1. O le ā na faavae ai le faamoemoe o Aperaamo?

 NA FOLAFOLA atu e Ieova i lana uō o Aperaamo, o le a manuia atunuu uma e ala i lana fanau. (Kene. 15:5; 22:18) O le malosi o le faatuatua o Aperaamo i le Atua, na ia mautinoa ai o le a taunuu moni Lana folafolaga. E ui i lea, ina ua 100 tausaga o Aperaamo ae 90 tausaga o lana avā, e leʻi maua lava se tama a lenei ulugalii faamaoni. (Kene. 21:​1-7) Peitaʻi, ua taʻua i le Roma 4:18: “Na faatuatua [Aperaamo] e faavae i le faamoemoe, ina ia avea o ia ma tamā o atunuu e tele, e tusa ma le mea ua fetalai mai ai.” Na taunuu le faamoemoe o Aperaamo ina ua fanau lona atalii o Isaako, o se mea ua leva ona ia faatalitali i ai. O le ā na faavae ai le mautinoa o Aperaamo?

2. Aiseā na mautinoa ai Aperaamo o le a taunuu moni le folafolaga a Ieova?

² O le faiā vavalalata a Aperaamo ma Ieova, na ia ʻmatuā mautinoa ai e mafai e le Atua ona faataunuuina le mea na Ia folafola mai.’ (Roma 4:21) Na finagalo malie Ieova iā Aperaamo, ma taʻua o ia o lē e amiotonu ona o lona faatuatua. (Iako. 2:23) E pei ona taʻua i le Roma 4:​18, e iai le fesootaʻiga o le faatuatua o Aperaamo ma lona faamoemoe. Seʻi o tatou iloiloina la le faamatalaga a le aposetolo o Paulo e faatatau i le faamoemoe o loo taʻua i le Roma mataupu e 5.

3. O le ā na faamatalaina e Paulo e faatatau i le faamoemoe?

³ Na faamatala e Paulo le māfuaaga e tatou te mautinoa ai,  o lo tatou “faamoemoe e lē iʻu ai i le faanoanoa.” (Roma 5:5) Ua ia fesoasoani foʻi iā i tatou e malamalama i le auala e faamalosia ai lo tatou faamoemoe. A o tatou iloiloina vala na taʻua e Paulo i le Roma 5:​1-5, ia manatunatu ifo iā te oe lava. O le faia faapea, o le a e iloa ai auala ua faamalosia ai lou faamoemoe o se Kerisiano a o faagasolo taimi. O le a talanoaina foʻi auala e faamalosia atili ai lo tatou faamoemoe ia sili atu nai lo o le taimi lenei. Seʻi o tatou talanoaina muamua la le faamoemoe matagofie, lea na taʻua e Paulo e lē iʻu atu ai i le faanoanoa.

4. O le ā o loo faamatalaina i le Roma 5:​1, 2?

⁴ Faitau le Roma 5:​1, 2. Na tusi atu e Paulo na upu i le faapotopotoga i Roma. Na aʻoaʻoina le ʻauuso i inā i mea e faatatau iā Ieova ma Iesu, faaalia le faatuatua, ma avea i latou ma Kerisiano. O lea, na “taʻuamiotonuina” i latou e le Atua “ona o le faatuatua,” ma faauuina i latou i le agaga paia. Ioe, sa latou maua se faamoemoe matagofie ma mautinoa.

5. O le ā le faamoemoe mo Kerisiano faauuina?

⁵ Mulimuli ane na tusi atu Paulo i Kerisiano faauuina i Efeso, e faatatau i le faamoemoe na valaauina ai i latou. O lenā faamoemoe e aofia ai le mauaina o le “tofi mo le ʻaupaia.” (Efe. 1:18) Na faailoa atu foʻi e Paulo i Kerisiano i Kolose po o fea e maua ai lo latou faamoemoe, e ala i le faapea atu “o le faamoemoe ua teuina mo outou i le lagi.” (Kolo. 1:​4, 5) O le faamoemoe la mo Kerisiano faauuina, o le faatutūina lea o i latou i le ola e faavavau i le lagi e pule faatasi ai ma Keriso.—1 Tesa. 4:​13-17; Faaa. 20:6.

6. O le ā na taʻua e se uso faauuina e faatatau i lona faamoemoe?

⁶ E matuā tautele i Kerisiano faauuina lo latou faamoemoe. O se tasi o i latou o Frederick Franz, o sē na auauna ma le faamaoni i le Atua mo le tele o tausaga. I le 1991, na ia taʻutino mai: “E moni lo matou faamoemoe ma o le a maua e sui uma o le  144,000 le mea ua folafola mai e le Atua. E sili atu ona tāua lo matou taui nai lo o so o se mea lava e matou te mafaufau i ai. . . . E lē mafai ona mou atu le tāua o lo matou faamoemoe. . . . O le umi e matou te faatali ai, o le atili tautele foʻi lenā iā i matou. O se mea e matuā tautele e tusa pe e faatalitali i ai mo le faitau miliona tausaga. Ua sili atu ona matuā tautele iā te aʻu lo matou faamoemoe nai lo o le taimi muamua.”

7-8. O le ā le faamoemoe o le a maua e le toʻatele? (Roma 8:​20, 21)

⁷ O le toʻatele o auauna a Ieova i aso nei, e ese lo latou faamoemoe. E tutusa lo latou faamoemoe ma Aperaamo, o le ola e faavavau i le lalolagi i le pulega o le Malo o le Atua. (Epe. 11:​8-10, 13) Na tusi Paulo e faatatau i faamanuiaga matagofie o le a tofo i ai i latou e maua lenā faamoemoe. (Faitau le Roma 8:​20, 21.) Ina ua e faatoʻā aʻoaʻoina le folafolaga a le Tusi Paia mo le lumanaʻi, o le ā se mea mataʻina na e tulimataʻia? Pe na e tulimataʻia le taimi o le a e lelei atoatoa ai ma lē toe faapologaina i le agasala? Pe na faagaeetia foʻi oe ina ua e aʻoaʻoina o le a toetutū mai i le lalolagi Parataiso ē pele ua maliliu? O na vala matagofie ua tatou tulimataʻia ai le faamoemoe ua saunia mo i tatou.

⁸ E tusa pe e tatou te ola e faavavau i le lagi po o le lalolagi, ae ua tatou maua se faamoemoe matagofie e olioli ai. E mafai foʻi ona faamalosia atili lo tatou faamoemoe, ma na faamatala mai e Paulo le auala e faia ai. Seʻi o tatou talanoaina la mea na ia taʻua e faatatau i lo tatou faamoemoe. O le faia faapea, o le a atili ai ona tatou mautinoa e taunuu moni lo tatou faamoemoe.

9-10. E tusa ai ma le faaaʻoaʻoga a Paulo, o le ā e faatalitalia e Kerisiano? (Roma 5:3) (Tagaʻi foʻi i ata.)

⁹ Faitau le Roma 5:3. Ia mātau, o puapuaga e ono faamalosia atili ai lo tatou faamoemoe. E ono faateʻia i tatou i lenā manatu.  Ae o le mea moni, e faatalitalia e soo uma o Keriso e oo puapuaga iā i latou. Seʻi mātau le faaaʻoaʻoga a Paulo, na ia faapea atu iā i latou i Tesalonia: “A o matou faatasi ma outou, e masani ona matou muaʻi fai atu iā te outou o le a oo iā i tatou puapuaga.” (1 Tesa. 3:4) Na ia tusi atu foʻi iā i latou i Korinito: “E matou te mananaʻo ina ia outou iloa puapuaga na oo iā i matou . . . Na oo foʻi ina matou popole neʻi o matou feoti.”—2 Kori. 1:8; 11:​23-27.

¹⁰ E faatalitalia foʻi e Kerisiano i aso nei puapuaga. (2 Timo. 3:12) Ae e faapefea oe? O ā ni puapuaga ua oo iā te oe ona o lou faatuatua iā Iesu ma avea ma ona soo? Atonu e ulagia oe e au uō ma ou tauaiga, pe agaleaga atu foʻi iā te oe. Po o inosia oe i lau galuega ona o lou taumafai e faamaoni i mea uma? (Epe. 13:18) Po o e feagai ma teteega mai i malo ona o lou faailoa atu o lou faamoemoe i isi? E tusa po o ā puapuaga e tatou te fesagaʻia, ae na faapea mai Paulo e ao ona tatou olioli pea. Aiseā?

11. Aiseā e manaʻomia ai ona tatou maumauaʻi e tutumau i so o se puapuaga?

¹¹ E mafai ona tatou olioli pe a feagai ma puapuaga, ona ua faapea mai le Roma 5:​3, “o puapuaga e iʻu ai ina tatou tumau.” E tatau i Kerisiano uma ona tutumau, auā e oo puapuaga iā i latou uma. E manaʻomia ona tatou maumauaʻi e tutumau e tusa po o ā puapuaga e tatou te fesagaʻia, ma e pau lea o le auala e maua ai le taui o loo tatou faamoemoe i ai. E tatou te lē mananaʻo e pei o ē na mafaufau i ai Iesu ina ua ia talanoa e faatatau i fatu na paʻuʻū i le mea papa. Sa latou talia ma le fiafia le upu i le taimi muamua, ae “ina ua oo mai puapuaga ma sauāga,” ona latou tautevateva lea. (Mata. 13:​5, 6, 20, 21) O le mea moni, o teteega ma puapuaga e lē o ni mea e fiafia ai, ae e tatou te maua iʻuga lelei pe a tatou tutumau. E faapefea?

12. O ā aogā e tatou te maua pe a tutumau i tofotofoga?

¹² Na faamatilatila e le soo o Iakopo aogā o le tutumau i tofotofoga. Na ia tusi: “Ia atoatoa galuega o lo outou tumau, ina ia atoatoa ma lelei ai outou i mea uma, ma ia leai se mea e mativa ai.” (Iako. 1:​2-4) Na faamatala e Iakopo e tai pei e iai se fuafuaga po o se galuega e faia e le tumau. O le ā lenā galuega? E mafai ona fesoasoani iā te oe e atiaʻe atili ai uiga e pei o le onosaʻi, faatuatua, ma le faalagolago i le Atua. Peitaʻi, e tatou te maua se isi aogā e sili atu pe a tatou tumau.

13-14. O le ā e tatou te maua pe a tumau, ma o le ā le fesootaʻiga o lenā mea i lo tatou faamoemoe? (Roma 5:4)

¹³ Faitau le Roma 5:4. Na taʻua e Paulo e tatou te maua le “finagalo malie o le Atua” pe a tatou tumau. E lē faapea ai e fiafia Ieova pe a e feagai ma tofotofoga po o faafitauli. Peitaʻi, e fiafia o ia ona o lou tumau faamaoni. E matuā faalaeiauina i tatou i le iloaina o lo tatou tutumau e faafiafiaina ai Ieova.—Sala. 5:12.

¹⁴ Ia manatua, na tumau Aperaamo i tofotofoga ma ia maua ai le finagalo malie o le Atua. Na avea o ia ma uō a Ieova ma taʻua o ia o sē e amiotonu. (Kene. 15:6; Roma 4:​13, 22) E faapena foʻi i tatou. E lē faalagolago lo tatou mauaina o le finagalo malie o le Atua, i le tele o mea e tatou te faia i le auaunaga po o faaeaga o loo tatou maua. Ae e tatou te maua lona finagalo malie, pe a tatou tutumau faamaoni. E mafai e i tatou uma ona tutumau e tusa po o le ā lo tatou matutua, tulaga po o tomai. Po o e tumau  faamaoni i se tofotofoga o loo e fesagaʻia i le taimi lenei? Pe afai o lea, ia e manatua o loo e faafiafiaina le finagalo o Ieova. O le iloaina o lenā mea e telē lona aafiaga lelei iā i tatou. E mafai ona faamalosia ai lo tatou faamoemoe.

15. O le ā le isi faamatalaga na taʻua e Paulo, ma aiseā e ono faigatā ai i isi ona malamalama ai?

¹⁵ Na taʻua e Paulo e tatou te maua le finagalo malie o Ieova, pe a tatou tumau faamaoni i tofotofoga. Seʻi mātau lana faamatalaga lenei: “O le finagalo malie o le Atua e [iʻu ai i] le faamoemoe, ma o le faamoemoe e lē iʻu ai i le faanoanoa.” (Roma 5:​4, 5) E ono faigatā ona malamalama nisi i lenei manatu. Aiseā? Muamua atu na taʻua e Paulo i le Roma 5:​2, ua uma ona iai le faamoemoe o Kerisiano i Roma, o le “faamoemoe i le mamalu o le Atua.” E ono fesili nisi, ʻPe afai la ua iai le faamoemoe o na Kerisiano, aiseā la na toe taʻua mulimuli ane ai e Paulo le faamoemoe?’

16. E faapefea ona faamalosia le faamoemoe o se tasi? (Tagaʻi foʻi i ata.)

¹⁶ E mafai ona tatou malamalama i le faamatalaga a Paulo, pe a tatou manatua o le faamoemoe o se mea e faasolosolo ona faamalosia. Pe e te manatua le taimi muamua na e faalogo ai i le faamoemoe matagofie o loo i le Afioga a le Atua? Atonu na e manatu i lenā taimi o le ola e faavavau i se lalolagi parataiso, ua na o se moomooga faivavale. Peitaʻi, a o faasolo ina e iloa lelei Ieova ma folafolaga o le Tusi Paia, na atili ai ona e mautinoa e mafai ona taunuu moni lenā faamoemoe.

17. E faapefea ona faamalosia lou faamoemoe pe a uma ona e tuuina atu ma papatiso?

¹⁷ E tusa po ua uma ona e tuuina atu ma papatiso, ae o le tele o mea e te aʻoaʻoina ma faasolo ina e matua faaleagaga, o le atili faamalosia foʻi lenā o lou faamoemoe. (Epe. 5:13–6:1) Atonu ua e tofo i mea o loo taʻua i  le Roma 5:​2-4. E tele puapuaga na e fesagaʻia, ae na e tumau ma maua le finagalo malie o le Atua. O le mauaina o lona finagalo malie, ua e mautinoa ai o le a e maua mea ua ia folafola mai. Ua atili ai ona malosi lou faamoemoe nai lo o le taimi muamua, ma ua matuā moni foʻi iā te oe. Ua matuā aafia ai vala uma o lou olaga, ma suia le auala e te feutagaʻi ai ma lou aiga, faia filifiliga, ma le faaaogāina o lou taimi.

18. O le ā ua faamautinoa mai e Ieova?

¹⁸ Na taʻua atili e Paulo se manatu tāua e faatatau i lou faamoemoe, pe a e maua le finagalo malie o le Atua. Na ia faamautinoa mai o le a taunuu moni lou faamoemoe. Aiseā e te mautinoa ai i lenā faamatalaga? Na faaaofia e Paulo i lana tusi i Kerisiano, le faamautinoaga lenei mai i le Atua: “O le faamoemoe e lē iʻu ai i le faanoanoa; auā ua liligi mai i o tatou loto le alofa o le Atua e ala i le agaga paia, lea na tuuina mai iā i tatou.” (Roma 5:5) O lea, e tele māfuaaga ua e mautinoa ai i lou faamoemoe.

19. O le ā ua e mautinoa i ai e faatatau i lou faamoemoe?

¹⁹ Ia mafaufau i le folafolaga a Ieova iā Aperaamo, ma le auala na ia maua ai le finagalo malie o le Atua ma avea ai o ia ma ana uō. Na taunuu moni le mea na faamoemoe i ai Aperaamo ma e leʻi iʻu i le faanoanoa, auā ua taʻua i le Tusi Paia: “Ina ua faaalia e Aperaamo le onosaʻi, ona ia maua ai lea o lenā folafolaga.” (Epe. 6:15; 11:​9, 18; Roma 4:​20-22) E mafai foʻi ona e mautinoa o le a e maua le taui o loo e faamoemoe i ai, pe a e tumau faamaoni. O lou faamoemoe o se mea e moni ma o le puna o le olioli, ma e lē iʻu atu i le faanoanoa. (Roma 12:12) Na tusi Paulo: “Tau ina ia faatumuina outou i le olioli uma ma le filemu e le Atua e aumaia le faamoemoe, ona ua outou faatuatua iā te ia, ina ia tupu tele ai lo outou faamoemoe i le mana o le agaga paia.”—Roma 15:13.