O LE ā le aso e sili ona fiafia i lou olaga? O le aso na e faaipoipo ai, po o le aso na fanau ai lau ulumatua? Po o le aso foʻi na e papatiso ai? O le aso lenā e sili ona tāua ma fiafia i lou olaga. Maʻeu le fiafia o ou uso ma tuafāfine a o vāai atu ua faamaonia lou alofa i le Atua ma lou lotoatoa, ola atoa, mafaufau atoa, ma le malosi atoa!—Mare. 12:30.

E lē taumatea na e olioli i lau auaunaga iā Ieova talu ona e papatiso. Ae o le toʻatele o le ʻautalaʻi ua mou atu lo latou olioli sa iai. Aiseā ua tupu ai lenā mea? O ā māfuaaga e faaauau ai pea ona tatou auauna iā Ieova ma le olioli?

Ua tatou maua le tele o le olioli ona o le feʻau o le Malo. Aiseā? Auā ua folafola mai e Ieova, ua toeitiiti ona faaumatia lea e le Malo o lenei lalolagi leaga ae aumaia le lalolagi fou a le Atua. Ua faapea mai le Sefanaia 1:14: “O loo latalata mai le aso tele o Ieova. O loo lata mai lava, e matuā televave mai lava.” Ae afai ua tatou manatu ua umi naʻuā le taimi ua tatou faatalitali ai, e mafai ona mou atu ai lo tatou olioli. E ono faavaivaia ai foʻi i tatou i la tatou auaunaga i le Atua.—Faata. 13:12.

Pe a tatou faatasitasi ma uso ma tuafāfine, e faalaeiauina ai i tatou e auauna pea iā Ieova ma le olioli. O amioga lelei a tagata o Ieova atonu na tosina mai ai i tatou i le tapuaʻiga moni, ma fesoasoani iā i tatou e auauna i le Atua ma le olioli. (1 Pete. 2:12) Peitaʻi, o le ā e ono tupu pe a aʻoaʻia se uso po o se tuafafine ona ua lē usitaʻia faatonuga a le Atua? E ono faavaivai ai nisi i le faapotopotoga ma mou atu ai lo latou olioli.

O le manaʻo tele i meafaitino e mafai foʻi ona aveesea ai lo tatou olioli. E faapefea? E taumafai le lalolagi a Satani e faatalitonu i tatou, e tatau ona tatou faatauina mea e lē o manaʻomia moni. O lea, seʻi o tatou manatua fetalaiga a Iesu: “E lē mafai ona pologa se tasi i ni matai se toʻalua, auā e ʻinoʻino o ia i le tasi ae alofa atu i le isi, pe e pipii atu i le tasi ae manatu faatauvaa i le isi. E lē mafai ona e pologa i le Atua atoa ma ʻOa.” (Mata. 6:24) E lē mafai ona tatou auauna iā Ieova ma le olioli, ae i le taimi e tasi o loo tatou taumafai e maua le tele o mea mai i lenei lalolagi.

O le auauna iā Ieova e lē o se avega mamafa mo i latou e alolofa iā te ia. (1 Ioa. 5:3) Ia manatua le fetalaiga a Iesu: “Ia outou ō mai iā te aʻu o outou uma ua tigāina ma mafatia i avega, ona ou faafouina lea o outou. Ia outou amoina laʻu amo ma faaaʻoaʻo mai iā te aʻu, auā o aʻu o lē e agamalu ma lotomaulalo, ona faafouina ai lea o outou. Auā e avegofie laʻu amo, ma e māmā foʻi laʻu avega.” (Mata. 11:28-30) O le avea ma Kerisiano moni e faafouina ma maua ai le olioli. E iai māfuaaga lelei tatou te olioli ai i le auaunaga iā Ieova. Seʻi o tatou iloiloina ni vala se tolu.—Sapa. 3:18.

O loo tatou auauna i le Atua fiafia, o Lē na foaʻi maia le ola. (Galu. 17:28; 1 Timo. 1:11) E tatou te iloa o le Atua e ana i tatou. O lea, seʻi o tatou auauna pea iā te ia ma le olioli, e tusa po o le ā le tele o tausaga talu ona tatou papatiso.

Seʻi o tatou manatu iā Héctor, sa auauna iā Ieova o se ovasia femalagaaʻi mo le 40 tausaga. E ui lava ina “ulusinā,” o loo auauna pea o ia ma le olioli iā Ieova. (Sala. 92:12-14) E ui ua faatapulaa lana auaunaga i le Atua ona o le maʻi o lana avā, ae e leʻi mou atu ai le olioli o Héctor. Na ia faapea mai: “E ui lava o se mea faanoanoa le vaai atu ua faasolo ina leaga le soifua mālōlōina o laʻu avā, ma o se luʻi le tausia pea o ia, ae ou te lē faatagaina lenei tulaga e aveesea ai loʻu olioli i le auaunaga i le Atua moni. Na ou iloa o Ieova e ana aʻu ma na ia faia le tagata ma se fuafuaga, ua lava ma totoe nei māfuaaga e alofa ma auauna ai iā te ia ma le lotoatoa. Ou te tauivi e maelega pea i le galuega talaʻi, ma ou te taumafai pea e taulaʻi i le faamoemoe o le Malo, ina ia tumau ai pea loʻu olioli.”

Ua saunia e Ieova le taulaga togiola, ina ia mafai ai ona tatou olioli i le olaga. Ioe, “ona o le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioa. 3:16) E mafai ona faamagaloina a tatou agasala ma tatou mauaina le ola e faavavau, pe afai e tatou te faatuatua i le meaalofa a le Atua o le togiola. O se māfuaaga lelei lea e tatau ai ona tatou lotofaafetai! O lo tatou lotofaafetai mo le togiola, o le a uunaʻia ai i tatou e auauna iā Ieova ma le olioli.

Na faapea mai se uso e igoa iā Jesús sa nofo i Mekisikō: “Na alu uma loʻu taimi i laʻu galuega, i nisi taimi ou te faigaluega ai mo le lima sifi sosoo e ui e leʻi manaʻomia. Na ou faigaluega ina ia maua ai nisi tupe se tele. Mulimuli ane, na ou  aʻoaʻoina upu moni e faatatau iā Ieova ma le auala na ia auina mai ai lona Alo pele mo tagata. O le iʻuga, na ou matuā naunau e auauna iā te ia. O lea, ina ua mavae le 28 tausaga o oʻu faigaluega i le kamupani, na ou tuuina atu ai iā Ieova, ma ou filifili ai e faamavae ae auai i le faiva faataimi atoa.” O le auala lenā na amata ai ona auauna ma le olioli Jesús iā Ieova.

E tatou te ola i ni olaga mamā lea e maua ai le fiafia. Pe e te manatua pe e faapeʻī lou olaga a o e leʻi iloaina Ieova? Na faamanatu e Paulo i Kerisiano i Roma ʻsa fai i latou ma pologa a le agasala’ ae peitaʻi ua avea nei “ma pologa a le amiotonu.” Talu ai ua latou ola i ni olaga mamā, ua mafai ai ona latou tepa taulaʻi atu i le ola e faavavau. (Roma 6:17-22) E tatou te mulimuli foʻi i tapulaa a Ieova, o lea ua tatou saʻoloto mai ai i se olaga faanoanoa ona o amioga lē mamā ma faiga sauā. Maʻeu se māfuaaga e olioli ai!

Seʻi manatu iā Jaime, o se tagata sa fusu na talitonu i le evolusione ae e lē talitonu e iai se Atua. Na amata ona auai Jaime i sauniga faa-Kerisiano ma na maofa o ia ona o le alofa na ia mātauina i inā. Ina ia lafoaʻia lona olaga sa iai muamua, na ōle atu Jaime iā Ieova ina ia fesoasoani mai e talitonu iā te Ia. Ua faapea mai Jaime: “Na faasolosolo mālie ona ou iloa e iai se Tamā alofa ma se Atua agalelei. O se puipuiga iā te aʻu le tausisi i tapulaa amiotonu a Ieova. Pe ana lē suia loʻu olaga, faapenei ua ou oti e pei o isi aʻu uō fusu sa iai. O tausaga sili ona fiafia o loʻu olaga, o tausaga ia ua faaaluina i le auaunaga iā Ieova.”

O le ā so tatou lagona a o faatalitali i le iʻuga o lenei lalolagi leaga? Ia manatua, o loo tatou faia le finagalo o le Atua ma tepa taulaʻi i le ola e faavavau. O lea, “aua neʻi o tatou fiu e faia le mea lelei, auā e iai le taimi e tatou te selesele mai ai, pe a tatou lē faavaivai.” (Kala. 6:8, 9) E ala i le fesoasoani a Ieova, seʻi o tatou tutumau ma ia galulue mamafa e atiaʻe uiga e manaʻomia e faasaoina ai i tatou i le “puapuaga tele,” ma ia auauna pea iā Ieova ma le olioli.—Faaa. 7:9, 13, 14; Iako. 1:2-4.

E tatou te mautinoa e tauia e Ieova lo tatou tumau, ona o loo ia silafia le galuega o loo tatou faia ma lo tatou alofa iā te ia ma lona suafa. Pe afai e tatou te auauna pea iā te ia ma le olioli, o le a tatou pei o le faisalamo o Tavita, o lē na faapea mai: “Ua ou tuu Ieova i oʻu luma e lē aunoa. Ou te lē tautevateva foʻi auā o loo iai o ia i loʻu itu taumatau. O le mea lea e olioli ai loʻu loto, ma ou te olioli foʻi i loʻu mamalu. Ou te nofo lava ma le saogalemu.”—Sala. 16:8, 9.