1. O le ā e mafai ona tatou faia ona o pese?

NA FAAPEA mai se tagata tusi pese lauiloa: “O upu e faaosofia ai manatu. O musika e faaosofia ai lagona. Ae o pese e pāʻia ai lou loto ma lagona ai se manatu.” E leai lava nisi pese e sili atu nai lo o pese e faaleo atu ai a tatou viiga ma le alolofa i lo tatou Tamā i le lagi o Ieova. E lētioa a avea pese ma vala tāua o le tapuaʻiga moni, e tusa pe e tatou te pepese na o i tatou pe faatasi ma le faapotopotoga o tagata o le Atua.

2, 3. (a) O ā faalogona o nisi e faatatau i le pepese leotele faatasi ma le faapotopotoga? (e) O ā fesili o le a tatou talanoaina?

² O le ā la sou manatu e faatatau i le pese leotele faatasi ma le faapotopotoga? Pe e te matamuli e faia faapea? I nisi aganuu, e matamumuli tamāloloa e pepese a o iai faatasi ma isi tagata. O lenei vaaiga e mafai ona iai se aafiaga i le faapotopotoga atoa, aemaise lava pe afai e lē pepese leotetele toeaina, pe faia foʻi nisi mea a o pepese le faapotopotoga.​—Sala. 30:12.

³ Pe afai e tatou te manatu i le usuina o pese o se vaega tāua o la tatou tapuaʻiga, e mautinoa la o le a tatou lē mananaʻo e ō i fafo pe lē iai foʻi i taimi e usu ai pese o sauniga. O lea, ia fesili ifo: ʻO le ā laʻu vaaiga e faatatau i le usuina o pese i sauniga? E faapefea ona ou foʻia so o se faalogona e ono taofia ai  aʻu mai i le usuina fiafia ma le leotele o pese? O le ā ou te faia ina ia matuā faaleo atu ai faalogona o pese o loo tatou usuina?’

4, 5. O le ā le tele o sauniuniga na faia mo le usuina o pese i le tapuaʻiga i Isaraelu anamua?

⁴ Ua leva ona faaaogā e tagata tapuaʻi moni o Ieova musika e vivii atu ai iā Ieova. A o auauna ma le faamaoni tagata Isaraelu iā Ieova, sa tāua tele le usuina o pese i la latou tapuaʻiga. O se faaaʻoaʻoga, ina ua sauni le auaunaga i le malumalu, sa faamaopoopo e le tupu o Tavita tagata sa Levī e toʻa 4,000 ina ia saunia musika o viiga. E aofia ai iā i latou na le toʻa 288 o ē “na aʻoaʻoina i pesega iā Ieova, o tagata tomai uma.”​—1 No. 23:5; 25:7.

⁵ Sa avea musika ma le usuina o pese o se vaega autū o le faapaiaga o le malumalu. Ua taʻua e faapea: “Ina ua peiseaʻī ua tasi le leo o ē e ilia pū ma ē e pepese i viiga ma faafetai iā Ieova, ma ina ua sii aʻe o latou leo i pū, o sumepalo, ma meafaifaaili e tā ai pese ma viiga o Ieova . . . ua tumu le fale o le Atua moni i le mamalu o Ieova.” E mautinoa o lenei sauniga na faamalosia ai le faatuatua o tagata!​—2 No. 5:13, 14; 7:6.

6. Faamatala mai le auala faapitoa na usu ai pese i le taimi na avea ai Neemia ma kovana i Ierusalema.

⁶ Ina ua taʻimua Neemia i tagata Isaraelu i le toe fausiaina o pā o Ierusalema, sa ia faamaopoopo foʻi tagata pepese sa Levī faatasi ai ma le tāina o meafaifaaili. Ina ua faapaiaina pā na toe fausia, sa avea musika faapitoa na usuina ai ma pogai na matuā olioli ai tagata i lenā sauniga. Sa iai “ni ʻaufaipese toʻatele se lua e usuina viiga o le faafetai.” Na eseese itu na savavali mai ai nei ʻaufaipese i luga o le pā, ona feiloaʻi lea e lata i le vaega na iai le malumalu, ina ia mafai ona lagona mai i mea mamao a latou pese. (Nee. 12:27, 28, 31, 38, 40, 43) E mautinoa na fiafia le finagalo o Ieova a o faafofoga mai i ona tagata tapuaʻi o loo viivii atu ma le fiafia iā te ia e ala i pese.

7. Na faapefea ona faamatilatila e Iesu le tāua o le usuina o pese i le tapuaʻiga faa-Kerisiano?

⁷ Ina ua faavaeina le faapotopotoga Kerisiano, sa faaauau ona avea musika ma vala tāua o le tapuaʻiga moni. Sa faaaofia e Iesu le usuina o pese ina ua mavae le Talisuaga Afiafi a le Alii, o le pō lea e sili ona tāua i le talafaasolopito o tagata.​—Faitau le Mataio 26:30.

8. Na faapefea ona faataatia e Kerisiano i le uluaʻi senituri se faaaʻoaʻoga i le usuina o pese i le tapuaʻiga?

⁸ Sa faataatia e Kerisiano i le uluaʻi senituri se faaaʻoaʻoga o le vivii faatasi atu i le Atua i pese. Sa masani ona latou feiloaʻi i fale o aiga mo la latou tapuaʻiga. E ui atonu sa faatauvaa na nofoaga, ae e leʻi taofia ai i latou mai i le pepese atu ma le fiafia iā Ieova. Na faapea atu le aposetolo o Paulo i ona uso Kerisiano: “Ia faaauau ona aʻoaʻo ma apoapoaʻi atu le tasi i le isi i salamo, o viiga i le Atua, o pese mananaia faaleagaga, ia pepese iā Ieova mai i o outou loto.” (Kolo. 3:16) O le mea moni, o pese o loo i la tatou tusi pese, o ni “pese mananaia faaleagaga” e ao ona usuina ma le lotofaafetai. O nisi na o meaʻai faaleagaga ua saunia mai e le “pologa faamaoni ma le faautauta.”​—Mata. 24:45.

9. (a) O le ā e ono taofia ai nisi mai i le pepese ma le fiafia i a tatou sauniga ma fonotaga? (e) O le ā le auala e tatau ona tatou usu ai pese o viiga iā Ieova, ma o ai e tatau ona tausolomua ai? (Tagaʻi i le ata i luga aʻe o le matua.)

⁹ Ae faapefea pe afai e lē o se tū masani i lou aiga, lau aganuu, po o le vaipanoa  o e nofo ai le usuina o pese? Talu ai ua faatupulaʻia faiga faatekinolosi faaonapōnei, atonu la e te fiafia e faalogologo i tagata pepese lauiloa. Atonu e te matamuli pe e te lē fiafia foʻi pe a e faatusatusa lou leo i tagata pepese taʻutaʻua. Peitaʻi, e lē tatau ona avea lenā ma māfuaaga e lē faia ai lau matafaioi o le pese atu o viiga iā Ieova. Nai lo o lea, ia tuu i luga lau tusi pese, ia faasaʻo i luga lou ulu, ona pese loa lea mai i lou loto! (Esera 3:11; faitau le Salamo 147:1.) O le tele o Maota mo Sauniga i aso nei ua faaali mai upu o pese i luga o TV ina ia fesoasoani iā i tatou i le usuina o pese. O se mea e mataʻina foʻi ona ua faaaofia i le Aʻoga o le Faiva o le Malo mo toeaina le usuina o pese o le Malo. Ua faamatilatila mai ai, e tāua i toeaina ona tausolomua i le usuina o pese i le faapotopotoga.

10. O le ā e tatau ona tatou manatua pe afai e tatou te popole e pepese leotetele?

¹⁰ O se tasi o mea e māfua ai ona lē pepese leotetele le toʻatele, ona o le popole. Atonu e popole ina neʻi matilatila ese o latou leo pe e lē manaia foʻi i le faalogo a isi. Peitaʻi, ia manatua “e sesē i tatou uma i mea e tele” pe a tatou tautatala. (Iako. 3:2) Ae e lē taofia ai lava i tatou mai i le talanoa atu i isi. Aiseā la e taofia ai fua i tatou mai i le pepese atu i viiga iā Ieova ona e lē lelei o tatou leo?

11, 12. O ā nisi o fautuaga i auala e faaleleia ai lo tatou usuina o pese?

¹¹ Atonu e tatou te faatalatū e pepese ona e tatou te lē mautinoa i le auala e pepese ai. Peitaʻi, e mafai ona faaleleia le auala e tatou te pepese ai e ala i le faatatau o nisi o fautuaga faigofie. *

¹² E mafai ona aʻo le auala e te pese malosi ai ma le leotele e ala i le mānava faalelei. E pei lava ona ola se molī ona o le  eletise, e faapena foʻi ona malosi lou leo pe a e mānava lelei a o e tautala pe pese. E tatau ona e pese leotele e pei lava ona e leotele pe a e tautala, pe sili atu foʻi. (Tagaʻi i fautuaga o loo i le tusi Mauaina o Aogā Mai i le Aʻoga o le Faiva Faatiokarate, itulau e 181 i le 184, i le tamaʻi ulutala “Faatonutonu Faalelei Lau Mānava.”) O le mea moni, o nisi taimi e faatonuina ai e le Tusi Paia tagata tapuaʻi o Ieova ia “alalaga fiafia” a o pepese.​—Sala. 33:1-3.

13. Faamatala mai le auala e mafai ona tatou pepese ai ma le mautinoa.

¹³ Ia faataʻitaʻi auala nei a o fai la outou tapuaʻiga a le aiga pe na o oe foʻi: Filifili se pese sauniga e te fiafia i ai. Ia faitau leotele upu o le pese i se leo malosi ma mautinoa. Pe a uma, ia mānava tasi i totonu ma toe taʻu upu uma o se laina e tasi, ona usu loa lea o lenā laina i le malosi lava lenā o lou leo. (Isa. 24:14) O le iʻuga, o le a malosi lou leo ma o se mea lelei lenā. Aua e te popole pe matamuli fua!

14. (a) O le ā se isi mea e tatou te faia ina ia malolosi ai o tatou leo? (Tagaʻi i le pusa “ Auala e Faaleleia ai Lou Usuina o Pese.”) (e) O ā ni fautuaga ua e iloa e aogā ina ia foʻia ai faafitauli i o tatou leo?

¹⁴ E lē mafai ona malosi lou leo seʻi vaganā ua tatala tele lou fofoga. O le isi la fautuaga, o le tatala tele lea o lou fofoga e sili atu nai lo o le mea e masani ai pe a e tautala. O le ā e tatau ona e faia pe afai e te manatu e vaivai lou leo pe atonu foʻi e ʻīʻī tele? E te maua ni fautuaga talafeagai i le tusi Mauaina o Aogā Mai i le Aʻoga o le Faiva Faatiokarate, itulau e 184, i le pusa “Foʻia o Faafitauli Patino.”

15. (a) O le ā le faasilasilaga na faia i le fono faaletausaga i le 2016? (e) O ā nisi o māfuaaga ua saunia ai le tusi pese fou?

¹⁵ Na lagona le fiafia i le fono faaletausaga a Molimau a Ieova iā Oketopa i le 2016, ina ua faasilasila e le uso o Stephen Lett o le Vaega Pule, ua lē o toe umi ona maua lea o la tatou tusi pese fou ua faamatuaina ʻPepese Fiafia’ iā Ieova. Na  faamatala e le uso o Lett o se tasi o māfuaaga ua toe fai ai lenei teuteuga, ina ia ōgatusa pese ma le toe teuteuga o le Faaliliuga a le Lalolagi Fou i le faa-Peretania. Na tatau ona aveese pe toe fetuunaʻi upu o pese o loo faaaogā ai faaupuga e lē toe maua i le toe teuteuga o le Faaliliuga a le Lalolagi Fou lea na tatala i le 2013. Ua faaopoopo foʻi i ai pese fou e faatatau i la tatou galuega talaʻi, ma pese e faaleo atu ai lo tatou lotofaafetai mo le togiola. E lē gata i lea, talu ai o pese o se vaega tāua o la tatou tapuaʻiga, na mananaʻo la le Vaega Pule ia saunia se tusi pese e anagatā e tutusa ma le faavaa o le Faaliliuga a le Lalolagi Fou lea ua toe teuteuina.

16, 17. O ā vala ua toe fetuunaʻi i la tatou tusi pese fou?

¹⁶ Ina ia faigofie ona faaaogā le tusi pese ʻPepese Fiafia’ iā Ieova, ua faatulaga lelei pese i mataupu eseese. O se faaaʻoaʻoga, o pese muamua e 12 o loo faatatau atu iā Ieova, o pese e 8 e sosoo ai o loo faatatau atu iā Iesu ma le togiola, ma faasolo atu ai i isi mataupu. O loo iai se faasino mataupu e mafai ona faaaogā pe a suʻe se pese, e pei o se pese mo se lauga lautele.

¹⁷ Ina ia fesoasoani i tagata uma ia pepese mai i le loto, o nisi pese ua toe fetuunaʻi upu ina ia faamanino atili ai se manatu. O se faaaʻoaʻoga, o le pese sa faamatuaina “Ia Faapalepale,” ua sui i le “Ia Outou Onosaʻi,” ma ua fetuunaʻi foʻi upu ina ia ōgatusa ma le matua. Ua talafeagai foʻi ona sui le matua o le pese “Ia Leoleoina Lou Loto,” i le matua e faapea “Ia Tatou Leoleo o Tatou Loto.” Aiseā? Talu ai o le toʻatele o tagata e iai i a tatou sauniga, fonotaga, ma tauaofiaga, o tagata fou, tagata fiafia, talavou, ma tuafāfine. Pe a latou usuina la upu o le pese “Ia Leoleoina Lou Loto,” e ono lē lelei o latou faalogona ona e peiseaʻī o loo latou faatonu atu isi i le mea e tatau ona fai. O lea la ua toe teuteu ai le matua ma upu o lenā pese.

18. Aiseā e tatau ai ona tatou faamasani i pese o la tatou tusi pese fou? (Tagaʻi foʻi i le faaopoopoga i le pito i lalo.)

¹⁸ O le tele o pese i lenei tusi pese fou ua pei o ni tatalo. E mafai ona e faaleo atu ou faalogona loloto iā Ieova e ala i nei pese. O isi pese o le a fesoasoani “ina ia faatupu ai [iā i tatou] le alofa ma galuega lelei.” (Epe. 10:24) E mautinoa e tatou te mananaʻo ia faamasani i fati, o le saoasaoa ma le lemū, faapea upu o a tatou pese. E mafai ona e faia faapea e ala i le faalogologo i pese ua usuina o loo maua i le jw.org i le faa-Peretania. Pe afai e aʻo le usuina o pese i le fale, o le a mafai la ona e pese ma le mautinoa mai i lou loto. *

19. E faapefea i tagata uma i le faapotopotoga ona faia se sao tuusaʻo i le tapuaʻiga iā Ieova?

¹⁹ Ia manatua, o le usuina o pese o se vala tāua o la tatou tapuaʻiga. O se auala lelei tele lea e faaalia atu ai lo tatou alolofa ma le talisapaia o Ieova. (Faitau le Isaia 12:5.) Pe afai e te pese leotele ma le fiafia, o le a faalaeiau ai foʻi isi ina ia pepese ma le mautinoa. O tagata uma lava i le faapotopotoga, o ē iti, matutua, ma tagata fou, e mafai ona aufaatasi i lenei auala tuusaʻo e tapuaʻi atu ai iā Ieova. O lea, aua e te faatalatū e pese mai i lou loto. Nai lo o lea, ia faatatau le faatonuga manino a le faisalamo e faapea: “Inā pepese atu ia iā Ieova!” Ioe, ia pepese atu ma le fiafia!​—Sala. 96:1.