I LE taeao o se Aso Faraile iā Setema 1922, na tumutumu ai tagata e toʻa 8,000 i se fale telē ma na faasolo ina vevela le tau. Na faasilasila e le taʻitaʻifono e mafai e so o se tasi ona tuua le maota a o faagasolo lenei vaega tāua o le polokalame, ae e lē faatagaina ona toe foʻi mai i totonu.

Ina ua uma pese e faatomua ai “Sauniga o Viiga,” ona alu ane lea o Joseph F. Rutherford i le pulelaa. E leʻi manonofo le toʻatele o le aofia, ma na feoaʻi solo nisi ona o le vevela. O lea, na talosaga atu le failauga ina ia nofoi i lalo ma faalogologo lelei. Pe na mātauina e se tasi i le amataga o le lauga, le ʻie telē na tāʻai lelei ma faatautau i luga aʻe o le pulelaa?

O le matua o le lauga a le uso o Rutherford, “Ua latalata mai le malo i le lagi.” Pe tusa e tasi ma le ʻafa itula o laulogo le leo o Rutherford i totonu o le fale, a o ia faamatala le lototetele o perofeta anamua e folafola atu le oo mai o le Malo. I upu faaiʻu o lana lauga, na fesili atu: “Pe e tou te talitonu ua amata le pulega a le Tupu mamalu?” Na tali faatasi ane le aofia i se leo malosi: “Ioe!”

Na ia toe faapea atu i se leo aasa: ʻInā toe foʻi atu ia i le fanua, outou o atalii o le Atua e sili ona maualuga! Faauta, o loo pule le Tupu! O outou o ona sui o loo faailoa atu o ia i le lautele. O le mea lea ia faalauiloa, faalauiloa, faalauiloa le Tupu ma lona malo.’

O le taimi lenā na faapaʻū mālie ifo ai le ʻie telē na tautau i luga, lea na tusia ai le faaupuga: “Ia Faalauiloa le Tupu ma le Malo.”

Na faapea mai Ray Bopp: “Na matuā patipati fiafia le aofia.” Na faamatala e Anna Gardner le “galulu o iviivi o le fale ona o le leotele o le patipati a le aofia.” Na faapea mai Fred Twarosh, “na laulaututū faatasi i luga tagata uma.” Na taʻua e Evangelos Scouffas: “Na peiseaʻī na uunaʻia e se mana malosi i matou e tutū i luga, ma na maligi o matou loimata.”

O le toʻatele o ē na iai i le tauaofiaga na latou folafola atu le tala lelei o le Malo. Peitaʻi, na saga faamalosia i latou ina ua maua se faasinomaga fou i o latou olaga. Na taʻua e Ethel Bennecoff e faatatau i Tagata Aʻoga o le Tusi Paia, na “faatupulaʻia lo [latou] maelega ma le alofa nai lo o le taimi muamua.” E 18 tausaga o Odessa Tuck i lenā taimi, ma na ia tuua le tauaofiaga ma lona faanaunauga e tali atu i le valaau, ʻO ai o le a alu atu?’ Na faapea mai Odessa: “Ou te leʻi iloa le auala, le nofoaga, ma ē o le a tali atu i le valaau. E pau le mea na ou iloa, na ou fia faataʻitaʻi iā Isaia o lē na faapea atu: ʻO aʻu lenei! Inā auina atu ia aʻu.’” (Isa. 6:8) Na taʻua e Ralph Leffler, “O lenā aso mataʻina o le amataga tonu lenā o le tauiviga ina ia folafola atu le Malo, lea ua faataunuuina i le lalolagi aoao i aso nei.”

 E lētioa a faamauina le tauaofiaga i Cedar Point i Ohio i le 1922, o se matatiʻa i le talafaasolopito o tagata o le Atua. Na faapea mai George Gangas, “Na totō e lenei tauaofiaga le faanaunauga iā te aʻu ina ia lē misia se tauaofiaga.” Na manatua e George, e na te leʻi misia lava se tauaofiaga. Na tusi Julia Wilcox: “E lē mafai e upu ona faamatala oʻu faalogona i so o se taimi e taʻua ai Cedar Point i le 1922 i a tatou lomiga. Ou te fia faapea atu iā Ieova i taimi uma, ʻFaafetai Ieova i lou faatagaina o aʻu e auai i lenā tauaofiaga.’”

O le toʻatele foʻi o i tatou i aso nei, e tatou te manatua taimi matagofie i se tauaofiaga na matuā faagaeetia ai o tatou loto, ma faatupulaʻia ai lo tatou maelega ma le alofa mo lo tatou Atua sili ma lana Tupu. A o tatou manatunatu i na taimi, e uunaʻia foʻi i tatou e faapea atu, “Faafetai Ieova i lou faatagaina o aʻu e auai i lenā tauaofiaga.”