo i ai. (1 Timo. 5:​1, 2) Pe afai ua ia faauō i se tuafafine, e na te puipuia lona talaaga lelei e ala i le faamautinoa e lē iai na o i laʻua i se nofoaga.—1 Kori. 6:18.

7. E faapefea ona fesoasoani le mafaufau lelei i se uso talavou pe a filifilia laʻei ma teuga?

 ⁷ O se tasi o auala e iloa ai ua atiaʻe e se uso talavou le mafaufau lelei, o le faia o filifiliga lelei i laʻei ma teuga. E masani o i latou e faia ma faaauiluma āʻega fou o laʻei, e lē faaaloalo iā Ieova ma ola i ni olaga lē mamā. E atagia mai o latou mafaufauga lē mamā, i ituaiga laʻei e pei o ofu fufusi ma ofu ua pei ai alii o ni tamaʻitaʻi. Pe a faia filifiliga i laʻei, o se uso talavou ua matua faaleagaga e taʻitaʻia o ia i mataupu silisili ma faaaʻoaʻoga lelei a i latou i le faapotopotoga. E fesili ifo o ia: ʻPo o atagia atu i aʻu filifiliga loʻu mafaufau lelei ma le manatu mamafa i isi? Pe e faigofie ona talitonu isi o aʻu o se auauna a le Atua pe a vaai i le auala ou te ofu ai?’ (1 Kori. 10:​31-33; Tito 2:6) O se uso talavou e mafaufau lelei, e faaaloalogia o ia e uso ma tuafāfine ma faafiafiaina ai lona Tamā o Ieova.

8. E faapefea ona avea se uso talavou o sē e maufaatuatuaina?

⁸ Ia maufaatuatuaina. O se uso talavou e maufaatuatuaina, e filigā o ia e faataunuu ona tiute tauave uma. (Luka 16:10) Seʻi mafaufau i le faaaʻoaʻoga lelei atoatoa a Iesu. E leʻi faatamala pe faatalalē o ia. Peitaʻi, na ia faataunuu ona tofiga mai iā Ieova e tusa pe e faigatā. Sa alofa o ia i tagata aemaise lava ona soo, ma na lotomalie e foaʻi lona ola mo i latou. (Ioa. 13:1) O lea, ia faaaʻoaʻo iā Iesu e ala i le galue mamafa e faataunuu so o se tofiga e tuuina atu iā te oe. Pe a e lē mautinoa i le auala e faia ai, ia lotomaulalo ma saʻili mo le fesoasoani a uso taʻumatuaina. Aua le tau na ona faataunuu o ou tiute tauave. (Roma 12:11) Nai lo o lea, ia faataunuu lou tofiga “e pei o loo faia iā Ieova ae e lē o tagata.” (Kolo. 3:23) O le mea moni e te lē lelei atoatoa, o lea ia faamaulalo ma taʻutino atu pe a e faia se mea sesē.—Faata. 11:2.

9. Aiseā e tāua ai i se uso talavou ona atiaʻe tomai aogā?

⁹ E manaʻomia ona aʻoaʻo e se uso talavou tomai aogā, ina ia avea ai ma Kerisiano taʻumatuaina. O nei tomai e fesoasoani iā te oe e taulima ai tiute tauave i le faapotopotoga, maua se galuega e tausia ai oe po o le aiga, ma maua ni faiā lelei ma isi. Seʻi o tatou iloiloina nisi o tomai aogā.

10-11. Pe a lelei le faitau ma le tusitusi, e faapefea ona aogā i se uso talavou ma le faapotopotoga? (Salamo 1:​1-3) (Tagaʻi foʻi i le ata.)

¹⁰ Ia lelei le faitau ma le tusitusi. Ua faapea mai le Tusi Paia, o se tagata e fiafia ma taulau manuia e faitau ma manatunatu i le Afioga a le Atua i aso taʻitasi. (Faitau le Salamo 1:​1-3.) O le faitau o le Tusi Paia i aso taʻitasi e na te iloa ai manatu o Ieova, ma maua ai le mafaufau lelei ma le tofā mamao. (Faata. 1:​3, 4) E manaʻomia tane faapena i le faapotopotoga. Aiseā?

 ¹¹ E saʻili atu uso ma tuafāfine i tane maufaatuatuaina mo taʻiala ma fautuaga faale-Tusi Paia. (Tito 1:9) Pe afai e lelei lau faitau ma lau tusitusi, o le a mafai ona e saunia ni lauga ma tali faalaeiau. O le a mafai foʻi ona e faia ni faamaumauga lelei a o faia au suʻesuʻega, pe faalogologo i lauga i sauniga, fonotaga, ma tauaofiaga. O na faamaumauga o le a mafai ona atiaʻe ai lou lava faatuatua ma faalaeiau atu i isi.

12. O le ā e fesoasoani iā te oe ina ia lelei ai fesootaʻiga ma isi?

¹² Ia atiaʻe le tomai e fesootaʻi ai ma isi. E manaʻomia ona lelei le auala e fesootaʻi ai se uso Kerisiano ma isi. O se uso e lelei le auala e fesootaʻi ai, e faalogologo lelei ma taumafai ia malamalama i manatu ma faalogona o isi. (Faata. 20:5) E mafai ona ia mātauina ituaiga leo, foliga vaaia, ma taga a se isi tagata. E lē mafai ona e aʻoaʻoina lenā tomai pe afai e te lē faifaimea faatasi ma isi. E faigatā ona faaleleia le auala e te fesootaʻi ai ma isi, pe afai e masani ona e faaaogā isi auala e fesootaʻi ai e pei o imeli ma feʻau tusitusia. O lea, ia saʻili avanoa e mafai ona e fesootaʻi tuusaʻo ai ma isi.—2 Ioa. 12.

13. O le ā se isi vala e ao ona aʻoaʻoina e se uso talavou? (1 Timoteo 5:8) (Tagaʻi foʻi i le ata.)

¹³ Ia aʻoaʻo le auala e tausia ai oe lava. E ao i se uso taʻumatuaina ona tausia o ia lava ma lona aiga. (Faitau le 1 Timoteo 5:8.) I nisi atunuu, e aʻoaʻo e uso talavou le auala e fai ai galuega mai i o latou tamā po o se isi tauaiga. Ae i isi atunuu, e latou te aʻoaʻoina ni tomai aogā mai i aʻoga. Po o le ā lava le auala, ae o se mea lelei le aʻoaʻoina o se tomai e mafai ona maua ai sau galuega. (Galu. 18:​2, 3; 20:34; Efe. 4:28) Ia taumafai e iloa oe o se tagata e galue mamafa ma taumafai e faamāeʻa se galuega. O le faia faapea, o le a mafai ai ona maua sau galuega ma tumau ai. O uiga ma tomai na tatou talanoaina, e mafai foʻi ona fesoasoani i se uso Kerisiano e faataunuu ai ona tiute tauave i le lumanaʻi. Seʻi iloilo nisi o na tiute tauave.

14. E faapefea ona sauniuni se uso talavou mo le auaunaga faataimi atoa?

¹⁴ Auai i le auaunaga faataimi atoa. O le toʻatele o uso taʻumatuaina, na amata la latou auaunaga faataimi atoa a o talavou. E fesoasoani le auaunaga paeonia i se uso talavou e iloa ai le auala e galulue ai ma tagata eseese. E mafai foʻi ona fesoasoani iā te ia e  iloa ai le auala e faaaogā ai tupe ma tausisi i ai. (Fili. 4:​11-13) O le paeonia lagolago, o se auala lelei lea e amata ai i le auaunaga faataimi atoa. E auauna le toʻatele o ni paeonia lagolago mo se taimi, ma sauniunia ai i latou e avea ma paeonia sauatoa. O le auaunaga paeonia e maua ai le avanoa mo isi vala o le auaunaga faataimi atoa, e aofia ai le galue i faugāfale po o le Peteli.

15-16. E faapefea ona agavaa se uso talavou e auauna o se tane tofia i le faapotopotoga?

¹⁵ Avea ma auauna o le faiva po o se toeaina. E ao ona avea ma sini o se uso Kerisiano le agavaa e auauna o se toeaina i le faapotopotoga. Ua faapea mai le Tusi Paia o tane e aapa atu i lenei faaeaga, e ao ona ʻnaunau i galuega lelei.’ (1 Timo. 3:1) A o leʻi avea se uso ma toeaina, e ao ona agavaa muamua e avea o se auauna o le faiva. E tele auala aogā e mafai ona fesoasoani ai auauna o le faiva i toeaina. E auauna ma le lotomaulalo toeaina ma auauna o le faiva i o latou uso ma tuafāfine ma maelega i le faiva. E mafai ona agavaa e avea ma auauna o le faiva se uso talavou ua latalata i le 20 ona tausaga. E mafai foʻi ona tofia o se toeaina se auauna o le faiva matuā agavaa ua silia teisi i le 20 ona tausaga.

¹⁶ E faapefea ona e agavaa mo na tiute tauave? Ua faailoa mai i le Tusi Paia nisi o uiga e manaʻomia ona e faaalia. O nei uiga po o agavaa e faavae uma mai i le Tusi Paia ma le alofa iā Ieova, o lou aiga, ma le faapotopotoga. (1 Timo. 3:​1-13; Tito 1:​6-9; 1 Pete. 5:​2, 3) Ia e taumafai malosi e malamalama i na agavaa taʻitasi, ma tatalo mo le fesoasoani a Ieova ina ia e ausia na agavaa. c

17. E faapefea ona sauniuni se uso talavou e avea ma tane ma ulu o se aiga? (Tagaʻi foʻi i le ata.)

¹⁷ Avea ma tane ma ulu o se aiga. Na faailoa mai e Iesu e iai nisi o uso taʻumatuaina e tumau ona nofofua. (Mata. 19:12) Ae pe afai e te filifili e faaipoipo, o le a e taulimaina tiute tauave faaopoopo o le avea ma tane ma ulu o se aiga. (1 Kori. 11:3) E faatalitalia e Ieova se tane ina ia alofa i lana avā ma tausia o ia i le itu faaletino, faalogona, ma le faaleagaga. (Efe. 5:​28, 29) O uiga ma tomai na talanoaina i lenei mataupu e pei o le atiaʻe o le mafaufau lelei, faaaloalo i tuafāfine, ma ia maufaatuatuaina, o le a fesoasoani e avea ai oe ma tane lelei. O le a mafai foʻi ona lava saunia ai oe mo tiute tauave i le avea ai ma tane ma ulu o se aiga.

18. E faapefea ona sauniuni se uso talavou e avea ma tamā?

 ¹⁸ Avea ma tamā. Pe a uma ona e faaipoipo, atonu i se taimi mulimuli ane o le a avea ai oe ma tamā. O lea, e tele lesona e mafai ona e aʻoaʻoina mai iā Ieova i le avea ai ma tamā lelei. (Efe. 6:4) Na faailoa manino mai e Ieova lona alofa ma lona finagalo malie i lona Alo o Iesu. (Mata. 3:17) Pe a avea oe ma tamā, ia faamautinoa atu e lē aunoa i lau fanau e te alofa iā i latou. Ia faamālō atu i ai i mea lelei e latou te faia. O tamā e faaaʻoaʻo iā Ieova, e fesoasoani i a latou fanau e avea o ni Kerisiano taʻumatuaina. E mafai ona e sauniuni i le taimi lenei mo lenā tiute tauave, e ala i le tausia ma le alofa o isi sui o lou aiga ma le faapotopotoga, ma faailoa i ai lou alofa ma lou talisapaia o i latou. (Ioa. 15:9) O le faia faapea, o le a mafai ona fesoasoani iā te oe pe a avea ma tane ma tamā i le lumanaʻi. Peitaʻi i le taimi lenei, e tautele oe iā Ieova, lou aiga, ma le faapotopotoga.

19-20. E faapefea ona avea uso talavou ma Kerisiano taʻumatuaina? (Tagaʻi i le ata i le faavaa.)

¹⁹ Uso talavou, e lē otometi ona avea outou ma Kerisiano taʻumatuaina. E manaʻomia ona outou mātauina ni faaaʻoaʻoga lelei e mulimuli i ai, atiaʻe le mafaufau lelei, ia maufaatuatuaina, aʻoaʻoina tomai aogā, ma sauniuni mo tiute tauave i le lumanaʻi.

²⁰ E iai taimi atonu e te lagona ai le lotovaivai, pe a mafaufau i le tele o mea e manaʻomia ona e faia i le lumanaʻi. Peitaʻi, e mafai ona e taulau. Ia manatua, e matuā naunau Ieova e fesoasoani mai iā te oe. (Isa. 41:​10, 13) E mafai foʻi ona fesoasoani atu iā te oe uso ma tuafāfine o le faapotopotoga. Pe a oo ina avea oe ma Kerisiano taʻumatuaina, o le a e maua se olaga fiafia ma faamalieina. E matou te alolofa tele iā te outou uso talavou. Tau ina ia faamanuia Ieova iā te outou a o outou galulue e avea o ni Kerisiano taʻumatuaina!—Faata. 22:4.