1. O le ā le faaeaga o loo tatou olioli ai?

MAʻEU se faaeaga o le avea ai o i tatou o se vaega o le faapotopotoga a Ieova! O loo tatou iai i se parataiso faaleagaga e tumu i tagata filemu ma fiafia. O le ā lou tulaga i le faapotopotoga?

2. O le ā le talafaatusa na faaaogā e le aposetolo o Paulo i nisi o ana tusi faagaeeina?

² E tele mea e mafai ona tatou aʻoaʻoina e faatatau i o tatou tulaga i le faapotopotoga, mai i le talafaatusa na faaaogā e le aposetolo o Paulo i nisi o ana tusi faagaeeina. I na tusi, na faatusa ai e Paulo le faapotopotoga i le tino o le tagata. Na ia faatusaina foʻi tagata taʻitoʻatasi o le faapotopotoga i vaega o le tino.​—Roma 12:4-8; 1 Kori. 12:12-27; Efe. 4:16.

3. O ā lesona e tolu o le a tatou talanoaina i lenei mataupu?

³ I lenei mataupu, o le a tatou talanoaina ai lesona tāua e tolu e mafai ona tatou aʻoaʻoina mai i le talafaatusa a Paulo. Muamua, o le a tatou aʻoaʻoina o i tatou uma e iai o tatou tulaga * i le faapotopotoga a Ieova. Lua, o le a tatou talanoaina mea e mafai ona tatou faia pe a faigatā ona iloa o tatou tulaga i le faapotopotoga. Tolu, o le a tatou talanoaina foʻi māfuaaga  e manaʻomia ai ona tatou pisi pea e faataunuu a tatou matafaioi i le faapotopotoga a le Atua.

4. O le ā ua tatou aʻoaʻoina mai i le Roma 12:4, 5?

⁴ O le lesona muamua e tatou te aʻoaʻoina mai i le talafaatusa a Paulo, o i tatou uma taʻitoʻatasi e iai o tatou tulaga tāua i le aiga o Ieova. Na faatomua e Paulo lana talafaatusa i lona faapea mai: “E pei ona tele o tatou itutino i le tino e tasi, ae e lē tutusa uma gaoioiga e faia e itutino taʻitasi, e faapena foʻi i tatou, e ui ina tatou toʻatele, ae e tasi le tino i lo tatou autasi ma Keriso, ma e faalagolago le tasi i le isi.” (Roma 12:4, 5) O le ā le manatu tāua na faamatilatila e Paulo? E eseese uma a tatou matafaioi e fai i le faapotopotoga, ma e tāua uma i tatou taʻitoʻatasi.

5. O ā “meaalofa” ua tuuina mai e Ieova i le faapotopotoga?

⁵ Pe a e mafaufau iā i latou e iai tulaga i le faapotopotoga, atonu e vave lava ona oso ane i lou mafaufau i latou o loo taʻimua. (1 Tesa. 5:12; Epe. 13:17) E moni na tuuina e Ieova i Lana faapotopotoga “meaalofa i tagata” e ala mai iā Keriso. (Efe. 4:8) O nei “meaalofa i tagata” e aofia ai le Vaega Pule, o ē ua tofia e fesoasoani i le Vaega Pule, Komiti o Lālā, ovasia matagaluega, faiaʻoga o aʻoga faale-Tusi Paia, toeaina o faapotopotoga ma auauna o le faiva. O nei uso uma ua tofia i le agaga paia e tausia mamoe pele a Ieova ma faamalosia le faapotopotoga.​—1 Pete. 5:2, 3.

6. E tusa ai o le 1 Tesalonia 2:6-8, o le ā o loo taumafai uso ua tofia e le agaga paia e fai?

⁶ Ua tofia e le agaga paia nei uso e latou te faatinoina tiute tauave eseese. E pei lava ona galulue faatasi vaega eseese o le tino e pei o lima ma vae ina ia maua ai e le tino atoa aogā, e faapena foʻi ona galulue mamafa uso ua tofia i le agaga paia ina ia maua ai e le faapotopotoga atoa aogā. E latou te lē saʻilia ni viiga mo i latou lava ae e latou te taumafai e atiaʻe ma faamalosia o latou uso ma tuafāfine. (Faitau le 1 Tesalonia 2:6-8.) E tatou te faafetaia Ieova mo nei tane agavaa faaleagaga e lē manatu faapito.

7. O ā faamanuiaga ua maua e i latou ua auauna faataimi atoa?

⁷ E ono tofia nisi i le faapotopotoga e auauna o ni misionare, paeonia faapito po o paeonia sauatoa. O le mea moni, ua avea le talaʻiga ma le faia o isi ma soo ma galuega faataimi atoa a uso ma tuafāfine i le lalolagi aoao. O lo latou faia o lenā galuega, ua latou fesoasoani ai i le toʻatele e avea ma soo o Keriso Iesu. E ui e masani ona utiuti meafaitino a nei tagata talaʻi faataimi atoa, ae ua tauia i latou e Ieova i se olaga e tumu i faamanuiaga. (Mare. 10:29, 30) E pele iā i tatou nei uso ma tuafāfine, ma e tatou te lotofaafetai ona o le avea o i latou ma vaega o le faapotopotoga.

8. Aiseā e pele ai iā Ieova tagata talaʻi uma o le tala lelei?

⁸ Pe e na o uso tofia, ma i latou e galulue faataimi atoa i le talaʻiga e iai o latou tulaga i le faapotopotoga? E leai. E tāua i le Atua ma le faapotopotoga so o se tagata talaʻi o le tala lelei. (Roma 10:15; 1 Kori. 3:6-9) O le mea moni, o se tasi o sini e sili ona tāua i le faapotopotoga, o le faia lea o isi ma soo o lo tatou Alii o Iesu Keriso. (Mata. 28:19, 20; 1 Timo. 2:4) O tagata talaʻi uma e aofia ai tagata papatiso ma tagata talaʻi e leʻi papatiso, e latou te taumafai e faamuamua lenei galuega i o latou olaga.​—Mata. 24:14.

9. Aiseā e pele ai iā i tatou o tatou tuafāfine Kerisiano?

⁹ Ua tuuina atu e Ieova i tuafāfine Kerisiano se tulaga faamamaluina i le faapotopotoga. E  tāua iā te ia avā, tinā, tuafāfine ua oti a latou tane, ma tuafāfine nofofua o loo auauna faamaoni iā te ia. E tele taimi o loo taʻua ai i le Tusi Paia fafine na fiafia i ai le finagalo o le Atua. Ua taʻuleleia nei fafine ona o a latou faaaʻoaʻoga lelei o le atamai, faatuatua, maelega, lototele, limafoaʻi ma galuega lelei. (Luka 8:2, 3; Galu. 16:14, 15; Roma 16:3, 6; Fili. 4:3; Epe. 11:11, 31, 35) Maʻeu lo tatou lotofaafetai iā Ieova, ona o le iai i a tatou faapotopotoga o tuafāfine Kerisiano o loo faaalia nei uiga matagofie!

10. Aiseā e tāua ai iā i tatou nai o tatou tagata matutua?

¹⁰ Ua faamanuiaina foʻi i tatou ona o le toʻatele o tagata matutua i le faapotopotoga. O nisi faapotopotoga o loo iai uso ma tuafāfine matutua, o ē na auauna faamaoni iā Ieova i o latou olaga atoa. Ae o nisi tagata matutua e leʻi leva ona latou aʻoaʻoina le upu moni. Po o le ā lava le tulaga, ae o loo tauivi nai tagata matutua ma faafitauli i le soifua mālōlōina ona o le soifua matua. O na faafitauli ua ono faaitiitia ai mea e mafai ona latou faia i le faapotopotoga ma le galuega talaʻi. E ui i na tulaga, ae e latou te faia mea e mafai ona latou faia i le galuega talaʻi, ma e latou te faaaogā uma le malosi ua iā i latou e faalaeiau ma toleni ai isi. Ua aogā iā i tatou lo latou poto masani. E matuā matagofie iā Ieova ma i tatou nai o tatou tagata matutua.​—Faata. 16:31.

11-12. O le ā le auala ua faalaeiauina ai oe e talavou o la outou faapotopotoga?

¹¹ Seʻi mafaufau foʻi i a tatou talavou. E latou te fesagaʻia le tele o luʻi a o latou ola aʻe i lenei lalolagi o loo pulea e Satani le Tiapolo, ma ua taaʻina i ana filosofia taufaasesē. (1 Ioa. 5:19) Peitaʻi, ua faalaeiauina i tatou uma i le vaai atu i a tatou talavou o loo faia se sao i sauniga, auai i le galuega talaʻi, ma lototetele e puipuia o latou talitonuga. E moni lava e iai le tulaga tāua o talavou i le faapotopotoga a Ieova.​—Sala. 8:2.

¹² Peitaʻi, e iai nisi o tatou uso ma tuafāfine o loo tauivi ma lagona e lē tāua i latou i le faapotopotoga. O le ā e mafai ona fesoasoani iā i tatou taʻitoʻatasi ina ia lagona ai e iai lo tatou  tulaga i le faapotopotoga? Seʻi tatou talanoa i lenā manatu.

13-14. Aiseā e ono manatu ai nisi e lē tāua i latou i le faapotopotoga?

¹³ Seʻi mātau le lesona lona lua e mafai ona tatou aʻoaʻoina mai i le faaaʻoaʻoga a Paulo. Ua faamatilatila mai e Paulo se faafitauli o loo fesagaʻia e le toʻatele i aso nei, o le faigatā ona latou talitonu e tāua i latou i le faapotopotoga. Na tusi Paulo: “Afai e faapea mai le vae: ʻOna e lē o aʻu o le lima, e lē o aʻu la o se vaega o le tino,’ e lē faapea ai la ua lē o se vaega moni o le tino. Afai foʻi e faapea mai le taliga: ʻOna e lē o aʻu o se mata, e lē o aʻu la o se vaega o le tino,’ e lē faapea ai la ua lē o se vaega moni o le tino.” (1 Kori. 12:15, 16) O le ā le manatu tāua na faamatilatila mai e Paulo?

¹⁴ Pe a faatusatusa oe i isi i le faapotopotoga, atonu ua e lē iloa ai lou tāua i le faapotopotoga. O nisi i le faapotopotoga atonu e tomai i le aʻoaʻo atu, lelei i le faamaopoopoina o mea, ma o ni leoleo mamoe lelei. Atonu e te manatu e sili atu o latou tomai nai lo o oe. O le iai iā te oe o lenā manatu ua faaalia ai, o oe o se tagata lotomaulalo ma faamaulalo. (Fili. 2:3) Ae ia faaeteete. Pe a fai ma au masani lou faatusatusaina o oe i tomai mataʻina o isi, o le a e lotovaivai ai. E ono oo ai foʻi iā te oe faalogona e pei ona taʻua e Paulo, e matuā leai lava sou tulaga i le faapotopotoga. O le ā e mafai ona fesoasoani iā te oe e fesagaʻia ai nei faalogona?

15. E tusa ai ma le 1 Korinito 12:4-11, o le ā e manaʻomia ona tatou iloa i so o se meaalofa e tatou te mauaina?

¹⁵ Seʻi mātau le mea moni lenei: Na tuuina atu faavavega e Ieova meaalofa o le agaga paia i nisi o Kerisiano o le uluaʻi senituri, ae e lē tutusa meaalofa na tuuina atu iā i latou. (Faitau le 1 Korinito 12:4-11.) E ui e eseese tomai ma meaalofa na tuuina atu e Ieova i Kerisiano taʻitoʻatasi, ae e tāua i latou uma. I aso nei, e tatou te lē o maua faavavega meaalofa o le agaga paia, ae e tāua i tatou uma iā Ieova, e ui atonu e eseese o tatou tomai.

16. O le ā le fautuaga a le aposetolo o Paulo e manaʻomia ona tatou faatatauina?

 ¹⁶ Nai lo o le faatusatusa o i tatou i isi Kerisiano, e manaʻomia ona tatou faatatauina le fautuaga a le aposetolo o Paulo: “Ia taʻitasi le tagata ma faamaonia po o faapefea ana galuega, ona iai lea o se mea e mitamita ai iā te ia lava, ae aua le faatusatusa atu i le isi tagata.”​—Kala. 6:4.

17. O ā aogā e tatou te maua pe a mulimuli i le fautuaga a Paulo?

¹⁷ Pe a tatou mulimuli i le fautuaga faagaeeina a Paulo ma iloilo a tatou gaoioiga, o le a tatou iloa ai e iai o tatou tomai ma meaalofa e ese mai ai tatou i isi. O se faaaʻoaʻoga, o se toeaina e lē lelei lana aʻoaʻo atu mai i le pulelaa, ae e uigā i le faia o isi ma soo. Pe e lē maopoopo foʻi le auala e na te faia ai mea e pei o isi toeaina i le faapotopotoga, ae e iloa o ia o se leoleo mamoe alofa e faigofie ona talanoa atu i ai tagata talaʻi mo ni fautuaga aogā mai i le Tusi Paia. Pe atonu e iloa o ia o se tagata e ese le talimālō. (Epe. 13:2, 16) Pe a tatou iloa lelei mea e tatou te lelei ai ma o tatou tomai, o le a tatou matuā fiafia ona ua tatou iloa mea e mafai ona tatou faia mo le faapotopotoga. E tatou te lē matauʻa ai foʻi i uso e ese o latou tomai ma mea e lelei ai mai iā i tatou.

18. E faapefea ona faaleleia o tatou tomai?

¹⁸ Po o le ā lava lo tatou tulaga i le faapotopotoga, ae e tatau iā i tatou uma ona naunau e faaleleia la tatou auaunaga ma atiaʻe o tatou tomai. Ua saunia e Ieova toleniga aogā e ala mai i lana faalapotopotoga ina ia faaleleia ai la tatou auaunaga ma tomai. O se faataʻitaʻiga, ua toleniina i tatou i a tatou sauniga amata o le vaiaso ina ia faaleleia atili ai la tatou faiva. Po o e taumafai e faatatau na toleniga ua e maua mai i na sauniga?

19. E faapefea ona e ausia agavaa ina ia auai ai i le Aʻoga mo Tagata Talaʻi o le Malo?

¹⁹ O le Aʻoga mo Tagata Talaʻi o le Malo, o le isi lea auala aogā e toleni ai i tatou. O lenei aʻoga e mafai ona auai ai uso ma tuafāfine o loo i le auaunaga faataimi atoa, ma e i le va o le 23 i le 65 tausaga. Atonu e te faapea ifo, e lē mafai ona ou auai i lenei aʻoga. Peitaʻi, e tatau ona fai sau lisi o māfuaaga e te fia auai ai, nai lo o le mafaufau i māfuaaga e lē mafai ai ona e auai. Ona fai lea o se faasologa ina ia fesoasoani iā te oe e ausia ai agavaa e manaʻomia i le aʻoga. O le fesoasoani a Ieova ma lou galue mamafa, o le a mafai ai ona e ausia mea e foliga e faigatā iā te oe.

20. O le ā e tatou te aʻoaʻoina mai i le Roma 12:6-8?

²⁰ O le lesona lona tolu e tatou te aʻoaʻoina mai i le talafaatusa a Paulo e maua i le Roma 12:6-8. (Faitau.) Na toe taʻua e Paulo i lenei mau, e eseese tomai o tagata taʻitoʻatasi o le faapotopotoga. Peitaʻi, ua ia faamatilatila mai i lenei mau, e tatau ona tatou faaaogā so o se tomai ua iā i tatou, e atiaʻe ma faamalosia ai le faapotopotoga.

21-22. O le ā le lesona e tatou te aʻoaʻoina mai iā Robert ma Felice?

²¹ Seʻi mātau le mea na tupu i le uso o Robert. Na auauna o ia i se isi atunuu, ae na suia lona tofiga e auauna i le Peteli i lona atunuu. E ui na faamautinoa atu e uso iā te ia, e leʻi suia lona tofiga ona ua ia faia se mea sesē, ae na ia faapea mai: “O le sesē o laʻu vaai e faapea ua ou lē taulau i laʻu auaunaga na tū mai pea i oʻu luma i le tele o masina. Na iai taimi na ou mafaufau ai e faamavae mai i le auaunaga i Peteli.” Ae na faapefea ona toe saʻo lana vaai? Na faamanatu atu e se toeaina iā te ia,  na toleni i tatou e Ieova i le tofiga na tatou galulue ai ina ia faaleleia ai le auala e faatino ai o tatou tofiga o loo iai. Na iloa e Robert e manaʻomia ona ia taulaʻi i mea e mafai ona ia faia i le taimi lenei, ae aua le toe tepa i mea ua tuanaʻi.

²² E tai faapena foʻi le luʻi na fesagaʻia ma le uso o Felice Episcopo. Na faauu mai ma lana avā i Kiliata i le 1956 ma na auauna i le galuega femalagaaʻi i Polivia. Na fanau le la tama i le 1964. Na faapea mai Felice: “O se luʻi le tuua o se tofiga na pele iā i maʻua. Ou te taʻutino atu e pe ā ma le tausaga o oʻu tauivi ma faalogona o le lē taulau. Ae o le fesoasoani a Ieova na sui ai laʻu vaai ma taulaʻi atu ai i loʻu tiute tauave fou o se matua.” Po ua oo iā te oe faalogona na oo iā Robert ma Felice? Po o e lotovaivai ona ua lē o toe iai ou faaeaga i le auaunaga na iai i le taimi ua teʻa? Pe afai o lea, o le a e matuā fiafia pe afai e sui lau vaai ma e taulaʻi atu i mea e mafai ona e faia i le taimi nei, e auauna ai iā Ieova ma ou uso. Ia pisi pea e faaaogā ou tomai e fesoasoani ai i isi, ma o le a e maua ai le olioli a o e atiaʻe le faapotopotoga.

23. O le ā e tatau ona faaalu i ai lo tatou taimi, ma o le ā o le a tatou talanoaina i le mataupu o loo sosoo mai?

²³ E matuā tāua iā Ieova i tatou taʻitoʻatasi. E finagalo o ia e avea i tatou ma ona ʻauaiga. Pe a faaalu le taimi e mafaufau loloto ai i mea e mafai ona tatou faia e atiaʻe ai o tatou uso ma tuafāfine ma galulue mamafa e faataunuu, e ono aveesea ai iā i tatou manatu e leai so tatou tulaga i le faapotopotoga. Ae e faapefea le auala e tatou te vaai ai i isi i le faapotopotoga? E faapefea ona faaalia e tatou te talisapaia i latou? O le a talanoaina i le mataupu o loo sosoo mai nei fesili tāua.