1, 2. O le ā le faatasiga e pito sili ona mataʻina e autasia ai i tatou i le 2018, ma aiseā? (Tagaʻi i le ata i luga aʻe o le matua.)

PE A amata ona goto le lā iā Mati 31, 2018, o le a faapotopoto tagata o le Atua faapea le toʻatele o tagata fiafia mo le faamanatuina o le Talisuaga Afiafi a le Alii, lea e faia i tausaga taʻitasi. A o faasolo le taamilosaga a le lalolagi i lenā afiafi, e faitau miliona o le a faapotopoto mo le Faamanatuga o le maliu o Keriso. O le Faamanatuga o le faatasiga lea e pito sili ona mataʻina e autasia ai tagata o le Atua i le lalolagi aoao i tausaga taʻitasi!

² Seʻi faaata le matuā olioli o Ieova ma Iesu a o la silasila mai i le faitau miliona o tagata i le lalolagi, o loo faasolosolo ona faamanatu lenei sauniga faapitoa mai i lea itula i lea itula seʻia oo ina iʻu le aso. Na valoia mai i le Tusi Paia “se motu o tagata e toʻatele e lē mafai e se tasi ona faitaulia mai i atunuu uma, ma ituaiga, ma nuu, ma gagana.” O le a latou alalaga atu: “O lo tatou faaolataga e mai le Atua o lē o loo afio i le nofoālii, ma le Tamaʻi Mamoe.” (Faaa. 7:9, 10) E maʻeu le matagofie o le faamamaluina o Ieova ma Iesu e  ala i le faamanatuina o le Faamanatuga i tausaga taʻitasi!

3. O ā fesili o le a taliina i lenei mataupu?

³ E iai fesili ua tulaʻi mai o le a taliina i lenei mataupu. (1) E faapefea iā i tatou taʻitoʻatasi ona sauniuni ma maua aogā mai i le auai i le Faamanatuga? (2) E faapefea i le Faamanatuga ona aafia ai le autasi o tagata o le Atua? (3) E faapefea iā i tatou taʻitoʻatasi ona faatumauina lenā autasi? (4) Po o le a iai se Faamanatuga mulimuli? Pe afai e iai, o afea?

4. Aiseā e tāua ai le faia o a tatou taumafaiga uma ina ia auai i le Faamanatuga?

⁴ Ia manatunatu i le tāua o le auai i le Faamanatuga. Ia manatua, o sauniga a le faapotopotoga o se vala lea o la tatou tapuaʻiga. E mautinoa e mātauina e Ieova ma Iesu i latou o loo faia taumafaiga e auai i lenei sauniga e sili ona tāua o le tausaga. O le mea moni, e tatou te mananaʻo e la te silasila mai o loo tatou auai i le Faamanatuga seʻi vaganā ai ni tulaga ogaoga ua lē mafai ai ona tatou auai. Pe afai e faaalia atu i a tatou gaoioiga o le faatasitasi mo le tapuaʻiga e tāua iā i tatou, ua tatou tuuina atu la iā Ieova se isi māfuaaga e faatumauina ai o tatou igoa i lana “tusi e faamanatu ai,” o le “tusi o le ola” lea. O lenā tusi e iai igoa o ē o le a mauaina le ola e faavavau.​—Mala. 3:16; Faaa. 20:15.

5. I aso a o lumanaʻi le Faamanatuga, e faapefea ona ʻtofotofo iā i tatou po o tatou iai i le faatuatua’?

⁵ I aso a o lumanaʻi le Faamanatuga, e mafai ona tatou faatulaga se taimi e mafaufau loloto ai ma iloilo totoʻa la tatou faiā ma Ieova. (Faitau le 2 Korinito 13:5.) E faapefea ona tatou faia faapea? E ala i le ʻtofotofo iā i tatou po o tatou iai i le faatuatua.’ Ina ia tofotofo iā i tatou lava, e lelei ona tatou fesili ifo: ʻPo ou te talitonu e na o le pau lenei o le faalapotopotoga o loo faaaogā e Ieova ina ia faataunuuina ai lona finagalo? Po o oʻu faia le mea sili ou te mafaia e talaʻi ma aʻoaʻo atu le tala lelei o le Malo? Po o atagia atu i aʻu gaoioiga ua ou talitonu ua tatou ola i aso e gata ai, ma ua lata mai le iʻuga o le pulega a Satani? Po o tutusa lava loʻu maufaatuatuaina o Ieova ma Iesu i le taimi nei, ma le taimi na tuuina atu ai loʻu ola iā Ieova le Atua?’ (Mata. 24:14; 2 Timo. 3:1; Epe. 3:14) O le manatunatu i tali o nei fesili o le a fesoasoani iā i tatou e suʻesuʻe ifo ai pea po o faapeʻī o tatou tulaga.

6. (a) O le ā le auala e tatou te maua ai le ola e faavavau? (e) E faapefea ona sauniuni se tasi toeaina mo le Faamanatuga i tausaga taʻitasi, ma e mafai faapefea ona e mulimuli i lenā auala?

⁶ Ia faitau ma manatunatu loloto i mataupu faale-Tusi Paia o loo talanoaina ai le tāua o le Faamanatuga. (Faitau le Ioane 3:16; 17:3.) E pau le auala mo le mauaina o le ola e faavavau o le “iloa” o Ieova ma “faatuatua” iā Iesu, o Lona Alo e toʻatasi. Ina ia sauniuni mo le Faamanatuga, aiseā e lē filifili ai e suʻesuʻe ni mataupu patino o le a fesoasoani e te mafuta vavalalata atu ai iā Ieova ma Iesu? Seʻi mātau le masaniga a se uso ua umi ona avea ma toeaina. A o faagasolo tausaga, na ia tuufaatasia ni mataupu o Le Olomatamata e faatatau patino atu i le Faamanatuga, ma le alofa na faaalia mai e Ieova ma Iesu. I vaiaso a o lumanaʻi le Faamanatuga, e toe faitau ai e le uso nei mataupu ma manatunatu loloto i le tāua o lenei sauniga. O nisi taimi e faaopoopo ai e le uso se mataupu se tasi pe lua i mataupu na ia tuufaatasia. Na iloa e lenei toeaina o le toe faitauina o nei mataupu faapea le faitau ma manatunatu loloto i le faitauga Tusi Paia mo le Faamanatuga, e na te aʻoaʻoina ai ni manatu fou i tausaga taʻitasi. Ae o le mea e sili ona tāua, e faalolotoina ai lona alofa mo Ieova ma Iesu mai i lea tausaga i lea tausaga. O le suʻesuʻeina o ni mataupu patino faapena e mafai ona faaloloto ai lou alofa ma lou talisapaia o Ieova ma Iesu, ma e mafai ona fesoasoani iā te oe e maua atoatoa ai aogā mai i le Faamanatuga.

7. (a) O le ā na tatalo ai Iesu i le pō na faia ai le uluaʻi Talisuaga Afiafi a le Alii? (e) O le ā e faaalia ai na tali mai Ieova i le tatalo a Iesu?

⁷ I le pō na faia ai le uluaʻi Talisuaga Afiafi a le Alii, na tatalo ai Iesu ina ia autasia uma ona soo ma latou maua ai le autasi lea e la te olioli ai ma lona Tamā. (Faitau le Ioane 17:20, 21.) Na tali mai Ieova i lenā tatalo a lona Alo pele, ma e faitau miliona i aso nei ua talitonu na auina mai e Ieova lona Alo. O le Faamanatuga ua faamaonia manino ai le autasi o Molimau a Ieova, e sili atu i isi sauniga a tagata o le Atua. O le taimi lenā e faapotopoto faatasi ai tagata i le tele o atunuu ma lanu eseese i nofoaga mo tapuaʻiga i le lalolagi aoao. I nisi o atunuu, o le faatasitasi o nei tagata o ituaiga eseese mo se sauniga faalelotu, o se mea e lē masani ai tagata i le lautele pe manatu faatauvaa foʻi i ai. E ui i lea, e matagofie i le silafaga a Ieova ma Iesu lenei autasi!

8. O le ā le feʻau na tuuina atu e Ieova iā Esekielu e faatatau i le autasi?

⁸ I le avea ai ma tagata o Ieova, e lē faateʻia i tatou i le autasi o loo tatou olioli ai. O le mea lenei na valoia mai e Ieova o le a tupu. Seʻi mātau le feʻau na tuuina atu e Ieova i le perofeta o Esekielu e faatatau i le tuufaatasia o laau e lua, o le laau “mo Iuta” ma le laau “mo Iosefa.” (Faitau le Esekielu 37:15-17.) Na faamatala i Le Olomatamata o Iulai 2016 i le “Fesili Mai le ʻAufaitau” e faapea: “Na avatu e Ieova iā Esekielu se feʻau o le faamoemoe, na folafola atu ai le toe autasia o le nuu o Isaraelu, pe a toe faafoʻisia i le Nuu Folafolaina. O loo valoia foʻi i lenā feʻau le toe autasia o tagata o le Atua lea na amata a o faagasolo aso e gata ai.”

9. E faapefea ona faamaonia le faataunuuina o le valoaga a Esekielu i le Faamanatuga i tausaga taʻitasi?

⁹ Talu mai le 1919, na faasolosolo muamua ona toe faamaopoopo ma toe autasia e Ieova le ʻaufaauuina lea i se uiga faafaatusa ua pei o le laau “mo Iuta.” Na sosoo ai ma le faatoʻateleina o i latou e faamoemoe i le lalolagi lea i se uiga faafaatusa ua pei o le laau “mo Iosefa,” ma ua latou aufaatasi atu i le ʻaufaauuina ma avea ai nei vaega e lua ma “lafu e tasi.” (Ioa. 10:16; Saka. 8:23) Na folafola mai e Ieova o le a ia tuufaatasia nei laau e lua, ma avea ai ma laau e tasi i lona aao. (Eseki. 37:19) O nei vaega e lua o loo auauna ma le autasi i lalo o le taʻitaʻiga a le Tupu e toʻatasi o Iesu Keriso, lea ua faamamaluina. O ia foʻi lenā na taʻua i le valoaga e faapea o ʻTavita le auauna’ a le Atua. (Eseki. 37:24, 25) O lenei autasi o loo faamatala i le tusi o Esekielu, e faamaonia i tausaga taʻitasi a o faapotopoto faatasi le vaega totoe o le ʻaufaauuina ma “isi mamoe” mo le Faamanatuga o le maliu o Keriso! E faapefea la iā i tatou taʻitoʻatasi ona faatumauina lenā autasi?

10. E faapefea ona tatou faatumauina le autasi o tagata o le Atua?

¹⁰ O le auala muamua e tatou te faatumauina ai le autasi o tagata o le Atua, o le atiaʻe lea o le lotomaulalo. A o iai Iesu i le lalolagi, na ia apoapoaʻi atu i ona soo ina ia faamaulalo iā i latou lava. (Mata. 23:12) Pe a tatou lotomaulalo, e tatou te lē lolo atu i le agaga o le lalolagi o le faasilisilia lea o i latou lava. Nai lo o lea, o lo tatou lotomaulalo e fesoasoani iā i tatou e gauaʻi atu ai i ē e taʻimua, ma o lenā agaga usiusitaʻi e tāua tele mo le faatumauina o le autasi i le faapotopotoga. Ae o le mea e sili ona tāua, o lo tatou lotomaulalo e faafiafiaina ai le finagalo o le Atua auā “e tetee le Atua i ē e faamaualuluga, ae e foaʻi mai e ia le agalelei faifua i ē e lotomaulalo.”​—1 Pete. 5:5.

11. E faapefea i le manatunatu i le uiga o le areto ma le uaina ona fesoasoani iā i tatou e faatumauina ai le autasi?

¹¹ O le auala lona lua e tatou te faatumauina ai le autasi, o le manatunatu lea i le uiga  o le areto ma le uaina e faaaogā i le Faamanatuga. A o latalata atu i lenā pō faapitoa aemaise lava pe a oo i lenā pō, ia manatunatu loloto i le tāua o le areto e lē faafefeteina ma le uaina mūmū. (1 Kori. 11:23-25) O le areto e faaata mai ai le tino lelei atoatoa o Iesu na fai ai le taulaga togiola, ma o le uaina e faaata mai ai lona toto na faamaligiina. Ae e lē lava le tau ina tatou malamalama i le tāua o le areto ma le uaina. Ia manatua o le taulaga togiola a Keriso na aofia ai ni faamaoniga silisili e lua o le alofa. O le alofa o Ieova na faaalia e ala i le auina mai o lona Alo mo i tatou, ma le alofa na faaalia e Iesu i lona lotomalie e foaʻi mai lona ola mo i tatou. O le manatunatu i lo la alofa e uunaʻia ai i tatou e alolofa atu iā i laʻua. O le alofa mo Ieova lea e tatou te faaalia ma o tatou uso tapuaʻi, e pei o se maea e fusia faatasi ai i tatou ma faamalosia ai lo tatou autasi.

12. Na faapefea ona faamanino mai e Iesu e faatalitalia e Ieova i tatou e faamagalo atu, e pei ona faaalia i lana talafaatusa i le tupu ma ana pologa?

¹² O le auala lona tolu e tatou te faatumauina ai le autasi, o le faamagalo atu ma le lotoatoa. Pe a tatou faamagalo atu i ē na faatigā mai iā i tatou, e faaalia ai o loo tatou talisapaia le faamagaloina e Ieova o a tatou lava agasala e ala i le taulaga togiola a Keriso. Seʻi manatu i se tasi o talafaatusa a Iesu o loo taʻua i le Mataio 18:23-34. Ia fesili ifo: ʻPo o oʻu naunau e faatatau mea na aʻoaʻo mai e Iesu? Po o oʻu faaalia le onosaʻi ma taumafai e malamalama i oʻu uso tapuaʻi? Po o oʻu nofosauni e faamagalo i latou na agasala mai iā te aʻu?’ O le mea moni, e eseese le matuiā o agasala ma o isi agasala e matuā faigatā i tagata lē lelei atoatoa ona faamagalo. Peitaʻi, o lenei talafaatusa e tatou te aʻoaʻoina ai le mea o loo faatalitalia e Ieova mai iā i tatou. (Faitau le Mataio 18:35.) Ua faamanino mai e Iesu o le a lē faamagaloina i tatou e Ieova pe afai e tatou te lē faamagalo atu i o tatou uso, e ui lava e iai māfuaaga lelei e tatau ona faamagalo ai i latou. E matuā tāua lenei manatu! E tatou te puipuimalu ma faatumauina lo tatou autasi pe a tatou faamagalo atu i isi e pei ona aʻoaʻo ai i tatou e Iesu.

13. E faapefea i le avea o i tatou ma ē e faatupuina le filemu ona faatumauina ai le autasi?

¹³ Pe a tatou faamagalo atu i isi, e faamaonia ai o i tatou o ni ē e faatupuina le filemu.  Ia manatua le fautuaga a le aposetolo o Paulo, e tatau ona tatou “matuā naunau e tausia le autasi i le agaga i le fusi o le filemu.” (Efe. 4:3) I le vaitaimi o le Faamanatuga aemaise lava i le pō o le Faamanatuga, ia manatunatu loloto i le auala o loo e feutagaʻi ai ma isi. Ia fesili ifo: ʻPo o oʻu faaalia manino atu e lē o aʻu o se tagata e teulotoina le ita? Po o mātaulia aʻu o sē e taumafai malosi e faatupu le filemu ma faatumauina le autasi?’ O ni fesili tāua nei e manatunatu i ai i lenei taimi o le tausaga.

14. E faapefea ona tatou faaalia atu o loo “onosaʻi le tasi i le isi i le alofa”?

¹⁴ O le auala lona fā e tatou te faatumauina ai le autasi, o le faaalia lea o le alofa e pei o Ieova le Atua alofa. (1 Ioa. 4:8) Ia aua lava neʻi o tatou faapea atu e faatatau i o tatou uso tapuaʻi, “E tatau ona ou alofa i ai ona o i latou o oʻu uso, ae o le mea moni ou te lē fiafia iā i latou”! O le iai o se manatu faapena, e tuufaafeagai ma le fautuaga a Paulo ina ia “onosaʻi le tasi i le isi i le alofa.” (Efe. 4:2) Ia mātau, e leʻi tau ina faapea mai Paulo ia “onosaʻi le tasi i le isi,” ae na ia faaopoopo mai e tatau ona tatou faia faapea “i le alofa.” E iai le eseesega o na manatu. E iai i a tatou faapotopotoga ituaiga eseese o tagata na tosina atu e Ieova iā te ia. (Ioa. 6:44) Talu ai ua tosina atu e Ieova i latou iā te ia, o lona uiga la e alofa Ieova iā i latou. Pe afai e alofa le Atua i o tatou uso ma tuafāfine, e faapefea la ona tatou faapea atu e lē mafai ona tatou alolofa iā i latou? E lē tatau ona tatou faatalatū e faaalia atu le alofa e pei ona poloaʻi mai ai Ieova.​—1 Ioa. 4:20, 21.

15. E faapefea ona tatou iloa o le a iai se Faamanatuga mulimuli?

¹⁵ O le a iai le aso o le a faia ai le Faamanatuga mo le taimi mulimuli. E faapefea ona tatou iloa? I lana uluaʻi tusi i le faapotopotoga i Korinito, na tusi atu ai Paulo i Kerisiano faauuina o le faamanatuina o le maliu o Iesu i tausaga taʻitasi, ua latou “faalauiloa atu ai pea le maliu o le Alii seʻia taunuu mai o ia.” (1 Kori. 11:26) O le faaupuga “taunuu mai” i le mau lenei, e faasino atu i le taimi e “sau” ai Iesu lea na ia taʻua i lana valoaga e faatatau i le taimi o le iʻuga. E tusa ai ma le puapuaga tele lea o loo faaloloʻi mai, na fetalai o ia: “Ona iloa ai lea i le lagi o le faailoga o le Atalii o le tagata, ona taufaitagituʻi ai lea o ituaiga uma o le lalolagi, o le a latou vaaia foʻi le Atalii o le tagata ua sau i ao o le lagi ma le mana ma le mamalu tele. O le a aauina atu e [Iesu] o ana agelu faatasi ma le leotele o le pū, ma o le a latou aoaoina ē ua filifilia mai i matāmatagi e fā, e amata mai i le tasi tuluʻiga o le lagi e oo atu i le isi tuluʻiga.” (Mata. 24:29-31) O le ʻaoaoina o ē ua filifilia’ e faasino atu i le taimi o le a maua ai e Kerisiano faauuina uma o loo totoe i le lalolagi lo latou taui faalelagi. O le a tupu lenā mea pe a māeʻa le amataga o le puapuaga tele ae a o leʻi gāpā le taua o Amaketo. I le taimi o lenā taua, o le a auai uma atu ai le 144,000 faatasi ma Iesu e faaumatia tupu o le lalolagi. (Faaa. 17:12-14) O le Faamanatuga mulimuli o le a faia a o leʻi “taunuu mai” Iesu e aoaoina le ʻaufaauuina i le lagi, o le Faamanatuga faaiʻu lenā.

16. Aiseā ua e naunau ai e auai i le Faamanatuga o lenei tausaga?

¹⁶ Seʻi o tatou finafinau ina ia auai ma maua aogā mai i le Faamanatuga iā Mati 31, 2018. Ia talosaga atu pea iā Ieova e fesoasoani mai iā i tatou ina ia faaauau ona faatumauina le autasi o ona tagata! (Faitau le Salamo 133:1.) Ia manatua, e iai le aso o le a tatou faamanatuina ai le Faamanatuga mo le taimi mulimuli. Ae i le taimi lenei, seʻi o tatou faia le mea sili ina ia auai, ma olioli ai i le matagofie o le autasi e tatou te maua a o auai i le Faamanatuga.