UA FAAPEA mai Sylviana, o se paeonia e silia i le 20 ona tausaga: “Pe a ou faalogo i tala fiafia a aʻu uō e faatatau i la latou auaunaga i oganuu o loo telē ai le manaʻoga mo paeonia, ou te fia tofo i lenā olioli.” Ae na toe faapea mai Sylviana: “Na ou popole ina neʻi lē mafai ona ou siitia atu i oganuu o loo telē ai le manaʻoga.”

Po o e malamalama i faalogona o Sylviana? Po o e fia auauna foʻi i se oganuu o loo telē ai le manaʻoga mo tagata talaʻi o le Malo, ae e te popole ina neʻi lē mafai ona ausia lou sini? Afai o lea, aua e te lotovaivai! O le fesoasoani a Ieova, ua mafai ai e le toʻatele o uso ma tuafāfine ona foʻia luʻi na taofia ai i latou mai i le faalautele atu o la latou faiva. Ina ia iloa le auala na fesoasoani ai Ieova i nisi o i latou, seʻi o tatou asiasi atu i le motu o Madagascar, e lona fā i motu aupito sili ona tetelē i le lalolagi.

I le silia i le 10 tausaga talu ai nei, e sili atu ma le toʻa 70 tagata talaʻi ma paeonia maelega mai i atunuu e 11 * na siitia mai i lenei motu o Aferika. E faaaloalo tele tagata o Madagascar i le Tusi Paia. E toʻatele foʻi tagata talaʻi i Madagascar ua lotomalilie e siitia atu i isi oganuu o lenei motu telē, ina ia fesoasoani e faalauiloa le feʻau o le Malo. Seʻi o tatou faatalanoaina nisi o i latou.

O Louis ma Perrine, o se ulugalii e silia i le taʻi 30 o laʻua tausaga, na la siitia mai i Falani i Madagascar. Ua leva ona la mafaufau e faalautele la laʻua faiva e ala i le siitia atu i se isi atunuu, ae na faatalatū Perrine. Na faapea mai Perrine: “Na ou fefe e faamasani i se olaga fou. Ou te leʻi manaʻo e tuua loʻu aiga, faapotopotoga, fale, o nofoaga na ou masani ai, ma laʻu faasologa masani. O le luʻi sili na tatau ona ou manumalo mai ai, o oʻu lava popolega.” Ae na iʻu ina foʻia faalogona popole o Perrine ma ia faaalia ai le lototele. O lea, na la siitia mai ai ma Louis i Madagascar i le 2012. O ā ni faalogona o Perrine e faatatau i la laʻua filifiliga? Na faapea mai o ia: “Pe a ou toe tepa i tua, e mafai ona ou faapea atu ua matuā faamalosia loʻu faatuatua i le vaaitino i le  fesoasoani a Ieova i o maʻua olaga.” Ua faapea mai Louis: “Na matuā faafiafiaina i maʻua i le ma Faamanatuga muamua i Madagascar, ona e toʻa 10 a ma suʻesuʻega faale-Tusi Paia na auai!”

Aiseā na lototetele ai lenei ulugalii e tutumau i lo laʻua tofiga ina ua tulaʻi mai faafitauli? Na la ōle atu iā Ieova i le tatalo ina ia foaʻi mai le malosi e tumau ai. (Fili. 4:13) Na taʻua e Louis: “Na tali mai Ieova i a ma tatalo ma foaʻi mai le ʻfilemu mai i le Atua.’ Na mafai ona ma taulaʻi i faamanuiaga o la ma auaunaga. Na imeli ma tusi mai foʻi a ma uō mai i Falani e faalaeiau i maʻua ina ia tutumau i le auaunaga.”​—Fili. 4:6, 7; 2 Kori. 4:7.

Na matuā faamanuiaina e Ieova le tutumau o Louis ma Perrine i le auaunaga. Na faapea mai Louis: “Iā Oketopa 2014, na ma auai ai i le Aʻoga Faale-Tusi Paia mo Ulugalii Kerisiano * i Falani. E lē mafai ona galo iā i maʻua lenā meaalofa mai iā Ieova.” Na faafiafiaina i laʻua ina ua faauu mai i le aʻoga, ma tofia e toe galulue i Madagascar.

O Didier ma Nadine, o se ulugalii na siitia mai i Falani i Madagascar i le 2010, ina ua silia i le taʻi 50 o la tausaga. Na faapea mai Didier: “Na ma paeonia i tausaga ua mavae, ae mulimuli ane tausi la ma fanau e toʻatolu. Ina ua matutua la ma fanau, na ma mafaufau e auauna i se isi atunuu.” Na taʻutino mai Nadine: “Ou te leʻi manaʻo e tuu si aʻu fanau. Ae na latou fai mai iā i maʻua: ʻE matuā faafiafiaina i matou pe afai e te lua ō e auauna i se atunuu o loo telē ai le manaʻoga!’ O a latou upu na faalaeiauina ai i maʻua e siitia mai loa. E ui lava o loo matou nonofo valavala ma le ma fanau, ae e faafiafiaina i maʻua ona e matou te talanoa i le tele o taimi.”

Na faigatā mo Didier ma Nadine le aʻoaʻoina o le gagana Malakasi. Na ʻata Nadine ma fai mai: “Ma te lē o toe talavou.” O le ā la na fesoasoani iā i laʻua? Muamua, na la auai atu i se faapotopotoga e tautatala i le gagana Falani. Mulimuli ane, na la siitia loa i se faapotopotoga e tautatala i le gagana Malakasi, ina ua la lototetele e aʻo le gagana Malakasi. Na taʻua e Nadine: “O le toʻatele o tagata na ma feiloaʻi ai i le talaʻiga, e latou te fiafia e suʻesuʻe le Tusi Paia. E masani ona latou faafetai mai i le asiasi atu iā i latou. I le taimi muamua, na faigatā ona ou talitonu i mea mananaia na tutupu i la ma faiva. Ua matuā faafiafiaina aʻu i la ma oganuu. Ou te ala aʻe i taeao uma ma ou faapea ifo, ʻManaia o le a ou auai i le talaʻiga.’”

E ʻata Didier a o mafaufau i le taimi na ia faatoʻā aʻoaʻoina ai le gagana Malakasi. Na fai mai o ia: “Na fai laʻu vaega i se tasi sauniga, ae ou te leʻi malamalama i tali a uso ma tuafāfine. Na pau laʻu tala na fai atu o le ʻFaafetai.’ Ina ua uma ona ou faafetai atu i se tuafafine mo lana tali, ae talo mai ē na nonofo i tua atu o le tuafafine e faailoa mai e sesē le tali. Na vave lava ona ou toe tofia se tasi uso ina ia aumai le tali saʻo. Ae talosia na saʻo le tali a le uso!”

Na matamata Thierry ma lana avā o Nadia i le tala, “Tausisi i Sini e Faamamalu ai le Atua” i le tauaofiaga i le 2005. Na faatatau atu lenā tala faale-Tusi Paia iā Timoteo. Na pāʻia ai loto o Thierry ma Nadia, ma faagaeetia ai i laʻua e auauna i se oganuu o loo telē ai le manaʻoga mo tagata talaʻi. Na faapea mai Thierry: “A o patipati le aofia i le faaiʻuga o le tala, na ou musumusu atu iā Nadia ʻO fea la e ta te siitia i ai?’ Ae fai mai Nadia, o le mea foʻi lenā o loo ia mafaufau ai.” E leʻi umi ae fai a la gaoioiga ina ia ausia lo la sini. Ua faapea mai Nadia: “Na faasolosolo ina faaitiitia a ma meafaitino, seʻia oo lava ina ofi uma i totonu o atopaʻu e fā!”

Na la taunuu i Madagascar i le 2006 ma olioli ai i la laʻua faiva. Na taʻua e Nadia, “E matuā faafiafiaina i maʻua ona o tagata e matou te feiloaʻi i le talaʻiga.”

Peitaʻi, na iai se luʻi na fetaiaʻi ma lenei ulugalii ina ua mavae le ono tausaga. O le tinā matua o Nadia e igoa iā Marie-Madeleine, sa nofo o ia i Falani. Na paʻū si loomatua ma gau ai lona lima ma lavea lona ulu. Ina ua uma ona talanoa atu Thierry ma Nadia i le fomaʻi a Marie-Madeleine, ona la talosaga atu loa lea i lo la tinā e sau e latou te nonofo i Madagascar. E ui lava na 80 tausaga o si loomatua i lenā taimi, ae na ia talia ma le fiafia le valaaulia. O ā ni ona faalogona i le nofo i se atunuu ese? Na fai mai o ia: “E faigatā i nisi taimi le faamasani i se siʻomaga fou. Ae e ui lava ua ou matua, e iai mea e mafai ona ou fesoasoani ai i le faapotopotoga. O le itu e sili ona ou fiafia ai i loʻu siitia mai i Madagascar, ona ua mafai ai e laʻu fanau ona faaauau i la laʻua auaunaga.”

O Riana o se uso ua silia i le 20 ona tausaga. Na ola aʻe o ia i Alaotra Mangoro, o se vaipanoa lafulemu i le itu i sasaʻe i Madagascar. Na atamai o ia i le aʻoga, ma na manaʻo e auai i iunivesite. Ae na sui lona mafaufau ina ua ia suʻesuʻeina le Tusi Paia. Na faapea mai o ia: “Na fai aʻu taumafaiga ina ia vave uma laʻu aʻoga maualuga, ma ou folafola atu iā Ieova, ʻO le a amata laʻu paeonia pe a pasi aʻu suʻega faaiʻu.’” Na faamaoni Riana i lana folafolaga ina ua faauu mai i le aʻoga. Na siitia atu o ia ma nofo i le fale o se uso paeonia, maua lana galuega faavaitaimi, ma amata loa ona paeonia. Na taʻua e Riana: “O le filifiliga sili lenei ua ou faia.”

Peitaʻi, e leʻi malamalama aiga o Riana i lana filifiliga na fai. Na taʻua e Riana: “Na faalaeiau aʻu e loʻu tamā, o lona uso, ma le uso o le tinā o loʻu tamā ina ia ou alu i le iunivesite. Ae ou te leʻi manaʻo e tuu laʻu paeonia.” E leʻi umi ae fia auauna Riana i oganuu o loo telē ai le manaʻoga. Aiseā? Na faapea mai o ia: “Na osofaʻia lo matou fale ma gaoia ai le tele o aʻu meatotino. O lenā faalavelave na ou manatunatu ai i fetalaiga a Iesu e faatatau i le faaputuina o ʻʻoa i le lagi.’ Na ou filifili ai loa e galue mamafa e faaputu ʻoa faaleagaga.” (Mata. 6:19, 20) Na siitia atu Riana i se vaipanoa mugālā i le itu i saute i Madagascar, e 800 maila (1,300 kilomita) le mamao mai i le nuu na nofo ai. O lenā vaipanoa e nonofo ai tagata Antandroy. Aiseā na siitia atu ai Riana i lenā vaipanoa mamao?

I se masina na muamua atu a o leʻi gaoia ana meatotino, na amata ai e Riana se suʻesuʻega faale-Tusi Paia ma ni tamāloloa Antandroy se toʻalua. Na ia aʻoaʻoina ni upu Tandroy ma mafaufau ai i le toʻatele o tagata Antandroy e leʻi faalogo muamua i le feʻau o le Malo. Na taʻua e Riana: “Na ou tatalo iā Ieova e fesoasoani mai ina ia ou siitia atu i le oganuu Tandroy.”

Na siitia atu Riana ma fetaiaʻi ai ma se faafitauli. Na fiu e saʻili sana galuega. Na fai i ai se tamāloa: “O le ā le mea ua e sau ai i inei? E ō uma tagata e suʻe ni a latou galuega i le mea na e sau ai.” Ina ua mavae ni vaiaso se lua, na malaga ai Riana e auai i se tauaofiaga itumalo e ui na utiuti lana tupe na iai. Na tomānatu o ia po o le ā sana gaoioiga o le a fai. Peitaʻi, na tuu e se uso se mea i totonu o le taga o le peleue o Riana, i le aso mulimuli o le tauaofiaga. O se tupe telē na lava ai lona pasese e toe foʻi i Antandroy, ma amata ai se tamaʻi pisinisi e faatau ai yogurt. Na taʻua e Riana: “Na ou maua le fesoasoani a Ieova i le taimi tonu na ou lē tagolima ai. Na mafai ai ona ou fesoasoani atu pea i tagata e leʻi iloa Ieova!” Na tele foʻi galuega na tatau ona fai i le faapotopotoga. Na toe faapea mai Riana: “E taʻilua vaiaso ma tofia aʻu e faia le lauga i le lautele. Na toleni aʻu e Ieova e ala i lana faalapotopotoga.” O loo faaauau ona galue Riana i le oganuu Tandroy,  e faalauiloa atu le feʻau o le Malo i le toʻatele o tagata o loo fia iloa Ieova.

O le faamautinoaga lenei a Ieova: “O so se tasi e faamanuia iā te ia lava i le lalolagi, e faamanuia iā te ia e ala i le Atua faamaoni.” (Isa. 65:16) E faamanuia i tatou e Ieova, pe afai e tatou te galulue malosi e faalautele atu la tatou faiva e ui i faafitauli. Seʻi mafaufau iā Sylviana, o se tuafafine mai Madagascar lea na taʻua i le amataga o lenei mataupu. Na popole o ia ina neʻi lē mafai ona ia siitia atu i oganuu o loo telē ai le manaʻoga. Aiseā na popole ai o ia? Na ia faapea mai: “O loʻu vae agavale e pe tusa ma le tolu ma le ʻafa inisi (9 senitimita) e puupuu atu ai nai lo o loʻu vae taumatau. E setusetu laʻu savali, ma e vaivaigofie foʻi loʻu tino.”

E ui i lea, na galulue faatasi Sylviana ma Sylvie Ann, o se tuafafine talavou e paeonia i lana faapotopotoga, ma la siitia atu ai i le 2014 i se tamaʻi nuu e 53 maila (85 kilomita) le mamao mai i lo la nuu. E ui i tulaga faigatā, ae na faataunuu le mea na moomoo i ai Sylviana, ma matuā faamanuiaina ai o ia. Na faapea mai Sylviana: “Pe tusa ma se tausaga talu ona ou galue i loʻu tofiga fou, ae papatiso loa i se fonotaga matagaluega Doratine, o se tinā talavou na ma suʻesuʻe i le Tusi Paia.”

E pei ona faaalia mai i faamatalaga a i latou ua siitia atu i oganuu o loo telē ai le manaʻoga, pe afai e faalautele atu la tatou faiva e ui i tulaga faigatā, o le a tatou tofo totino i le moni o le folafolaga a Ieova i ana auauna: “Ou te faamalosi iā te oe. Ou te matuā fesoasoani iā te oe.” (Isa. 41:10) O le iʻuga, e faamalosia ai la tatou faiā ma Ieova. E lē gata i lea, o lo tatou lotomalilie e ofo atu i tatou lava e galulue i oganuu i o tatou lava atunuu po o atunuu mamao, e sauniunia ai i tatou mo galuega faaleagaga i le lalolagi fou. Ua moni ai upu a Didier lea na taʻua muamua: “O le auauna i oganuu o loo telē ai le manaʻoga, o se toleniga lelei lenā mo le lumanaʻi.” Tau ina ia maua nisi tagata e lotomalilie e galulue, ina ia amata lenā toleniga!