1. Aiseā na foafoaina ai e Ieova le ola?

NA IAI le taimi e na o Ieova lava na soifua ai. Ae e na te leʻi lagona ai le tuua toʻatasi. Na atoatoa o ia i mea uma ae na finagalo o ia e maua e tagata le ola ma olioli ai. O lea la, o le alofa o Ieova na uunaʻia ai o ia e foafoaina mea.​—Sala. 36:9; 1 Ioa. 4:19.

2. O ā faalogona o agelu ma Iesu i galuega mataʻina o le foafoaga a Ieova?

² Muamua, na foafoaina e Ieova lona Alo e la te galulue faatasi. O lea “na foafoaina isi mea uma” e aofia ai le faitau miliona o foafoaga agaga atamamai e ala mai i lenā Alo ulumatua. (Kolo. 1:16) Na olioli Iesu i le avanoa na la galulue faatasi ai ma lona Tamā. (Faata. 8:30) Na iai foʻi māfuaaga na olioli ai atalii agaga o le Atua. Na latou vaavaai atu a o foafoaina e Ieova ma lana Tufuga Poto o Iesu le lagi ma le lalolagi. O le ā na faaalia e agelu? Na latou “alalaga faatasi ma le olioli” ina ua foafoaina le lalolagi. E mautinoa na latou alalaga pea ma le olioli i aso taʻitasi o galuega o le foafoaga a Ieova, e aofia ai lana foafoaga mataʻina mulimuli o le tagata. (Iopu 38:7; Faata. 8:31) O nei foafoaga uma ua atagia mai ai le alofa ma le atamai o Ieova.​—Sala. 104:24; Roma 1:20.

3. E tusa ai o le 1 Korinito 15:21, 22, o le ā ua mafai e le taulaga togiola a Iesu ona fai?

³ Na finagalo Ieova ia ola e faavavau le tagata i lenei lalolagi matagofie na ia foafoaina. Peitaʻi, na oo mai le agasala ma le  oti i le lalolagi ina ua fouvale Atamu ma Eva i lo la Tamā alofa. (Roma 5:12) O le ā na faia e Ieova? Na vave lava ona faailoa mai e Ieova le auala o le a ia laveaʻia ai tagata. (Kene. 3:15) Na finagalo o ia e saunia se togiola ina ia mafai ai e le fanau a Atamu ma Eva, ona saʻoloto mai i le agasala ma le oti. O lea, na ia tuu atu ai le avanoa i tagata e filifili ai, pe auauna iā te ia ma maua le ola e faavavau.​—Ioa. 3:16; Roma 6:23; faitau le 1 Korinito 15:21, 22.

4. O ā fesili o le a tatou talanoaina i lenei mataupu?

⁴ O le folafolaga a Ieova mo le toetutū mai o ē ua maliliu, ua lāgā ai le tele o fesili. O se faaaʻoaʻoga, o le ā le auala e ono faataunuu ai le toetū? Pe e mafai ona tatou iloa ē pele iā i tatou pe a faatutūina mai? O ā auala e tatou te maua ai le olioli ona o le toetū? E faapefea ona atiaʻe lo tatou talisapaia o le alofa, atamai ma le onosaʻi o Ieova pe a manatunatu loloto i le toetū? Seʻi o tatou talanoaina nei fesili.

5. Aiseā e talafeagai ai ona tatou faatalitalia o le a faasolosolo ona faatutūina tagata i se auala maopoopo?

⁵ Pe a faatutū mai e Ieova le faitau miliona e ala i lona Alo, atonu e tatou te faatalitalia e lē o i latou uma o le a toetutū mai i le taimi e tasi. Aiseā? Talu ai pe a faafuaseʻi ona faateleina le faitau aofaʻi o tagata i le lalolagi, o le a matuā tumu ma vevesi ai le lalolagi. Ae e lē mafai ona faia e Ieova se mea i se auala e lē maopoopo. E silafia e Ieova e manaʻomia ona maopoopo mea, ina ia mafai ai ona nonofo filemu tagata. (1 Kori. 14:33) Na faaalia e Ieova le atamai ma le onosaʻi a o la galulue faatasi ma Iesu e saunia le lalolagi i se auala faasolosolo a o leʻi foafoaina tagata. O le a faapena foʻi ona faaalia e  Iesu na uiga i le Afe Tausaga o lana Pulega, a o latou galulue faatasi ma ē o le a faasaoina mai iā Amaketo, e saunia le lalolagi mo i latou e faatutūina mai.

6. E tusa ai o le Galuega 24:15, o ai o le a faatutūina mai e Ieova?

⁶ O le auala e sili ona tāua e fesoasoani ai i latou o le a faasaoina mai iā Amaketo i ē o le a faatutūina mai, o le aʻoaʻo lea o i latou e faatatau i le Malo o le Atua ma mea e faafinagaloina e Ieova. Aiseā? Talu ai o le toʻatele o i latou o le a faatutūina mai ua taʻua i le Tusi Paia o “tagata amiolētonu.” (Faitau le Galuega 24:15.) E tatau iā i latou na ona faia suiga e tele, ina ia latou maua ai aogā mai i le togiola a Keriso. Seʻi mafaufau i le tele o galuega o le a aofia ai, i le aʻoaʻoina o le upu moni e faatatau i le Atua i le faitau miliona o tagata o ē e lē iloa Ieova. Po o le a tutusa le auala e aʻoaʻoina ai i latou, ma le auala o loo tatou faia ai suʻesuʻega faale-Tusi Paia i aso nei? Po o le a tofia i latou nei i ni faapotopotoga, ma toleniina ina ia mafai ona latou aʻoaʻoina i latou o le a mulimuli toetutū? E tatau ona tatou faatalitali ma le onosaʻi. Peitaʻi, ua tatou iloa, i le faaiʻuga o le Pulega a Keriso i le Afe Tausaga “o le a tumu le lalolagi i le poto e uiga iā Ieova.” (Isa. 11:9) Maʻeu le tele o galuega faamalieloto o le a tatou pisi e fai a o faagasolo le afe tausaga!

7. Aiseā e tatau ai ona faaalia e tagata o le Atua le tigā alofa a o latou aʻoaʻoina ē o le a toetutū mai?

⁷ I le Pulega a Keriso i le Afe Tausaga, e tatau i le fanau uma a Ieova i le lalolagi ona faia ni suiga ina ia maua ai lona finagalo malie. O lea, o le a iai iā i latou uma le tigā alofa a o latou fesoasoani i ē o le a toetutū mai e tauivi ma o latou faanaunauga agasala ma ola e tusa ai ma tapulaa a Ieova. (1 Pete. 3:8) E mautinoa e tosina atu i latou o le a toetutū mai i tagata lotomaulalo o Ieova, o ē foʻi o le a “galulue mo lo [latou] faaolataga.”​—Fili. 2:12.

8. Aiseā e talafeagai ai ona faapea atu o ē o le a faafeiloaʻia ē e pele o le a toetutū mai, o le a mafai ona latou iloa i latou?

⁸ E tele māfuaaga e tatou te faatalitalia ai o ē o le a faafeiloaʻia ē e pele o le a toetutū mai, o le a mafai ona latou iloa i latou. O se faataʻitaʻiga, pe a fua i le toe faatutūina e Ieova o tagata i le taimi ua mavae, e tatou te faatalitalia la o le a toe foafoaina e Ieova foliga o tagata na iai, le auala na latou tautatala ma mafaufau ai i le taimi na maliliu ai. Ia manatua na faatusa e Iesu le oti i le moe ae e pei le toetū o le ala mai i le moe. (Mata. 9:18, 24; Ioa. 11:11-13) Pe a feala mai tagata na momoe, e tumau pea o latou foliga ma leo na iai i le taimi na momoe ai ma e latou te toe manatua foʻi mea uma na fai a o leʻi momoe. Seʻi tatou talanoa i le mea na tupu iā Lasalo. E fā aso talu ona maliu ma ua amata la ona pala lona tino. Peitaʻi, ina ua toe faatūina mai o ia e Iesu na vave lava ona iloa o ia e ona tuafāfine ma e mautinoa na iloa foʻi e Lasalo ona tuafāfine.​—Ioa. 11:38-44; 12:1, 2.

9. Aiseā e lē faatalitalia ai o le a lelei atoatoa tino ma mafaufau o tagata i le taimi e faatutū mai ai?

⁹ Ua folafola mai e Ieova o le a leai se tasi e ola i lalo o le pulega a Keriso e faapea mai: “Ou te maʻi.” (Isa. 33:24; Roma 6:7) O lona uiga la, o i latou o le a faatutū mai i le oti, o le a latou maua ni tino e soifua mālōlōina lelei. Peitaʻi, e lē faapea ai o le a lelei atoatoa i le taimi e faatutū mai ai. Pe afai o le tulaga lenā, atonu la o le a faigatā ona iloa i latou e o latou tauaiga ma uō. E foliga mai o tagata uma o le a faasolosolo ona avea ma tagata lelei atoatoa a o faagasolo le Pulega a Keriso i le Afe Tausaga.  O le a tuuina atu e Iesu le Malo i lona Tamā i le iʻuga o le afe tausaga. I lenā taimi, ua faataunuuina atoatoa ai e le Malo ana galuega uma, e aofia ai le faatutūina o tagata i se tulaga lelei atoatoa.​—1 Kori. 15:24-28; Faaa. 20:1-3.

10. O ā ni ou faalogona o le a iai ona o le toetū?

¹⁰ Seʻi faaāta i lou mafaufau ou faalogona a o e toe feiloaʻi atu i ē pele iā te oe. Po o le a e tagi, po o le a e ʻata ona o lou olioli tele? Po o le a e pese leotele e vivii iā Ieova? E mautinoa o le a matuā faalolotoina lou alofa i lou Tamā manatu mamafa ma lona Alo lē manatu faapito ona o le meaalofa matagofie o le toetū.

11. E tusa ai ma fetalaiga a Iesu i le Ioane 5:28, 29, o le ā o le a tofo i ai i latou e ola e tusa ma tapulaa amiotonu a le Atua?

¹¹ Seʻi faaāta faalogona olioli o i latou o le a toetutū mai a o latou toese le tagata tuai ae ola e tusa ai ma tapulaa amiotonu a le Atua. O i latou e faia nei suiga, o le a latou toetutū i le ola. Ae o le a lē faatagaina e Ieova tagata e mumusu e fai suiga e saveʻuina le filemu i le Parataiso.​—Isa. 65:20; faitau le Ioane 5:28, 29.

12. O le ā le auala o le a faamanuia ai e Ieova i latou uma i le lalolagi?

¹² I lalo o le pulega o le Malo, o le a tofo tagata uma o le Atua i le moni o faaupuga i le Faataoto 10:22: “O le faamanuiaga a Ieova, e faatamaoaiga ai ma e na te lē faaopoopo i ai se tigā.” O le fesoasoani a le agaga o Ieova o le a mafai ai ona matuā faatamaoaigaina faaleagaga tagata o le Atua. O lona uiga o le a matuā pei o latou uiga o le Keriso ma o le a faasolosolo ai ona avea i latou ma tagata lelei atoatoa. (Ioa. 13:15-17; Efe. 4:23, 24) I aso taʻitasi, o le a faateleina lo latou malolosi ma o le a faaleleia pea o latou tulaga. Maʻeu se olaga fiafia o le a iai! (Iopu 33:25) E faapefea ona fesoasoani iā te oe i le taimi lenei le manatunatu loloto i le toetū?

13. E tusa ai o le Salamo 139:1-4, e faapefea ona iloa e silafia lelei i tatou e Ieova e ala i le toetū?

¹³ E pei ona tatou talanoaina i palakalafa ua mavae, pe a faatutūina e Ieova tagata, o le a ia toe faafoʻisia o latou manatunatuga ma uiga ia na iloa ai i latou e tagata. Seʻi manatu i le uiga o lenā mea. E alofa tele Ieova iā te oe, e na te silafia ou manatunatuga uma, faalogona, o au upu ma au gaoioiga. O lea, pe afai e te maliu ma faatūina oe e Ieova e faigofie ona ia faafoʻisia ou manatunatuga, o ou uiga ma le ituaiga tagata e iai oe. Na iloa e le tupu o Tavita e silafia lelei e Ieova i tatou taʻitoʻatasi. (Faitau le Salamo 139:1-4.) O le ā se aafiaga o le iloaina e silafia lelei e Ieova i tatou?

14. O le ā le aafiaga mo i tatou pe a manatunatu loloto i le silafia lelei e Ieova o i tatou?

¹⁴ Pe a manatunatu loloto i le silafia lelei e Ieova o i tatou, e lē tatau la ona tatou popole. Aiseā? Ia manatua e matuā manatu mamafa mai Ieova iā i tatou. E tāua iā Ieova o tatou uiga lea e ese mai ai i tatou i isi. E silafia lelei e Ieova mea e tutupu i o tatou olaga lea e taaʻina ai tatou. Maʻeu se faamāfanafanaloto o lenā manatu! E lē tatau ona iā i tatou lagona o le tuua toʻatasi. O taimi uma i aso taʻitasi, e faatasi pea Ieova ma i tatou ma e na te saʻili avanoa e fesoasoani mai ai.​—2 No. 16:9.

15. E faapefea ona faamaonia i le toetū le atamai o Ieova?

¹⁵ O le fefe i le oti o se auupega mataʻutia. O i latou o loo pulea e Satani e latou te faaaogā  lenei auupega mataʻutia e faamalosia ai tagata ia lē faamaoni i a latou uō pe faia foʻi mea e latou te iloa e sesē. Ae e lē mafai e lenā auupega ona faavaivaia ai i tatou, talu ai ua tatou iloa e faatūina i tatou e Ieova pe a fasiotia i tatou e o tatou fili. (Faaa. 2:10) Ua tatou mautinoa e leai se mea e mafai ona taofia i tatou mai i le auauna atu iā Ieova. (Roma 8:35-39) Maʻeu le mataʻina o le atamai ua faaalia e Ieova, e ala i lona aumaia iā i tatou o le faamoemoe o le toetū! E ala i le toetū, ua ia faalēaogāina ai se tasi o auupega e sili ona mataʻutia a Satani, ma i le taimi e tasi ua ia faaauupegaina i tatou i le lototele e lē maluelue.

16. O ā fesili e manaʻomia ona e fesili ifo ai, ma e faapefea ona fesoasoani iā te oe tali o na fesili e iloa ai po o le ā le tele o lou maufaatuatuaina o Ieova?

¹⁶ Pe a faamataʻu mai fili o Ieova o le a latou fasiotia oe, po o le a e maufaatuatuaina o le a faatūina oe e Ieova? E faapefea ona e iloa? O se tasi o auala o le fesili ifo iā te oe lava, ʻPo o faamaonia atu i filifiliga lāiti ou te faia i aso taʻitasi loʻu maufaatuatuaina o Ieova?’ (Luka 16:10) E tatou te ono fesili foʻi faapea, ʻPo o faamaonia atu i le auala o loo oʻu ola ai ou te maufaatuatuaina le folafolaga a Ieova e na te tausia oʻu manaʻoga faaletino pe a ou saʻili muamua le Malo?’ (Mata. 6:31-33) Pe afai o le ioe lau tali i na fesili, ua e faamaonia atu la e te maufaatuatuaina Ieova ma ua e sauni foʻi e fesagaʻia so o se tofotofoga e tulaʻi mai.​—Faata. 3:5, 6.

17. (a) E faapefea ona faaalia i le toetū le onosaʻi o Ieova? (e) E faapefea ona tatou faaalia le talisapaia o le onosaʻi o Ieova?

¹⁷ Ua uma ona faatulaga e Ieova le aso atofaina e faaumatia ai lenei faiga tuai o mea. (Mata. 24:36) E onosaʻi pea Ieova ma e lē mafai ona ia aumaia le faaumatiaga a o leʻi oo i lenā aso. E naunau Ieova e faatutū ē ua oti ae e onosaʻi pea o ia. (Iopu 14:14, 15) O loo faatalitali pea Ieova i le taimi tatau e faatutū ai i latou i le ola. (Ioa. 5:28) E iai māfuaaga lelei e tatou te talisapaia ai le onosaʻi o Ieova. Ia mafaufau: Talu ai e onosaʻi Ieova, o le toʻatele o tagata e aofia ai ma i tatou, o loo iai le taimi e tatou te faaalia ai le salamō. (2 Pete. 3:9) E finagalo Ieova ia mafai ona maua e le toʻatele o tagata le avanoa e ola ai e faavavau. O lea, ia tatou faaalia atu e tatou te talisapaia lona onosaʻi. E faapefea? E ala i le faia o taumafaiga uma e saʻilia ai i latou “ua saunia o latou loto mo le ola e faavavau” ma fesoasoani iā i  latou ia alolofa iā Ieova ma auauna iā te ia. (Galu. 13:48) O lea, o le a latou maua ai foʻi aogā mai i le onosaʻi o Ieova e pei ona aogā iā i tatou.

18. Aiseā e tatau ai ona tatou onosaʻi i isi?

¹⁸ E faatalitali pea ma le onosaʻi Ieova seʻia tatou lelei atoatoa i le iʻuga o le afe tausaga. A o leʻi oo mai lenā taimi, o loo finagalo malie Ieova e faamagalo a tatou agasala. O lea la, e mautinoa ua iā i tatou māfuaaga lelei e tatou te mātauina ai mea lelei o loo faia e isi ma onosaʻi iā i latou. Seʻi manatu i se faaaʻoaʻoga a se tuafafine na maua lana tane i le matuā lotomafatia ma na lē toe auai ai i sauniga. Na faapea mai le tuafafine: “Na matuā faigatā lenei mea mo aʻu. Na faafuaseʻi ona suia ma fuafuaga mo le lumanaʻi ma na lē mafai ai ona ma faia mea na ma fuafua e fai.” E ui i nei tulaga faigatā ae na faaalia pea e lenei avā alofa le onosaʻi i lana tane. Na faalagolago iā Ieova ma e leʻi faavaivai o ia. Na faaaʻoaʻo le tuafafine iā Ieova e ala i lona lē taulaʻi atu i le faafitauli ae taulaʻi atu i mea lelei e uiga i lana tane. Na ia faapea mai: “E mataʻina uiga lelei o laʻu tane ma o loo fai ana taumafaiga ina ia toe faafoʻisia lona malosi.” Maʻeu le tāua o lo tatou onosaʻi i o tatou aiga po o nisi i le faapotopotoga o loo fesagaʻia luʻi faigatā!

19. O le ā e tatau ona tatou maumauaʻi e fai?

¹⁹ Na olioli Iesu ma le ʻauagelu ina ua foafoaina le lalolagi. Ae seʻi faaāta lo latou fiafia tele pe a vāai ua faatumulia le lalolagi i tagata lelei atoatoa e alolofa iā Ieova ma auauna iā te ia. Seʻi manatu foʻi i le fiafia o i latou o le a ō i le lagi e pule faatasi ma Keriso i le vaai atu ua aogā a latou galuega i tagata. (Faaa. 4:4, 9-11; 5:9, 10) Seʻi manatu foʻi i le taimi o le a suia ai loimata o le faanoanoa i loimata o le fiafia, pe a lē toe iai maʻi, faanoanoaga ma le oti. (Faaa. 21:4) A o leʻi oo mai lenā taimi, seʻi o tatou maumauaʻi e faaaʻoaʻo i le alofa, atamai ma le onosaʻi o lo tatou Tamā. O le faia faapea, o le a tumau ai pea lo tatou olioli e tusa lava po o ā luʻi e tatou te fesagaʻia. (Iako. 1:2-4) Maʻeu lo tatou lotofaafetai mo le folafolaga a Ieova o le a “toetutū mai tagata”!​—Galu. 24:15.