1, 2. Ua faapefea ona faaalia e Ieova lona aaomafola?

O IEOVA o le Atua e aaomafola. O mea uma ua tatou mauaina e mai iā te ia. O ia e ana auro ma siliva uma faapea punaʻoa uma faalenatura o i le lalolagi, ma o loo ia faaaogāina na mea ina ia faatumauina ai lo tatou ola. (Sala. 104:13-15; Ha. 2:8) E anoanoaʻi tala i le Tusi Paia e faatatau i le auala na faaaogā faavavega ai e Ieova na mea ina ia tausia ai ona tagata.

² Na saunia e Ieova le manai ma le vai mo le nuu o Isaraelu mo le 40 tausaga a o latou iai i le toafa. (Eso. 16:35) O le iʻuga, “e leai se mea na latou matitiva ai.” (Nee. 9:20, 21) E ala mai i le perofeta o Elisaia, na faavavega ona faateleina e Ieova le suāuu laʻitiiti na iai a se fafine faamaoni ua oti lana tane. O lenā meaalofa a le Atua na mafai ai e lenā fafine ona totogi uma ana aitalafu, ma faaaogā tupe na totoe e ola ai ma lana fanau tama. (2 Tu. 4:1-7) O le fesoasoani foʻi a Ieova na mafai ai e Iesu ona saunia faavavega meaʻai ma tupe ina ua manaʻomia.​—Mata. 15:35-38; 17:27.

3. O le ā o le a tatou talanoaina i lenei mataupu?

³ E matuā anoanoaʻi punāʻoa faalenatura e mafai ona faaaogā e Ieova e tausia ai ana foafoaga i le lalolagi. E ui i lea, ua ia valaaulia  ana auauna e faaaogā a latou ʻoa faaletino ina ia lagolago ai le galuega a lana faalapotopotoga. (Eso. 36:3-7; faitau le Faataoto 3:9.) Aiseā e faatalitalia ai e Ieova i tatou ia toe foaʻi atu a tatou ʻoa iā te ia? Na faapefea i ē faamaoni i le taimi ua teʻa ona faaaogā a latou tupe e lagolago ai galuega a ē na fai ma sui o Ieova? Ua faapefea ona faaaogā e le faalapotopotoga i aso nei tupe mai i foaʻi tauofo? O le a maua tali o nei fesili i lenei mataupu.

4. O le ā e tatou te faailoa atu iā Ieova pe a tatou lagolagoina lana galuega?

⁴ E tatou te foaʻi atu iā Ieova ona o lo tatou alolofa iā te ia ma talisapaia o ia. E faatumulia i tatou i le lotofaafetai pe a tatou manatunatu i mea lelei uma ua faia e Ieova mo i tatou. Ina ua faailoa atu e le tupu o Tavita mea na manaʻomia mo le fausiaina o le malumalu, na ia faapea atu o mea uma ua tatou maua e mai iā Ieova, ma po o ā lava mea e tatou te foaʻiina atu iā Ieova, o mea uma na sa ia foaʻi mai iā i tatou.​—Faitau le 1 Nofoaiga a Tupu 29:11-14.

5. Ua faapefea ona faaalia mai i le Tusi Paia o le foaʻi atu ma le lē manatu faapito o se vala autū lea o le tapuaʻiga moni?

⁵ O le foaʻi atu o se isi foʻi vala lenā o la tatou tapuaʻiga iā Ieova. I se faaaliga, na faalogo ai le aposetolo o Ioane i auauna a Ieova i le lagi o alalaga atu: “Ieova e, lo matou Atua, ua tatau lava oe ona e mauaina le viiga, ma le mamalu, ma le mana, auā na e foafoaina mea uma lava, ma o lou finagalo foʻi ua iai nei mea ma na foafoaina ai.” (Faaa. 4:11) Pe e te lē ioe o Ieova ua alagatatau ona tatou avatu uma i ai le viiga ma le mamalu e ala i le ofo atu o le mea sili e tatou te mafaia? Na faatonu e Ieova le nuu o Isaraelu e ala atu iā Mose ina ia laulaututū i luma o Ieova i tausamiga e tolu faaletausaga. I le avea ai ma vaega o la latou tapuaʻiga, sa lē tatau i se tagata Isaraelu ona “tū i luma o Ieova e aunoa ma se mea.” (Teu. 16:16) I se tulaga talitutusa, o le foaʻi atu ma le lē manatu faapito ma le lagolagoina o le galuega a le faalapotopotoga a Ieova i le lalolagi, o se vala autū lea o le tapuaʻiga moni.

6. Aiseā e lelei ai mo i tatou le foaʻi atu i isi? (Tagaʻi i le ata i luga aʻe o le matua.)

⁶ O le foaʻi atu e lelei mo i tatou. E tele aogā e tatou te mauaina pe a tatou limafoaʻi nai lo o le tau ina talia o mea mai i isi. (Faitau le Faataoto 29:21.) Seʻi manatu i se tamaitiiti ua ia foaʻi atu se meaalofa i ona mātua, na faatau mai i tupe iti na avatu e ona mātua mo ia. E matuā talisapaia e mātua lenā meaalofa! E ono avatu e se talavou paeonia o loo nonofo faatasi pea ma ona mātua, se tupe e fesoasoani ai i tupe faaalu a le aiga. E ui atonu e leʻi faatalitalia e mātua lenei mea, ae e la te ono talia lava le meaalofa ona e la te iloa, o se auala lea e faaalia ai e le la tama le talisapaia o mea uma sa la faia mo ia. I se tulaga talitutusa, ua silafia e Ieova e lelei mo i tatou le foaʻi atu o a tatou ʻoa.

7, 8. Na faapefea ona faataatia e tagata o Ieova i taimi o le Tusi Paia se faaaʻoaʻoga i le faia o foaʻi (a) mo ni galuega patino? (e) ina ia lagolagoina ai i latou na taʻimua i le galuega?

⁷ O lenei vala o le foaʻi atu o ʻoa a se tasi, ua loa ona faamauina i le Tusi Paia. Na iai taimi na foaʻi atu ai e tagata o Ieova ni meaalofa mo ni galuega patino. O se faaaʻoaʻoga, na talosaga atu Mose mo ni foaʻi mo le fausiaina o le faleʻie paia, ma na faapena foʻi le tupu o Tavita mo le fausiaina o le malumalu. (Eso. 35:5; 1 No. 29:5-9) I taimi o le tupu o Ioasa, na faaaogā e ositaulaga tupe na aoina mai ina ia faaleleia ai le fale o Ieova. (2 Tu. 12:4, 5) I le uluaʻi senituri, na faailoa atu i uso i le faapotopotoga Kerisiano le manaʻoga  na tulaʻi mai ona o le oge, o lea ʻna latou filifili ai loa e aauina atu se fesoasoani i uso o loo nonofo i Iutaia, e tusa ma le mea ua mafai e le tagata.’​—Galu. 11:27-30.

⁸ O nisi taimi, na foaʻi atu ai e tagata o Ieova ni fesoasoani tautupe ina ia lagolagoina ai i latou na taʻimua i le galuega. I lalo o le Tulafono a Mose, e leʻi maua ni tofi o le ʻau sa Levī e pei o isi ituaiga. Ae na foaʻi atu e tagata Isaraelu i le ʻau sa Levī le sefuluaʻi po o le tasi vaesefulu o mea sa iā i latou. O lenā faatulagaga na mafai ai e le ʻau sa Levī ona uaʻi atu i la latou galuega i le faleʻie paia. (Nu. 18:21) Mulimuli ane, na maua foʻi e Iesu ma ona aposetolo aogā mai i le limafoaʻi o fafine ʻo ē na auauna iā i latou i a latou meafaitino.’​—Luka 8:1-3.

9. O fea na maua mai ai foaʻi a nisi o auauna a le Atua i aso anamua?

⁹ O le mea moni, e eseese mea na maua mai ai na foaʻi. Ina ua faia e tagata Isaraelu foaʻi mo le fausiaina o le faleʻie paia a o iai i le toafa, e foliga mai na aofia i a latou foaʻi mea na ō mai ma i latou mai i Aikupito. (Eso. 3:21, 22; 35:22-24) I le uluaʻi senituri, na faatau ese e nisi Kerisiano a latou meatotino e pei o fanua po o fale, ma avatu le tupe i le ʻauaposetolo. Na faasoasoa e le ʻauaposetolo na tupe i ē na manaʻomia le fesoasoani. (Galu. 4:34, 35) O isi na latou tuu ese se vaega o tupe na latou mauaina, ma foaʻi atu e lē aunoa ina ia lagolagoina ai le galuega. (1 Kori. 16:2) O lea, na mafai e so o se tagata, o ē e lelei le tamaoaiga ma ē e lima vaivai, ona faia so latou sao i le foaʻi atu.​—Luka 21:1-4.

10, 11. (a) E faapefea ona tatou faaaʻoaʻo i le limafoaʻi o auauna a Ieova i taimi o le Tusi Paia? (e) O ā ni ou faalogona e faatatau i lou faaeaga o le lagolagoina o le galuega o le Malo?

¹⁰ E ono manaʻomia foʻi i aso nei ni foaʻi tauofo mo se fuafuaga patino. O se faataʻitaʻiga, po o fuafua e fausia se Maota fou mo sauniga e faaaogā e la tatou faapotopotoga? Po o faia ni galuega e toe faaleleia ai la tatou Maota mo Sauniga o loo iai? Atonu ua faailoa mai se manaʻoga mo ni foaʻi tautupe e toe faaleleia ai le ofisa o le lālā i lo tatou atunuu, se tauaofiaga o le a tatou auai ai, po o le fesoasoani mo o tatou uso na aafia i se mala faalenatura. E tatou te foaʻi foʻi auā le lagolagoina o i latou o loo galulue i le ofisa ulu ma ofisa o lālā i le lalolagi aoao. E lagolagoina foʻi e a tatou foaʻi tauofo ia misionare, paeonia faapito, ma ovasia o matagaluega. E lē taumatea na faia foʻi e la outou faapotopotoga se iʻugāfono tumau, e lagolagoina ai le polokalame o le fausiaina o Maota mo Fonotaga ma Maota mo Sauniga i le lalolagi aoao, lea e faaaogā e o tatou uso ma tuafāfine.

¹¹ O i tatou uma lava e mafai ona faia so tatou sao e lagolagoina ai le galuega o loo faataunuuina e Ieova i nei aso e gata ai. O le tele o foaʻi e tatou te faia, e lē iloa mai e isi. E tuuina atu a tatou foaʻi tautupe i pusa mo meaalofa tauofo o loo i totonu o Maota mo Sauniga, pe faia se foaʻi e ala atu i le Initaneti e faaaogā ai le jw.org, e aunoa ma lo tatou faailoa atu i isi. Atonu e tatou te manatu e itiiti se aogā o a tatou foaʻi. Peitaʻi, o le tele o tupe o loo maua mai i meaalofa tauofo, e mai i le tele o foaʻi lāiti nai lo o ni nai foaʻi tetele. O o tatou uso e aofia ai ma uso e lē tagolima, ua pei i latou o Kerisiano i Maketonia o ē na ʻaiʻoi atu mo le faaeaga e faia ai ni foaʻi, ma na latou foaʻi ma le agalelei “e ui i lo latou matuā matitiva.”​—2 Kori. 8:1-4.

12. Ua faapefea ona taumafai malosi le faalapotopotoga e faaaogā tatau foaʻi tauofo?

¹² Pe a uma ona faia se iloiloga faatasi ma le tatalo, e taumafai malosi le Vaega Pule ina ia faamaoni ma faautauta i le auala e faaaogā ai tupe a le faalapotopotoga. (Mata. 24:45) O tupe e maua mai i foaʻi tauofo e  faasoasoa lelei ma faaaogā e tusa ai ma manaʻoga. (Luka 14:28) I taimi o le Tusi Paia, o tane faamaoni na vaavaaia foaʻi tautupe na mulimuli i ni faatulagaga ina ia faamautinoa e faaaogā nei foaʻi tau lava o le tapuaʻiga iā Ieova. O se faataʻitaʻiga, na toe foʻi Esera i Ierusalema ma ni foaʻi mai i le tupu o Peresia e aofia ai auro, siliva, ma isi mea taugatā e silia i le $100 miliona (tālā Amerika) i se fua faatatau i aso nei. Na manatu Esera i na foaʻi o ni meaalofa tauofo mo Ieova, ma na matuā mataala o ia i le faia o ni faatulagaga manino mo le leoleoina o nei foaʻi a o faimalaga atu i laufanua e tumu i tagata faomea. (Esera 8:24-34) Na aoaoina e le aposetolo o Paulo ni foaʻi tautupe e fesoasoani ai i uso i Iutaia. Na faamautinoa e Paulo, o i latou e momoliina atu nei foaʻi o ni ē e “faia mea uma lava ma le faamaoni, e lē gata i le silafaga a Ieova, ae i le vaaiga foʻi a tagata.” (Faitau le 2 Korinito 8:18-21.) I le faaaʻoaʻo iā Esera ma Paulo, e mulimulituʻi foʻi la tatou faalapotopotoga i ni faatulagaga i le auala e taulima ma faaaogā ai foaʻi tautupe.

13. Aiseā na faia ai talu ai nei e le faalapotopotoga ni fetuunaʻiga?

¹³ Atonu e faia e se aiga ni fetuunaʻiga a o taumafai e faapaleni a latou tupe maua ma tupe faaalu, pe a o fuafua foʻi e faafaigofie o latou olaga ma faaitiitia tupe faaalu ina ia faateleina ai mea e latou te faia mo Ieova. E faapena le faalapotopotoga a Ieova. E tele ni galuega mataʻina fou na faia i tausaga talu ai nei. Ae i nisi taimi, ua iʻu ai ina tele tupe faaalu nai lo o foaʻi e maua mai. O lea, ua tagatagaʻi ai le faalapotopotoga i auala e faaitiitia ai tupe faaalu ma faafaigofie ai le galuega, ina ia faataunuu ai le tele o mea e ala i a outou foaʻi tauofo.

14-16. (a) O ā nisi o mea ua mafai ona faatinoina ona o a outou foaʻi tauofo? (e) O ā ni aogā ua e maua mai i nei sauniuniga?

¹⁴ O le toʻatele o auauna a Ieova ua loa tausaga o iai i le upu moni, ua latou faapea mai ua matuā mataʻina lenei taimi ona o le anoanoaʻi o sauniuniga faaleagaga ua tatou mauaina. Seʻi manatu i nei faamanuiaga: Na amata i tausaga talu ai nei le jw.org ma le TV i le Initaneti a Molimau a Ieova. Ua sili atu foʻi le tele o gagana ua lomia ai le faaliliuga O le Tusi Paia—O le Faaliliuga a le Lalolagi Fou.I le 2014/2015, na faia ai le tauaofiaga faavaomalo e tolu aso ʻIa Faaauau Pea Ona Saʻili Muamua le Malo o le Atua!’ i ni fale taalo e sili ona tetelē i ni aai se 14 i le lalolagi aoao. Na matuā faafiafiaina i latou na auai i na tauaofiaga.

¹⁵ E toʻatele ua faailoa mai lo latou talisapaia o le tele o aogā ua latou maua mai i le  faalapotopotoga a Ieova. O se faaaʻoaʻoga, na tusi mai se ulugalii o loo auauna i se atunuu i Asia e faatatau i polokalame i le TV i le Initaneti a Molimau a Ieova e faapea: “E ma te auauna i se tamaʻi aai. I nisi taimi, e ma te lagona ai le tuua na o i maʻua, ma e faigofie ona galo iā i maʻua le telē o le galuega o loo faataunuuina e Ieova. Ae o taimi uma lava e ma te matamata ai i polokalame eseese o le TV i le Initaneti a Molimau a Ieova, e ma te manatua ai o i maʻua o se vaega o le ʻauuso i le lalolagi aoao. E matuā fiafia o tatou uso ma tuafāfine pele i lo matou vaipanoa e matamata i a tatou polokalame i le TV i le Initaneti. E masani ona ma faalogo o latou faapea mai, ua iai o latou lagona māfana mo sui o le Vaega Pule pe a uma ona matamata i polokalame i masina taʻitasi. I le taimi lenei, ua sili atu ona latou mitamita i le iai i le faalapotopotoga a le Atua.”

¹⁶ I le lalolagi aoao, e toetoe 2,500 Maota mo Sauniga o loo fausia po o loo toe faaleleia i le taimi nei. Na tusi mai uso o se faapotopotoga i Honduras ina ua amata ona faaaogā lo latou Maota fou mo sauniga e faapea: “E matou te matuā lagona le fiafia i le avea ai ma vaega o le aiga o Ieova i le aoao o mea, ma olioli i lo tatou ʻauuso matagofie i le lalolagi aoao, o ē na fesoasoani ina ia faataunuu la matou miti mo se Maota mo Sauniga i lo matou vaipanoa.” E toʻatele foʻi nisi na faailoa mai lo latou lotofaafetai ina ua maua le Tusi Paia ma isi lomiga i a latou gagana, maua aogā mai i galuega fesoasoani, pe vaaia foʻi iʻuga lelei mai i talaʻiga faapitoa i aai tetele ma le molimau atu i nofoaga faitele i o latou vaipanoa.

17. E faapefea ona tatou iloa o loo lagolagoina e Ieova lana faalapotopotoga i aso nei?

¹⁷ Ua iso le toʻatele o tagata e lē o ni Molimau a Ieova pe e faapefea ona tatou faia nei galuega uma e ala i foaʻi tauofo. Ina ua uma le maimoaga a le pule o se kamupani telē i se tasi o a tatou fale lomitusi, na maofa o ia ona o galuega uma na faia e tagata tauofo na faatupe mai i foaʻi tauofo, e aunoa ma ni suʻegātupe e faia. Na ia faapea mai o mea o loo tatou faia, o ni mea e lē mafai ona faia e tagata. E tatou te ioe i lenā manatu! Ua tatou iloa e pau le māfuaaga ua mafai ai, ona o loo lagolagoina e Ieova la tatou galuega.​—Iopu 42:2.

18. (a) O ā faamanuiaga e tatou te maua pe a tatou foaʻi atu ina ia lagolagoina ai le Malo? (e) E faapefea ona toleni a tatou fanau ma ē fou mai ina ia faia so latou sao?

¹⁸ Ua faamamaluina i tatou e Ieova e ala i le tuuina mai o le avanoa e tatou te lagolagoina ai le galuega mataʻina o loo faataunuuina i aso nei. Ua ia faamautinoa mai o le a tatou maua faamanuiaga pe a tatou lagolagoina le Malo. (Mala. 3:10) Ua folafola mai e Ieova o le a faatamaoaigaina le tagata limafoaʻi. (Faitau le Faataoto 11:24, 25.) O le limafoaʻi e tatou te maua ai foʻi le fiafia auā “e sili le fiafia e maua i le foaʻi atu i lo o le talia mai.” (Galu. 20:35) E ala i a tatou upu ma faaaʻoaʻoga, ua tatou maua le faaeaga o le toleni o a tatou fanau ma ē fou mai, i auala e faia ai a latou foaʻi tauofo ma maua ai le tele o faamanuiaga.

19. Ua faapefea ona faalaeiauina oe i lenei mataupu?

¹⁹ O mea uma ua tatou maua e mai iā Ieova. O le toe foaʻi atu iā te ia e faaalia ai e tatou te alolofa iā te ia ma e tatou te talisapaia mea uma ua ia faia mo i tatou. (1 No. 29:17) Ina ua faia e tagata Isaraelu foaʻi mo le fausiaina o le malumalu, na “olioli lava le nuu i a latou meaalofa tauofo, auā na latou foaʻi atu ma le lotoatoa meaalofa tauofo iā Ieova.” (1 No. 29:9) Tau ina ia faaauau foʻi ona tatou maua le olioli ma le lotomalie ona o le toe foaʻi atu iā Ieova o mea uma na ia foaʻi mai iā i tatou.