O LE tulaga masani lava e mananaʻo tagata ia olioli o latou olaga. Ae i nei aso e gata ai, o loo feagai tagata uma ma tulaga “faigatā.” (2 Timo. 3:1) E ono mou mālie atu le olioli o isi ona o faiga lē tonu, lē lelei o le soifua mālōlōina, leai ni galuega, lagona faavauvau, po o isi māfuaaga o le popole ma le faanoanoa. E oo foʻi i auauna a le Atua e ono lotovaivai ma amata ona mou atu lo latou olioli. Pe afai ua tupu lenei mea iā te oe, e faapefea ona e toe maua le olioli?

Ina ia tali lenā fesili, e manaʻomia ona tatou malamalama muamua po le ā le olioli moni, ma na faapefea ona maua pea e isi le olioli e ui i faigatā. O le a tatou aʻoaʻoina foʻi mea e mafai ona tatou faia ina ia faatumau ai pea ma faateleina lo tatou olioli.

E lē tatau ona tatou manatu o le olioli e na o le tau ina ʻataʻata po o le laufofoga fiafia. O se faataʻitaʻiga: Pe a faasuāʻavā se tasi, e ʻata o ia ma le fiafia. Ae e teʻa loa le onā, e lē toe ʻata o ia ma e ono toe foʻi lava i le faanoanoa ma le tele o faafitauli. O lana ʻata leotele ma le fiafia mo sina taimi, e lē o se olioli moni lenā.​—Faata. 14:13.

I se faaeseesega, o le olioli o se uiga e mauaa i le loto. Ua faamatalaina lenei uiga “o le faalogona e puna aʻe mai i le mauaina po o le faatalitalia o se mea manaia e fiafia ai.” O le olioli o se uiga fiafia e iai pea iā i tatou e tusa pe sologa lelei le tulaga o mea pe e leai. (1 Tesa. 1:6) O le mea moni, e mafai ona olioli pea se tasi e tusa pe e iai se mea o loo faapopoleina ai o ia. O se faaaʻoaʻoga, na sasaina le ʻauaposetolo ona o le molimau atu e faatatau i le Keriso. E ui i na tulaga, ʻna ō ese i latou mai i luma o le Faamasinoga Sili, ua olioli ina ua taʻuaogāina i latou ia faaleagaina ona o lona suafa.’ (Galu. 5:41) E manino mai e latou te leʻi olioli ona o le sasaina o i latou. Ae i le avea ai ma auauna a le Atua, na latou maua le olioli moni i le tumau pea ma le faamaoni iā te ia.

E tatou te leʻi fananau mai ma lenei uiga o le olioli, pe e otometi foʻi ona tatou atiaʻe. Aiseā? Talu ai o le olioli moni o se vala o le fua o le agaga paia o le Atua. O le fesoasoani a le agaga o le Atua, e mafai ai ona tatou atiaʻe atoatoa “le tagata fou” lea e aofia ai ma le olioli. (Efe. 4:24; Kala. 5:22) Pe a tatou atiaʻe le olioli, e faaleleia atili ai le auala e tatou te taulimaina ai popolega o le olaga.

Na finagalo Ieova ina ia tutupu mea lelei i le lalolagi, nai lo o mea leaga o loo taatele i aso nei. Peitaʻi, e lē mafai e mea leaga o loo faia e isi ona aveesea ai le olioli o Ieova. Ua faapea mai le Afioga a le Atua: “O loo i lona afioaga foʻi le malosi ma le olioli.” (1 No. 16:27) E lē gata i lea, o mea lelei o loo faataunuuina e auauna a Ieova e “faafiafia ai [lona] loto.”​—Faata. 27:11.

E mafai ona tatou faaaʻoaʻo iā Ieova e ala i le lē soona popole pe a lē taunuu mea i le auala na tatou faatalitalia. Nai lo o le mou atu ai o lo  tatou olioli, e mafai ona tatou taulaʻi atu i mea lelei o loo tatou maua i le taimi lenei, ma faatalitali ma le onosaʻi mo tulaga e sili ona lelei i le lumanaʻi. *

O loo iai foʻi le tele o faaaʻoaʻoga mai i le Tusi Paia o i latou na tumau pea le olioli e ui i tulaga faigatā. O Aperaamo o se tasi na onosaia tulaga e lamatia ai le ola ma faafitauli ia na māfua mai i isi. (Kene. 12:10-20; 14:8-16; 16:4, 5; 20:1-18; 21:8, 9) E ui lava i na tulaga faigatā, ae na maua pea e Aperaamo le olioli. I le ā le itu? Na tāmau i lona mafaufau lona faamoemoe o le ola i le lalolagi fou i le pulega a le Mesia. (Kene. 22:15-18; Epe. 11:10) Na fetalai Iesu: “Na matuā olioli lo outou tamā o Aperaamo i le faamoemoe e vaai i mea o le a ou faia.” (Ioa. 8:56) E mafai ona tatou faaaʻoaʻo iā Aperaamo e ala i le manatunatu loloto i le olioli o loo i o tatou luma.​—Roma 8:21.

E pei o Aperaamo, na taulaʻi atu le aposetolo o Paulo ma lana aumea o Sila i folafolaga a le Atua. Na malosi lo laʻua faatuatua ma tumau pea lo la olioli e ui i mea leaga na tutupu iā i laʻua. O se faaaʻoaʻoga, e ui ina sasa faamoʻamoʻa Paulo ma Sila ma tuu i le falepuipui, ae ina ua oo ʻi le vaeluapō, na tatalo i laʻua ma usu viiga i le Atua.’ (Galu. 16:23-25) E faaopoopo atu i le malosi lea e maua mai i lo la faamoemoe, na maua pea e Paulo ma Sila le olioli talu ai sa sauāina i laʻua ona o le suafa o Keriso. E mafai ona tatou faaaʻoaʻo iā Paulo ma Sila e ala i le mafaufau i aogā e maua mai i le auauna ma le faamaoni i le Atua.​—Fili. 1:12-14.

I aso nei, o loo iai i lo tatou ʻauuso le tele o faaaʻoaʻoga lelei o ē na tumau pea lo latou olioli e ui i faigatā. O se faataʻitaʻiga, ina ua taia vaipanoa i le ogatotonu o Filipaina i le afā malosi o Haiyan iā Novema 2013, na matuā faaleagaina le silia ma le 1,000 fale o aiga Molimau a Ieova. Na faapea mai George o se tasi na matuā faaleagaina lona fale sa i le aai o Tacloban: “E ui i le mea na tupu, ae o loo maua pea e uso le fiafia. E faigatā ona ou faamatalaina le olioli o loo matou lagonaina.” Pe a tatou feagai ma le tele o faigatā, e faatumauina lo tatou olioli pe a manatunatu loloto ma lotofaafetai mo mea ua faia e Ieova mo i tatou. O ā isi mea ua saunia e Ieova ua avea ma māfuaaga e tatou te olioli ai?

E leai se isi māfuaaga e sili atu e tatou te olioli ai nai lo o le iai o se faiā ma le Atua. Seʻi mafaufau: Ua tatou iloa le Pule Silisili Ese i le Aoao o Mea. O ia o lo tatou Tamā, Atua, ma o la tatou Uō.​—Sala. 71:17, 18.

E tatou te faatāua foʻi le meaalofa o le ola ma auala e tatou te olioli ai i le olaga. (Fai. 3:12, 13) I le avea ai o i tatou o ni foafoaga atamamai ua tosina atu e Ieova, ua tatou malamalama la i lona finagalo mo i tatou. (Kolo. 1:9, 10) O lea, ua tatou maua ai se fuafuaga moni i le olaga ma se taʻitaʻiga. Ae i le isi itu, o le toʻatele o tagata e latou te lē iloa po o le ā le fuafuaga o o latou olaga. Na faamatilatila e Paulo lenei faaeseesega ina ua tusi o ia: “ʻE leʻi vāai mata, e leʻi faalogo taliga, ma e leʻi lagona foʻi e loto o tagata mea ua saunia e le Atua mo ē e alolofa iā te ia.’ Auā ua faaalia mai e le Atua iā i tatou nei mea e ala i lona agaga.” (1 Kori. 2:9, 10) Pe e tatou te lē olioli ai i le iloaina o le fuafuaga ma le finagalo o Ieova?

Ia mātau isi mea ua faia e Ieova mo ona tagata. Pe e tatou te lē fiafia ona e mafai ona faamagaloina a tatou agasala? (1 Ioa. 2:12) O le alofa mutimutivale o le Atua ua tatou maua ai se faamoemoe mautinoa ua toeitiiti ona iai lea o se lalolagi fou. (Roma 12:12) E oo lava i le taimi lenei, ua saunia mai e Ieova se ʻauuso o tagata tapuaʻi. (Sala. 133:1) Ua faamautinoa mai foʻi i le Afioga a le Atua e puipuia e Ieova ona tagata mai iā Satani ma ana temoni. (Sala. 91:11) Pe a tatou manatunatu loloto i faamanuiaga uma nei mai i le Atua, o le a atili mauaa ma faateleina ai lo tatou olioli.​—Fili. 4:4.

Pe e mafai e se Kerisiano ua maua le olioli ona faateleina lona olioli? Na fetalai Iesu: “Ua ou tautala atu i nei mea iā te outou, ina ia iā te outou loʻu olioli, ma faaatoatoaina ai lo outou olioli.” (Ioa. 15:11) Pe e lē o faailoa mai i nei upu e mafai ona faateleina lo tatou olioli? E mafai ona e faatusaina au taumafaiga ina ia faateleina lou olioli i le tafuina o se afi. Ina ia matuā aasa le afi, e tatau ona e tuu i ai fafie. I se tulaga talitutusa, ina ia faateleina lou olioli e tatau ona e fafagaina lou itu faaleagaga. Ia manatua, e mafai ona faateleina le olioli e ala i le agaga o le Atua. O lea, o le a faateleina lou olioli e ala i le talosaga atu pea mo le fesoasoani a le agaga o Ieova, ma manatunatu loloto e lē aunoa i lana Afioga faagaeeina.​—Sala. 1:1, 2; Luka 11:13.

E faateleina foʻi lou olioli e ala i le maelega i galuega e faafiafiaina ai Ieova. (Sala. 35:27; 112:1) Aiseā? Talu ai na foafoaina i tatou ina ia ʻmatataʻu i le Atua moni ma tausi i ana poloaʻiga. Auā o le matafaioi lea a tagata.’ (Fai. 12:13) I se isi faaupuga, na foafoaina i tatou ina ia faia le finagalo o le Atua. Pe a tatou auauna la iā Ieova, o le a tatou maua ai le olioli i le olaga. *

A o tatou atiaʻe le olioli mai i le Atua, o le a tatou tofo i aogā e sili atu nai lo o le tau ina iai o ni faalogona fiafia. O se faataʻitaʻiga, o le a sili atu ona fiafia mai lo tatou Tamā i le lagi a o tatou auauna iā te ia ma le olioli, e tusa lava po o ā faafitauli o loo tatou fesagaʻia. (Teu. 16:15; 1 Tesa. 5:16-18) O le mauaina foʻi o le olioli moni, o le a tatou teena ai se olaga o le manaʻo tele i meafaitino, ae fai le tele o faataulaga mo le Malo o le Atua. (Mata. 13:44) Pe a tatou vaaia aogā e maua mai ai, o le a faateleina lo tatou olioli, maua le ola mālōlōina, ma faateleina ai le fiafia o isi.​—Galu. 20:35; Fili. 1:3-5.

O le faamatalaga lenei a se tagata suʻesuʻe i le iunivesite o Nebraska i le Iunaite Setete, ina ua uma ona ia iloiloina ni suʻesuʻega sa fai e faatatau i le soifua mālōlōina: “Pe afai o loo e fiafia ma faamalieina lou olaga i le taimi nei, o le a iai se aafiaga lelei i lou soifua mālōlōina i le lumanaʻi.” Ua ōgatusa lenā manatu ma le faamatalaga a le Tusi Paia: “O le loto e fiafia e aogā auā e mālōlō ai.” (Faata. 17:22) O le mea moni, a o faateleina lou olioli, o le a iai se aafiaga lelei i lou soifua mālōlōina.

E ui lava la o loo tatou ola i taimi e sili ona faigatā, ae e mafai ona tatou atiaʻe le olioli moni ma tumau a o tatou mauaina le agaga paia e ala i le tatalo, suʻesuʻe, ma manatunatu loloto i le Afioga a le Atua. E faateleina foʻi lo tatou olioli a o tatou mafaufau i faamanuiaga o loo tatou maua i le taimi lenei, faaaʻoaʻo i le faatuatua o isi, ma taumafai e fai le finagalo o le Atua. O le iʻuga, e tatou te talitonu ai i le moni o upu o loo i le Salamo 64:10 e faapea: “E olioli lē e amiotonu iā Ieova, ma e sulufaʻi atu lava iā te ia.”