Na fesili se uso na pule i le ola lona atalii: ʻPe na iloilo muamua e Ieova pe e ma te mafaia ma laʻu avā ona onosaia le pule i le ola o la ma tama? Pe na tupu ona ua silafia e Ieova e mafai ona ma onosaia lenei mea?’ Pe e iai se māfuaaga tatau e talitonu ai e faapea, e faatulaga e Ieova mea patino e tutupu i o tatou olaga?

O suʻesuʻega atili i upu a Paulo o loo i le 1 Korinito 10:13, ua mafai ai ona tatou faapea atu: E leai se faavae faale-Tusi Paia e talitonu ai e faapea, e muaʻi iloilo e Ieova mea e mafai ona tatou lavātia, ona ia filifilia lea o luʻi e oo mai iā i tatou, e fua i lenā iloiloga. Seʻi o tatou tilofaʻia ni māfuaaga se fā e lagolagoina ai lenei manatu.

Muamua, ua tuuina mai e Ieova i tagata le meaalofa o le saʻolotoga e filifili ai. E finagalo Ieova e filifili e i tatou lava le auala e tatou te ola ai. (Teu. 30:19, 20; Iosua 24:15) Pe a tatou filifili le ala saʻo, e mafai la ona tatou faalagolago atu iā Ieova e faatonutonuina o tatou ala. (Faata. 16:9) Ae a tatou filifili le ala sesē, o le a tatou selesele ona āuga leaga. (Kala. 6:7) Pe afai la e filifili e Ieova luʻi e oo mai iā i tatou, pe e lē o lenā ua ia aveesea la tatou meaalofa o le saʻolotoga e filifili ai?

Lua, e lē puipuia e Ieova i tatou mai i mea ʻe tutupu faafuaseʻi i taimi e leʻi faatalitalia.’ (Fai. 9:11) O se faalavelave faafuaseʻi e ono iʻu ai i ni iʻuga mataʻutia, ona na tatou iai i se nofoaga sesē i se taimi sesē. Na taʻua e Iesu se faalavelave na maliliu ai ni tagata se toʻa 18 ina ua paʻū i ai se ʻolo, ma na ia faailoa mai o lenā faalavelave mataʻutia e leʻi māfua ona o le finagalo o le Atua. (Luka 13:1-5) Pe e talafeagai la ona manatu e faapea, e iloilo muamua e le Atua po o ai e tatau ona faasaoina ae po o ai e feoti, pe a tupu se faalavelave faafuaseʻi?

Tolu, o i tatou uma lava o loo aafia i le finauga o le tumau faamaoni. Ia manatua, ua luʻia e Satani le faamaoni o auauna uma a Ieova, e faapea e lē mafai ona tatou tumau faamaoni iā Ieova pe a feagai ma tofotofoga. (Iopu 1:9-11; 2:4; Faaa. 12:10) Pe a puipuia la i tatou e Ieova mai i le aafia i nisi o tofotofoga ona e manatu e tatou te lē lavātia, pe e lē o lenā ua lagolagoina ai le tuuaʻiga a Satani e māfua ona tatou auauna i le Atua ona o le manatu faapito?

 Fā, e lē manaʻomia ona muaʻi silafia e Ieova mea uma lava e tutupu iā i tatou. O le manatu e faapea e muaʻi filifili e Ieova po o ā tofotofoga o le a tatou fesagaʻia, e faaalia ai e tatau ona ia silafia mea uma lava o le a tutupu iā i tatou. Ae e lē lagolagoina e le Tusi Paia lenā manatu. E mautinoa e mafai e le Atua ona muaʻi silafia le lumanaʻi. (Isa. 46:10) Peitaʻi, ua faaalia i le Tusi Paia, e faaaogā ma le atamai e le Atua lona tomai e muaʻi silafia ai mea o le a tutupu i le lumanaʻi. (Kene. 18:20, 21; 22:12) O lea, e faaōgatusa e Ieova lona tomai e muaʻi silafia ai mea, ma lona amanaʻia o lo tatou saʻolotoga e filifili ai. Pe e lē o le mea lenā e tatou te faatalitalia mai i le Atua, o lē e na te faatāua lo tatou saʻolotoga e filifili ai, ma faaalia i taimi uma ona uiga i se auala talafeagai?—Teu. 32:4; 2 Kori. 3:17.

O le ā la lo tatou malamalamaga e tatau ona iai i upu a Paulo, ʻe lē tuua e le Atua i tatou i se faaosoosoga e sili atu nai lo o le mea e tatou te lavātia?’ O loo faamatala i inei e Paulo le mea e faia e Ieova i taimi o tofotofoga, ae e lē o le taimi e leʻi oo mai tofotofoga. * Ua faamautinoa mai i upu a le aposetolo, po o ā lava tofotofoga e oo mai iā i tatou, o le a tausia e Ieova i tatou pe a faatuatua iā te ia. (Sala. 55:22) Na faavae nei upu faamalosiau a Paulo i ni upu moni tāua se lua.

Muamua, o tofotofoga o loo tatou fesagaʻia, “e oo foʻi i tagata uma.” O o tatou tofotofoga o ni tofotofoga masani. O na tofotofoga e lē sili atu i le mea e tatou te lavātia pe a tatou faalagolago i le Atua. (1 Pete. 5:8, 9) I manatu o loo siʻomia ai le 1 Korinito 10:13, o loo faasino atu ai Paulo i tofotofoga na feagai ma tagata Isaraelu a o iai i le toafa. (1 Kori. 10:6-11) O na tofotofoga na tutupu foʻi i isi tagata ma na mafai lava ona lavātia e tagata faamaoni Isaraelu. E faafā ona faapea mai Paulo o “nisi o i latou” e leʻi usiusitaʻi. O nisi o tagata Isaraelu na lolo atu i o latou tuʻinanauga sesē, ona e leʻi faalagolago i le Atua.

Lua, “e faamaoni le Atua.” O faamaoniga o feutagaʻiga a le Atua ma ona tagata, ua faaalia ai e alofa faamaoni o ia “i ē e alolofa iā te ia, ma tausia ana poloaʻiga.” (Teu. 7:9) Ua faamaonia mai ai foʻi e faataunuu e le Atua i taimi uma ana folafolaga. (Iosua 23:14) O le mātauina o faamaoniga o lona faamaoni i taimi ua mavae, e mafai ai e i latou e alolofa ma usiusitaʻi iā te ia, ona maufaatuatuaina o le a ia faataunuu vala nei e lua o lana folafolaga, pe a oo mai tofotofoga iā i latou: (1) E na te lē faatagaina se tofotofoga ia oo i se tulaga e sili ona matuiā, ma lē mafai ai ona lavātia e ana auauna, ma le (2) “e saunia e ia se auala e sao ai” i latou.

E faapefea la ona saunia e Ieova se auala e sao ai i latou e faalagolago iā te ia i taimi o tofotofoga? E mautinoa lava, e faigofie ona ia aveesea se tofotofoga pe a finagalo i ai. Ae ia manatua upu a Paulo: “E saunia e ia [Ieova] se auala e sao ai outou, ina ia outou tumau ai.” O lea, i le tele o tulaga, e na te saunia “se auala e sao ai” e ala i le foaʻi mai o mea e tatou te manaʻomia ina ia tumau ai i tofotofoga. Seʻi o tatou tilofaʻia nisi o auala e ono saunia ai e Ieova se auala e tatou te sao ai.

• E “na te faamāfanafanaina i tatou i o tatou puapuaga uma.” (2 Kori. 1:3, 4) E mafai e Ieova ona faatoʻafilemu o tatou mafaufau, loto, ma faalogona, e ala mai i lana Afioga, lona agaga paia, ma meaʻai faaleagaga o loo saunia mai e le pologa faamaoni.—Mata. 24:45; Ioa. 14:16; Roma 15:4.

• E mafai ona ia taʻitaʻia i tatou e ala i lona agaga paia. (Ioa. 14:26) Pe a oo mai ni tofotofoga, e mafai ona fesoasoani le agaga paia iā i tatou e manatua ai mau ma mataupu silisili o le Tusi Paia, ma tatou iloa ai le ala saʻo e uia.

• E mafai ona ia faaaogā ana agelu e fesoasoani mai iā i tatou.—Epe. 1:14.

• E mafai ona ia fesoasoani mai e ala i o tatou uso tapuaʻi. E mafai ona latou “faamalosiau” iā i tatou e ala mai i a latou upu ma gaoioiga.—Kolo. 4:11.

O le ā la le uiga o upu a Paulo o loo faamauina i le 1 Korinito 10:13? E lē filifilia e Ieova tofotofoga e tatou te fesagaʻia. Peitaʻi, pe a oo mai tofotofoga iā i tatou, e mafai ona tatou mautinoa i le manatu lenei: Pe a tatou maufaatuatuaina atoatoa Ieova, o le a ia lē faatagaina se tofotofoga e sili atu i lo o le mea e tatou te lavātia; e na te saunia se auala e tatou te sao ai ina ia tatou tumau ai. Maʻeu se manatu faamāfanafanaloto!