1. Aiseā e iloga ai le taimi o loo tatou ola ai?

O LOO tatou ola i se taimi iloga i le talafaasolopito. E pei ona valoia mai i le Tusi Paia, o loo aoaoina e Ieova “se motu o tagata e toʻatele . . . mai i atunuu uma, ma ituaiga, ma nuu, ma gagana.” O i latou na ua faia aʻe ai “se atunuu malosi” e silia ma le valu miliona tagata fiafia, ʻua latou tuuina atu i le Atua le auaunaga paia i le ao ma le pō.’ (Faaa. 7:9, 15; Isa. 60:22) E leʻi iai lava se isi taimi ua toʻatele ai tagata e alolofa i le Atua ma o latou tuaoi.

2. O le ā le ituaiga o alofa e faatagāfai lea e mātaulia ai tagata ua vavaeese mai i le Atua? (Tagaʻi i le ata i luga aʻe o le matua.)

² Peitaʻi, ua valoia mai foʻi i le Tusi Paia i o tatou aso, o le a faaalia e tagata ua vavaeese mai i le Atua se ituaiga o alofa e faatagāfai, lea e atagia mai ai le manatu faapito. Na tusi le aposetolo o Paulo: ʻO aso e gata ai, e avea tagata ma ē e alolofa iā i latou lava, o ē e mananaʻo tele i tupe, o ē e pupū i mea faafiafia nai lo o le alolofa i le Atua.’ (2 Timo. 3:1-4) E tuufaafeagai lenei alofa manatu faapito ma le alofa faa-Kerisiano. O le saʻilia o sini manatu faapito e lē maua ai e tagata le fiafia o loo latou faatalitalia.  O le mea moni, o lenā ituaiga o alofa ua faapogaia ai ni uiga manatu faapito i se lalolagi “e sili ona faigatā.”

3. O le ā o le a tatou iloiloina i lenei mataupu, ma aiseā?

³ Na iloa e Paulo o le a iai lamatiaga i Kerisiano ona o le alofa manatu faapito lea ua taatele i le lalolagi. O lea na ia lapataʻi mai ai ina ia “ʻaloese mai” iā i latou o loo faaalia le alofa faatagāfai. (2 Timo. 3:5) Ae e lē mafai ona tatou ʻalofia fesootaʻiga uma ma na tagata. O lea, e faapefea ona tatou ʻaloese mai i uiga o le lalolagi lea o loo siʻomia ai i tatou, ma taumafai e faafiafia Ieova le Atua o le alofa? Seʻi o tatou faia se faaeseesega o le alofa i le Atua ma le alofa o loo faamatalaina i le 2 Timoteo 3:2-4. O le faia faapea o le a fesoasoani iā i tatou e toe tilofaʻia ma toe faamalosia ai le alofa e tatau ona tatou faaalia, o le ituaiga alofa lea e maua ai le faamalieina ma le fiafia moni.

4. Aiseā e lē leaga ai lo tatou alolofa iā i tatou lava?

⁴ Na tusi le aposetolo o Paulo, “E avea tagata ma ē e alolofa iā i latou lava.” Pe e iai se leaga o lo tatou alolofa iā i tatou lava? E leai, o lo tatou alolofa iā i tatou lava o se tulaga masani ma e talafeagai foʻi. O le auala lenā na foafoaina ai i tatou e Ieova. Na fetalai Iesu: “Ia e alofa atu i lou tuaoi e pei o oe lava iā te oe.” (Mare. 12:31) Pe afai e tatou te lē alolofa iā i tatou lava, e lē mafai foʻi la ona tatou alolofa i o tatou tuaoi. Ua faapea mai foʻi le Tusi Paia: “E tatau i tane ona alolofa atu i a latou avā e pei o o latou lava tino. O lē e alofa i lana avā, e alofa o ia iā te ia lava, auā e leai se tane e ita i lona lava tino; ae e na te fafaga ma faapelepele i ai.” (Efe. 5:28, 29) O lea, o se mea e talafeagai lo tatou alolofa iā i tatou lava.

5. E faapefea ona e faamatalaina ē e soona alolofa iā i latou lava?

⁵ O le alofa o se tasi iā te ia lava lea o loo taʻua i le 2 Timoteo 3:2, e lē o se alofa e masani ai ma e lē talafeagai. Nai lo o lea, o se ituaiga o alofa e faaituʻau ma manatu faapito. O tagata e soona alolofa iā i latou lava, ua faasili lo latou manatu iā i latou lava i lo o le mea e tatau ona manatu i ai. (Faitau le Roma 12:3.) E latou te faatāua i latou lava. E latou te lē popole i isi. Pe a lē sologa lelei mea, e tele ina latou tuuaʻia isi nai lo o le talia o i latou e sesē. E lē maua e tagata manatu faapito le fiafia moni.

6. O ā iʻuga e maua mai i le alofa i le Atua?

⁶ E manatu ni ʻaufaitofā o le Tusi Paia na muamua taʻua e le aposetolo o Paulo le alofa o le tagata iā te ia lava, ona e māfua mai ai isi uiga lē lelei, lea o le a taatele i nei aso e gata ai. I se faaeseesega, e matuā ese uiga e faaalia e tagata e alolofa i le Atua. I le Tusi Paia, e ō faatasi le alofa i le Atua ma le olioli, filemu, faapalepale, agalelei, mataalofa, faatuatua, agamalu, ma le amio pulea. (Kala. 5:22, 23) Na tusi le faisalamo: “E fiafia foʻi le nuu e fai Ieova ma o latou Atua!” (Sala. 144:15) O Ieova o le Atua fiafia, ma e faaatagia mai e ona tagata lenā uiga. E lē gata i lea, e maua e auauna a Ieova le fiafia i le foaʻi atu mo le lelei o isi, e lē pei o ē e alolofa iā i latou lava ma fiafia i mea e maua mai i isi.​—Galu. 20:35.

7. O ā fesili o le a fesoasoani iā i tatou e iloilo ai lo tatou alofa i le Atua?

⁷ E faapefea ona tatou iloa po ua sili atu lo tatou alolofa iā i tatou lava nai lo o le alolofa i le Atua? Ia mātau le apoapoaʻiga o loo i le Filipi 2:3, 4: “Ia aua lava neʻi faia se mea ma le finauvale ma le faasausili, ae ia faia ma le lotomaulalo, i le manatu ua sili isi iā te outou, ia vaavaai ma le naunau e lē gata i au lava mea, ae i mea foʻi e lelei ai isi.” E tatou te ono fesili ifo iā i tatou lava: ʻPo o oʻu  faatatauina lenā fautuaga i loʻu olaga? Po o fai ni aʻu taumafaiga ina ia faia le finagalo o le Atua? Po o oʻu taumafai e fesoasoani atu i isi i le faapotopotoga ma le faiva i le fanua?’ E lē faigofie i taimi uma le faaaogā o lo tatou taimi ma le malosi e fesoasoani ai i isi. E manaʻomia ai taumafaiga malolosi ma le faataulaga. E leai lava se isi mea e sili atu ona tatou maua ai le fiafia, nai lo o le iloaina ua tatou maua le finagalo malie o le Pule Silisili Ese i le aoao o mea.

8. O le ā ua uunaʻia isi e fai ona o le alofa i le Atua?

⁸ O le alofa i le Atua ua uunaʻia ai isi e tuua ni galuega lelei e tetelē totogi ina ia faalautele atu la latou auaunaga iā Ieova. E nofo Ericka i le Iunaite Setete, ma o ia o se fomaʻi. Ae nai lo o le saʻilia o se tulaga taualoa i lana galuega faafomaʻi, na avea o ia o se paeonia sauatoa ma auauna i le tele o atunuu ma lana tane. Pe a toe mafaufau i taimi ua teʻa, ua ia faapea mai: “Ua matuā faatamaoaigaina o ma olaga i le tele o mea na tutupu a o ma fesoasoani ai i se oganuu e ese le gagana, faatasi ma faauōga na atiaʻe ai. O loo avea pea aʻu o se fomaʻi, ae o le faaalu o le tele o loʻu taimi ma le malosi e fesoasoani ai i tagata i le itu faaleagaga ma tausia manaʻoga o le faapotopotoga, ua ou maua ai le fiafia moni ma le faamalieina.”

9. Aiseā e lē fiafia ai se tasi e manaʻo tele i tupe?

⁹ Na tusi Paulo o le a avea tagata ma “ē e mananaʻo tele i tupe.” I ni nai tausaga ua mavae, sa talaʻi atu ai se paeonia i Aialani i se tamāloa e faatatau i le Atua. Na tago le tamāloa i lana ato tupe ma seʻi aʻe se tupe pepa, ma faapea mai ma le faamaualuga, “O loʻu atua lea.” E ui lava e lē taʻu saʻo mai faapena e le toʻatele, ae ua tumu le lalolagi i tagata e mananaʻo tele i tupe ma mea e mafai ona faatau mai ai. Peitaʻi ua lapataʻi mai le Tusi Paia e faapea: “O lē e fiafia i siliva, e lē faamalieina i siliva, o lē e fiafia i le ʻoa e lē faamalieina i ana tupe maua.” (Fai. 5:10) E lē taitai faamalieina na tagata i a latou tupe ma faaalu le tele o le taimi e saʻili ai nisi tupe se tele, lea e iʻu ai “i le tele o tigā.”​—1 Timo. 6:9, 10.

10. O le ā le faamatalaga a le Tusi Paia e faatatau i le tamaoaiga ma le mativa?

¹⁰ O le mea moni, e tatou te manaʻomia tupe ma e tatou te maua ai sina puipuiga. (Fai. 7:12) Ae pe e mafai ona fiafia moni se tasi pe afai e maua na o tupe e tausia ai ona manaʻoga moni? Ioe, e mafai. (Faitau le Failauga 5:12.) Na tusi Akuru le atalii o Iake: “Ia aua neʻi oʻu matuā mativa po o ou te matuā tamaoaiga. Ia ou ʻai tau lava o meaʻai e tatau mo aʻu.” E faigofie ona tatou malamalama i le māfuaaga e leʻi manaʻo ai o ia e aafia i le matuā mativa. E pei ona ia taʻua atili, e leʻi manaʻo ina ia faaosoosoina o ia ina ia gaoi, ona e faalumaina ai le Atua. Ae aiseā na tatalo ai o ia ina ia aua neʻi matuā tamaoaiga? Na ia faapea mai: “Neʻi oʻu maʻona ma ou faafitia oe ma faapea ane: ʻO ai ea Ieova?’” (Faata. 30:8, 9) Atonu e mafai ona e mafaufau i nisi e tuu o latou faatuatuaga i a latou ʻoa nai lo o le Atua.

11. O le ā le fautuaga na aumai e Iesu e faatatau i tupe?

¹¹ E lē mafai e i latou e mananaʻo tele i tupe ona faafiafiaina le finagalo o le Atua. Na fetalai Iesu: “E lē mafai ona pologa se tasi i ni matai se toʻalua, auā e ʻinoʻino o ia i le tasi ae alofa atu i le isi, pe e pipii atu i le tasi ae manatu faatauvaa i le isi. E lē mafai ona e pologa i le Atua atoa ma ʻOa.” Na ia faatomua lenā faamatalaga e ala i le faapea mai: “Aua tou te toe faaputuina mo outou ʻoa o le lalolagi, auā o loo iai mogamoga ma le ʻele e faaumatia ai, o loo iai foʻi tagata gāoi e osofaʻi atu ma gaoia. A ia outou faaputu ʻoa i le lagi e lē o iai ni mogamoga po o le ʻele e faaumatia  ai, e leai foʻi ni tagata gāoi e osofaʻi atu ma gaoia.”​—Mata. 6:19, 20, 24.

12. E faapefea i le ola i se olaga faigofie ona fesoasoani iā i tatou e auauna ai i le Atua? Aumai se faaaʻoaʻoga.

¹² Ua iloa e le toʻatele ua faafaigofie o latou olaga, e lē gata ua sili atu lo latou fiafia ae ua tele foʻi le taimi e auauna ai iā Ieova. E nofo Jack i le Iunaite Setete, ma na ia faatau ese lona fale telē ma lana pisinisi talu ai sa ia iloa, o le a mafai ai ona ia paeonia faatasi ma lana avā. Na ia faapea mai: “E leʻi faigofie le tuua o lo ma fale matagofie ma lo ma fanua i le atunuu. Peitaʻi mo le tele o tausaga, ou te mānava mai lava ou te lagona le lē fiafia ona o faafitauli i le galuega. Ae e fiafia lava i taimi uma laʻu avā, o se paeonia sauatoa. E faapea mai o ia, ʻO le matuā lelei a o loʻu pule.’ O lea la ua ou paeonia foʻi, ma ua ma galulue uma mo Ieova.”

13. E faapefea ona tatou faia se iloiloga e faatatau i la tatou vaaiga i tupe?

¹³ Ina ia iloilo la tatou vaaiga e faatatau i tupe, e tatou te ono faia se iloiloga faamaoni o i tatou lava e ala i le fesili ifo: ʻPo ou te talitonu moni lava ma ola e ōgatusa ma le faamatalaga a le Tusi Paia e faatatau i tupe? Po o faamuamua i loʻu olaga le saʻilia o tupe? Pe e sili atu ona tāua iā te aʻu meafaitino nai lo o laʻu faiā ma Ieova ma tagata? Po ou te matuā maufaatuatuaina Ieova e na te tausia oʻu manaʻoga?’ E mafai ona tatou mautinoa e na te lē tuulafoaʻia i latou e faamoemoe atu iā te ia.​—Mata. 6:33.

14. O le ā le vaaiga talafeagai e tatau ona iai e faatatau i mea faafiafia?

¹⁴ E pei ona valoia mai, o le toʻatele o tagata i aso nei o le a avea ma “ē e pupū i mea faafiafia.” E pei lava ona leai se leaga o le iai o se vaaiga talafeagai ma paleni e faatatau iā i tatou ma tupe, e faapena foʻi ona leai se leaga o le iai o se vaaiga paleni i mea faafiafia. E lē finagalo Ieova e tatou te matuā teena so o se mea faafiafia, pe faamamao ese mai i faafiafiaga e talafeagai. Ua faalaeiauina auauna faamaoni e le Tusi Paia: “Inā alu ia ma ʻai lau meaʻai ma le olioli ma inu lau uaina ma le lotofiafia.”​—Fai. 9:7.

15. O le ā e uiga i ai le faaupuga “o ē e pupū i mea faafiafia”?

¹⁵ O loo faasino atu le 2 Timoteo 3:4 i le saʻilia o mea faafiafia ae leai se manaʻo i le  Atua. Ia mātau e lē o faapea mai le fuaiupu o le a sili atu le pupū o tagata i mea faafiafia i lo o le alolofa i le Atua, e pei e iai sina o latou alofa mo ia. Nai lo o lea, o loo faapea mai le fuaiupu “e pupū i mea faafiafia nai lo o le alolofa i le Atua.” Na tusi se tasi faitofā e faapea: “E mautinoa e lē o faapea mai lenei [fuaiupu] e iai sina o latou alofa mo le Atua. Ae o lona uiga e matuā leai lava so latou alofa mo le Atua.” O se lapataʻiga tāua lenei mo ē e pupū tele i mea faafiafia. O le faaupuga “o ē e pupū i mea faafiafia” ua talafeagai lelei ona faamatalaina ai i latou “ua tosina atu i . . . fiafiaga o lenei olaga.”​—Luka 8:14.

16, 17. O le ā le faaaʻoaʻoga na faataatia e Iesu e faatatau i mea faafiafia?

¹⁶ Na faaalia e Iesu se vaaiga paleni i mea faafiafia. Na auai o ia i “le ʻaiga o se faaipoipoga” ma “se faigaʻai tele.” (Ioa. 2:1-10; Luka 5:29) Ina ua uma le uaina i le faaipoipoga, na suia faavavega e Iesu le vai e avea ma uaina ma na toe maua ai le uaina. I se isi mea na tupu, na ia teena ai manatu faafiaamiotonu o ē na faitio ina ua ʻai o ia ma inu.​—Luka 7:33-36.

¹⁷ Peitaʻi, e leʻi avea mea faafiafia ma taulaʻiga autū o le olaga o Iesu. Na ia faamuamua Ieova ma na matuā tinoū e fesoasoani i isi. Na lotomalie o ia e onosaia se maliu tigā i luga o le laau, ina ia faaolaina ai tagata e toʻatele. Na fetalai atu Iesu iā i latou o le a mulimuli i ona tulaga aao: “E fiafia outou pe a upuleagaina, sauāina, ma tuuaʻia pepelo outou i mea leaga uma ona o aʻu. Ia outou olioli ma fiafia, auā o loo i le lagi lo outou taui e tele; auā na faapena foʻi ona latou faasauā i perofeta o ē na muamua atu iā te outou.”​—Mata. 5:11, 12.

18. O ā fesili e fesoasoani iā i tatou e iloilo ai po o tatou pupū i mea faafiafia?

¹⁸ E faapefea ona tatou iloilo po o tatou pupū i mea faafiafia? E mafai ona tatou fesili ifo: ʻPo o oʻu faamuamuaina mea faafiafia nai lo o sauniga ma talaʻiga? Po o oʻu lotomalie e faataulaga ni mea faafiafia ona ou te manaʻo e auauna i le Atua? Pe a filifili faafiafiaga, po ou te mafaufau po o le ā le silafaga a Ieova i laʻu filifiliga?’ Pe afai e tatou te alolofa moni i le Atua, o le a tatou ʻalofia e lē gata o mea e tatou te mautinoa e lē fiafia i ai o ia, ae o faafiafiaga foʻi e tatou te ono manatu e lē fiafia i ai o ia.​—Faitau le Mataio 22:37, 38.

19. O ai i latou e lē mafai ona maua le fiafia moni?

¹⁹ Ua tusa ma le 6,000 tausaga talu ona mafatia tagata, ma ua latalata i le iʻuga o le lalolagi a Satani. Ua faatumulia le lalolagi i ē e alolofa iā i latou lava, o ē e mananaʻo tele i tupe, ma ē e pupū i mea faafiafia. E latou te matuā naunau ina ia maua ni mea, ma faamuamua o latou lava manaʻoga. E lē mafai e na tagata ona maua le fiafia moni. Ae i se faaeseesega, na tusi le faisalamo e faapea: “E fiafia le tagata e fai le Atua o Iakopo ma ona fesoasoani, e iai lona faamoemoe iā Ieova lona Atua.”​—Sala. 146:5.

20. E faapefea i le alofa i le Atua ona e maua ai le fiafia?

²⁰ Ua matuā faatuputeleina le alofa o tagata o Ieova iā te ia, ma o loo faatupulaʻia pea lo tatou faitau aofaʻi i tausaga taʻitasi. O le faamaoniga lea o loo pule le Malo o le Atua ma e lē o toe umi aumaia faamanuiaga e lē mafaatusalia i le lalolagi. O le fiafia moni e maua mai i le faia o le finagalo o le Atua, ma le iloaina o loo tatou faafiafiaina Lē e Silisili Ese. O le a fiafia foʻi e faavavau i latou e alolofa iā Ieova. I le mataupu o sosoo mai, o le a tatou talanoaina ai nisi o uiga lē lelei e māfua mai i le alofa manatu faapito, ma le eseesega ma uiga o loo faaalia e auauna a Ieova.