E LEʻI iloa e Iosefa le Arimataia pe na faapefea ona ia maua le lototele e alu atu ai i le kovana o Roma. Na lauiloa Ponotio Pilato o sē e maumaututū i ana faaiʻuga. Peitaʻi, ina ia aloaʻia le tanuga o Iesu, na tatau ona alu atu se tasi e talosaga iā Pilato mo le tino o Iesu. Atonu na manatu Iosefa e faigatā ona talanoa tuusaʻo atu iā Pilato, ae e lē o le tulaga lenā na tupu. Ina ua uma ona faamautinoa mai e Pilato i se taʻitaʻiʻau ua maliu Iesu, ona ia talia loa lea o le talosaga a Iosefa. Sa faavave atu loa Iosefa i le nofoaga na faasala ai Iesu e ui lava o loo faanoanoa o ia.​—Mare. 15:42-45.

• O ai Iosefa le Arimataia?

• O le ā le la faiā ma Iesu?

• Aiseā e tatau ai ona e naunau e faitau i lenei tala iā Iosefa?

O loo taʻua i le Evagelia a Mareko o Iosefa “o se sui aloaʻia o le Fono.” O lenei Fono e faasino atu i le Saniterini, po o le Faamasinoga Sili a Iutaia lea e faatautaia le pulega a le atunuu ma mataupu faalelotu. (Mare. 15:1, 43) O lea la, o Iosefa o se tasi o taʻitaʻi o ona tagata, ma ua tatou malamalama ai i le māfuaaga na mafai ai ona ia talanoa tuusaʻo atu i le kovana o Roma. E lē taumatea o Iosefa foʻi o se tagata mauʻoa.​—Mata. 27:57.

Na tetee le ʻau Saniterini iā Iesu ma taupulepule ina ia fasiotia o ia. Peitaʻi, na taʻua Iosefa “o se tagata lelei ma amiotonu.” (Luka 23:50) I le lē pei o le toʻatele o isi sui o le Saniterini, na faamaoni, amiolelei, ma tausia e Iosefa tulafono a le Atua. Sa ia “faatalitali foʻi i le malo o le Atua” ma atonu o le māfuaaga lea na avea ai o ia o se tasi o soo o Iesu. (Mare. 15:43; Mata. 27:57) E foliga mai na tosina atu Iosefa i le feʻau a Iesu ona o lona naunau moni i le upu moni ma le faamasinogatonu.

O loo taʻua i le Ioane 19:38 o Iosefa “o se soo o Iesu, ae sa faalilolilo ona o lona fefe i tagata Iutaia.” Aiseā na fefe ai Iosefa? Na iloa e Iosefa le tetee o tagata Iutaia iā Iesu, ma na latou maumauaʻi e faateʻa mai i le sunako so o se tasi e taʻutino atu lona faatuatua iā Iesu. (Ioa. 7:45-49; 9:22) Pe a faateʻa ese se tasi mai i le sunako, o lona uiga o le a tauemua, inosia, ma faaesea o ia e isi tagata Iutaia. O lea na fefe ai Iosefa e faailoa atu i le lautele lona faatuatua iā Iesu, ina neʻi aveesea ai lona tulaga taualoa.

E lē na o Iosefa na tupu ai lenei faafitauli. O loo taʻua i le Ioane 12:42, na “faatuatua le toʻatele o taʻitaʻi iā [Iesu]. Peitaʻi, ona o le ʻau Faresaio, ua latou lē faailoa mai ai o ia, ina neʻi tutuliese i latou mai i le sunako.” O se tasi na iai i lea tulaga o Nikotemo, o se sui foʻi o le Saniterini.​—Ioa. 3:1-10; 7:50-52.

Peitaʻi, o Iosefa sa avea ma soo ae e leʻi lototele e faailoa atu i tagata. O se faafitauli tugā lenei pe a fua i le fetalaiga lenei a Iesu: “O sē na te taʻu atu lona aufaatasi ma aʻu i luma o tagata, ou te taʻu atu foʻi loʻu aufaatasi ma ia i luma o loʻu Tamā o i le lagi. A o lē e teena aʻu i luma o tagata, ou te teena foʻi o ia i luma o loʻu Tamā o i le lagi.” (Mata. 10:32, 33) E leʻi faapea na teena e Iosefa Iesu, ae o le faafitauli e leʻi lototele o ia e taʻu atu i luma o tagata lona aufaatasi ma Iesu. Ae faapefea oe?

Na faia e Iosefa se gaoioiga lelei auā o loo taʻua i le Tusi Paia e na te leʻi lagolagoina le faufauga a le ʻau Saniterini faasaga iā Iesu. (Luka 23:51) E manatu nisi atonu e  leʻi iai Iosefa i le taimi o le faamasinoga o Iesu. Po o le ā lava le tulaga, e lē taumatea na matuā faanoanoa Iosefa i nei faiga lē tonu, ae e leʻi mafai ona ia taofia!

I le taimi o le maliu o Iesu, na faamaonia ai le manumalo o Iosefa mai i lona fefe ma filifili e lagolagoina soo o Iesu. Na atagia mai lenā filifiliga i upu o loo i le Mareko 15:43: “Ua lototele o ia e alu atu iā Pilato ma talosaga atu mo le tino o Iesu.”

E foliga mai na iai Iosefa i le taimi na maliu ai Iesu, auā na muamua iloa e Iosefa ua maliu Iesu a o leʻi iloa e Pilato. O lea, ina ua talosaga atu Iosefa mo le tino o Iesu, na “fia iloa e Pilato po ua maliu” Iesu. (Mare. 15:44) Pe afai na vaaitino Iosefa i le maliu tigā o Iesu i le laau na faapuapuagatia ai, pe e leʻi aafia ai lona lotofuatiaifo i lenā vaaiga faamomoiloto, ma filifili ai loa e faailoa atu o ia o se soo o Iesu? Atonu o le mea lenā na tupu. Ae o le mea mautinoa, na uunaʻia Iosefa e faia se gaoioiga ma e leʻi toe avea ai o ia o se soo faalilolilo.

E tusa ai ma le tulafono a Iutaia, a o leʻi goto le lā e tatau ona tanu tino oti o tagata na faasala. (Teu. 21:22, 23) Ae o tagata Roma, na latou tuu pea i luga o le laau le tino o se tagata solitulafono seʻia oo ina pala, pe lafo foʻi i se lua na tanu ai tino oti. Ae e leʻi mafaufau Iosefa e faia lenā tulaga iā Iesu. Na iai se tuugamau fou a Iosefa na vane i le papa e latalata i le nofoaga na  faasala ai Iesu. E foliga mai e leʻi leva ona siitia atu Iosefa mai Arimataia * i Ierusalema, ona e fou lenei tuugamau ma na faamoemoe e faaaogā e fai ma fanuatanu mo lona aiga. (Luka 23:53; Ioa. 19:41) O le tanuina la o Iesu i le tuugamau na fuafua e Iosefa mo ia i le lumanaʻi, o se faamaoniga lea o lona limafoaʻi ma na faataunuu ai le valoaga o le a tanu le Mesia “faatasi ma tagata mauʻoa.”​—Isa. 53:5, 8, 9.

O loo faamatala i Evagelia uma e fā e faapea ina ua aveese le tino maliu o Iesu mai i le laau, ona tāʻai lea e Iosefa i le ʻie lino lelei ma tuu i lona tuugamau. (Mata. 27:59-61; Mare. 15:46, 47; Luka 23:53, 55; Ioa. 19:38-40) E pau le tagata o loo taʻua patino mai na fesoasoani iā Iosefa o Nikotemo, lea na aumaia ni mea manogi e sauniunia ai le tino o Iesu mo lona tanuga. E tusa ai ma tulaga taualoa o nei tane, e foliga mai e iai nisi na fesoasoani iā i laʻua. E lē taumatea na la faaaogāina ni auauna e sii le tino o Iesu ma tuu i le tuugamau. E tusa pe na la faaaogā ni auauna pe leai, ae sa tatau ona matuā faaeteete i laʻua. Aiseā? O so o se tasi e papaʻi atu i se tagata oti e lē mamā o ia mo aso e fitu, ma e lē mamā foʻi mea uma e papaʻi i ai. (Nu. 19:11; Ha. 2:13) O lenā tulaga na tatau ai ona faaesea i laʻua mai i tagata a o faagasolo le vaiaso o le Paseka, ma misia ai sauniga mo le faamanatuina o le Paseka. (Nu. 9:6) O le sauniunia foʻi e Iosefa o le tanuga o Iesu na ono tauemua ai o ia e sui o le Saniterini. Peitaʻi, na lototele Iosefa e fesagaʻia so o se tulaga e tulaʻi mai ona o lona tanuina o Iesu, ma faailoa atu i le lautele o ia o se soo o Iesu.

Ina ua māeʻa le faamatalaina i Evagelia o le tanuga o Iesu, e leʻi toe taʻua lava Iosefa le Arimataia i le Tusi Paia. Ua tulaʻi mai ai le fesili: O le ā na tupu iā te ia? O le mea moni, e tatou te lē iloa. Peitaʻi, pe a fua i manatu na faamatalaina i luga, e lē taumatea na ia faailoa atu i le lautele o ia o se Kerisiano. Ina ua ia fesagaʻia tofotofoga ma tulaga faigatā, na faatuputeleina lona faatuatua ma lona lototele nai lo o le faavaivaia ai. O le faamaoniga lenā o lona lototele.

O lenei tala ua tulaʻi mai ai se fesili e tatau iā i tatou uma ona mafaufau i ai: Po o iai se mea o sili atu ona tatou faatāua, e pei o tulaga aloaʻia, galuega, meafaitino, faiā faaleaiga, po o lo tatou saʻolotoga, nai lo o la tatou faiā ma Ieova?