“LE MAFINE E.” O le auala lea sa talanoa atu ai Iesu i nisi taimi iā i latou o le isi itupā. O se faataʻitaʻiga, ina ua faamālōlō e Iesu se fafine maʻi na faanoʻunoʻu mo le 18 tausaga, na ia faapea atu: “Le mafine e, ua faasaʻolotoina oe mai lou tulaga vaivai.” (Luka 13:10-13, fpl.) Sa faaaogā foʻi e Iesu lenei faafeiloaʻiga masani ina ua talanoa atu i lona tinā, ma o se faaupuga faaaloalo i taimi o le Tusi Paia. (Ioa. 19:26; 20:13) Peitaʻi, e iai se isi faaupuga na sili atu ona tāua.

“Loʻu afafine e.” O loo faaaogā i le Tusi Paia lenei faaupuga e sili ona agalelei ma māfana e faasino atu i nisi o fafine. Sa faaaogā e Iesu lenei faaupuga ina ua talanoa atu i se fafine na mafatia i le punatoto mo le 12 tausaga. Na faalatalata atu lenei fafine iā Iesu, o se gaoioiga e leʻi ōgatusa ma le Tulafono a le Atua lea e taʻua ai o se tagata e maua i lea maʻi e lē mamā o ia. Sa tatau i lenei fafine ona faamamao ese mai i isi ona o lona maʻi. (Levi. 15:19-27) Peitaʻi, sa matuā fia maua e lenei fafine se mapusaga, auā “e tele mea ua tigā ai o ia ona o fomaʻi e toʻatele, ua uma ai ana tupe ae e leʻi aogā, a ua atili ai ona tigāina o ia.”​—Mare. 5:25, 26.

Sa faaofiofi lemū atu o ia i se motu o tagata, ua ui mai i tua ma paʻi atu i le pito o le ofu tele o Iesu. Na uma ai loa i inā lona punatoto! Sa faamoemoe le fafine o le a leai se tasi e iloaina o ia, peitaʻi na fesili Iesu: “O ai na paʻi mai iā te aʻu?” (Luka 8:45-47) O le taimi lea na faapaʻū ai loa le fafine ua fefe ma gatete i luma o Iesu, ʻma faamatala atu le mea atoa na tupu.’​—Mare. 5:33.

Ina ia faatoʻafilemu le fafine, na fetalai atu ma le agalelei Iesu: “Loʻu afafine e, ia e lototele.” (Mata. 9:22) Ua taʻua e le ʻaufaitofā o le Tusi Paia, o le upu Eleni ma le upu Eperu mo le “afafine,” sa mafai ona faaaogā i se auala faafaatusa e faailoa atu ai le “agalelei ma le alofa faapelepele.” Sa toe faamautinoa atu e Iesu i le fafine: “Ua e malosi ona o lou faatuatua. Alu ia ma le filemu, ma ia e mālōlō mai lou maʻi tigā.”​—Mare. 5:34.

O le faaupuga foʻi lea a Poasa, o se tagata Isaraelu e mauʻoa, na fai atu iā Ruta le fafine Moapi. Sa iā Ruta lagona lē mautonu ona sa ia aoina karite i le fanua o se tamāloa e lē masani ai. Na faapea atu Poasa iā Ruta: “Po ua e faalogo mai ea, loʻu afafine e?” Sa sosoo ai ma lona faalaeiau o Ruta ia faaauau ona ia aoina karite i lona fanua. Sa faapaʻū faō Ruta i luma o Poasa ma fesili atu pe aiseā ua ia agalelei mai ai iā te ia o se tagata ese. Na tali mai Poasa e ala i le faamautinoaga atili e faapea: “Ua uma ona faamatala mai iā te aʻu o mea uma na e faia i le tinā o lau tane [o Naomi le fafine ua oti lana tane] . . . Tau ina ia tauia e Ieova au gaoioiga.”​—Ruta 2:8-12.

Maʻeu ni faaaʻoaʻoga lelei na faia e Iesu ma Poasa mo toeaina Kerisiano! O nisi taimi e ono feiloaʻi ai ni toeaina se toʻalua ma se tuafafine o loo manaʻomia se fesoasoani ma faalaeiauga faale-Tusi Paia. Pe a uma ona ōle atu mo le taʻitaʻiga a Ieova ma faalogologo lelei a o talanoa mai le tuafafine, e avatu e toeaina i le tuafafine faamautinoaga ma faamāfanafanaga mai i le Afioga a le Atua.​—Roma 15:4.