1, 2. (a) O ā faafitauli o loo fesagaʻia e le toʻatele i aso nei, ma o le ā ua iʻu i ai? (e) O le ā le faamoemoe mautinoa o loo i le Isaia 41:10, 13?

UA FAAPEA mai se tuafafine e paeonia sauatoa ma o le avā a se toeaina: “E ui e iai saʻu faasologa lelei faaleagaga, ae sa lofitūina aʻu i popolega i le tele o tausaga. E lē lelei ai laʻu moe, aafia ai loʻu ola mālōlōina faapea le auala ou te feutagaʻi ai ma isi, ma o nisi taimi ou te lagona ai le lē toe fia faia o se mea.”

² Pe e te malamalama i faalogona o le tuafafine? O le tulaga e faanoanoa ai, ona ua anoanoaʻi omiga mai i le lalolagi leaga a Satani, ma ua lofitūina ai tagata i popolega ma lagona ai le lotovaivai. E tai pei na faalogona o le taula o se vaa, o loo taofia le vaa mai i le agaʻi i luma. (Faata. 12:25) O le ā le faapogai o na faalogona? Atonu ua maliu sē e pele iā te oe, ua e aafia i se maʻi tugā, o loo tausia se aiga ae utiuti le faasoa, pe feagai foʻi ma teteega. O le soona popole i na faafitauli e faasolo ina mou atu ai lou malosi. E mafai foʻi ona mou atu ai lou olioli. Peitaʻi, ia e mautinoa o loo nofosauni le Atua e fesoasoani iā te oe.—Faitau le Isaia 41:10, 13.

3, 4. (a) Ua faapefea ona faaaogā i le Tusi Paia le upu “lima”? (e) O le ā e faapogaia ai le faapaʻuʻū i lalo po o le gagase o lima i se uiga faafaatusa?

³ E masani ona faaaogā e le Tusi Paia vaega eseese o le tino  o le tagata e faataʻitaʻia mai ai uiga po o gaoioiga a se tagata. O se faaaʻoaʻoga, e tele ina taʻua le lima. O le faamalosia o le lima o se tagata, e mafai ona faasino atu i le faalaeiau po o le faamalosia e faia se gaoioiga. (1 Samu. 23:16; Esera 1:6) E mafai foʻi ona faasino atu i le iai o se vaaiga saʻo ma mautinoa i le lumanaʻi.

⁴ O le faapaʻuʻū i lalo po o le gagase o lima i se uiga faafaatusa, e faamatala ai i nisi taimi se tagata ua lotovaivai, lotomafatia po ua leai se faamoemoe. (2 No. 15:7, fpl.; Epe. 12:12) E masani ona faavaivai se tagata ua aafia i na faalogona. Pe a e feagai ma tulaga e faapogaia ai le atuatuvale ma vaivai ai le tino, faalogona, po o le itu faaleagaga, e faapefea ona e maua le lototele? O le ā le auala e mafai ona e faaauau ai pea ma faamalosia oe ina ia tumau ma maua le olioli?

5. (a) O ā o tatou faalogona pe a tulaʻi mai faafitauli, ae o le ā e tatau ona tatou manatua? (e) O le ā o le a tatou iloiloina?

⁵ Faitau le Sefanaia 3:16, 17. Nai lo o le matataʻu ma lotovaivai, lea e pei ai ua gagase o tatou lima, ua valaaulia i tatou e lo tatou Tamā alofa o Ieova ia ʻtaʻu atu o tatou popolega uma iā te ia.’ (1 Pete. 5:7) Ia teu i o tatou loto le fetalaiga a Ieova i tagata Isaraelu, ʻe leʻi faapuupuuina lona aao ua lē mafai ai ona faaolaina’ ana auauna faamaoni. (Isa. 59:1) O le a tatou iloiloina ni faaaʻoaʻoga mataʻina se tolu mai i le Tusi Paia, e faailoa mai ai le naunautaʻiga ma le tomai o Ieova e faamalosia ona tagata e faia lona finagalo, e ui i faafitauli e matuā faigatā. Seʻi vaai pe faapefea ona faamalosia oe i nei faaaʻoaʻoga.

6, 7. O ā lesona tāua e tatou te aʻoaʻoina mai i le manumalo o Isaraelu i tagata Amaleka?

⁶ E leʻi umi lava talu ona faasaoina faavavega Isaraelu mai i le nofo pologa i Aikupito, ae osofaʻia loa i latou e tagata Amaleka. Na faatonu e Mose le tagata lototele o Iosua e taʻitaʻia le ʻautau. I le taimi lea, na ō ese atu ai Mose, Arona ma Huro i le tumutumu o se aʻega na mafai ona iloa atu ai le taua. Pe na sosola ese nei tane mai i le taua ona o le palaaai? E mautinoa e leai.

⁷ Na mulimuli Mose i se fuafuaga na mafai ona latou taulau manuia ai. Na sisii aʻe e Mose i le lagi ona lima sa iai le tootoo o le Atua moni. Pe a faia e Mose lenā mea, ona faamalosia lea e Ieova lima o tagata Isaraelu ma taulau manuia ai i le taua ma Amaleka. Peitaʻi, pe a eeva ma amata ona tuu i lalo lima o Mose, ona amata lea ona malolosi tagata Amaleka. O lea, na vave gaoioi ai Arona ma Huro e ʻave le maa ma tuu i lalo e tiʻetiʻe ai Mose; ua taofi i luga e Arona ma Huro ona lima, o le tasi i le isi itu ma le isi i le isi itu, ina ia tuu ai pea i luga ona lima seʻia goto le lā.’ Ioe, o le aao malosi o le Atua na mafai ai ona manumalo Isaraelu.—Eso. 17:8-13.

8. (a) Na faapefea ona tali atu Asa ina ua faamataʻu ane ʻautau a Aitiope i tagata o Iuta? (e) E faapefea ona tatou faataʻitaʻi i le auala na faalagolago ai Asa i le Atua?

⁸ Na faamaonia foʻi e Ieova e leʻi puupuu lona aao i aso o le tupu o Asa. E tele taua o loo taʻua i le Tusi Paia. Ae o le ʻautau e sili ona toʻatele, o le ʻautau a Sera le Aitiope. Sa iā te ia fitafita tomai e 1,000,000. E toetoe toʻalua Aitiope i le fitafita Isaraelu e toʻatasi. Seʻi mafaufau la i le faigofie ona fefe ma atuatuvale o Asa, ma  iʻu ina siilima ma toʻilalo ai. Nai lo o lea, na vave ona liliu atu Asa iā Ieova mo le fesoasoani. I le vaaiga faaletagata, e lē mafai ona faatoʻilalo ʻautau a Aitiope, peitaʻi “e mafaia e le Atua mea uma lava.” (Mata. 19:26) Na faaali e Ieova lona mana tele ma ʻfaatoʻilaloina tagata Aitiope i luma o Asa,’ o lē na ʻatoatoa lona loto iā Ieova i ona aso uma.’—2 No. 14:8-13; 1 Tu. 15:14.

9. (a) O ā faafitauli e leʻi taofia ai Neemia mai i le toe fausia o pā o Ierusalema? (e) Na faapefea ona tali mai le Atua i le tatalo a Neemia?

⁹ Seʻi mafaufau i faalogona o Neemia ina ua alu atu i Ierusalema. E leʻi malupuipuia le aai, ma ua matuā lotovaivai ona uso Iutaia. O faamataʻuga mai tagata tetee o isi atunuu, na faavaivaia ai lima o tagata Iutaia ma taofia ai le toe fausiaina o pā o Ierusalema. Pe na faataga e Neemia lenā tulaga e gagase ai ona lima ma lotovaivai ai? E leai! E pei o Mose, Asa, ma isi auauna faamaoni a Ieova, sa faalagolago Neemia iā Ieova i taimi uma i le tatalo. O le mea foʻi lenā na ia faia i le taimi lea. E ui i toʻatugā na foliga mai e faigatā i tagata Iutaia, ae na tali mai Ieova i le tatalo faamaoni a Neemia. Na faaaogā e Ieova lona “mana tele” ma lona “aao malosi” e faamalosia ai lima o tagata Iutaia. (Faitau le Neemia 1:10; 2:17-20; 6:9.) Pe e te talitonu e faaaogā foʻi e Ieova lona “mana tele” ma lona “aao malosi,” e faamalosia ai ana auauna i aso nei?

10, 11. (a) Ua faapefea ona taumafai Satani e faavaivaia i tatou? (e) Ua faapefea ona faamalosia i tatou e Ieova? (i) O ā aogā ua e maua mai i aʻoaʻoga ma toleniga faatiokarate?

¹⁰ E tatou te mautinoa e lē faavaivai le Tiapolo i ana taumafaiga e taofia galuega a Kerisiano. Ua ia faaaogā faamatalaga pepelo ma faamataʻuga mai i faigāmalo, taʻitaʻi lotu, ma ē ua liliu ese mai i le tapuaʻiga moni. O lona sini ia faavaivaia i tatou ma taofia le galuega talaʻi o le Malo. Peitaʻi, e mafai ma e naunau Ieova e foaʻi mai le malosi e ala mai i lona agaga paia. (1 No. 29:12) E tāua ona tatou faalagolago i lenā agaga, ina ia mafai ona tatou faafetaiaʻia so o se luʻi mai iā Satani ma lana lalolagi leaga. (Sala. 18:39; 1 Kori. 10:13) E tatou te faafetai foʻi ona ua tatou maua le Afioga a le Atua lea na faagaeeina e lona agaga paia. Ia mafaufau foʻi i meaʻai faaleagaga faale-Tusi Paia ua tatou maua i masina taʻitasi. Ua talafeagai lelei iā i tatou fetalaiga o loo i le Sakaria 8:9, 13 (faitau), lea na faia i le taimi na toe fausia ai le malumalu i Ierusalema.

¹¹ Ua faamalosia foʻi i tatou i aʻoaʻoga mai i le Atua e ala mai i sauniga, fonotaga, tauaofiaga, ma aʻoga faatiokarate. O na toleniga ua fesoasoani iā i tatou ina ia maua le uunaʻiga saʻo, faatutū sini faaleagaga, ma faataunuu o tatou tiute tauave faa-Kerisiano. (Sala. 119:32) Pe e te naunau e maua le malosi mai i na aʻoaʻoga?

12. O le ā e tatau ona tatou faia ina ia malolosi ai pea faaleagaga?

¹² Na fesoasoani Ieova i tagata Isaraelu e faatoʻilalo Amaleka ma Aitiope, ma na ia avatu iā Neemia ma ana aumea le malosi e faauma ai le galuega. O le a foaʻi mai foʻi e le Atua iā i tatou le malosi e tumau ai i teteega, le lē ano mai o tagata, ma popolega, ina ia mafai ona faaauau ai le galuega talaʻi. (1 Pete. 5:10) E tatou te lē faatalitalia o le a faia e Ieova ni vavega mo i tatou. Nai lo o lea, e tatau ona fai la tatou vaega. E aofia ai le faitau o le Afioga  a le Atua i aso taʻitasi, sauniuni ma auai i sauniga i vaiaso taʻitasi, fafaga o tatou loto ma mafaufau i a tatou lava suʻesuʻega ma tapuaʻiga a le aiga, ma faalagolago pea iā Ieova i le tatalo. Aua neʻi faatagaina mea masani o le olaga ma isi gaoioiga, e faalavelavea ai auala ua faaaogā e Ieova e faamalosia ma faalaeiau ai i tatou. Pe afai ua e lē toe faatinoina nisi o nei vala, ia talosaga atu i le Atua mo le fesoasoani. O le iʻuga, o le a e mātauina le galue o lona agaga paia i ʻtotonu iā te oe ina ia e lotomalie ma galue ai.’ (Fili. 2:13) Ae o le ā e mafai ona e faia ina ia faamalosia ai isi?

13, 14. (a) Na faapefea ona faamalosia se tasi uso ina ua maliu lana avā? (e) O ā auala e mafai ona tatou faamalosia ai isi?

¹³ Ua foaʻi mai e Ieova se ʻauuso i le lalolagi aoao o tagata tapuaʻi alolofa, e mafai ona aumaia faalaeiauga iā i tatou. Na tusi Paulo: “Ia faasaʻo lima ua gagase ma tulivae ua vaivai, ma ia faasaʻo ala mo o outou vae.” (Epe. 12:12, 13) Na maua e le toʻatele i le uluaʻi senituri lenā faalaeiauga faaleagaga, ma e faapena foʻi i aso nei. O le faamatalaga lenei a se tasi uso ina ua maliu lana avā, ma ia feagai ma isi tulaga faigatā: “Ua ou iloa e lē mafai ona tatou filifilia tofotofoga e fesagaʻia, o le taimi, ma le tele e tutupu ai. O le tatalo ma aʻu lava suʻesuʻega, ua pei o se ofu faaola ina ia ou lē malemo ai. Na ou maua foʻi faamāfanafanaga mai i oʻu uso ma tuafāfine faaleagaga. O lea na ou iloa ai le tāua o le atiaʻe o se faiā lelei ma Ieova, a o leʻi tulaʻi mai tulaga faigatā.”

¹⁴ Na sisii i luga e Arona ma Huro lima o Mose a o faia le taua. E mafai foʻi ona tatou saʻilia auala e fesoasoani atu ai i isi. O ai i latou na? O i latou ua loa le soifua, aafia i maʻi o le tino, feagai ma teteega mai i aiga, tuua toʻatasi, po ua maliu sē e pele. E mafai foʻi ona tatou faamalosia talavou o loo feagai ma omiga ina ia faia le mea sesē, pe saʻilia le manuia i lenei faiga o mea i tulaga tau aʻoaʻoga, tamaoaiga, po o galuega. (1 Tesa. 3:1-3; 5:11, 14) Ia saʻilia auala e faaalia atu ai le naunau moni i isi a o iai i le Maota mo Sauniga, auai i le faiva, auai i se taumafataga, pe talanoa i isi i le telefoni.

15. O le ā le aafiaga o au upu faalaeiau i ou uso Kerisiano?

¹⁵ O upu nei na faalaeiau ai e le perofeta o Asaraia le tupu o Asa ma ona tagata ina ua manumalo: “Ia outou lototetele ae aua neʻi faapaʻuʻū i lalo o outou lima, auā o loo iai le taui mo la outou galuega.” (2 No. 15:7, fpl.) O lea, na uunaʻia Asa e faia suiga ina ia toe faafoʻisia ai le tapuaʻiga moni. I se tulaga talitutusa, o a tatou upu faalaeiau e iai le aafiaga lelei i isi. E mafai ona e fesoasoani ai iā i latou e auauna ma le lotoatoa iā Ieova. (Faata. 15:23) Aua neʻi e manatu māmā i aafiaga lelei o au tali faalaeiau e faia i sauniga.

16. E pei o Neemia, e faapefea ona faamalosia e toeaina sui o le faapotopotoga? Ia faamatala le auala na fesoasoani ai ou uso talitonu iā te oe.

¹⁶ O le fesoasoani a Ieova na mafai ai e Neemia ma ē na latou faatasi ona faatino le galuega. E na o le 52 aso na latou faamāeʻaina ai pā o Ierusalema. (Nee. 2:18; 6:15, 16) E leʻi tau ina vaavaaia e Neemia le galuega. Peitaʻi, na faia sona sao i le toe fausiaina o pā o Ierusalema. (Nee. 5:16) I se tulaga talitutusa, o le toʻatele o toeaina alolofa ua faataʻitaʻi iā Neemia  e ala i le fesoasoani i galuega faufale o le Malo, po o le faamamāina ma le faaleleia o Maota mo Sauniga. O lo latou galulue faatasi ma tagata talaʻi i le faiva ma faia asiasiga faaleoleo mamoe, ua mafai ai ona latou faamalosia lima ua vaivai o ē ua popole o latou loto.—Faitau le Isaia 35:3, 4.

17, 18. O le ā e mafai ona tatou mautinoa i ai pe a feagai ma faafitauli ma popolega?

¹⁷ O le galulue soosootauʻau ma uso ma tuafāfine e maua ai le autasi. E atiaʻe ai ni faigāuō lelei, ma atili ai ona tatou mautinoa i faamanuiaga o le Malo o le Atua o loo faaloloʻi mai. A o tatou faamalosia isi, o le a tatou fesoasoani iā i latou e fesagaʻia tulaga e faavaivaia ai, ma faatumau ai se vaaiga saʻo ma mautinoa e faatatau i le lumanaʻi. O le faia faapea o le a fesoasoani foʻi iā i tatou e uaʻi ai pea i mea faaleagaga, ma talitonu ai i le moni o mea o loo folafola mai e le Atua, lea e mafai ona faamalosia ai foʻi i tatou.

¹⁸ O le iloaina o le auala na lagolagoina ma puipuia ai e Ieova ana auauna faamaoni i aso ua mavae, e atiaʻe ai lo tatou faatuatua ma faalagolago iā te ia i aso nei. O lea, pe a feagai ma faafitauli ma omiga, “tau ina ia lē paʻuʻū i lalo ou lima.” Nai lo o lea, ia ōle atu iā Ieova i le tatalo, ma faataga lona aao malosi e faamalosia oe ma maua ai faamanuiaga o le Malo.—Sala. 73:23, 24.