Pe na e faitau māeʻaeʻa i lomiga taʻitasi o Le Olomatamata o lenei tausaga? O lea, pe mafai ona e taliina fesili o loo mulimuli mai?

O le ā e aofia ai i le “suia o o outou mafaufau”? (Roma 12:2)

E lē lava le tau ina fai na o ni nai gaoioiga lelei. Ae e aofia ai le iloiloina e lē aunoa o mea o loo i o tatou loto, ma faia suiga manaʻomia ina ia ōgatusa ma tapulaa a Ieova.—w23.01, itu. 8-9.

E faapefea ona iai sa tatou vaaiga paleni a o mātaʻitū mea o loo tutupu i le lalolagi?

E tatou te naunau e iloa auala ua faataunuu ai e mea o loo tutupu i le lalolagi i aso nei valoaga o le Tusi Paia. Nai lo o le taumatemate, lea e ono saveʻu ai le autasi o le faapotopotoga, ae e ao ona faavae a tatou talanoaga i mataupu ua lomia e le faalapotopotoga a Ieova. (1 Kori. 1:10)—w23.02, itu. 16.

O ā vala e ese ai le papatisoga o Iesu mai i le papatisoga o ona soo?

E leʻi manaʻomia ona tuuina atu o ia iā Ieova, talu ai na fanau mai o ia i se nuu ua tuuina atu i le Atua. E leʻi manaʻomia ona salamō Iesu mai i se agasala pe talosaga atu mo se lotofuatiaifo mamā, talu ai o ia o se tagata e lelei atoatoa ma e leai se agasala.—w23.03, itu. 5.

E faapefea ona tatou fesoasoani i isi ina ia fai ni a latou tali i sauniga?

E mafai ona faapupuu a tatou tali. Ia ʻalofia foʻi le taʻua o le tele o manatu, auā o le a leai ai se manatu e tali ai isi.—w23.04, itu. 23.

O le ā e faasino atu i ai “le Ala Paia” o loo i le Isaia 35:8?

I le taimi ua teʻa, na faasino atu lenei ala tele faafaatusa i le ala na uia e tagata Iutaia ina ua ō ese mai i Papelonia e toe foʻi i lo latou nuu. Ae e faapefea aso nei? Mo le tele o senituri seʻia oo i le 1919, na faia ai ni sauniuniga lea na aofia ai le faaliliuina ma le lomiaina o Tusi Paia, ma le tele o isi mea. O loo savavali pea tagata o le Atua i “le Ala Paia” lea e taʻitaʻia atu ai i le parataiso faaleagaga ma maua ai faamanuiaga o le Malo.—w23.05, itu. 15-19.

O ai fafine faafaatusa e toʻalua o loo i le Faataoto e 9?

O loo taʻua i le Faataoto “le fafine valea” ma le “atamai moni.” O le valaaulia a “le fafine valea” e iʻu atu i “le Tuugamau.” Ae o le valaaulia a le “atamai moni,” e iʻu atu i le “ala o le malamalama” ma le ola. (Faata. 9:​1, 6, 13, 18)—w23.06, itu. 22-24.

Na faapefea ona faamaonia le lotomaulalo ma le magafagafa o le Atua ina ua feutagaʻi ma Lota?

Na faatonu e Ieova Lota e alu ese mai i Sotoma ae sola atu i vaega maugā. Ina ua ʻaiʻoi atu Lota e sola i Soara, na talia e le Atua lana talosaga.—w23.07, itu. 21.

O le ā e mafai ona faia e se avā pe a matamata lana tane i ata matagā taufeusuaʻiga?

E tatau ona ia manatua, e lē tatau ona ia tuuaʻia o ia lava. Ia taulaʻi atu i lana faauōga ma le Atua, ma manatunatu loloto i tala faale-Tusi Paia e faatatau i fafine na lagona le mafatia, ae na faamāfanafanaina ina ua tatalo iā Ieova. E mafai ona ia fesoasoani i lana tane e ʻalofia so o se tulaga e ono faaosoosoina ai o ia.—w23.08, itu. 14-17.

Pe a luʻia o tatou talitonuga, e faapefea ona fesoasoani le tofā mamao ina ia tatou agamalu ai?

Ia mafaufau pe e faapefea i na fesili ona fesoasoani iā i tatou e iloa ai manatu po o popolega o le isi tagata. O le faia faapea, e sauniunia ai i tatou e tali atu i se auala agamalu.—w23.09, itu. 17.

O le ā e tatou te aʻoaʻoina mai iā Maria i le auala e maua ai le malosi?

Ina ua iloa e Maria o le a avea o ia ma tinā o le Mesia, na ia saʻili mo le fesoasoani a isi, ma na ia maua ai le malosi. Na faalaeiauina o ia e Kaperielu ma Elisapeta e ala i tusitusiga paia. E tatou te maua foʻi le malosi mai i o tatou uso tapuaʻi.—w23.10, itu. 15.

O ā auala e ono tali mai ai Ieova i a tatou tatalo?

Ua ia folafola mai e na te faafofoga mai iā i tatou, ma e na te silafia foʻi le fesootaʻiga o mea e tatou te talosaga atu ai ma lona finagalo. (Iere. 29:12) E eseese auala e ono tali mai ai o ia, ae e fesoasoani mai pea o ia iā i tatou.—w23.11, itu. 21-22.

O loo taʻua i le Roma 5:2 le “faamoemoe,” aiseā la na toe taʻua mulimuli ane ai i le fuaiupu e 4?

O le taimi muamua e faalogo ai se tasi i le tala lelei, o le a ia aʻoaʻoina ai e faatatau i le faamoemoe o le ola e faavavau i se lalolagi parataiso. Ae pe a ia fesagaʻia puapuaga, tumau ma maua le finagalo malie o le Atua, o le a atili ai ona malosi lona faamoemoe ma matuā moni ai iā te ia.—w23.12, itu. 12-13.