UA LEVA ona avea taulaga o se vaega tāua o le tapuaʻiga moni. Sa ofo atu e tagata Isaraelu taulaga na faia i manu, ma ua mātaulia Kerisiano i taimi uma i lo latou faia o “taulaga o viiga.” Peitaʻi, e iai isi ituaiga taulaga e fiafia i ai le finagalo o le Atua. (Epe. 13:15, 16) O nei taulaga e maua ai le olioli ma faamanuiaga, e pei ona faaalia i faaaʻoaʻoga o loo mulimuli mai.

Sa matuā naunau Hana, o se tasi o auauna faamaoni anamua, ia maua sana tama tama. Peitaʻi sa lē fanau o ia. Sa tatalo o ia ma tautō iā Ieova pe afai o le a ia fanaua se tama tama, o le a “foaʻi atu o ia iā Ieova i aso uma o lona ola.” (1 Samu. 1:10, 11) Mulimuli ane, na tō Hana ma ia fanauina ai se tama tama na faaigoa iā Samuelu. Ina ua teʻa Samuelu ma le susu, sa ave o ia e Hana i le faleʻie paia e pei ona ia tautō ai. Sa faamanuia e Ieova Hana ona o lona uiga faataulaga. Sa faamanuiaina Hana i isi fanau e toʻalima, ma na avea Samuelu o se perofeta ma tusitala o le Tusi Paia.​—1 Samu. 2:21.

I le pei o Hana ma Samuelu, ua iai i Kerisiano i aso nei le faaeaga e faaaogā ai o latou ola i le auaunaga paia i Lē na faia i latou. Na folafola mai e Iesu o le a matuā tauia i tatou i so o se faataulaga e tatou te faia ina ia tapuaʻi atu ai iā Ieova.—Mare. 10:28-30.

I le uluaʻi senituri, sa lauiloa se fafine Kerisiano e igoa iā Toreka i ana ʻgaluega lelei ma le foaʻi atu o meaalofa,’ po o faataulaga na ia faia ina ia fesoasoani ai i isi. Ae e faanoanoa ona na ʻmaʻi o ia ma oti ai,’ ma na matuā faanoanoa ai le faapotopotoga atoa. Ina ua faalogo le ʻausoo o loo iai i inā Peteru, sa latou talosaga atu iā te ia ina ia alu ane. Seʻi faaata lo latou fiafia ina ua alu atu Peteru ma ia toe faatūina mai Toreka! O le uluaʻi toetū lea na faia e se aposetolo. (Galu. 9:36-41) E leʻi galo i le Atua faataulaga na faia e Toreka. (Epe. 6:10) O loo faamauina i le Afioga a le Atua le limafoaʻi o Toreka e avea o se faaaʻoaʻoga lelei mo i tatou.

Sa faataatia foʻi e le aposetolo o Paulo se faaaʻoaʻoga lelei o sē na foaʻi atu ma le agalelei lona taimi ma uaʻi atu i isi. Na tusi atu o ia i ona uso Kerisiano i Korinito e faapea: “Ua ou naunau tele e faaaogā mea uma ua iā te aʻu, ma loʻu malosi atoa ona o o outou ola.” (2 Kori. 12:15) Sa aʻoaʻoina e Paulo mai i mea na tutupu iā te ia, e lagona e se tasi le faamalieina pe a ia faia ni faataulaga mo le lelei o isi. Ae o le itu e sili ona tāua, e maua ai le faamanuia ma le finagalo malie o Ieova.​—Galu. 20:24, 35.

O lea la, e fiafia le finagalo o Ieova pe a faaaogā lo tatou taimi ma le malosi ina ia faaauiluma ai manaʻoga o le Malo, ma fesoasoani ai i uso ma tuafāfine. Ae pe e iai nisi auala e mafai ona tatou lagolagoina ai le galuega talaʻi o le Malo? Ioe, e iai! E lē gata i a tatou galuega lelei, ae e mafai foʻi ona tatou faamamaluina le Atua e ala i a tatou meaalofa tauofo. Ua faaaogā na meaalofa ina ia faaoo atu ai le talaʻiga i le lalolagi aoao, e aofia ai le lagolagoina o misionare ma isi auauna faapitoa faataimi atoa. O a tatou meaalofa tauofo foʻi o loo faagaoioia ai le saunia ma le faaliliuina o lomiga ma vitiō, o galuega fesoasoani i taimi o mala faalenatura, faapea le fausiaina o Maota mo Sauniga fou. E tatou te mautinoa o le a “faatamaoaigaina le tagata limafoaʻi.” E lē gata i lea, ua tatou faamamaluina Ieova pe a faaaogā a tatou ʻoa ina ia auauna ai iā te ia.​—Faata. 3:9; 11:25.