1. O ā lagona o le toʻatele o auauna faamaoni a le Atua ona o le tulaga agasala?

“AUĒ o aʻu o le tagata malaia!” (Roma 7:24) E toʻatele auauna faamaoni a le Atua ua tofo i lagona e pei o le aposetolo o Paulo. O i tatou uma ua aafia i le agasala tuufaasolo, ma pe a lē ōgatusa a tatou gaoioiga ma le faanaunauga e faafiafia Ieova, e tatou te lagona le lotomafatia. O nisi Kerisiano na latou faia se agasala matuiā ma na manatu e lē mafai ona faamagaloina i latou e le Atua.

2. (a) E faapefea ona faailoa mai i le Salamo 34:22 e lē tatau i auauna a le Atua ona iai ni lagona o loo taʻusalaina i latou? (e) O le ā o le a tatou talanoaina i lenei mataupu? (Tagaʻi i le pusa “ Lesona po o le Faataunuuga?”)

² Peitaʻi, ua faamautinoa mai i le Tusi Paia o i latou e sulufaʻi atu iā Ieova e lē tatau ona iai ni lagona o loo taʻusalaina i latou. (Faitau le Salamo 34:22.) O le ā e aofia ai i le sulufaʻi atu iā Ieova? O ā laasaga e tatau ona tatou uia ina ia maua ai le alofa mutimutivale ma le faamagaloga a Ieova? E tatou te maua tali o nei fesili e ala i le iloilo o le faatulagaga o aai o sulufaʻiga i Isaraelu anamua. E moni o lenā faatulagaga na faia i lalo o le feagaiga o le Tulafono lea na suia i le Penetekoso 33 T.A. Ae ia manatua, o Ieova na saunia le Tulafono. O lea la, o lenei faatulagaga o aai o sulufaʻiga e tatou te aʻoaʻoina ai le silafaga a Ieova e faatatau i le agasala, tagata agasala,  ma le salamō. Muamua, seʻi o tatou tilofaʻia le fuafuaga ma le auala na faagaoioi ai nei aai o sulufaʻiga.

3. Na faapefea ona feutagaʻi tagata Isaraelu ma sē na fasioti tagata faamoemoeina?

³ E leʻi manatu māmā Ieova i so o se gaoioiga faamasaatoto i Isaraelu anamua. O sē na fasioti tagata faamoemoeina, e fasiotia o ia e “lē na te tauimasui i le toto,” o se tane lea e aiga vavalalata ma lē ua maliu. (Nu. 35:19) O lenei gaoioiga na taui ai le toto o le tagata lē sala lea ua faamaligiina. O le vave faia o lenā faasalaga oti na puipuia ai le Nuu Folafolaina mai i le faaleagaina, auā na faatonuina e Ieova, “aua foʻi tou te faaleagaina le laueleele, auā ua faaleagaina le laueleele i le [faamaligiina o le] toto” o tagata.​—Nu. 35:33, 34.

4. Na faapefea ona feutagaʻi tagata Isaraelu ma sē na fasioti tagata paʻivalea?

⁴ Ae na faapefea ona feutagaʻi tagata Isaraelu ma sē na fasioti tagata paʻivalea? E ui e leʻi fuafuaina le gaoioiga na ia faia, ae na nofosala lava o ia i le faamasaaina o le toto o le tagata e lē sala. (Kene. 9:5) Peitaʻi, na iai se faatulagaga alofa na faataga ai lē na fasioti tagata paʻivalea e sola ese mai i lē na te tauimasui i le toto, ma sulufaʻi atu i se tasi o aai o sulufaʻiga e ono na iai. O i inā na maua ai e lē na fasioti tagata paʻivalea le puipuiga, ma na tatau ona nofo ai i totonu o le aai o sulufaʻiga seʻia maliu le ositaulaga sili.​—Nu. 35:15, 28.

5. E faapefea ona fesoasoani le faatulagaga o aai o sulufaʻiga ina ia tatou malamalama lelei ai iā Ieova?

⁵ E leʻi tofiaina e tagata nei aai e avea ma aai o sulufaʻiga. O Ieova lava ia na faatonuina Iosua: “Ia e fai atu i le fanauga a Isaraelu e faapea, ʻIa tofia mo outou aai o sulufaʻiga.’” O na aai sa “faapaiaina.” (Iosua 20:1, 2, 7, 8) Talu ai o Ieova na faatulagaina nei aai mo se fuafuaga faapitoa, e tatou te ono fesili la: E faapefea i lenei faatulagaga ona fesoasoani e tatou te malamalama lelei ai i le alofa mutimutivale o Ieova? O le ā e tatou te aʻoaʻoina mai ai i le auala e sulufaʻi atu ai iā Ieova i aso nei?

6, 7. (a) Faamatala le matafaioi a toeaina i le faamasinoina o lē na fasioti tagata paʻivalea? (Tagaʻi i le ata i luga aʻe o le matua.) (e) Aiseā o se gaoioiga atamai ai i le tagata sulufaʻi ona talanoa atu i toeaina?

⁶ Pe afai na faafuaseʻi ona fasiotia se tasi, e tatau i lē na fasioti tagata paʻivalea ona sola atu i le aai o sulufaʻiga, ma muamua “tautala atu a o faalogologo mai toeaina” o loo i le faitotoʻa o le aai. E tatau ona talileleia o ia e toeaina. (Iosua 20:4) I se taimi mulimuli ane, e toe auina atu o ia i toeaina o le aai lea na ia fasiotia ai le tagata, ma e latou te faia lona faamasinoga. (Faitau le Numera 35:24, 25.) E faatoʻā mafai ona toe faafoʻi o ia i le aai o sulufaʻiga pe afai e faamaonia e leʻi fuafuaina le gaoioiga na ia faia.

⁷ Aiseā na tatau ai ona ia talanoa atu i toeaina? Na tatau i toeaina ona latou faatumauina le mamā o le nuu o Isaraelu, ma fesoasoani i lē na fasioti tagata paʻivalea ina ia maua le alofa mutimutivale o Ieova. Na tusi se faitofā o le Tusi Paia pe afai e lē alu atu le tagata sulufaʻi i toeaina, “o le a lamatia lona ola.” Na ia taʻua atili: “O le a paʻū lona toto iā te ia lava ona e na te leʻi faaaogā tatau le puipuiga na saunia e le Atua.” Na iai le fesoasoani mo lē na fasioti tagata paʻivalea, peitaʻi, na tatau ona ia saʻili ma talia lenā fesoasoani. Pe a lē sola atu o ia i se aai o sulufaʻiga na tofia e Ieova, na saʻoloto la le tauaiga vavalalata o lē ua maliu e fasioti o ia.

8, 9. Aiseā e tatau ai i se Kerisiano na faia se agasala matuiā ona talanoa atu i toeaina?

⁸ I aso nei, e manaʻomia i se Kerisiano ua faia se agasala matuiā ona saʻili le fesoasoani a toeaina o le faapotopotoga, ina ia toe faaleleia ai lona tulaga. Aiseā e tāua ai  lenei laasaga? Muamua, o Ieova na saunia le faatulagaga ina ia taulima e toeaina agasala matuiā, e pei ona taʻua i lana Afioga. (Iako. 5:14-16) Lua, o lenei faatulagaga e fesoasoani i le tagata faimea sesē ua salamō, ina ia tumau ai i le tausiga a le Atua ma ʻalofia ai le faaauau ona fai o le agasala. (Kala. 6:1; Epe. 12:11) Tolu, ua tofia ma toleniina toeaina ina ia faalaeiau i ē faimea sesē ua salamō, ma fesoasoani e tuuitiitia o latou tigā ma faalogona nofosala. Na fetalai Ieova o nei toeaina o ni “mea e malu ai mai i timuga mamafa.” (Isa. 32:1, 2) Pe e te lē ioe o lenei faatulagaga o se faamaoniga o le alofa mutimutivale o le Atua?

⁹ O le toʻatele o auauna a le Atua ua latou maua le mapusaga e ala i le saʻili atu ma maua le fesoasoani mai i toeaina. O se faaaʻoaʻoga, na faia e se uso e igoa iā Daniel se agasala matuiā, ma na faatalatū o ia i le tele o masina e talanoa atu i toeaina. Na ia taʻutino mai, “Ina ua mavae se taimi umi, na ou manatu e leai se mea e mafai ona toe fai e toeaina e fesoasoani ai iā te aʻu. Peitaʻi, sa ou popole ina neʻi iloa e se isi laʻu agasala ma ou selesele ai i āuga o le mea sesē na ou faia. O taimi uma ou te tatalo ai, sa ou manatu e tatau ona amata aʻu tatalo i le faatoese atu iā Ieova ona o laʻu agasala.” Mulimuli ane, na saʻili atu Daniel i le fesoasoani a toeaina. Pe a toe tepa i tua, ua faapea mai o ia: “O le mea moni na ou fefe e talanoa atu i toeaina. Ae ina ua ou faia faapea, na peiseaʻī na aveese atu e se tasi se avega mamafa na ou tauaveina. I le taimi lenei, ua mafai ona ou tatalo atu iā Ieova e aunoa ma se mea e faalavelavea ai.” Ua maua nei e Daniel se lotofuatiaifo mamā, ma na tofia talu ai nei o ia o se auauna o le faiva.

10. O le ā le gaoioiga na tatau ona vave faia e sē na fasioti tagata paʻivalea ina ia maua ai le alofa mutimutivale o Ieova?

¹⁰ Na tatau i lē na fasioti tagata paʻivalea ona vave gaoioi ina ia maua le alofa mutimutivale o Ieova. Na tatau ona ia sola atu i se aai o sulufaʻiga na sili ona latalata ane. (Faitau le Iosua 20:4.) E faigatā ona tatou faaata se tagata sulufaʻi e lē ano i le mea ua tupu, auā na faalagolago lona ola i le sola atu i le aai o sulufaʻiga i le vave e mafai ai ma nofo ai i inā! E tele mea na tatau ona ia faataulagaina. Na  tatau ona ia tuua lana galuega, se olaga sologa lelei i lona aiga, ma le saʻolotoga e fealuaʻi ai seʻia maliu le ositaulaga sili. * (Nu. 35:25) Peitaʻi, na matuā tauia ana taumafaiga. Pe a ia toe tuua le aai o sulufaʻiga, ua faaalia ai lona matuā lē popole i le toto na ia faamaligiina, ma o le a lamatia ai foʻi lona ola.

11. O ā gaoioiga e faia e se Kerisiano ua salamō e faaalia ai e na te lē o faaaogā sesē le alofa mutimutivale o le Atua?

¹¹ I aso foʻi nei, e tatau i tagata faimea sesē ua salamō ona latou faia se gaoioiga ina ia maua ai le alofa mutimutivale o le Atua. E tatau ona tatou lafoaʻia atoatoa le ala agasala, faamamao mai i agasala matuiā faapea foʻi agasala lāiti lea e iʻu atu ai i le faia o agasala matuiā. Na faagaeeina le aposetolo o Paulo e faamatala mai gaoioiga a Kerisiano i Korinito na salamō. Na tusi o ia e faapea: “Ua outou matuā filigā ai, ua taʻumamāina ai outou, ua outou lototigā ai, ua outou matataʻu ai, ua outou naunau tele ai, ua outou maelega ai e faasaʻo mea sesē!” (2 Kori. 7:10, 11) O taumafaiga maumauaʻi e lafoaʻia se ala agasala, e faailoa atu ai iā Ieova e tatou te lē o manatu māmā i le mea na tupu, ma e tatou te lē o faaaogā sesē lona alofa mutimutivale.

12. O ā mea e ono manaʻomia ona lafoaʻia e se Kerisiano ina ia maua ai pea le alofa mutimutivale o Ieova?

¹² O ā nisi o mea e ono manaʻomia ona lafoaʻia e se Kerisiano ina ia faaauau ai ona ia mauaina le alofa mutimutivale o le Atua? E tatau ona nofosauni e lafoaʻi e oo lava i mea e pele iā te ia pe afai e faaosoosoina ai o ia e faia le agasala. (Mata. 18:8, 9) Pe a uunaʻia oe e nisi o au uō e fai ni mea e lē fiafia i ai le finagalo o Ieova, po o le a e taofia le toe faifaimea faatasi ma i latou? Pe afai e faigatā ona e pulea lau inu i le ʻava malosi, po o le a e taumafai e faamamao ese mai i tulaga e ono faaosoosoina ai oe e inu tele? Pe afai o loo e tauivi ma tuʻinanauga lē mamā taufeusuaʻiga, po o le a e ʻalofia ni ata tifaga, upega tafaʻilagi, po o isi mea e ono faaosofia ai ni mafaufauga lē mamā? Ia manatua o so o se mea e tatou te lafoaʻia mo Ieova, e matuā aogā ina ia faatumauina ai lo tatou faamaoni iā te ia. E leai se isi mea e sili atu ona tigā nai lo o teena e Ieova. I le taimi e tasi, e leai se mea e sili atu ona faamalieina ai nai lo o le mauaina o lona “alofa faamaoni i aso uma lava.”​—Isa. 54:7, 8.

13. Aiseā na mafai ai ona maua e le tagata sulufaʻi le saogalemu, malupuipuia, ma le fiafia a o iai i le aai o sulufaʻiga?

¹³ O le taimi lava na taunuu ai le tagata sulufaʻi i se aai o sulufaʻiga, na saogalemu o ia. Na fetalai Ieova e faatatau i na aai: “Ia avea ma aai o sulufaʻiga mo outou.” (Iosua 20:2, 3) E leʻi finagalo Ieova e toe faamasinoina le fasioti tagata paʻivalea mo le solitulafono lava lea e tasi, pe faataga lē na te tauimasui i le toto e alu atu i totonu o le aai ma fasioti le tagata sulufaʻi. E lē manaʻomia ona fefe le tagata sulufaʻi ina neʻi tauimasui atu se tasi iā te ia. A o iai i totonu o le aai, na saogalemu ma malupuipuia o ia i le puipuiga a Ieova. O lenā aai e lē o se falepuipui. Na mafai e le tagata sulufaʻi ona faigaluega, fesoasoani i isi, ma auauna iā Ieova ma le filemu. Ioe, na mafai ona ia maua se olaga fiafia ma faamalieina!

14. O le ā e tatau ona mautinoa i ai se Kerisiano ua salamō?

¹⁴ O nisi o auauna a le Atua na faia ni agasala matuiā a ua salamō, na faaauau ona faapologaina i lagona nofosala. Na latou manatu e faavavau ona silasila Ieova iā i latou o ni tagata na agasala matuiā. Pe afai e faapena ou faalogona, ia e mautinoa pe a faamagalo oe e Ieova, ua ia faamagaloina atoatoa oe ma e lē tatau ona e toe lagona le nofosala. Na iloa e Daniel lea na taʻua i le amataga le moni o lenei manatu. Ina ua uma ona taulima e  toeaina le mataupu ma fesoasoani iā te ia e toe maua se lotofuatiaifo mamā, na ia faapea mai: “E pei ua mafai ona ou toe mānava. Ina ua uma ona taulima lelei le mataupu, ou te leʻi toe lagona le nofosala. E uma loa ona faamagalo se agasala, ua mou atu e faavavau lenā agasala. E pei lava ona fetalai Ieova, e na te aveesea a tatou avega mamafa ma faamamao ese mai iā i tatou. E te lē toe vaai lava i ai.” O le taimi lava e iai le tagata sulufaʻi i totonu o le aai o sulufaʻiga, e lē tatau ona toe popole ina neʻi maua o ia e lē na te tauimasui i le toto. I se tulaga talitutusa, o le taimi lava e faamagalo ai e Ieova a tatou agasala, e lē tatau ona tatou popole o le a toe lāgā e Ieova lenā agasala, pe toe faamasinoina ai foʻi i tatou.​—Faitau le Salamo 103:8-12.

15, 16. E faapefea i le avea ai o Iesu ma Lē e togiolaina i tatou ma o le Ositaulaga Sili, ona faamalosia ai lo tatou mautinoa i le alofa mutimutivale o le Atua?

¹⁵ O le mea moni, e tele atu māfuaaga e tatou te mautinoa ai nai lo o tagata Isaraelu i le alofa mutimutivale o Ieova. Ina ua uma ona faaleo mai e Paulo lona faanoanoa i le lē mafai ona ia usiusitaʻi atoatoa iā Ieova, na faapea mai o ia: “Ia faafetaia le Atua ona o lo tatou Alii o Iesu Keriso!” (Roma 7:25) Ioe, e ui lava na tauivi o ia ma le agasala faapea ana mea sesē i le taimi ua teʻa ia na salamō mai ai, ae na ia mautinoa o le a ia maua le faamagaloga a le Atua e ala iā Iesu. I le avea ai o Iesu ma Lē e togiolaina i tatou, ua ia faamamā o tatou lotofuatiaifo ma foaʻi mai le filemu o le mafaufau. (Epe. 9:13, 14) I le avea ai o Iesu ma o tatou Ositaulaga Sili, “ua mafai ai ona ia faaolaina atoatoa i latou e faalatalata atu i le Atua e ala iā te ia, auā o loo soifua pea o ia e ʻaiʻoi atu mo i latou.” (Epe. 7:24, 25) Pe afai o le matafaioi a le ositaulaga sili na faamautinoa atu ai i tagata Isaraelu ua faamagaloina a latou agasala, e sili atu la ona tatou mautinoa e ʻtatou te maua le alofa mutimutivale ma le agalelei faifua o le Atua e fesoasoani mai i le taimi e tatau ai,’ ona o le auaunaga a lo tatou Ositaulaga Sili o Iesu.​—Epe. 4:15, 16.

¹⁶ O lea la, ina ia o tatou sulufaʻi atu iā Ieova, e ao ona tatou faatuatua i le taulaga togiola a Iesu. Aua le tau ina manatu e tāua le taulaga togiola mo tagata uma. Nai lo o lea, ia e faatuatua o le togiola e mo oe. (Kala. 2:20, 21) Ia e faatuatua o le togiola o le faavae lea mo le faamagaloina o au agasala. Ia e faatuatua o le togiola ua e maua ai le faamoemoe mo le ola e faavavau. Ioe, o le taulaga togiola a Iesu o le meaalofa a Ieova mo oe.

17. Aiseā ua e manaʻo ai e sulufaʻi atu iā Ieova?

¹⁷ O aai o sulufaʻiga ua faaalia mai ai le alofa mutimutivale o Ieova. O lenei faatulagaga e lē gata na faamatilatila ai e le Atua le paia o le ola, ae na faataʻitaʻi mai ai foʻi le auala e fesoasoani mai ai toeaina iā i tatou, o mea e aofia ai i le salamō moni, ma le māfuaaga e tatou te maufaatuatuaina atoatoa ai le faamagaloga a Ieova. Po o e sulufaʻi atu iā Ieova? E leai lava se isi mea e te maua ai le saogalemu moni ua na o Ieova! (Sala. 91:1, 2) I le mataupu o sosoo mai, o le a tatou iloiloina ai pe faapefea i aai o sulufaʻiga ona fesoasoani iā i tatou, e faaaʻoaʻo ai i le faaaʻoaʻoga silisili a Ieova o le faamasinotonu ma le alofa mutimutivale.