E MAUTINOA e te talisapaia meaalofa eseese a Ieova, e aofia ai le saʻolotoga e te filifili ai le auala e ono faaaogā ai na meaalofa. Ua taʻua i le Tusi Paia, o le uaina o se meaalofa mai i le Atua. Ua faapea mai: “Ua saunia meaʻai ina ia toē ai, ma o le uaina e fiafia ai i le olaga.” (Fai. 10:19; Sala. 104:15) Ae atonu e te mātauina ua feagai nisi ma faafitauli ona o le ʻava malosi. E lē gata i lea, e eseese uma manatu ma tapulaa a le lalolagi aoao i le faaaogāina o le ʻava malosi. O le ā la e fesoasoani i Kerisiano i le faia o filifiliga atamai i lea mataupu?

E tusa po o fea na tatou ola aʻe ai po o a tatou aganuu, ae pe a faaōgatusa o tatou manatu ma filifiliga ma le silafaga a le Atua, o le a tatou maua ai iʻuga aogā.

Atonu e te mātauina le toʻatele o tagata i le lalolagi, e masani ona inu ma inu tele i le ʻava malosi. O nisi e faaaogāina le ʻava malosi ona e lagona ai le toʻafilemu. Ae o isi e inu ina ia mapu ai mai i o latou faafitauli. Peitaʻi i nisi vaipanoa, o se tasi e inu tele i le ʻava malosi, e manatu i ai e matuā malosi lava.

Peitaʻi, e mulimuli Kerisiano i le taʻitaʻiga atamai mai i Lē na foafoaina i tatou. O se faaaʻoaʻoga, ua ia lapataʻia i tatou i āuga leaga o le inu tele i le ʻava malosi. Atonu ua e faitau i le Faataoto 23:​29-35, o loo faamatala ai se tagata onā ma iʻuga e oo i ai. a O Daniel o se toeaina Kerisiano i Europa. E na te manatua lona olaga sa iai muamua a o leʻi avea ma Kerisiano moni. Na ia faapea mai: “O le inu tele na ou faia ai filifiliga lē lelei, ma tutupu ai faafitauli lea e oo mai lava i le taimi lenei o loo oʻu lagonaina ona aafiaga.”

E faapefea ona faaaogā tatau e Kerisiano le filifiliga saʻoloto, ma ʻalofia faafitauli ona o le inu tele i le ʻava malosi? E fesoasoani iā i tatou le faaōgatusa o o tatou manatu ma gaoioiga, ma le silafaga a le Atua.

Seʻi o tatou tilofaʻia faamatalaga a le Tusi Paia e faatatau i le ʻava malosi, ma māfuaaga e taumafa ai e isi le ʻava malosi.

E lē o taʻusalaina i le Afioga a le Atua le faaaogāina o sina ʻava malosi. Ua taʻua i le Tusi Paia o le inuina o le uaina o se mea e maua ai le fiafia, auā ua faapea mai le Failauga 9:7: “Ia . . . ʻai lau meaʻai ma le olioli ma inu lau uaina ma le lotofiafia.” E iai foʻi taimi na taumafa ai Iesu i le uaina ma e faapena foʻi isi auauna faamaoni a Ieova.—Mata. 26:​27-29; Luka 7:34; 1 Timo. 5:23.

Peitaʻi, ua faamanino mai i le Tusi Paia le eseesega o le inu o sina ʻava malosi ma le inu seʻia oo ina onā. Ua taʻua manino i le Efeso 5:18: “Aua foʻi tou te onanā i le uaina.” Ua taʻua foʻi i le Tusi Paia “o ē e onanā . . . e lē fai mo latou tofi le Malo o le Atua.” (1 Kori. 6:10) E matuā taʻusalaina e Ieova le inu tele ma le onā. O lea, e tatou te talisapaia le silafaga a le Atua nai lo o le mulimuli i faiga ua masani ai a tatou aganuu.

E manatu nisi e mafai ona latou inu tele i le ʻava malosi ae e lē onanā ai. Peitaʻi e lē atamai lenā mea. Ua faailoa manino mai i le Tusi Paia, o le “faapologaina i le inu tele i le uaina” e mafai ona aafia ai amioga ma le itu faaleagaga o se tagata. (Tito 2:3; Faata. 20:1) Na lapataʻi mai foʻi Iesu, o le “inu tele” e lē mafai ona ulu atu ai se tasi i le lalolagi fou a le Atua. (Luka 21:​34-36) O le ā la e fesoasoani i se Kerisiano e ʻalofia ai faafitauli ona o le taumafaina o le ʻava malosi?

E matuā afāina se tasi, pe a fua ona manatu e faatatau i le faaaogāina o le ʻava malosi i aganuu na ola aʻe ai. O se faiga atamai mo Kerisiano le faafiafia o Ieova pe a faia filifiliga i meaʻai ma meainu. Ua faamanatu mai i le Tusi Paia: “Pe tou te aai, pe inu, pe faia se isi lava mea, ia faia mea uma lava ina ia faamamaluina ai le Atua.” (1 Kori. 10:31) O nisi nei o fesili ma mataupu silisili o le Tusi Paia e ao ona iloiloina.

Po ou te inuina le ʻava malosi ina ia fiafia mai ai isi iā te aʻu? Ua faapea mai le Esoto 23:2: “Aua e te mulimuli i le toʻatele.” Na lapataʻia e Ieova tagata Isaraelu e aua le mulimuli i tagata o loo faatigā iā te Ia. O loo aogā pea lenā lapataʻiga mo Kerisiano i aso nei. Pe a tatou faataga isi e taaʻina o tatou manatu ma filifiliga i le faaaogāina o le ʻava malosi, o le a iʻu ai ina tatou mamao ese mai iā Ieova ma ana tapulaa.—Roma 12:2.

Po ou te inuina le ʻava malosi ina ia iloa ai e tagata ou te malosi? I nisi aganuu, e leai se afāina o le inu tele ma le inu o le ʻava malosi i le tele o taimi. (1 Pete. 4:3) Peitaʻi, ia mātau le fautuaga lenei i le 1 Korinito 16:13: “Ia mataala, ia tutū mausalī i le faatuatua, ia faatamatane, ma ia faamalolosi.” O lea, pe e mafai moni ona iloa le malosi o se tagata pe a inu le ʻava malosi? O le mea moni e leai. O le ʻava malosi e faigofie ona faasesēina ai mafaufauga o se tagata ma aafia ai ana gaoioiga. O lea o le inu tele i le ʻava malosi, e mafai ona iloa ai lona vaivai. Ua faamatalaina i le Isaia 28:​7, pe a fesēaʻi se tasi ona o le ʻava malosi, o le a tautevateva o ia ma lē mautonu.

O le malosi moni e mai iā Ieova ma e aofia ai le mataala, ma le tutū mausalī i le faatuatua. (Sala. 18:32) E faia e Kerisiano moni lenā mea e ala i le mataala ma faia filifiliga lelei e puipuia ai mai i lamatiaga faaleagaga. Na faaalia e Iesu lenā ituaiga malosi a o iai i le lalolagi, ma na faaaloalogia o ia e tagata ona o lona lototele ma maumauaʻi e faia le mea saʻo.

Po ou te faaaogāina le ʻava malosi e mapu ai mai i faafitauli? Na tusi se faisalamo: “Ina ua lofitūina aʻu i popolega, na e [Ieova] faamāfanafana ma faatoʻafilemu aʻu.” (Sala. 94:19) Pe a lofitūina oe i faafitauli, ia saʻili iā Ieova mo le  fesoasoani ae e lē o le ʻava malosi. O se tasi o auala lelei e faia ai faapea, o le tatalo e lē aunoa iā Ieova. Ua maua foʻi e isi aogā mai i le saʻili atu i fautuaga atamai a se uō taʻumatuaina i le faapotopotoga. O le mea moni o le faaaogāina o le ʻava malosi e mapu ai mai i faafitauli, e mafai ona lē toe maumauaʻi ai se tagata e faia le mea saʻo. (Ho. 4:11) Ua taʻutino mai Daniel lea na taʻua muamua: “Sa ou tauivi ma le lotomafatia ma faalogona nofosala. Na ou inu i le ʻava malosi e foʻia ai faafitauli ae uma ane ua faateteleina ai, aafia ai aʻu faauōga ma isi, ma lē toe iai se lagona mautinoa iā te aʻu lava.” O le ā na fesoasoani iā Daniel? Na ia faapea mai, “Na ou iloa ane ou te manaʻomia le fesoasoani a Ieova ae e lē o le ʻava malosi. O le iʻuga, na mafai ona ou foʻia ma manumalo ai i na faafitauli.” O le mea moni, e nofosauni Ieova i taimi uma e fesoasoani iā i tatou e tusa pe e tatou te manatu ua leai se faamoemoe.—Fili. 4:​6, 7; 1 Pete. 5:7.

Pe afai e te faaaogāina le ʻava malosi, ia faaaogā fesili nei e iloilo ai lou tulaga: ʻPo ua talanoa mai soʻu tauaiga po o saʻu uō vavalalata i ni popolega i loʻu faaaogāina o le ʻava malosi?’ Pe afai o lea, ua faailoa mai ai ua amata ona e aafia i se masaniga po o se faafitauli e te lē o iloaina. ʻPo ua malosi atu laʻu inu i le taimi lenei nai lo o le taimi muamua?’ O le tulaga lenā o se tagata ua faasolo ina pulea e le ʻava malosi. ʻPe e faigatā ona ou lē tagofia le ʻava malosi mo ni nai aso pe sili atu?’ Pe afai o lea, ua amata la ona e aafia i se masaniga e faigatā ona tuu po ua pulea foʻi oe e le ʻava malosi. Pe atonu foʻi ua e manaʻomia se fesoasoani faapitoa ina ia foʻia ai le faafitauli.

O nisi Kerisiano e filifili e lē tagofia so o se ituaiga ʻava malosi, ina ia ʻalofia ai le ono oo i faafitauli ona o le ʻava malosi. O nisi atonu e filifili e lē inu ona e lē fiafia i le tofo o le ʻava malosi. Pe a faia e sau uō lenā filifiliga, ia faaalia le agalelei e ala i le faaaloalogia o lana filifiliga ma aua le faitioina.

Pe atonu foʻi e te filifili o se mea atamai le faatapulaa o le tele o le ʻava malosi e te faaaogāina.  Atonu e te faatulagaina le tele e inu ai le ʻava malosi, atonu e faatasi i le vaiaso pe inu foʻi sina ʻava malosi i nisi taimi e taumafa ai. O nisi e faatapulaa ituaiga ʻava malosi e latou te tagofia, e pei o le inu o sina uaina po o sina pia, ae e latou te lē faaaogāina fagu malosi e tusa lava pe toe sui ma isi meainu. Pe a faatulaga lelei e se tasi se tapulaa, o le a faigofie ona ia tausisi i ai. E lē tatau i se Kerisiano ona matamuli e faia se filifiliga faapena ma maumauaʻi e faia faapea.

O se isi mea e ao ona manatua, o le faaalia o le magafagafa i isi. Ua faapea mai le Roma 14:21: “E sili ona lelei pe a lē ʻai i aano o manu pe inu i le uaina, po o le faia o so o se mea e tausuai ai lou uso.” E faapefea ona e faatatauina lenā fautuaga? Ia faaalia le alofa faaleuso. Pe afai e te iloa o le a tausuai se isi pe a e inuina le ʻava malosi, o le alofa o le a uunaʻia ai oe e lē faia faapea. Ia faaalia le manatu mamafa ma le faaaloalo i faalogona o isi, nai lo o le faamuamua o lou lava lelei.—1 Kori. 10:24.

E lē gata i lea, e iai tulafono a faigāmalo e mafai ona aafia ai filifiliga a se Kerisiano. O na tulafono e ono aofia ai tausaga faatapulaa e mafai ona tagofia ai e se tasi le ʻava malosi, pe faasā foʻi ona aveina le taavale pe faaaogā se masini a o tagofia le ʻava malosi.—Roma 13:​1-5.

Ua faamamaluina e Ieova i tatou, e ala i le tuuina mai o le saʻolotoga e olioli ai i meaalofa ua ia foaʻi mai mo i tatou. O na meaalofa e aofia ai le saʻolotoga e filifili ai a tatou meaʻai ma meainu. Tau ina ia atagia atu i a tatou filifiliga e tāua iā i tatou lenā saʻolotoga, e ala i le faaaogā e faafiafia ai lo tatou Tamā i le lagi!