1. O le ā le auala faapitoa na faailoa atu ai e Ieova o ia lava iā Mose, ma aiseā e mataʻina ai?

E IAI le taimi na faailoa atu ai e le Atua o ia lava iā Mose e ala i le taʻua o Lona suafa ma ona uiga. O ona uiga na ia taʻua muamua o le alofa mutimutivale ma le alofa fua. (Faitau le Esoto 34:5-7.) Sa ono mafai ona faamatilatila atu e Ieova lona malosi ma lona atamai. Peitaʻi, na faamatilatila atu e Ieova iā Mose ona uiga e atagia atu ai lona naunau e fesoasoani i ana auauna, ona na fia maua e Mose se faamautinoaga o le fesoasoani a le Atua. (Eso. 33:13) Pe e lē faamāfanafanaloto iā te oe le taʻua muamua e le Atua o ona uiga nei? O le a taulaʻi atu lenei mataupu i le alofa mutimutivale, o le manatu mamafa lea i mafatiaga po o faafitauli o isi ma naunau e fesoasoani atu i ai.

2, 3. (a) O le ā e iloa ai o le alofa mutimutivale o se uiga masani o tagata? (e) Aiseā e tatau ai ona tatou faatāua le manatu o le Tusi Paia e faatatau i le alofa mutimutivale?

² Na faia tagata i le faatusa o le Atua. Talu ai e alofa mutimutivale Ieova, o se uiga masani la o tagata le manatu mamafa mo le lelei o isi. E oo lava i ē e lē iloa le Atua moni, e masani ona latou faaalia le alofa mutimutivale. (Kene. 1:27) E tele tala i le Tusi Paia o loo faamatilatila ai lenei uiga o le alofa mutimutivale. Seʻi manatu  i le tala i fafine talitane e toʻalua na fefinauaʻi i luma o Solomona po o ai o i laʻua o le tinā moni o le pepe. Ina ua tofotofoina i laʻua e Solomona e ala i le faatonuina ia isilua le pepe, na oso aʻe le alofa mutimutivale o le tinā moni o le pepe. Na augani atu ia aua le fasiotia le pepe ae ave ma le isi fafine. (1 Tu. 3:23-27) Ia mafaufau foʻi i le afafine o Farao lea na ia faasaoina Mose a o pepe. E ui na ia iloa o le pepe na ia mauaina o se pepe Eperu e lē tatau ona faasaoina, ae na filifili o ia e na te tausia e avea ma ana tama ʻona na ootia o ia i le alofa’ i le pepe.​—Eso. 2:5, 6.

³ Aiseā e tatau ai ona tatou faatāua le uiga lenei o le alofa mutimutivale? Talu ai ua uunaʻia i tatou e le Tusi Paia ina ia faaaʻoaʻo atu iā Ieova. (Efe. 5:1) Na faia le tagata ina ia faaalia le alofa mutimutivale. Peitaʻi, e tatou te lolo atu i le manatu faapito ona o lo tatou tulaga lē lelei atoatoa na tuufaasolo mai iā Atamu. O nisi taimi e ono faigatā la tatou filifiliga pe fesoasoani i isi pe uaʻi iā i tatou lava. O loo faaauau ona tauivi nisi ma lenei filifiliga pe taumafai ia maua se vaaiga paleni. O le ā e fesoasoani iā i tatou ina ia atiaʻe ma faatumauina ai lo tatou naunau i isi? Muamua, ia faaalu se taimi e iloilo ai auala na faaalia ai e Ieova le alofa mutimutivale ma auala na faaalia ai e isi. Lua, ia iloilo pe faapefea ona tatou faaaʻoaʻo iā Ieova ma po o ā aogā o lo tatou faia faapea.

4. (a) Aiseā na aauina atu ai e Ieova agelu i Sotoma? (e) O le ā e tatou te aʻoaʻoina mai i le tala iā Lota ma ona afafine?

⁴ E tele faaaʻoaʻoga e iloa ai na faaalia e Ieova le alofa mutimutivale. Seʻi manatu i le gaoioiga na faia e le Atua mo Lota. Na “matuā mafatia” lenei tane amiotonu ona o amioga matagā a tagata Sotoma ma Komoro. O lea na filifili ai le Atua ua tatau ona faaumatia nei tagata amioleaga. (2 Pete. 2:7, 8) Na aauina mai e le Atua agelu ina ia laveaʻi Lota. Na tauanau e agelu Lota ma lona aiga ina ia sosola ese mai i aai o le a faaumatia. “Ua faifaiaga pea o ia, ae ona o le alofa mutimutivale o Ieova iā te ia, ua fetagofi atu ai [agelu] i lona lima, ma lima o lana avā, ma lima o ona afafine e toʻalua, ua la aveese atu o ia ma tuu i fafo o le aai.” (Kene. 19:16) Pe e lē faaalia mai ai i lenei faataʻitaʻiga e silafia lelei e Ieova faafitauli o loo fesagaʻia e ana auauna faamaoni?​—Isa. 63:7-9; Iako. 5:11.; 2 Pete. 2:9.

5. E faapefea ona fesoasoani le Afioga a le Atua e pei o le mau o loo i le 1 Ioane 3:17, ina ia tatou faaalia ai le alofa mutimutivale?

⁵ E lē gata na faaalia e Ieova le alofa mutimutivale, ae na ia aʻoaʻoina foʻi ona tagata ia faaalia lenei uiga. Seʻi manatu i le tulafono na tuu atu iā Isaraelu e faatatau i le ave o le ofu o se tasi ina ia faamau ai se aitalafu. (Faitau le Esoto 22:26, 27.) O se tagata e lē alofa atonu na manaʻo e taofi le ofu o lē na aitalafu iā te ia, ma leai ai se mea e ufiufi ai lona tino pe a moe. Peitaʻi, na aʻoaʻoina e Ieova ona tagata ia ʻalofia lenā uiga lē alofa. Sa tatau i ona tagata ona faaalia le alofa mutimutivale. Pe e lē uunaʻia ai i tatou e lenā mataupu silisili ina ia fesoasoani i isi? Pe e tatou te fia vāai atu o loo mafatia o tatou uso ae o loo mafai ona tatou fesoasoani atu i ai?​—Kolo. 3:12; Iako. 2:15, 16; faitau le 1 Ioane 3:17.

6. O le ā e tatou te aʻoaʻoina mai i taumafaiga a Ieova ina ia suia tagata Isaraelu na agasala?

⁶ Na faaalia e Ieova le alofa mutimutivale e ui ina agasala tagata Isaraelu. E tatou te faitau e faapea: “Ua auina mai pea lava pea e Ieova le Atua o o latou augātamā, o lapataʻiga iā i latou e ala i ana avefeʻau, auā ua alofa mutimutivale o ia i lona nuu, atoa foʻi ma lona afioaga.” (2 No. 36:15) Pe e lē  faapena foʻi o tatou faalogona mo tagata e mafai ona salamō mai i se agasala ma maua le finagalo malie o le Atua? E lē finagalo Ieova ina ia faaumatia se tasi i le faaumatiaga o loo faaloloʻi mai. (2 Pete. 3:9) O lea, a o leʻi oo ina faaumatia e le Atua o ē amioleaga, seʻi faaauau pea ona tatou faalauiloa atu lana feʻau alofa e lapataʻia ai tagata.

7, 8. Aiseā na talitonu ai se tasi aiga na faaalia e Ieova le alofa mutimutivale iā i latou?

⁷ E tele mea na tutupu e faaalia ai le alofa mutimutivale o le Atua. Seʻi manatu i le mea na tupu i le aiga o se tama talavou e 12 tausaga o le a faaigoa iā Milan. O le taimi lea o le taua i le va o ituaiga i lo latou atunuu i le amatamataga o vaitausaga o le 1990. Na malaga atu Milan, o lona uso laʻitiiti, o ona mātua ma nisi o Molimau mai i Bosnia e agaʻi atu i Serbia. Sa agaʻi atu i latou mo se tauaofiaga lea o le a papatiso ai mātua o Milan. Peitaʻi, ina ua taunuu atu i le tuaoi, na aveese e fitafita le aiga o Milan mai i le pasi ona e ese lo latou ituaiga, ae faataga isi uso e faaauau le faigāmalaga. Ina ua mavae le lua aso talu ona taofia i latou, na ualesi atu le fitafita i lo latou taʻitaʻi po o le ā le mea o le a fai i le aiga o Milan. Na tū le fitafita i luma ma na lagona uma atu e le aiga le tali mai a le taʻitaʻi, “Ave e tafana!”

⁸ A o talanoa atu le fitafita i isi fitafita, na savavali mai ni tamāloloa se toʻalua agaʻi i le aiga ma musumusu i ai o i laʻua o ni Molimau. Na la iloa le mea ua tupu mai i isi na malaga atu i le pasi. Na faatonu e nei tamāloloa Milan ma lona uso e tulioso i le la taavale ina ia sopoʻia le tuaoi ona e leʻi siakiina pepa a Milan ma lona uso. Na faapea mai nei tamāloloa i mātua o Milan e ui atu i tua o le tuaoi ma latou feiloaʻi ai i le isi itu. E leʻi mautonu Milan pe ʻata pe tagi ona o faatonuga a tamāloloa. Na fesili atu mātua o Milan, “E te lua manatu o le a latou faataga i matou e ō ese?” Peitaʻi, a o latou savavali ese, na pei lava e leʻi iloa atu i latou e fitafita. Na feiloaʻi le aiga i le isi itu o le tuaoi. Na faaauau la latou faigāmalaga i le aai na faia ai le tauaofiaga, ma le talitonuga na tali mai Ieova i a latou tatalo faatauanau mo se fesoasoani. E tatou te iloa mai i le Tusi Paia e iai taimi e leʻi puipuia faavavega ai e Ieova ana auauna. (Galu. 7:58-60) Peitaʻi, ua faapea mai Milan, “Iā te aʻu, e pei na faatauaso e agelu mata o fitafita ma laveaʻiina ai i matou e Ieova.”​—Sala. 97:10.

9. O le ā na faia e Iesu ona o le tulaga mafatia o le motu o tagata na mulimuli atu iā te ia? (Tagaʻi i le ata i luga aʻe o le matua.)

⁹ E mafai ona tatou aʻoaʻoina se lesona mai iā Iesu. Na mutimutivale lona alofa i le motu o tagata na feiloaʻi i ai, ona “ua pei i latou o mamoe ua faamanuʻalia ma agaleagaina, ua leai so latou leoleo mamoe.” O le ā le tali atu a Iesu i o latou tulaga mafatia? ʻSa ia aʻoaʻo atu iā i latou i le tele o mea.’ (Mata. 9:36; faitau le Mareko 6:34.) O uiga o Iesu na matuā tuufaafeagai lava ma le ʻau Faresaio, o ē e leʻi mananaʻo e fesoasoani i tagata lautele. (Mata. 12:9-14; 23:4; Ioa. 7:49) Pe e lē iā te oe foʻi se faanaunauga malosi e pei o Iesu, ia fafaga tagata o loo galala faaleagaga?

10, 11. Pe e talafeagai ona faaalia le alofa mutimutivale i so o se tulaga? Ia faamatala.

¹⁰ E lē faapea e tatau lava ona faaalia le alofa mutimutivale i so o se tulaga. Na talafeagai lelei tulaga na faaalia ai le alofa mutimutivale o le Atua, e pei o faaaʻoaʻoga na taʻua i le amataga. Peitaʻi, na lē usiusitaʻi Saulo ona o lona faia o se gaoioiga na manatu i ai o le alofa mutimutivale. Na ia faasaoina le ola o Akako o se fili o tagata o le Atua, ma na ia faasaoina foʻi manu e aupito i lelei. O le iʻuga, na teena e Ieova Saulo mai i le avea ma tupu i Isaraelu. (1 Samu. 15:3, 9, 15) O le mea  moni, o Ieova o le Faamasino amiotonu. E na te silafia loto o tagata ma e na te silafia foʻi le taimi e lē talafeagai ai ona faasafua atu lona alofa mutimutivale. (Aue. 2:17; Eseki. 5:11) O le a oo mai le taimi o le a ia faaumatia ai i latou uma o loo mumusu e usiusitaʻi iā te ia. (2 Tesa. 1:6-10) E lē o se taimi lenā e na te faaalia ai le alofa mutimutivale iā i latou ua ia silasila i ai o ē amioleaga. Nai lo o lea, o lona faaumatiaina o ē amioleaga o se gaoioiga talafeagai lea e faaalia ai lona alofa mutimutivale i ē amiotonu, ia o le a faasaoina.

¹¹ E manino mai la, e lē o sa tatou matafaioi le faamasino po o ai tagata e faaumatia a o ai e faasaoina. Nai lo o lea, e manaʻomia ona tatou faia le mea sili i le taimi lenei e fesoasoani ai i tagata. O lea, o ā ni auala aogā e tatou te faaalia ai le alofa mutimutivale i isi? Seʻi o tatou iloiloina nisi o auala.

12. E faapefea ona e faaalia le alofa mutimutivale i isi?

¹² Ia loto fesoasoani i aso faisoo. O le faaalia o le alofa mutimutivale i tuaoi ma uso Kerisiano o se mea e tatau ona fai e i latou e fia faaaʻoaʻo iā Iesu. (Ioa. 13:34, 35; 1 Pete. 3:8) O se tasi uiga o le alofa mutimutivale o le “mafatia faatasi ma isi.” O le tagata e alofa mutimutivale e naunau e faaitiitia mafatiaga o isi, atonu e ala i le fesoasoani e foʻia o latou faafitauli. Ia saʻili avanoa e tatou te faia ai faapea! O se faataʻitaʻiga, pe e mafai ona e tauofo e faia se feʻau mo se isi o loo manaʻomia le fesoasoani?​—Mata. 7:12.

13. O ā uiga e mātaulia ai tagata o le Atua pe a māeʻa ni mala faalenatura?

¹³ Ia faia se sao i galuega laveaʻi. O le mafatia o nisi ona o mala faalenatura ua uunaʻia ai le toʻatele e faaalia le alofa mutimutivale. Ua lauiloa tagata o Ieova i le tauofo atu e fesoasoani i taimi o mala. (1 Pete. 2:17) E iai se tuafafine Iapani na nofo i le vaipanoa lea na matuā faaleagaina i le mafuiʻe ma le sunami i le 2011. Na ia taʻua sa “matuā faalaeiauina ma faamāfanafanaina” o ia, ona o le fesoasoani a le toʻatele o le ʻautauofo mai isi vaega o Iapani ma isi atunuu ina ia faaleleia mea na faaleagaina. Na tusi mai o ia: “O lenei mea na tupu, ua ou iloa ai e manatu mamafa mai Ieova.  O ana Molimau foʻi e manatu mamafa le tasi i le isi, ma e toʻatele uso ma tuafāfine i le lalolagi aoao o loo tatalo mo i matou.”

14. E faapefea ona e fesoasoani i ē mamaʻi ma ē matutua?

¹⁴ Ia fesoasoani i ē mamaʻi ma ē matutua. A o tatou vāai atu o mafatia isi ona o āuga o le agasala a Atamu, e uunaʻia ai i tatou e faaalia le alofa mutimutivale. E tatou te tulimataʻia le taimi o le a faamuta ai maʻi ma le tino matua. O lea, e tatou te tatalo ai ia oo mai le Malo o le Atua. I le taimi e tasi, e tatou te faia le mea e mafai ina ia fesoasoani ai i ē o manaʻomia le fesoasoani. Seʻi manatu i le faamatalaga a se tusitala e faatatau i lona tinā matua na maua i le gasegase o le galogalo o mea. I se tasi aso na fai ai le feʻau a lona tinā i lona ofu (seʻi tulou). A o taumafai lona tinā e faamamā o ia lava, ae paʻō mai le logo o le faitotoʻa. O ē na asiasi atu o ni Molimau se toʻalua na asia e lē aunoa lona tinā. Na fesili atu tuafāfine pe e iai se mea e manaʻomia ai se fesoasoani. Na tali mai lona tinā, “Ta te māsiasi lava, ae ou te manaʻomia lava le lua fesoasoani.” Na fesoasoani tuafāfine e faamamā si ona tinā, faia se iputī mo ia, ma latou talatalanoa. Na matuā talisapaia e Jan nei gaoioiga. Na tusi o ia e faapea, “E tō loʻu pulou i nei Molimau a Ieova. E ola i latou e tusa ma mea o loo latou talaʻia.” Pe e uunaʻia oe e lou alofa mutimutivale mo ē mamaʻi ma matutua, e te faia ai le mea sili e faaitiitia ai o latou mafatiaga?​—Fili. 2:3, 4.

15. O ā aogā o le galuega talaʻi?

¹⁵ Ia fesoasoani i tagata i le itu faaleagaga. O faafitauli ma popolega o tagata e uunaʻia ai i tatou e fia fesoasoani i ai faaleagaga. O le auala sili e tatou te faia ai faapea, o le aʻoaʻo lea o i latou e faatatau i le Atua ma mea o le a faia e lona Malo mo tagata. O le isi auala, o le fesoasoani lea iā i latou ia iloa aogā o le faatatau o tapulaa a le Atua. (Isa. 48:17, 18) Pe e mafai ona faateleina lou sao i le faiva, o se galuega e faamamaluina moni ai Ieova ma faaalia ai lou alofa mutimutivale i isi?​—1 Timo. 2:3, 4.

16. O ā aogā e tatou te maua ona o le faaalia o le alofa mutimutivale?

¹⁶ Ua faapea mai fomaʻi o le mafaufau, o le faaalia o le alofa mutimutivale e mafai ona faaleleia ai lou soifua mālōlōina ma faiā ma isi. Pe a e fesoasoani i se isi e faaitiitia ona mafatiaga, o le a sili atu lou fiafia ma le mautinoa. O le a faaitiitia ai ou lagona o le tuua toʻatasi ma le aafiagofie i mafaufauga lē saʻo. Ioe, o le faaalia o le alofa mutimutivale e aogā iā te oe. (Efe. 4:31, 32) O Kerisiano e loto fesoasoani i isi e tauia i latou i ni lotofuatiaifo lelei, ona o loo latou faatatauina mataupu silisili a le Atua. O le a avea i latou ma mātua e sili atu ona manatu mamafa, ma ni paaga faaipoipo ma ni uō e sili atu ona lelei. O i latou e vave faaalia atu le alofa mutimutivale, e tele lava ina o latou maua le fesoasoani ma le lagolagosua pe a latou manaʻomia.​—Faitau le Mataio 5:7; Luka 6:38.

17. Aiseā e tatou te mananaʻo ai e atiaʻe ma faaalia le alofa mutimutivale?

¹⁷ O le mauaina o aogā mai i le faaalia o le alofa mutimutivale, e lē tatau ona avea ma māfuaaga autū e tatou te atiaʻe ai lenei uiga. O le māfuaaga autū o lo tatou faanaunauga lea e faaaʻoaʻo ma faamamaluina Ieova le Atua, le Puna o le alofa mutimutivale. (Faata. 14:31) Ua ia faataatia le faaaʻoaʻoga lelei atoatoa mo i tatou. Tau ina ia o tatou faia le mea sili ina ia faaaʻoaʻo ai iā te ia i le faaalia o le alofa mutimutivale. O le iʻuga, o le a atiaʻe ai ni faalogona māfana i le va o uso ma ni faiā lelei ma o tatou tuaoi.​—Kala. 6:10; 1 Ioa. 4:16.