1. O le ā le fautuaga na tusi atu e le aposetolo o Paulo i Kerisiano i Kolose? (Tagaʻi i le ata i luga aʻe o le matua.)

E FOLIGA mai na tusia e le aposetolo o Paulo lana tusi i Kerisiano i Kolose, a o lata ina faaiʻu le taimi muamua na taofia ai o ia i Roma i le pe tusa o le 60-61 T.A. Na ia faapea atu i na Kerisiano e tāua ona latou maua le “malamalama faaleagaga.” (Kolo. 1:9) Na faapea atili atu Paulo: “Ua ou fai atu lenei mea, ina neʻi faatosina ese outou e se tasi i ana faamatalaga taufaasesē. Ia faaeteete: ina neʻi maileia outou e se tasi i filosofia ma manatu taufaasesē e lē aogā e tusa ma tū masani a tagata, e tusa ma mataupu faavae a le lalolagi, ae e lē tusa ma aʻoaʻoga a Keriso.” (Kolo. 2:4, 8) Na sosoo ai ma lona faamatala atu o māfuaaga na sesē ai nisi o manatu taatele, ma le pogai e fiafia ai tagata lē lelei atoatoa i mafaufauga o le lalolagi. O se faaaʻoaʻoga, o nisi o na manatu na faapogaia ai ni faalogona fiasili i isi, ma manatu ai e latou te atamamai atu nai lo o isi. O le fuafuaga o lenei tusi, ina ia fesoasoani i uso ia teena mafaufauga o le lalolagi ma gaoioiga sesē.​—Kolo. 2:16, 17, 23.

2. Aiseā o le a tatou iloiloina ai ni faaaʻoaʻoga o mafaufauga o le lalolagi?

² O mafaufauga o le lalolagi e uunaʻia ai se tasi ina ia lē amanaʻia pe manatu māmā i taʻiala a Ieova, ma e faasolosolo ona faavaivaia ai lo tatou faatuatua. O i tatou uma lava e vāai, faalogo, ma faitau i mafaufauga o le lalolagi e ala mai i televise, Initaneti, galuega, po o aʻoga. O le a iloiloina i lenei mataupu mea e mafai ona tatou  faia ina ia teena ai na mafaufauga e faasesēina ai o tatou mafaufau. O le a tatou talanoaina ni faaaʻoaʻoga se lima o mafaufauga o le lalolagi, ma auala e tatou te teena ai.

3. O le ā le manatu o loo fiafia ai le toʻatele o tagata, ma aiseā?

³ “E mafai lava ona avea aʻu ma tagata lelei e aunoa ma le talitonu i le Atua.” I le tele o atunuu, e masani ona faapea mai tagata e latou te lē talitonu i le Atua ma e lē ō i ni lotu. Atonu e latou te leʻi iloiloina lelei le manatu e faapea o loo soifua le Atua, ae e latou te fiafia i le manatu e pule lava i latou i le mea e fai. (Faitau le Salamo 10:4.) E manatu isi o i latou o ni tagata e atamamai pe a faapea mai, “E mafai lava ona avea aʻu ma tagata lelei e aunoa ma le talitonu i le Atua.”

4. E faapefea ona tatou fefulifulisaʻi ma se tasi e faapea mai e leai Sē na foafoaina mea uma?

⁴ Pe e saʻo manatu o tagata ia e faapea mai e leai Sē na foafoaina mea uma? E faigofie ona fenuminumiaʻi se tasi pe a saʻili atu i le faasaienisi ina ia iloa ai pe na faapefea ona amata le ola. Peitaʻi, e faigofie lava le tali. Pe afai e tatau ona iai se tufuga e na te fausia se fale, e sili atu la ona manaʻomia se tasi e na te foafoaina meafaiola! O le mea moni, e sili atu ona lavelave sela i tino o meafaiola nai lo o se fale, auā e lē mafai e se fale ona fanafanau e pei o sela ola. E mafai e nei sela ona teu faamatalaga ma toe faia kopi o i latou lava ina ia toe maua mai ai o latou ituaiga. O ai na foafoaina nei sela? O le tali lenei a le Tusi Paia: “E tofu lava le fale ma le tagata na ia faia, a o lē na faia mea uma o le Atua lea.”​—Epe. 3:4.

5. E faapefea ona tatou tali atu i le manatu e faapea, e mafai ona tatou iloa le mea e lelei e aunoa ma le talitonu i le Atua?

⁵ E faapefea ona tatou tali atu i le manatu e faapea, e mafai lava ona tatou iloa le mea e lelei e aunoa ma le talitonu i le Atua? Ua taʻua i le Afioga a le Atua e oo lava i tagata e lē talitonu i le Atua, e ono iai foʻi a latou tapulaa tau amio. (Roma 2:14, 15) O se faaaʻoaʻoga, atonu e latou te faaaloalo ma alolofa i o latou mātua. Peitaʻi, faamata e lelei ni tapulaa a se tasi e na te lē amanaʻia Lē na foafoaina mea, ma o Lē e faatulagaina tapulaa mo le mea saʻo ma le mea sesē? (Isa. 33:22) O le toʻatele o ē e atamamai ua latou taʻutino mai e manaʻomia e tagata le fesoasoani a le Atua, ona o tulaga leaga o loo tutupu i le lalolagi. (Faitau le Ieremia 10:23.) O lea, e lē tatau ona tatou manatu e mafai e le tagata ona iloa le mea lelei, e aunoa ma le talitonu i le Atua ma usitaʻi i Ana tapulaa.​—Sala. 146:3.

6. O le ā le manatu o le toʻatele e faatatau i lotu?

⁶ “E mafai lava ona e fiafia e aunoa ma lou auai i se lotu.” E toʻatele tagata e fiafia i lenei manatu, ona e latou te vāai i lotu o se mea ua pasiā ma lē toe aogā. Ua lē toe tapuaʻi foʻi tagata i le Atua ona o loo aʻoaʻo i le tele o lotu le aʻoaʻoga i le afi i seoli, le aoina o sefuluaʻi, po o le lagolagoina o faiga faapolotiki. E lētioa a faatupulaʻia le aofaʻi o tagata e manatu e mafai lava ona latou fiafia e aunoa ma le auai i se lotu. E latou te ono faapea mai, “Ou te fiafia e talanoa i le Tusi Paia, ae ou te lē fia alu i se lotu.”

7. E faapefea ona faatupu e le tapuaʻiga moni le fiafia?

⁷ Pe e moni e mafai lava ona fiafia se tasi e aunoa ma le auai i se lotu? E moni e mafai lava ona fiafia se tasi e aunoa ma lotu sesē, ae e lē mafai ona fiafia moni se tasi e aunoa ma se faiā lelei ma Ieova “le Atua fiafia.” (1 Timo. 1:11) O mea uma e faia e le Atua e mo le lelei o isi. E fiafia ana auauna ona e latou te taulaʻi atu i le fesoasoani i isi. (Galu. 20:35) O se faaaʻoaʻoga, seʻi mafaufau i le auala e faatupu ai e le tapuaʻiga moni le fiafia i le aiga. E aʻoaʻo e le tapuaʻiga  moni i tatou ia faaaloalo ma āva i a tatou paaga faaipoipo, ia manatu i le tautoga o le faaipoipoga o se mea e paia, ia faamamao mai i le mulilua, ia tausia aʻe se fanau e faaaloalo i isi, ma ia faaalia le alofa moni. O le iʻuga, o le tapuaʻiga moni ua autasia ai tagata i faapotopotoga fiafia ma se ʻauuso fiafia i le lalolagi aoao.​—Faitau le Isaia 65:13, 14.

8. E faapefea ona tatou faaaogā le Mataio 5:3 ina ia fefulifulisaʻi ai ma isi i le fesili, O le ā le ki i le mauaina o le fiafia moni?

⁸ O le ā so tatou manatu i mafaufauga o le lalolagi e faapea, e mafai lava ona fiafia se tasi e aunoa ma le auauna i le Atua? Ia mafaufau i le fesili lenei, O le ā le ki i le mauaina o le fiafia moni? E faafiafiaina nisi ona o a latou galuega, taaloga, po o isi mea. E olioli nisi ona o le tausia o se aiga, po o ni faiā māfana ma uō. O mea uma na e maua ai le fiafia, peitaʻi e iai se isi fuafuaga o le olaga e sili atu ona tāua e tatou te maua ai le fiafiaga tumau. E ese i tatou mai i manu, ona e mafai ona tatou aʻoaʻoina le poto e faatatau i Lē na faia i tatou, ma auauna iā te ia ma le faamaoni. O le auala lenā na foafoaina ai i tatou ma e maua ai le fiafia. (Faitau le Mataio 5:3.) O se faaaʻoaʻoga, e faafiafiaina tagata tapuaʻi moni pe a faapotopoto faatasi e tapuaʻi iā Ieova, ma maua ai le tele o faalaeiauga. (Sala. 133:1) E latou te olioli foʻi i se ʻauuso fealofani, ni olaga mamā, ma se faamoemoe fiafia.

9. (a) O le ā le manatu ua taatele i le lalolagi e faatatau i feusuaʻiga? (e) Aiseā e faasā ai i le Tusi Paia le faia o feusuaʻiga i le va o ni tagata e lē faaipoipo?

⁹ “Aiseā e faasā ai fua le faia o feusuaʻiga i le va o ni tagata e lē faaipoipo?” E ono faapea mai tagata: “O le mea tāua ia tatou fiafia. Aiseā e faasā ai fua le faia o feusuaʻiga i le va o ni tagata e lē faaipoipo?” E sesē le manatu e faapea e tatau ona talia e Kerisiano amioga lē mamā tau feusuaʻiga. Aiseā? Talu ai e faasā i le Afioga a le Atua le faitaaga. * (Faitau le 1 Tesalonia 4:3-8.) E iai le aiā tatau a Ieova e faia ai tulafono mo i tatou, ona o ia na faia i tatou. E faataga e le tulafono a le Atua le faia o feusuaʻiga i le va o se tane ma se fafine ua uma ona faaipoipo, ma o le faatulagaga lenā o le faaipoipoga. Ua saunia mai e le Atua tulafono ona e alofa iā i tatou, ma e mo lo tatou lelei. O aiga e usiusitaʻi i na tulafono e latou te olioli i ni mafutaga alofa, faaaloalo, ma saogalemu. E lē talia e le Atua i latou e iloa ana tulafono ae e lē usiusitaʻi i ai.​—Epe. 13:4.

10. E faapefea i se Kerisiano ona matuā faamamao ese mai i feusuaʻiga lē mamā?

¹⁰ Ua aʻoaʻoina i tatou i le Afioga a le Atua i auala e matuā faamamao ese ai mai i feusuaʻiga lē mamā. O se auala tāua e faia ai faapea, o le pulea lea o mea e tatou te vaavaai i ai. Na fetalai Iesu: “Ai se tasi e vaavaai pea i se fafine ma manaʻonaʻo i ai, ua uma ona mulilua ma ia i lona loto. O lenei, afai e te tausuai ona o lou mata taumatau, ia sali ese ma lafoaʻi.” (Mata. 5:28, 29) O lea, e tatau i se Kerisiano ona ʻalofia le matamata i ata matagā tau feusuaʻiga pe faalogologo i pese lē mamā. Na tusi le aposetolo o Paulo: “Ia fasiotia tuʻinanauga i o outou itutino, o le faitaaga.” (Kolo. 3:5) E lē gata i lea, e tatau ona pulea mea e tatou te mafaufau ma talanoa ai.​—Efe. 5:3-5.

11. Aiseā e ono tosina atu ai se Kerisiano i le tuliloaina o se galuega lelei?

¹¹ “E maua le fiafia pe a tatou tuliloaina se galuega lelei.” E faalaeiau e le toʻatele o  tagata i tatou ina ia tuliloa ni galuega lelei. O na galuega e ono maua ai se tulaga aloaʻia, pule, ma le tamaoaiga. Talu ai o le toʻatele o tagata e taulaʻi atu o latou olaga i le tuliloaina o ni galuega lelei, e ono mafai foʻi la ona aafia ai se Kerisiano i na mafaufauga.

12. Pe e fiafia moni se tasi pe a taulau manuia i se galuega lelei?

¹² Pe e moni o le a tumau ona fiafia se tasi pe a taulau manuia i se galuega lelei, lea e maua ai le pule ma se tulaga taualoa? E leai. Ia manatua, na maileia Satani i le tuʻinanauga o le fia pule ma viiviia e isi. Ae e lē o fiafia Satani, ma e lotoa tele o ia. (Mata. 4:8, 9; Faaa. 12:12) I se faaeseesega, e tumau ona fiafia se tasi pe a fesoasoani i isi ina ia aʻoaʻo le poto e faatatau i le Atua ma le faamoemoe o le ola e faavavau. E lē tumau le fiafia o se tagata i galuega a le lalolagi. E lē gata i lea, o galuega a le lalolagi e tumu i le uiga faatautavā. E uunaʻia ai foʻi le uiga fiasili ma le lotoleaga, ae o le iʻuga e na o le “ʻai a le matagi.”​—Fai. 4:4.

13. (a) O le ā se manatu e tatau ona iā i tatou e faatatau i galuega totogi? (e) E tusa ai o le tusi a Paulo i Kerisiano i Tesalonia, aiseā na matuā fiafia ai o ia?

¹³ E moni e manaʻomia ona tatou faigaluega ina ia maua tupe e tausi ai o tatou ola, ma e lē leaga le filifilia o galuega e tatou te fiafia i ai. E ui i lea, e lē tatau ona taulaʻi atu o tatou olaga i galuega totogi. Na fetalai Iesu: “E lē mafai ona pologa se tasi i ni matai se toʻalua, auā e ʻinoʻino o ia i le tasi ae alofa atu i le isi, pe e pipii atu i le tasi ae manatu faatauvaa i le isi. E lē mafai ona e pologa i le Atua atoa ma ʻOa.” (Mata. 6:24) E tatou te maua le fiafia moni pe a faamuamua le auaunaga iā Ieova ma aʻoaʻo isi i lana Afioga. O le ituaiga fiafia lenā na tofo i ai le aposetolo o Paulo. Na tuliloa muamua e Paulo se galuega lelei i le faiga o mea faa-Iutaia. Ae mulimuli ane na ia maua le fiafia moni ina ua auai i le galuega o le faia o isi ma soo, ma vaaitino i le talilelei ane o tagata i le feʻau mai i le Atua ma suia ai o latou olaga. (Faitau le 1 Tesalonia 2:13, 19, 20.) Ua na o le pau lenā o le galuega e maua ai le fiafia moni.

14. Aiseā e ono fiafia ai nisi i le manatu e faapea, e mafai ona foʻia e tagata o latou lava faafitauli?

¹⁴ “E mafai ona foʻia e tagata o latou lava faafitauli.” Atonu e fiafia le toʻatele o  tagata i lenei manatu o le lalolagi. Aiseā? Pe afai e moni lenei manatu, o lona uiga la e lē manaʻomia e tagata le taʻitaʻiga a le Atua, ma e pule lava le tagata i le mea e fai. O se isi māfuaaga e fiafia ai isi i lenei manatu, ona e tusa ai ma nisi suʻesuʻega, ua faaitiitia taua, solitulafono, faamaʻi, ma le tulaga mativa. Ua taʻua i se lipoti: “O le māfuaaga ua faasolo ai ina faaleleia tulaga o tagata, ona ua filifili tagata e faaleleia le tulaga o lalolagi.” Pe e faamaonia mai i lenā lipoti ua mafai e tagata ona foʻia faafitauli ua autausagā o latou puapuagatia ai? Ina ia tali lenei fesili, seʻi o tatou iloilo nei faafitauli.

15. O ā faamatalaga e faamaonia ai le tulaga mataʻutia o faafitauli o tagata?

¹⁵ Taua: E silia i le 60 miliona soifua na maumau i taua e lua a le lalolagi. Talu mai le Taua Lona Lua a le Lalolagi, ua lē mafai e tagata ona taofia faigātaua. E oo ane i le 2015, ua siitia i le pe tusa ma le 65 miliona tagata na ō ese faamalosi mai i o latou aiga ona o taua po o sauāga. E pe tusa ma le 12.4 miliona tagata na ō ese faamalosi mai i o latou aiga i le 2015. Solitulafono: E ui lava ua faaitiitia isi solitulafono i nisi o atunuu, peitaʻi ua matuā faatupulaʻia isi ituaiga solitulafono e pei o solitulafono i luga o le Initaneti, o sauāga i aiga, ma faiga faatupu faalavelave. E lē gata i lea, e manatu le toʻatele ua sasao faaafi faiga piʻopiʻo i le lalolagi aoao. Ua lē mafai e tagata ona tafiesea solitulafono. Faamaʻi: E iai faamaʻi ua mafai ona togafitia. Peitaʻi, e tusa ai ma se lipoti i le 2013, e toʻa iva miliona tagata i lalo ifo o le taʻi 60 tausaga ua maliliu i tausaga taʻitasi, ona o faamaʻi o le fatu, o le pē o le tino, kanesa, faaleagaina o māmā, ma le maʻi suka. Mativa: E tusa ai ma le lipoti a le Faletupe Autū a le Lalolagi, ua faatupulaʻia le aofaʻi o tagata e matuā matitiva i Aferika, mai i le 280 miliona i le 1990 i le 330 miliona i le 2012.

16. (a) Aiseā e na o le Malo ai o le Atua e mafai ona foʻia faafitauli o tagata? (e) O ā faamanuiaga o le Malo o loo folafola mai e Isaia ma le faisalamo?

¹⁶ O loo pulea e taʻitaʻi manatu faapito faiga faapisinisi ma faiga faapolotiki i aso nei. E manino mai la, e lē mafai e nei taʻitaʻi ona aveesea taua, solitulafono, faamaʻi, ma le tulaga mativa. E na o le Malo o le Atua e mafai ona aveesea nei faafitauli. Seʻi manatu i mea o le a faia e Ieova mo tagata. Taua: O le a aveesea e le Malo o le Atua mea uma e faapogaia ai faigātaua, e pei o le manatu faapito, faiga piʻopiʻo, lotonuu, tapuaʻiga sesē, atoa foʻi ma Satani. (Sala. 46:8, 9) Solitulafono: Ua aʻoaʻoina e le Malo o le Atua le faitau miliona o tagata i aso nei ina ia fealofani ma feoeoeaʻi, o se mea e lē mafai ona faia e se malo faaletagata. (Isa. 11:9) Faamaʻi: O le a faamanuia e Ieova ona tagata ma latou maua ai le soifua mālōlōina lelei atoatoa. (Isa. 35:5, 6) Mativa: O le a tafiesea e Ieova le tulaga mativa, ma faatamaoaiga ona tagata i le itu faaleagaga ma le faaletino, o se mea e sili atu ona tāua nai lo o tupe.​—Sala. 72:12, 13.

17. E faapefea ona e teena mafaufauga o le lalolagi?

¹⁷ Pe afai e te faalogo i se manatu o le lalolagi e tofotofoina ai lou faatuatua, ia suʻesuʻe po o ā fā a le Afioga a le Atua e faatatau i lenā manatu, ma talanoa atu i se Kerisiano taʻumatuaina. Ia tomānatu pe aiseā e fiafia ai tagata i lenā manatu, o ā māfuaaga e sesē ai, ma pe e faapefea ona e teena. Ioe, e mafai ona tatou puipuia i tatou lava mai i mafaufauga o le lalolagi, e ala i le mulimuli i le apoapoaʻiga a Paulo i le faapotopotoga i Kolose: “Ia outou savavali pea ma le atamai e faatatau i ē o i tua . . . Ia outou iloa le auala e tali atu ai i tagata taʻitoʻatasi.”​—Kolo. 4:5, 6.