1, 2. O le ā atonu na taumānatu i ai le ʻauaposetolo ina ua toe afio Iesu i le lagi?

O LOO tutū aposetolo o Iesu i luga o le mauga o Olive ma vaavaai atu i le lagi. O lea faatoʻā māeʻa ona latou vaaia lo latou matai ma o la latou uō o Iesu, ua aveina aʻe i le lagi ma ua ufitia i se ao. (Galu. 1:9, 10) E pe ā ma le lua tausaga na aʻoaʻoina, faalaeiau, ma taʻitaʻia ai i latou e Iesu, a o lenei ua leai o ia. O le ā nei o le a latou faia?

² Na tuuina atu e Iesu i ona soo se tofiga: ʻE fai outou ma molimau iā te aʻu i Ierusalema, i Iutaia uma ma Samaria, ma tuluʻiga uma o le lalolagi.’ (Galu. 1:8) E mafai faapefea ona latou faataunuu lea tofiga tele? E moni na faamautinoa atu e Iesu iā i latou e lē o toe umi ae o latou mauaina le agaga paia. (Galu. 1:5) Peitaʻi, ina ia oo atu le talaʻiga i tuluʻiga uma o le lalolagi, na manaʻomia ona taʻitaʻia ma faamaopoopo lelei. Na faaaogā e Ieova ni tane e fai ma ona sui e taʻitaʻia ma faamaopoopo ona tagata i aso anamua. O lea, atonu na taumānatu  ai le ʻauaposetolo, ʻPo o le a filifilia e Ieova se taʻitaʻi fou?’

3. (a) O le ā le filifiliga tāua na faia e aposetolo faamaoni ina ua toe afio Iesu i le lagi? (e) O le ā o le a tatou talanoaina i lenei mataupu?

³ A o leʻi atoa se lua vaiaso mulimuli ane, na iloilo ai e soo o Iesu Tusitusiga Paia, tatalo mo le taʻitaʻiga a le Atua, ona filifilia lea o Matatia e suitulaga iā Iuta le Sekara e fai ma aposetolo lona 12. (Galu. 1:15-26) Aiseā na tāua ai lenei filifiliga iā i latou ma Ieova? Na iloa e soo e manaʻomia ona toʻa 12 aposetolo. * E leʻi tau ina filifilia e Iesu ona aposetolo ina ia latou galulue faatasi i le faiva, ae ina ia latou faatinoina se matafaioi tāua i tagata o le Atua. O le ā lenā matafaioi, ma na faapefea ona fesoasoani Ieova e ala mai iā Iesu, ina ia toleni i latou e faataunuu lenā matafaioi? O le ā se faatulagaga faapena o loo iai i tagata o le Atua i aso nei? E faapefea ona tatou “manatua i latou o loo taʻimua,” aemaise “le pologa faamaoni ma le faautauta”?—Epe. 13:7; Mata. 24:45.

4. O le ā le matafaioi na faatino e le ʻauaposetolo ma isi toeaina i Ierusalema i le uluaʻi senituri?

⁴ Na amata i le Penetekoso 33 T.A. ona taʻimua le ʻauaposetolo i le faapotopotoga Kerisiano. I lenā taimi, na “tū i luga Peteru faatasi ma le toʻasefulu tasi” ma taʻu atu upu moni faasaoola i le motu o tagata Iutaia ma tagata liulotu. (Galu. 2:14, 15) O le toʻatele o i latou na avea ma tagata talitonu. Mulimuli ane, o nei Kerisiano fou na “faaauau ona latou uaʻi atu i aʻoaʻoga a le ʻauaposetolo.” (Galu. 2:42) Na vaavaaia foʻi e le ʻauaposetolo tulaga tautupe a le faapotopotoga. (Galu. 4:34, 35) Sa latou tausia manaʻoga faaleagaga o tagata o le Atua, ma na latou taʻua: “O le a matou faasaga i le tatalo ma le faiva e tusa ai ma le afioga a le Atua.” (Galu. 6:4) Na latou tofia Kerisiano taʻumatuaina ina ia talaʻi i oganuu fou. (Galu. 8:14, 15) Mulimuli ane, na aufaatasi atu isi toeaina faauuina i le ʻauaposetolo i le vaavaaia o mataupu i faapotopotoga. I le avea ai ma vaega pule, na latou saunia atu taʻiala mo faapotopotoga uma.—Galu. 15:2.

5, 6. (a) Na faapefea ona faamalosia e le agaga paia le vaega pule? (Tagaʻi i le ata i luga aʻe o le matua.) (e) Na faapefea ona fesoasoani agelu i le vaega pule? (i) Na faapefea ona taʻitaʻia le vaega pule e le Afioga a le Atua?

⁵ Na mautinoa e Kerisiano i le uluaʻi senituri o Ieova na faatonutonuina le vaega pule e ala mai i lo latou Taʻitaʻi o Iesu. Na faapefea ona latou mautinoa? Muamua, na faamalosia e le agaga paia le vaega pule. (Ioa. 16:13) Na liligi ifo le agaga paia i luga o Kerisiano faauuina uma, ma na faamalosia faapitoa ai le ʻauaposetolo ma isi toeaina i Ierusalema e faataunuu o latou tofiga o ni ovasia. Mo se faaaʻoaʻoga, i le 49 T.A., na taʻitaʻia ai e le agaga paia le vaega pule e faia se faaiʻuga e faatatau i le mataupu o le peritomeina. Na mulimuli faapotopotoga i le taʻitaʻiga a le vaega pule, ma na “faaauau ai ona faamalosia le faatuatua o faapotopotoga, ma faatuputeleina ai mai i lea aso i lea aso.” (Galu. 16:4, 5) Ua iloa mai i le tusi na faailoa atu ai lenā faaiʻuga, sa faaalia e le vaega pule le fua o le agaga o le Atua, e aofia ai le alofa ma le faatuatua.—Galu. 15:11, 25-29; Kala. 5:22, 23.

⁶ Lona lua, na fesoasoani agelu i le vaega pule. A o leʻi papatiso Konelio, o le tagata mai i nuu ese e leʻi peritomeina na muamua  avea ma Kerisiano, na faatonu o ia e se agelu ina ia aami i le aposetolo o Peteru. Ina ua uma ona talaʻi atu Peteru iā Konelio ma lona aiga, na liligi ifo le agaga paia iā i latou e ui e leʻi peritomeina tane o lona aiga. O lenā mea na uunaʻia ai le ʻauaposetolo ma isi uso e gauaʻi i le finagalo o le Atua, ma talia i le faapotopotoga Kerisiano tagata mai nuu ese e leʻi peritomeina. (Galu. 11:13-18) Na galulue malolosi foʻi agelu e lagolagoina ma faatelevave le galuega talaʻi lea na vaavaaia e le vaega pule. (Galu. 5:19, 20) Lona tolu, na taʻitaʻia le vaega pule e le Afioga a le Atua. E tusa pe na latou foʻia feeseeseaʻiga i o latou talitonuga, pe tuuina atu taʻiala i faapotopotoga, ae na taʻitaʻia na toeaina faauuina e Tusitusiga Paia.—Galu. 1:20-22; 15:15-20.

7. Aiseā e tatou te faapea atu ai na taʻitaʻia e Iesu uluaʻi Kerisiano?

⁷ E ui na iai i le vaega pule le tulaga pule i le uluaʻi faapotopotoga, ae na latou amanaʻia o Iesu lo latou Taʻitaʻi. Na tusi le aposetolo o Paulo: “Na ia [Keriso] tuuina mai foʻi nisi e fai ma aposetolo, . . . ia tatou tutupu aʻe i le alofa iā te ia i mea uma, o le ulu lava ia, o Keriso lea.” (Efe. 4:11, 15) Nai lo o le faaigoa o i latou i se aposetolo lauiloa, na ʻtaʻua soo o Kerisiano, ona o le taʻitaʻiga a le Atua.’ (Galu. 11:26) E moni na iloa e Paulo e tāua ona “tausia mea uma lava,” po o faiga e faavae mai i le Tusi Paia lea na tuuina mai e aposetolo ma isi tane na taʻimua. Peitaʻi na ia taʻua atili: “Ae ou te manaʻo ina ia outou iloa, o le ulu o tane taʻitoʻatasi uma [e aofia ai sui uma o le vaega pule] o Keriso; . . . a o le ulu o Keriso o le Atua.” (1 Kori. 11:2, 3) Ioe, na taʻitaʻia e Keriso Iesu ua faamamaluina, le faapotopotoga i lalo o le taʻitaʻiga a Lē ua avea ma ona ulu, o Ieova le Atua.

8, 9. E amata mai le 1870, o le ā le matafaioi tāua na faatino e le uso o Russell?

⁸ E amata mai i le 1870, na taumafai ai Charles Taze Russell ma ana aumea e toe atiaʻe le tapuaʻiga moni faa-Kerisiano. Ina ia fesoasoani iā i latou e faaoo atu upu moni o le Tusi Paia i gagana eseese, na faavae faaletulafono ai i le 1884 le Zion’s Watch Tower Tract Society, lea na avea ai le uso o Russell ma peresitene. * O ia o se tagata aʻoga iloga o le Tusi Paia ma e leʻi fefe e faailoa atu le sesē o talitonuga, e pei o le Tolutasi ma le ola pea o le agaga pe a oti le tagata. Na ia iloa lelei e lē vaaia le toe afio mai o Keriso, ma o le a faaiʻuina “taimi atofaina o nuu ese” i le 1914. (Luka 21:24) Na tuutoina atu atoa e le uso o Russell lona taimi, malosi, ma tupe ina ia faasoa atu ai nei upu moni i isi. E manino mai, na faaaogā e Ieova ma le ulu o le faapotopotoga le uso o Russell i lea taimi tāua.

⁹ E leʻi saʻilia e le uso o Russell ni viiga mai i tagata. I le 1896, na tusi o ia: “E tatou te lē mananaʻo e viiviia pe faamamaluina i tatou po o a tatou lomiga. E tatou te lē mananaʻo e taʻua i tatou o Faafeagaiga po o Rapi [Aʻoaʻo]. E tatou te lē mananaʻo foʻi e faaigoa ni vaega i o tatou igoa.” Na ia taʻua mulimuli ane: “E lē o se galuega lenei a tagata.”

10. (a) O anafea na tofia ai e Iesu le “pologa faamaoni ma le faautauta”? (e) Faamatala pe na faapefea ona faasolosolo ona faaeseese le Vaega Pule mai i le Watch Tower Society.

¹⁰ I le 1919, ina ua tolu tausaga talu ona maliu le uso o Russell, na tofia ai e Iesu le “pologa faamaoni ma le faautauta.” Mo le ā le fuafuaga? Ina ia latou avatu “meaʻai i le taimi tatau” mo lana ʻaufaigaluega. (Mata.  24:45) A o faagasolo na tausaga, o se vaega toʻaitiiti o tane faauuina na auauna i le ofisa ulu i Brooklyn i Niu Ioka, na saunia ma tufatufaina atu meaʻai faaleagaga i soo o Iesu. Na amata ona faaaogā le taʻu “vaega pule” i a tatou lomiga ina ua mavae le 1940. I lenā taimi, na manatu ai o le vaega pule e faasino atu i faatonu o le Watch Tower Bible and Tract Society. Peitaʻi, i le 1971, na faaeseese ai le Vaega Pule mai i le Watch Tower Society ma ona faatonu, o se faalapotopotoga e uaʻi atu i mataupu faaletulafono nai lo o mataupu faale-Tusi Paia. O lea, na aofia ai i le Vaega Pule uso faauuina e lē o ni faatonu o le Sosaiete. I tausaga talu ai nei, ua auauna ai uso taʻimua mai i “isi mamoe” e avea o ni faatonu o le Sosaiete, ma isi sosaiete faaletulafono o loo faaaogā e tagata o le Atua. O le faia faapea ua mafai ai ona uaʻi atu le Vaega Pule i le saunia o faatonuga ma taʻitaʻiga faaleagaga. (Ioa. 10:16; Galu. 6:4) I Le Olomatamata o Iulai 15, 2013, na faamatala ai o le “pologa faamaoni ma le faautauta,” o se vaega toʻaitiiti o uso faauuina ua faia aʻe ai le Vaega Pule.

11. E faapefea ona faia faaiʻuga a le Vaega Pule?

¹¹ E faia faatasi faaiʻuga tāua e le Vaega Pule. E faapefea? E fono i vaiaso taʻitasi sui o le Vaega Pule, lea e fesoasoani iā i latou e maua ai ni fesootaʻiga māfana ma le autasi. (Faata. 20:18) I tausaga taʻitasi, e auauaʻi sui o le Vaega Pule e fai ma taʻitaʻifono i taimi o a latou fono, ona e leai se tasi e sili atu nai lo o le isi. (1 Pete. 5:1) O le auala foʻi lea e auauaʻi ai sui o le Vaega Pule e taʻitaʻifono i komiti e ono a le Vaega Pule o loo latou iai. O sui taʻitasi o le Vaega Pule e lē manatu iā i latou o ni taʻitaʻi i o latou uso, ae o ni sui o le “ʻaufaigaluega” lea o loo fafagaina e le pologa faamaoni ma gauaʻi atu i lana taʻitaʻiga.

12. Talu ai e lē maua e le Vaega Pule ni faaaliga mai i le Atua ma e lē lelei atoatoa foʻi, o ā la fesili ua tulaʻi mai?

¹² E lē maua e le Vaega Pule ni faaaliga mai i le Atua ma e lē lelei atoatoa foʻi i latou. O lea, e latou te ono sesē i mataupu e faatatau i talitonuga po o le taʻitaʻiga i le faalapotopotoga. O se faataʻitaʻiga, i le Watch Tower Publications Index, o loo iai le tamaʻi ulutala “Beliefs Clarified,” o loo lisi mai ai fetuunaʻiga i o tatou malamalamaga faale-Tusi Paia talu mai le 1870. * O le mea moni e leʻi fetalai Iesu o le a saunia mai e lana pologa faamaoni ni meaʻai faaleagaga lelei atoatoa. E faapefea la ona tatou taliina le fesili a Iesu: “O ai la le pologa faamaoni ma le faautauta?” (Mata. 24:45) O ā faamaoniga e iloa ai o le Vaega Pule o le pologa faamaoni lenā? Sei o tatou tilofaʻia vala e tolu lea foʻi na taʻitaʻia ai le vaega pule i le uluaʻi senituri.

13. Ua faapefea ona fesoasoani le agaga paia i le Vaega Pule?

¹³ Faamaoniga o le taʻitaʻiga a le agaga paia. Ua fesoasoani le agaga paia i le Vaega Pule ina ia malamalama i upu moni o le Tusi Paia lea e latou te leʻi malamalama muamua i ai. O se faataʻitaʻiga, seʻi mafaufau i le lisi o malamalamaga ua toe faamanino mai, lea na taʻua i le palakalafa ua mavae. E mautinoa e leai se tagata e mafai e ia lava ona malamalama ma faamatala nei “mea loloto a le Atua”! (Faitau le 1 Korinito 2:10.) E tutusa faalogona o le Vaega Pule ma le aposetolo o Paulo o lē na tusi: “O mea foʻi nei ua tatou tautatala atu ai, e lē o ni upu na aʻoaʻo mai i le atamai o tagata a o  mea na aʻoaʻo mai e le agaga.”(1 Kori. 2:13) Pe e lē moni ea o le agaga paia ua māfua ai ona faatuputeleina lo tatou malamalamaga faaleagaga talu mai le 1919, aemaise ua faitau selau tausaga talu ona liliuese tagata mai i le upu moni ma ua pogisa faaleagaga?

14. E tusa ai o le Faaaliga 14:6, 7, ua faapefea ona fesoasoani agelu i tagata o le Atua i aso nei?

¹⁴ Faamaoniga o le fesoasoani a agelu. Ua iai i le Vaega Pule i aso nei se tofiga tele o le vaavaaia o le galuega talaʻi i le lalolagi aoao, lea e aofia ai le silia i le valu miliona le ʻautalaʻi. Aiseā ua matuā taulau manuia ai lenei galuega? O se tasi o māfuaaga, ona o le fesoasoani a agelu. (Faitau le Faaaliga 14:6, 7.) E tele taimi na asia ai e le ʻautalaʻi nisi o tagata na faatoʻā uma lava ona tatalo mo se fesoasoani. * O le fesoasoani foʻi a agelu ua mafai ai ona faatuputupulaʻia le galuega talaʻi ma le faia o isi ma soo, e ui i teteega ogaoga i nisi o atunuu.

15. O le ā le eseesega o le Vaega Pule ma taʻitaʻi o lotu ua faapea mai o Kerisiano? Aumai se faaaʻoaʻoga.

¹⁵ Faalagolago i le Afioga a le Atua. (Faitau le Ioane 17:17.) Seʻi manatu i le mea na tupu i le 1973. I le Watchtower o Iuni 1, na lāgā ai se fesili: “Pe e agavaa mo le papatisoga i latou e lē o tuua le masaniga o le ulaula tapaa?” O le tali: “Ua faamaonia mai i mau o le Tusi Paia, e leai.” Ina ua uma ona sii mai nisi o mau talafeagai,  ona faamatala mai lea i le Watchtower māfuaaga e tatau ai ona faateʻaina se tagata ulaula e lē salamō. (1 Kori. 5:7; 2 Kori. 7:1) Na taʻua atili o lenei tapulaa maumauaʻi e lē mai i tagata, “ae e mai i le Atua e pei ona ia faailoa manino mai i lana Afioga tusia.” Pe e iai se isi tapuaʻiga e maumauaʻi e faalagolago atoatoa i le Afioga a le Atua, e tusa pe e matuā faigatā ona tausisia e nisi o ona sui? Na taʻua i se tusi talu ai nei e faatatau i tapuaʻiga i le Iunaite Setete: “E fetuunaʻi e lē aunoa e taʻitaʻi lotu Kerisiano o latou talitonuga, ina ia ōgatusa ma manatu ma talitonuga ua talia e le ʻaulotu po o tagata lautele.” Pe afai o loo taʻitaʻia faaiʻuga a le Vaega Pule e le Afioga a le Atua nai lo o manatu taatele, o ai moni la o loo taʻitaʻia tagata o le Atua i aso nei?

16. O le ā se tasi o auala e manatua ai le Vaega Pule?

¹⁶ Faitau le Eperu 13:7. O le upu ua faaliliuina i le “manatua,” e mafai foʻi ona faaliliuina i le “taʻua.” O lea, o se tasi o auala e “manatua ai i latou o loo taʻimua,” o le taʻua lea o le Vaega Pule i a tatou tatalo. (Efe. 6:18) Ia manatunatu i lo latou tiute tauave o le saunia mai o meaʻai faaleagaga, le vaavaaia o le galuega talaʻi i le lalolagi aoao, ma le vaavaaia o foaʻi tauofo. E mautinoa e latou te manaʻomia a tatou tatalo e lē aunoa mo i latou.

17, 18. (a) E faapefea ona tatou lagolagoina le Vaega Pule? (e) E faapefea i la tatou galuega talaʻi ona lagolagoina ai le pologa faamaoni ma Iesu?

¹⁷ O le mea moni, o le manatuaina o le Vaega Pule e lē na o upu e aofia ai, ae e aofia ai foʻi le lagolagoina o la latou taʻitaʻiga. Ua saunia mai e le Vaega Pule faatonuga o loo aumaia i a tatou lomiga, sauniga, fonotaga, ma tauaofiaga. Ua latou tofia foʻi ovasia o matagaluega, lea e latou te tofiaina toeaina o faapotopotoga. E manatua e ovasia o matagaluega ma toeaina le Vaega Pule, e ala i le mulimulituʻi i taʻiala ua tuuina mai iā i latou. O i tatou uma lava e faaalia le faaaloalo i lo tatou Taʻitaʻi o Iesu, e ala i le usiusitaʻi ma gauaʻi i tane o loo ia faaaogāina e taʻimua iā i tatou.—Epe. 13:17.

¹⁸ O le isi auala e tatou te manatua ai le Vaega Pule, o lo tatou maelega lea i le galuega talaʻi. Na faalaeiau e Paulo Kerisiano ia faaaʻoaʻo i le faatuatua o ē o loo taʻimua iā i latou. O loo faaalia e le pologa faamaoni le faatuatua malosi, e ala i le maelega e faaauiluma ma faalauiloa atu le tala lelei o le Malo. Po o oe o se tasi o isi mamoe o loo lagolagoina le ʻaufaauuina i lenei galuega tāua? E tatou te matuā lagona le fiafia pe a faapea mai lo tatou Taʻitaʻi o Iesu: “Auā na outou faia i se tasi o oʻu uso e sili ona faatauvaa, o aʻu lava lea ua outou faia i ai.”—Mata. 25:34-40.

19. Aiseā ua e maumauaʻi ai e mulimuli i lo tatou Taʻitaʻi o Iesu?

¹⁹ Ina ua toe afio Iesu i le lagi, e na te leʻi tuulafoaʻiina ona soo. (Mata. 28:20) Na ia silafia lelei le telē o le fesoasoani a le agaga paia, agelu, ma le Afioga a le Atua i lana taʻitaʻiga a o iai i le lalolagi. O lea, ua ia saunia foʻi nei fesoasoani mo le pologa faamaoni i aso nei. I le avea ai ma Kerisiano faauuina, ua “mulimuli atu” sui o le pologa faamaoni “i le Tamaʻi Mamoe i mea uma e alu i ai o ia.” (Faaa. 14:4) Pe a tatou mulimuli i la latou taʻitaʻiga, ua tatou mulimuli foʻi i lo tatou Taʻitaʻi o Iesu. Ua lē o toe umi ona ia taʻitaʻia atu lea o i tatou i le ola e faavavau. (Faaa. 7:14-17) E leai se taʻitaʻi faaletagata e mafai ona ia faia lenei folafolaga.