1. O le ā na taʻua e Tavita e faatatau i le lotomaulalo o Ieova?

PE E mafai moni lava ona tatou faapea atu e lotomaulalo Ieova? Ioe, e mafai. Na faapea mai Tavita: “E te tuuina mai foʻi iā te aʻu o lou talita o le faaolataga. O lou agamalu [po o le “lotomaulalo”] ua faasilisiliina ai aʻu.” (2 Samu. 22:36; Sala. 18:35) Atonu na mafaufau Tavita i le aso na alu atu ai le perofeta o Samuelu i le fale o lona tamā, e faauu lē o le a avea ma tupu o Isaraelu e sui ai Saulo. O Tavita o le uii o le fanau tama e toʻavalu, peitaʻi na filifilia o ia e Ieova e suia le tupu o Saulo.​—1 Samu. 16:1, 10-13.

2. O le ā o le a tatou talanoaina i lenei mataupu?

² E ioe Tavita i faalogona na faaalia e se tasi o faisalamo, na faapea mai e uiga iā Ieova: “Ua faamaulaloina e ia o ia lava e silasila mai i le lagi ma le lalolagi. Ua ia faatūina le tagata faatauvaa mai i le pefu. Ua ia faaeaina le tagata mativa . . . ina ia faanofo faatasi o ia ma tamālii.” (Sala. 113:6-8) Muamua, o le a tatou talanoaina i lenei mataupu ni lesona tāua e faatatau i le lotomaulalo e ala i le talanoaina o auala na faaalia ai e Ieova lenei uiga. O le a tatou talanoaina foʻi mea e mafai ona tatou aʻoaʻoina mai i le tupu o Saulo, le perofeta o Tanielu ma Iesu e faatatau i le uiga o le faamaulalo.

3. Na faapefea ona feutagaʻi Ieova ma i tatou, ma o le ā ua faamaonia ai?

³ E faamaonia le lotomaulalo o Ieova i le auala na ia feutagaʻi ai ma tagata lē lelei atoatoa. E na te taliaina la tatou tapuaʻiga, ma e manatu foʻi iā i tatou o ni ana uō. (Sala. 25:14) Na tausolomua  Ieova e saunia lona Alo e fai ma taulaga mo a tatou agasala, ina ia mafai ai ona tatou maua se faauōga ma ia. Maʻeu le alofa mutimutivale ma le tigā alofa ua faaalia e Ieova iā i tatou!

4. O le ā ua tuuina mai e Ieova iā i tatou, ma aiseā?

⁴ Seʻi tatou talanoaina se isi auala o loo faaalia ai e Ieova lona lotomaulalo. Ona o ia o Lē na foafoaina i tatou, na mafai lava la ona faia i tatou e Ieova e aunoa ma le tuuina iā i tatou o le tomai e filifili ai mea e fai e le tagata lava ia i lona olaga. Ae e na te leʻi faia faapea. Na ia foafoaina i tatou i lona faatusa ma tuuina mai iā i tatou le filifiliga saʻoloto. E ui o i tatou o tagata faatauvaa, ae e finagalo Ieova ia auauna atu iā te ia mai i le loto ona e tatou te alolofa iā te ia, ma ia iloa e aogā iā i tatou le usiusitaʻi iā te ia. (Teu. 10:12; Isa. 48:17, 18) Maʻeu lo tatou lotofaafetai i lenei faailoaga o le lotomaulalo o Ieova!

5. E faapefea ona aʻoaʻoina i tatou e Ieova ia lotomaulalo? (Tagaʻi i le ata i le faavaa.)

⁵ O loo aʻoaʻoina i tatou e Ieova ia lotomaulalo e ala i le auala o loo ia feutagaʻi ai ma i tatou. E sili le atamai o Ieova i le aoao o mea, peitaʻi, e lotomalie o ia e talia manatu o isi. O se faaaʻoaʻoga, na faataga e Ieova lona Alo e fesoasoani iā te ia i le foafoaina o mea uma. (Faata. 8:27-30; Kolo. 1:15, 16) E ui o Ieova o Lē e ona le malosi uma lava, ae ua ia faasafua atu tiute tauave i isi. O se faataʻitaʻiga, na ia tofia Iesu e avea ma Tupu o le Malo, ma ua ia tuuina atu se pule i le 144,000 o ē o le a pule lagolago faatasi ma Iesu. (Luka 12:32) O le mea moni, na toleniina e Ieova Iesu e avea ma Tupu ma Ositaulaga Sili. (Epe. 5:8, 9) O loo toleniina foʻi e Ieova pule lagolago e faataunuu o latou tofiga, ae e na te lē o pulea auala uma e faia ai o latou tofiga. E maufaatuatuaina e Ieova i  latou, o le a latou faia lona finagalo.​—Faaa. 5:10.

6-7. O le ā e tatou te aʻoaʻoina mai i lo tatou Tamā i le lagi e faatatau i le faasafua atu o tiute tauave i isi?

⁶ E lē manaʻomia e lo tatou Tamā i le lagi se fesoasoani ae e na te faasafua atu le pule i isi. Talu ai e tatou te manaʻomia le fesoasoani, pe e lē tatau ea la ona tatou faasafua atu le pule i isi? Po o oe o se ulu o se aiga po o se toeaina o le faapotopotoga? Ia mulimuli i le faaaʻoaʻoga a Ieova e ala i le faasafua atu o tiute tauave i isi, ma ʻalofia le taumafai e pulea auala uma e faia ai o latou tiute. Pe a faaaʻoaʻo iā Ieova, e lē gata o le a māeʻa ai le galuega, ae o le a toleniina ai foʻi isi ma faateleina ai lo latou mautinoa e mafai ona latou faia galuega. (Isa. 41:10) O ā isi mea e mafai e i latou o loo iai se pule ona aʻoaʻoina mai iā Ieova?

⁷ O loo taʻua i le Tusi Paia e fiafia Ieova i manatu o ona atalii agaga. (1 Tu. 22:19-22) Mātua e, e faapefea ona e faaaʻoaʻo i le faaaʻoaʻoga a Ieova? Pe a talafeagai, ia fesili i lau fanau mo ni o latou manatu i se auala e faataunuu ai se galuega. Pe a fetaui, ia faaaogā a latou fautuaga.

8. Na faapefea ona faaalia e Ieova le onosaʻi a o feutagaʻi ma Aperaamo ma Sara?

⁸ E faaalia foʻi le lotomaulalo o Ieova i lona onosaʻi. O se faaaʻoaʻoga, na onosaʻi Ieova ina ua fesiligia ma le faaaloalo e ana auauna ana faaiʻuga. Na ia faafofoga atu iā Aperaamo a o faamatala atu ona popolega e faatatau i lana faaiʻuga e faaumatia Sotoma ma Komoro. (Kene. 18:22-33) Ia manatua foʻi le auala na feutagaʻi ai Ieova ma Sara le avā a Aperaamo. E leʻi toʻatamaʻi pe ita o ia, ina ua ʻataʻata Sara i lana folafolaga o le a tō o ia ae ua loomatua. (Kene. 18:10-14) Nai lo o lea, na ia feutagaʻi ma Sara i se auala faaaloalo.

9. O ā lesona e mafai ona aʻoaʻoina e mātua ma toeaina mai i le faaaʻoaʻoga a Ieova?

⁹ O ā lesona e mafai ona aʻoaʻoina e mātua ma toeaina mai i le faaaʻoaʻoga a Ieova? Ia mafaufau i le auala e te tali atu ai, pe a lē ioe lau fanau po o nisi o le faapotopotoga i au faaiʻuga. Po o lau tali muamua lava o le faasaʻo o i latou? Pe e te taumafai e malamalama i o latou manatu? E mautinoa e maua e aiga ma faapotopotoga aogā pe a taumafai mātua ma toeaina e faaaʻoaʻo iā Ieova. Ua tatou talanoaina lesona e mafai ona tatou aʻoaʻoina e uiga i le lotomaulalo mai i le faaaʻoaʻoga a Ieova. O lea, seʻi o tatou talanoaina lesona e mafai ona tatou aʻoaʻoina e uiga i le faamaulalo mai i faaaʻoaʻoga o loo i le Afioga a le Atua.

10. E faapefea ona faaaogā e Ieova faaaʻoaʻoga a isi e aʻoaʻoina ai i tatou?

¹⁰ Talu ai o Ieova o lo tatou “Aʻoaʻo Sili,” ua ia saunia faaaʻoaʻoga mai i lana Afioga e aʻoaʻo ai i tatou. (Isa. 30:20, 21) E tatou te aʻoaʻoina mai ni lesona pe a tatou manatunatu loloto i faaaʻoaʻoga faale-Tusi Paia, e faatatau iā i latou na faaalia uiga faale-Atua, e aofia ai le faamaulalo. E tatou te aʻoaʻoina mai foʻi lesona, a o tatou suʻesuʻeina mea na tutupu iā i latou e leʻi taulau i le faaalia o na uiga faale-Atua.​—Sala. 37:37; 1 Kori. 10:11.

11. O le ā e mafai ona tatou aʻoaʻoina mai i le faaaʻoaʻoga leaga a Saulo?

¹¹ Seʻi mafaufau i le mea na tupu i le tupu o Saulo. O ia o se tama talavou lotomaulalo. Na ia iloa mea na gata ai lona mafai ma na ia faatalatū foʻi e talia nisi o tiute tauave. (1 Samu. 9:21; 10:20-22) Peitaʻi, na iai le taimi na faamaualuga ai le loto o Saulo. Na amata ona ia faaalia lenei uiga leaga ina ua faatoʻā māeʻa ona avea o ia ma tupu. Na iai se mea na tupu na leʻi onosaʻi ai Saulo a o faatalitali i le taunuu ane o le perofeta o Samuelu. Na ia ofo atu se taulaga mū e ui e leai sana pule e na te faia ai.  E leʻi faaalia e Saulo le faamaulalo, i lona lē maufaatuatuaina o Ieova e gaoioi mo ona tagata. O le iʻuga, na melea ai e Saulo le finagalo malie o Ieova ma lona tulaga o se tupu. (1 Samu. 13:8-14) O se lapataʻiga mo i tatou le mea na tupu iā Saulo, ma e atamai lo tatou aʻoaʻoina mai ai o ni lesona ma ʻalofia le faamaualuga.

12. Na faapefea ona faaalia e Tanielu le faamaulalo?

¹² Seʻi o tatou talanoa i le faaaʻoaʻoga lelei a le perofeta o Tanielu, lea e ese mai i le faaaʻoaʻoga leaga a Saulo. I lona olaga atoa, na tumau pea ona avea Tanielu o se auauna lotomaulalo ma faamaulalo a le Atua, auā na ia talosaga pea iā Ieova mo le taʻitaʻiga. O se faaaʻoaʻoga, ina ua faaaogā o ia e Ieova e faamatala miti a Nepukanesa e leʻi faapea atu Tanielu na mafai ona ia faamatalaina nei miti ona o ia lava. Nai lo o lea, na faamaulalo Tanielu e ala i le avatu o le viiga uma ma le mamalu iā Ieova. (Tani. 2:26-28) O le ā le lesona mo i tatou? Pe a fiafia uso e faalogo i a tatou lauga pe e iai foʻi ni mea lelei na tutupu i la tatou galuega talaʻi, e manaʻomia ona tatou manatua e avatu iā Ieova le viiga uma. E ao ona tatou faamaulalo e ala i lo tatou faailoa atu e leʻi mafai ona tatou faia nei mea e aunoa ma le fesoasoani a Ieova. (Fili. 4:13) Pe a iā i tatou lenei uiga ua tatou faaaʻoaʻo foʻi la i le faaaʻoaʻoga lelei a Iesu. E faapefea?

13. O le ā ua tatou aʻoaʻoina mai i upu a Iesu o loo i le Ioane 5:19, 30 e faatatau i le faamaulalo?

¹³ E ui o Iesu o le Atalii lelei atoatoa o le Atua, ae na ia faalagolago iā Ieova. (Faitau le Ioane 5:19, 30.) E leʻi taumafai o ia e faoa le pule mai i lona Tamā i le lagi. Ua taʻu mai i le Filipi 2:6 e uiga iā Iesu e faapea, “e leʻi manatu o ia e faoa le pule, ina ia tutusa ai o ia ma le Atua.” Talu ai o Iesu o se Atalii e gauaʻi, na malamalama la o ia i mea e gata ai lana pule ma na ia faaaloalo foʻi i le pule a lona Tamā.

14. Na faapefea ona tali atu Iesu ina ua talosagaina o ia e fai se mea e lē oo i ai lana pule?

¹⁴ Seʻi mafaufau i le auala na tali atu ai Iesu i ona soo o Iakopo ma Ioane ma lo la tinā, ina ua latou talosaga ane mo se faaeaga e lē oo i ai le pule a Iesu. Na vave lava ona tali atu Iesu, e na o lona tamā i le lagi e iai le pule e filifili ai i latou e nonofo i lona itu taumatau ma lona itu tauagavale i le Malo. (Mata. 20:20-23) Na faaalia i le tali atu a Iesu e na te amanaʻia le mea e  gata ai lana pule. Na faaalia e Iesu le faamaulalo. E na te leʻi faia se mea e leʻi faatagaina o ia e Ieova e fai. (Ioa. 12:49) E faapefea ona tatou faaaʻoaʻo i le faaaʻoaʻoga lelei a Iesu?

15-16. E faapefea ona tatou faatatauina le fautuaga a le Tusi Paia o loo i le 1 Korinito 4:6?

¹⁵ E tatou te faaaʻoaʻo i le faaaʻoaʻoga a Iesu o le faamaulalo e ala i le faatatau o le fautuaga a le Tusi Paia o loo i le 1 Korinito 4:6: “Aua tou te faia mea e sili atu nai lo o mea ua tusia.” Pe a talosagaina la tatou fesoasoani, e tatou te lē mananaʻo e faaauilumaina o tatou lava manatu, pe fai atu foʻi se tala e muamua tau iai o tatou mafaufau. Peitaʻi, e ao ona faauaʻi atu i fautuaga o loo i le Tusi Paia, ma a tatou lomiga faale-Tusi Paia. O le faia faapea ua tatou faailoa atu ai, e iai mea e gata ai mea e tatou te faia. O le iai iā i tatou o le faamaulalo, o le a tatou faaalia ai le faaaloalo i “poloaʻiga amiotonu” a Lē e ona le malosi uma lava.​—Faaa. 15:3, 4.

¹⁶ O le faamaulalo e faamamaluina ai Ieova, ae e iai foʻi isi māfuaaga lelei e tatou te faaalia ai le faamaulalo. O le a tatou talanoaina pe faapefea i le lotomaulalo ma le faamaulalo ona fesoasoani iā i tatou e maua ai le olioli ma maua ai faiā lelei ma isi.

17. Aiseā e olioli ai tagata lotomaulalo ma faamaulalo?

¹⁷ E tatou te maua le olioli pe a lotomaulalo ma faamaulalo. Aiseā? E tatou te faaalia le lototalisapaia ma fiafia i so o se fesoasoani e maua mai i isi, pe a tatou iloa mea e gata ai lo tatou mafai. O se faaaʻoaʻoga, seʻi mafaufau i le mea na tupu ina ua faamālōlō e Iesu lepela e toʻasefulu. E na o le toʻatasi le tamāloa na toe foʻi e faafetai iā Iesu mo le faamālōlōina o ia mai i lenā maʻi leaga, o se mea e lē mafai ona fai e le tamāloa. Na lotofaafetai lenei tamāloa lotomaulalo ma faamaulalo mo le fesoasoani  na ia mauaina, ma na ia faamamaluina ai le Atua.​—Luka 17:11-19.

18. E faapefea ona fesoasoani iā i tatou le lotomaulalo ma le faamaulalo ina ia faigofie ai ona faauō atu i isi? (Roma 12:10)

¹⁸ E masani lava o tagata lotomaulalo ma faamaulalo e faigofie ona faauō atu ma vavalalata i isi. Aiseā? E latou te fiafia e faailoa atu e iai uiga lelei o isi ma e latou te maufaatuatuaina i latou. O i latou e lotomaulalo ma faamaulalo e fiafia pe a taulau isi i o latou tofiga, e vave ona faamālō atu ma tausolomua e faaaloalo iā i latou.​—Faitau le Roma 12:10.

19. O ā nisi o māfuaaga e tatau ai ona tatou ʻalofia le faamaualuga?

¹⁹ Peitaʻi, o tagata faamaualuluga e faigatā ona latou faamālō atu i isi, ma e latou te manatu e na o i latou lava e tatau ona mauaina le viiga. E latou te faatusatusa i latou i isi ma faaauiluma le agaga faatautavā. Nai lo o le toleniina o isi ma avatu iā i latou le pule e fai ai se mea, e latou te ono faapea atu, “Pe a e manaʻo e saʻo le auala e fai ai se mea, tago oe e fai.” Ae o le mea moni, o le auala lava lenā o loo latou mananaʻo e fai ai se mea. E masani lava o le tagata faamaualuga e fia matamuamua ma e lotoleaga. (Kala. 5:26) O tagata faapena e seāseā iai ni a latou faauōga tumau. Pe a tatou iloa ua maua i tatou i lenei uiga o le faamaualuga, e tatau ona tatou tatalo faatauanau iā Ieova mo le fesoasoani, ina ia ʻsuia o tatou mafaufau,’ ma lē mafai ai ona mauaa lenei uiga i o tatou loto.​—Roma 12:2.

20. Aiseā e tatau ai ona tatou lotomaulalo ma faamaulalo?

²⁰ Maʻeu lo tatou lotofaafetai i le faaaʻoaʻoga a Ieova! Ua tatou iloa lona lotomaulalo i le auala o loo ia feutagaʻi ai ma ana auauna, ma e tatou te mananaʻo e faaaʻoaʻo iā te ia. E tatou te mananaʻo foʻi e faaaʻoaʻo i faaaʻoaʻoga lelei o tagata na faaalia le faamaulalo o loo i le Tusi Paia, o ē na maua le faaeaga e savavali ma le Atua. Tau ina ia tatou avatu pea iā Ieova le mamalu ma le viiga, lea e tatau ona ia mauaina. (Faaa. 4:11) O le faia faapea, o le a tatou agavaa ai foʻi e savavali ma lo tatou Tamā i le lagi, o lē e alofa i tagata lotomaulalo ma faamaulalo.