1, 2. (a) O le ā le vaaiga a le toʻatele i le avea ai ma tagata faaleagaga? (e) O ā fesili autū e faatatau i le avea ai ma tagata faaleagaga o le a tatou talanoaina?

UA FAAPEA mai se tuafafine i Kanata, “O le avea ma tagata faaleagaga ua atili ai ona ou fiafia, ma fesoasoani iā te aʻu e fesagaʻia ai ma le taulau manuia tulaga faigatā i aso taʻitasi.” Ua taʻua e se uso mai i Pasili, “O a ma taumafaiga ina ia avea o ni tagata faaleagaga ua ma maua ai le fiafia i le 23 tausaga talu ona ma faaipoipo.” Ua fai mai foʻi se uso mai i Filipaina, “O le avea ma tagata faaleagaga ua ou maua ai le filemu o le mafaufau, ma fesoasoani iā te aʻu e faaleleia le auala ou te feutagaʻi ai ma uso e eseese o latou talaaga.”

² O faamatalaga faapena ua faailoa mai ai le tāua o le avea ma tagata faaleagaga. O le iʻuga, e ono uunaʻia ai i tatou e fesili ifo, ʻE faapefea ona ou tuputupu aʻe o se tagata faaleagaga ma maua atoatoa aogā e pei ona taʻua i le palakalafa muamua?’ A o leʻi taliina lenā fesili, e manaʻomia ona tatou malamalama lelei i le manatu o le Tusi Paia e faatatau i tagata faaleagaga po o tagata e mafaufau faaleagaga. O le a taliina i lenei mataupu ni fesili autū se tolu. (1) O le ā le uiga o le avea ma tagata faaleagaga? (2) O ā faaaʻoaʻoga o le a fesoasoani iā i tatou e tuputupu aʻe ai faaleagaga? (3) E faapefea  i a tatou taumafaiga ina ia iloa “le finagalo o Keriso,” ona fesoasoani iā i tatou e avea ai ma tagata faaleagaga?

3. E tusa ai ma faamatalaga a le Tusi Paia, o le ā le eseesega o le tagata faaletino ma le tagata faaleagaga?

³ Ua fesoasoani mai le aposetolo o Paulo ina ia tatou malamalama po o le ā e faasino i ai le tagata faaleagaga, e ala i le faia o se faaeseesega o le “tagata faaleagaga” ma le “tagata faaletino.” (Faitau le 1 Korinito 2:14-16.) O le ā le eseesega? Ua faamatalaina le “tagata faaletino” e faapea, e na te lē taliaina “mea ua faaalia mai e le agaga o le Atua, auā o mea valea ia iā te ia; ma e lē mafai ona ia iloa na mea.” Ae i le isi itu, o le “tagata faaleagaga” e na te ʻsuʻesuʻeina mea uma lava’ ma iloa “le finagalo o Keriso.” Ua faalaeiauina i tatou e Paulo ina ia avea o ni tagata faaleagaga. O ā isi vala e eseese ai le tagata faaletino ma le tagata faaleagaga?

4, 5. O ā uiga e iloa ai se tagata faaletino?

⁴ Muamua, ia mātau uiga o se tagata faaletino. Ua taatele i le lalolagi le uiga lea o le faamalie o tuʻinanauga o le tino. Ua faamatalaina e Paulo lenā uiga “o le agaga lea o loo galue i fanau e lē usiusitaʻi.” (Efe. 2:2) O lenā agaga ua uunaʻia ai le toetoe o tagata uma ina ia mulimuli i taaʻiga a le toʻatele. E latou te taulaʻi atu i tuʻinanauga o le tino. O le iʻuga, ua faia ai e le toʻatele mea e latou te manatu e saʻo i o latou lava mafaufau, ma lē faia ai ni taumafaiga e ola e ōgatusa ma tapulaa a le Atua. O le tagata faaletino po o le tagata e mafaufau faaletino, e masani lava e soona faatāua tulaga taualoa ma le saʻilia o meafaitino, po o le puipuia foʻi o mea ua ia manatu i ai o lana aiā tatau.

⁵ O ā isi mea e iloa ai se tagata faaletino? O le tagata faaletino e aofia ai i latou e faia so o se “galuega a le tino.” (Kala. 5:19-21) Na faailoa mai i le tusi muamua a Paulo i le faapotopotoga i Korinito le tele o isi uiga e iloa ai le tagata faaletino. E aofia ai le faatupu o fevaevaeaʻiga, faaituʻau, finauvale, ave e le tasi o le isi i le faamasinoga, lē amanaʻia le tulaga ulu, ma faamamafa naʻuā meaʻai ma meainu. Pe a feagai le tagata faaletino ma faaosoosoga, o le a faavaivai o ia ma lolo atu i ai. (Faata. 7:21, 22) Na taʻua e Iuta o i latou e matuā faaletino o latou mafaufau, o le a iʻu ina “lē ano i mea faaleagaga.”​—Iuta 18, 19.

6. E faapefea ona iloa se tagata faaleagaga?

⁶ O le ā la e uiga i ai le avea ma “tagata faaleagaga”? O le tagata faaleagaga e manatu mamafa i le la faiā ma le Atua, e tuufaafeagai lenā ma le tagata faaletino. E tauivi tagata e mafaufau faaleagaga ina “ia faaaʻoaʻo i le Atua.” (Efe. 5:1) O lona uiga e latou te faia taumafaiga ina ia iloa po o le ā le finagalo o Ieova i se mataupu, ma vaai i mea e pei ona silasila i ai o ia. E moni le Atua iā i latou. I le lē pei o tagata faaletino, e taumafai tagata faaleagaga e faaōgatusa o latou ala uma ma tapulaa a Ieova. (Sala. 119:33; 143:10) Nai lo o le taulaʻi atu i galuega a le tino, e taumafai malosi le tagata e mafaufau faaleagaga e faaalia “le fua o le agaga.” (Kala. 5:22, 23) Ina ia faamanino atili le faaupuga “tagata e mafaufau faaleagaga,” seʻi mafaufau i le faatusatusaga lenei: O le tagata e lelei i faiga faapisinisi e mafai ona taʻua o se tagata faipisinisi, e faapena foʻi le tagata e taulaʻi atu i mea faaleagaga e mafai ona taʻua o le tagata faaleagaga.

7. O le ā le faamatalaga a le Tusi Paia e faatatau iā i latou e mafaufau faaleagaga?

⁷ O loo taʻuleleia i le Tusi Paia i latou e mafaufau faaleagaga. Ua faapea mai le Mataio 5:3: “E fiafia o ē e naunau i mea faaleagaga, auā e fai mo i latou le malo o le lagi.” O loo taʻua i le Roma 8:6 aogā o le avea ma tagata e mafaufau faaleagaga e faapea: “O le uaʻi atu i le tino, e iʻu ai i le oti, a o le uaʻi atu i le agaga, e iʻu ai i le ola ma le filemu.” O le taulaʻi atu i mea faaleagaga ua tatou maua ai  le filemu ma le Atua, filemu o le mafaufau, ma le faamoemoe o le ola e faavavau i le lumanaʻi.

8. Aiseā e manaʻomia ai ona tauivi e atiaʻe ma faatumauina lo tatou tulaga o ni tagata faaleagaga?

⁸ Peitaʻi, o loo tatou ola i se lalolagi leaga. Talu ai o loo siʻomia i tatou i tagata e faaletino o latou uiga, e manaʻomia ai ona tatou taumafai malosi ina ia atiaʻe lo tatou tulaga o ni tagata faaleagaga ma ia leoleomalu lenā tulaga. Pe a lē malosi faaleagaga se tasi, ua ia tatalaina atu se avanoa e sao mai ai le “ʻea” lea ua faaleagaina po o mafaufauga faaletino o lenei lalolagi, ma faatumu ai lona mafaufau. O le ā e fesoasoani iā i tatou ina ia ʻalofia ai le tupu o lenā mea? E faapefea ona tatou tuputupu aʻe faaleagaga?

9. (a) O le ā e fesoasoani iā i tatou ina ia tuputupu aʻe ai faaleagaga? (e) O ā faaaʻoaʻoga o tagata faaleagaga o le a tatou iloiloina?

⁹ E mafai ona faatagata matua i le mafaufau se tamaitiiti, e ala i le mātauina o ona mātua ma mulimuli i a la faaaʻoaʻoga lelei. I se tulaga talitutusa, e mafai ona tatou tuputupu aʻe faaleagaga e ala i le mātau ma faaaʻoaʻo i tagata e malolosi faaleagaga. I le isi itu, ua avea tagata faaletino ma faaaʻoaʻoga lapataʻi mo i tatou. (1 Kori. 3:1-4) O loo iai i le Tusi Paia faaaʻoaʻoga o tagata faaleagaga ma tagata faaletino. Ae ona o lo tatou sini ina ia tuputupu aʻe o ni tagata faaleagaga, seʻi o tatou iloilo la nisi o faaaʻoaʻoga lelei e mafai ona tatou faaaʻoaʻo i ai. O le a tatou iloiloina faaaʻoaʻoga a Iakopo, Maria, ma Iesu.

10. Na faapefea ona faaalia e Iakopo o ia o se tagata faaleagaga?

¹⁰ Seʻi iloilo muamua le faaaʻoaʻoga a Iakopo. E leʻi faigofie le olaga na ola ai Iakopo e pei foʻi o le toʻatele o i tatou i aso nei. Sa onosaʻi Iakopo i lona uso o Esau, o lē na mafaufau faaletino ma manaʻo e fasioti o ia. E lē gata i lea, sa ia feagai foʻi ma faiga taufaaʻoleʻole a le tamā o lana avā. E ui lava la ina siʻomia o ia i tagata “faaletino” ae na tumau pea ona avea Iakopo ma tagata faaleagaga.  Na faatuatua o ia i le folafolaga na faia iā Aperaamo ma faamaoni i le tausia o lona aiga, o ē o le a iai se matafaioi faapitoa i le faataunuuina o le finagalo o Ieova. (Kene. 28:10-15) O faamatalaga ma gaoioiga a Iakopo na faaalia ai sa tamau pea i lona mafaufau tapulaa a le Atua ma lona finagalo. O se faaaʻoaʻoga ina ua faamataʻu ane Esau, na faapea atu Iakopo i le Atua: “Ou te tatalo atu iā te oe ina ia e laveaʻiina aʻu . . . Na e fetalai, ʻOu te tausia lelei lava oe, ou te faatoʻateleina lau fanau e pei o le oneone i le sami.’” (Kene. 32:6-12) E manino mai na ia faatuatuaina folafolaga a Ieova iā te ia ma ona augātamā, ma na manaʻo foʻi e gaoioi e ōgatusa ma le finagalo ma le fuafuaga a le Atua.

11. O ā faamaoniga e iloa ai o Maria o se tagata faaleagaga?

¹¹ Seʻi o tatou talanoa nei i le faaaʻoaʻoga a Maria. Aiseā na filifilia ai e Ieova Maria e avea ma tinā o Iesu? O le mea mautinoa ona o ia o se tagata e mafaufau faaleagaga. E faapefea ona faamaonia lenā manatu? Na faamaonia i ana faaupuga matagofie o viiga ina ua asiasi atu i le fale o ona tauaiga o Sakaria ma Elisapeta. (Faitau le Luka 1:46-55.) O faamatalaga a Maria na iloa ai sa matuā naunau o ia i le Afioga a le Atua, ma sa ia iloa lelei Tusitusiga Paia Eperu. (Kene. 30:13; 1 Samu. 2:1-10; Mala. 3:12) Mātau foʻi, e ui lava faatoʻā la faaipoipo ma Iosefa, ae e la te leʻi feusuaʻi seʻia oo lava ina fanau mai Iesu. O le ā ua faailoa mai ai? Ua taʻu mai ai na sili atu lo la faatāua o le finagalo o Ieova nai lo o le faamalieina o o laʻua manaʻoga. (Mata. 1:25) A o faagasolo taimi, na mātaʻitū lelei e Maria mea na tutupu a o tuputupu aʻe Iesu ma uaʻi atu i upu atamai na fetalai ai o ia. E lē gata i lea, na ia ʻtaofimau pea i lona loto nei mea uma.’ (Luka 2:51) Na matuā naunau o ia e iloa po o le ā le finagalo o le Atua e faatatau i le Mesia. Pe e lē uunaʻia i tatou i le faaaʻoaʻoga a Maria, ina ia mafaufau i auala e faamuamua ai i o tatou olaga le faia o le finagalo o le Atua?

12. (a) Na faapefea ona faaatagia mai e Iesu lona Tamā? (e) E faapefea ona tatou mulimuli i le faaaʻoaʻoga a Iesu? (Tagaʻi i le ata i luga aʻe o le matua.)

¹² I tagata uma na soifua mai, o ai le faaaʻoaʻoga e sili ona mataʻina o se tagata faaleagaga? O le mea moni o Iesu. Na ia faaalia i lona olaga atoa ma lana faiva, e manaʻo e faaaʻoaʻo i lona Tamā o Ieova. Na pei o ia o Ieova i ona mafaufauga, lagona, ma gaoioiga, ma na ola foʻi e ōgatusa ma le finagalo o le Atua ma ana tapulaa. (Ioa. 8:29; 14:9; 15:10) O se faaaʻoaʻoga, mātau le auala na faamatalaina ai e le perofeta o Isaia lagona alofa mutimutivale o Ieova, ona faatusatusa lea i le faamatalaga a le tusitala o le Evagelia o Mareko e faatatau i lagona o Iesu. (Faitau le Isaia 63:9; Mareko 6:34.) Pe e pei i tatou o Iesu e nofosauni e faaalia le alofa mutimutivale i ē o loo manaʻomia le fesoasoani? Sa tuutoina atu foʻi Iesu i le galuega o le talaʻi ma aʻoaʻo atu le tala lelei. (Luka 4:43) O na lagona ma gaoioiga uma, o faailoga ia e iloa ai se tagata faaleagaga.

13, 14. (a) O le ā e mafai ona tatou aʻoaʻoina mai i faaaʻoaʻoga i aso nei o i latou e mafaufau faaleagaga? (e) Faamatala mai se faaaʻoaʻoga.

¹³ E ese mai i faaaʻoaʻoga faale-Tusi Paia, o loo tele faaaʻoaʻoga i aso nei o i latou e mafaufau faaleagaga na faia taumafaiga maumauaʻi e faaalia uiga o Keriso. Atonu na e mātauina lo latou maelega i le faiva, o latou uiga mataʻina o le agaga talimālō, lo latou alofa mutimutivale, po o isi foʻi uiga lelei. I le pei o i tatou, e latou te tauivi foʻi ma vaivaiga ma le tulaga lē lelei atoatoa a o taumafai e atiaʻe na uiga o le Atua. Ua faapea mai Rachel o se tuafafine mai i Pasili: “Na ou fiafia e faataʻitaʻi i āʻega a le lalolagi. O le iʻuga, ou te leʻi faia ni laʻei e onomea ma talafeagai. Ae o le aʻoaʻoina o le upu moni na uunaʻia ai aʻu e faia ni suiga manaʻomia ina ia avea ai o se tagata faaleagaga. E leʻi faigofie le faia o suiga, ae ua ou  maua ai se olaga e sili ona fiafia ma se fuafuaga moni o loʻu olaga.”

¹⁴ E ese le luʻi na feagai ma Reylene mai i Filipaina. Na taulaʻi atu o ia i le saʻilia o aʻoaʻoga maualuluga ma se galuega e lelei le totogi, ina ia taulau manuia ai i le olaga. Ua ia faapea mai: “Na faasolosolo ina lē toe tāua iā te aʻu oʻu sini faaleagaga. Ae na ou lagona e iai le mea o loo misia i loʻu olaga, o se mea e sili atu ona tāua nai lo o laʻu galuega. O lea, na faasaʻo ai laʻu vaai ma toe taulaʻi atu i laʻu auaunaga iā Ieova.” Talu mai lenā taimi, ua avea Reylene o se faaaʻoaʻoga lelei o le faatuatuaina o le folafolaga a Ieova o loo i le Mataio 6:33, 34. Ua faapea mai Reylene: “Ou te mautinoa e tausia aʻu e Ieova.” Atonu e te iloa nisi o la outou faapotopotoga o loo faia foʻi faapea. Pe e lē uunaʻia i tatou e faaaʻoaʻo i na auauna faamaoni a o latou mulimuli i le Keriso?​—1 Kori. 11:1; 2 Tesa. 3:7.

15, 16. (a) Ina ia faaaʻoaʻo i le Keriso, o le ā e manaʻomia ona tatou faia? (e) E faapefea ona tatou aʻoaʻoina le tele o mea e faatatau i “le finagalo o Keriso”?

¹⁵ E faapefea ona tatou faaaʻoaʻo i le Keriso? O loo taʻua i le 1 Korinito 2:16 ia iloa “le finagalo o Keriso.” Ua faapea mai foʻi le Roma 15:5 ia iai “le mafaufau lava lea e tasi sa iā Keriso Iesu.” O lea ina ia faaaʻoaʻo i le Keriso, e manaʻomia ona tatou iloa le auala sa mafaufau ai o ia, iloa atoatoa ona uiga totino, ma mulimuli i ona tulagāaao. Sa taulaʻi atu le mafaufau o Iesu i lana faiā ma le Atua. O lea, o le faaaʻoaʻo iā Iesu o le a atili ai ona tatou pei o Ieova. Ua manino mai i nei manatu le tāua o lo tatou iloa o le auala e mafaufau ai Iesu.

¹⁶ E faapefea ona tatou faia faapea? Na vāai soo o Iesu i vavega na ia faia, faalogo i ana lauga, matau auala na ia feutagaʻi ai ma so o se ituaiga o tagata, faapea auala na ia faatatauina ai mataupu silisili a le Atua. Na latou faapea mai: ʻO molimau i matou i mea uma na ia faia.’ (Galu. 10:39) O le mea moni e lē o mafai ona tatou toe vāai atu iā Iesu. Ae ua saunia mai ma le alofa e Ieova tala o loo faamauina i Evagelia ina ia tatou malamalama lelei ai i uiga o Iesu. O le faitau ma manatunatu loloto i tusi o Mataio, Mareko, Luka ma Ioane, o le a mafai ai ona tatou aʻoaʻoina le tele o mea e faatatau i le finagalo o Keriso. O le faia faapea, e mafai ai ona tatou ʻmulimulituʻi i ona tulaga aao’ ma ʻfaaauupegaina ai i tatou i mafaufauga’ o Keriso.​—1 Pete. 2:21; 4:1.

17. E faapefea ona aogā iā i tatou le mafaufau e pei o Keriso?

¹⁷ E faapefea ona aogā iā i tatou le aʻoaʻoina o le auala e mafaufau ai e pei o Keriso? E pei lava ona maua e le tino le malosi mai i taumafa paleni, e faapena foʻi ona faamalosia lo tatou itu faaleagaga e ala i lo tatou manatunatu i le auala sa mafaufau ai Keriso. O le a faasolosolo ina tatou iloa lelei ai le gaoioiga e fai e Keriso i so o se tulaga. O le faia faapea, o le a fesoasoani iā i tatou e faia ai filifiliga e maua ai se lotofuatiaifo mamā ma le finagalo malie o le Atua. Pe e te lē ioe o māfuaaga lelei na e tatau ai ona tatou “oofu i le Alii o Iesu Keriso”?​—Roma 13:14.

18. O ā mea ua e aʻoaʻoina mai i lenei mataupu e faatatau i le avea ai o se tagata faaleagaga?

¹⁸ Ua māeʻa ona tatou iloiloina le uiga o le avea ma tagata faaleagaga. Sa tatou talanoaina foʻi e mafai ona tatou aʻoaʻoina ni lesona aogā mai i faaaʻoaʻoga lelei o tagata faaleagaga. Sa iloiloina foʻi le auala e aogā ai le iloaina o “le finagalo o Keriso” i lo tatou tuputupu aʻe faaleagaga. Peitaʻi, e iai foʻi isi vala o le tagata faaleagaga e tatau ona tatou iloiloina. O se faataʻitaʻiga, e faapefea ona tatou iloilo po o le ā le malosi o lo tatou itu faaleagaga? O ā isi mea e mafai ona tatou faia e faamalosia atili ai? O le a faapefea i le avea o i tatou ma tagata faaleagaga ona aogā i o tatou olaga i aso faisoo? O le a taliina na fesili i le mataupu o sosoo mai.