1. E faapefea ona taumafai le toʻatele e fai le mea sili e auauna ai iā Ieova?

 O LOO tele pea mea e tatou te faia a o latalata atu i le iʻuga o lenei faiga o mea. (Mata. 24:14; Luka 10:2; 1 Pete. 5:2) E tatou te mananaʻo uma e auauna atoatoa iā Ieova. E toʻatele ua faalautele atu la latou auaunaga. O nisi e mananaʻo e auauna o ni paeonia. O nisi e fia auauna i le Peteli a o nisi e mananaʻo e auai i faugāfale. E toʻatele foʻi uso o loo aapa atu ina ia agavaa e avea o ni auauna o le faiva ma ni toeaina. (1 Timo. 3:1, 8) Maʻeu le faafiafiaina o Ieova i le agaga faataulaga o loo faaalia e ona tagata!​—Sala. 110:3; Isa. 6:8.

2. O ā o tatou faalogona pe a lē mafai ona ausia nisi o tatou sini faaleagaga?

² E tatou te ono lagona le lotovaivai pe afai ua umi tele se taimi e tatou te leʻi ausia o tatou sini faaleagaga. Atonu e tatou te lagona foʻi le lotovaivai pe a lē mafai ona tatou agavaa mo nisi faaeaga, ona ua tatou matutua po o nisi foʻi māfuaaga. (Faata. 13:12) O le mea lenā na tupu iā Melissa. * Na naunau lava Melissa e auauna i le Peteli pe auai foʻi i le Aʻoga mo Tagata Talaʻi o le Malo. Na ia faapea mai: “Ua ou matua tele ma ua ou lē toe agavaa ai mo na faaeaga. E na o loʻu moomoo lava i ai ae e leai se mea e mafai ma e iai taimi ou te lagona ai le lotovaivai.”

3. O ā mea e manaʻomia ona ausia e nisi ina ia agavaa ai mo nisi faaeaga?

³ O nisi e talavou ma soifua mālōlōina, atonu e manaʻomia ona avea ma tagata taʻumatuaina ma atiaʻe nisi o uiga, ina ia agavaa ai mo nisi faaeaga. Atonu e latou te atamamai, maumauaʻi ma filigā. Ae e ono manaʻomia ona latou atiaʻeina le  onosaʻi, faaaloalo ma fai mea māeʻaeʻa. Pe a uaʻi atu i uiga e manaʻomia ona faaleleia, atonu o le a tatou agavaa ai i se faaeaga i le taimi e tatou te leʻi faatalitalia. Seʻi mātau le mea na tupu iā Nick. Ina ua 20 ona tausaga, na matuā lē fiafia lava ina ua lē tofia o ia o se auauna o le faiva. Na ia faapea mai: “Na ou manatu e iai le mea lea e faalētonu iā te aʻu.” Ae e leʻi faavaivai ai Nick. Na ia faia le mea sili e na te mafaia e faatino ai faaeaga na ia maua. O loo auauna nei Nick o se sui o se Komiti o le Lālā.

4. O le ā o le a talanoaina i lenei suʻesuʻega?

⁴ Po o e lotovaivai ona e te leʻi ausia lava se sini faaleagaga na e tulimataʻia? Afai o lea, ia taʻu atu iā Ieova ou popolega. (Sala. 37:5-7) Ia talosaga atu foʻi i uso taʻumatuaina mo ni fautuaga ina ia faaleleia ai lau auaunaga i le Atua, ma fai le mea sili e te mafaia e faatatau ai na fautuaga. O le faia faapea e te ono ausia ai lenā faaeaga po o lenā sini. Atonu e tatou te faanaunau foʻi i se faaeaga e lē mafai ona tatou ausia i le taimi lenei e pei o Melissa lea na taʻua muamua. O lea la, e faapefea ona faatumauina pea lou olioli? Ina ia tali lenā fesili, o le a talanoaina i lenei suʻesuʻega (1) E faapefea ona tatou maua le olioli? (2) E faapefea ona faateleina lo tatou olioli? ma le (3) O ā sini e tatou te faatutūina ina ia matuā faateleina ai lo tatou olioli?

5. Ina ia tatou maua le olioli, o ā mea e tatau ona tatou uaʻi atu i ai? (Failauga 6:9)

⁵ E tusa ai ma le Failauga 6:9 (Faitau.), e faapefea ona tatou maua le olioli? O se tasi e olioli i mea e ʻvaai i ai ona mata,’ e na te talisapaia mea ua ia maua po o lona tulaga i le taimi lenei. Ae o se tasi e manaʻonaʻo i mea e na te lē o maua, e lē mafai ona faamalieina. O lea, o le ā le lesona mo i tatou? E tatau ona tatou uaʻi atu i mea ua tatou maua ma mea e mafai ona tatou faia, ina ia tatou maua ai le olioli.

6. O le ā le talafaatusa o le a tatou talanoaina, ma o le ā o le a tatou uaʻi atu i ai?

⁶ Pe e mafai moni lava ona faamalieina i tatou i mea ua tatou maua? O le mea moni, a o faagasolo taimi o o tatou faanaunauga masani o le saʻili o nisi mea fou. Peitaʻi, e mafai moni lava ona faamalieina i tatou ma maua le olioli i mea ua tatou maua, nai lo o le tau ina ʻvaai i ai o mata.’ E faapefea ona tatou faia lenā mea? Seʻi o tatou iloiloina le talafaatusa a Iesu e faatatau i taleni o loo i le Mataio 25:14-30. O le a tatou uaʻi atu i lesona e mafai ona tatou aʻoaʻoina mai i lenā talafaatusa i auala e maua ma faateleina ai lo tatou olioli i faamanuiaga ua iā i tatou i le taimi nei.

7. Ia faamatala puupuu le talafaatusa a Iesu e faatatau i taleni.

⁷ O loo taʻua i le talafaatusa se tamāloa o loo sauni e alu malaga. A o leʻi malaga, na ia avatu i ana pologa taleni e fai ai a latou pisinisi. * Na iloa e le tamāloa e eseese agavaa o ana pologa. O lea, na ia avatu ai i le pologa muamua taleni e lima, ae avatu i le pologa lona lua taleni e lua ma le taleni e tasi na ia tuuina atu i le pologa lona tolu. Na galulue mamafa le pologa muamua ma le pologa lona lua i le faaaogāina o a la taleni. Ae o le pologa lona tolu, e na te leʻi faaaogāina le taleni na tuu atu iā te ia. O lea, na tuliese ai o ia e lona matai.

8. Aiseā na ono olioli ai le pologa muamua o le talafaatusa a Iesu?

⁸ Atonu na matuā talisapaia e le pologa muamua le maufaatuatuaina o ia e lona matai  i le tuuina atu iā te ia o taleni e lima. E matuā telē le tupe na tuuina atu i lenā pologa, e iloa ai le matuā maufaatuatuaina o ia e lona matai. Ae faapefea le pologa lona lua? Na ono lotovaivai lenā pologa ona e tele atu taleni na maua e le pologa muamua nai lo o ia. Ae o le ā na ia faia?

9. O le ā e leʻi faapea mai Iesu na faia e le pologa lona lua? (Mataio 25:22, 23)

⁹ Faitau le Mataio 25:22, 23. E leʻi faapea mai Iesu na ita ma lē fiafia le pologa lona lua, ona e na o le lua taleni na tuuina atu iā te ia. E leʻi faapea mai foʻi Iesu na faitio le pologa ma faapea ifo: ʻE na o le pau ia o taleni ua aumai iā te aʻu? E tutusa lelei ma agavaa ma le pologa na tuu i ai taleni e lima. Afai e lē talisapaia aʻu e loʻu matai, o le a ou tanuina taleni nei ae fai le mea ou te loto i ai.’

10. O le ā na faia e le pologa lona lua i taleni na tuu atu iā te ia?

¹⁰ Na galue mamafa le pologa lona lua e auauna i lona matai, ma na ia faataunuuina foʻi le galuega na tuuina atu iā te ia e pei o le pologa muamua. O le iʻuga, na ia maua isi taleni faaopoopo e lua mo lona matai. Na matuā tauia lenā pologa e lona matai, ona o lona toʻaga ma le faaaogāina lelei o ona tomai. Na faafiafiaina le matai i galuega a lenā pologa, ma na ia maufaatuatuaina o ia ma tuu atu i ai isi galuega e tele.

11. E faapefea ona faateleina lo tatou olioli?

¹¹ E faateleina foʻi lo tatou olioli, pe a tatou galulue mamafa i so o se galuega ua tuuina mai iā i tatou i le auaunaga iā Ieova. Ia “matuā tinoū” i le talaʻiga ma ia auai atoatoa i mea fai a le faapotopotoga. (Galu. 18:5; Epe. 10: 24, 25) Ia auai i sauniga ma sauniuni e fai ni sao faalaeiau i mataupu o loo suʻesuʻeina. Aua le manatu māmā pe a maua se tofiga e faia ai sau vaega i le aʻoga ae ia sauniuni lelei. Pe a talosagaina oe e faia se galuega i le faapotopotoga, ia maufaatuatuaina oe ma aua e te fai mea tuu. Ia aua lava le manatu māmā i so o se tofiga e tuuina atu iā te oe ae ia taumafai malosi e faaleleia ou tomai. (Faata. 22:29) O le tele lava e te galue mamafa ai i galuega faaleagaga ma tofiga ua tuuina atu iā te oe, o le vave foʻi lenā ona e agaʻigaʻi i luma ma faateleina ai lou olioli. (Kala. 6:4) O le a faigofie ai foʻi iā te oe ona e olioli faatasi ma i latou ua mauaina se faaeaga na e moomoo i ai.​—Roma 12:15; Kala. 5:26.

12. O ā mea na faia e Melissa ma Nick ina ia faateleina ai lo la olioli?

¹² Pe e te manatua le tuafafine o Melissa lea na moomoo e auauna i le Peteli po o le auai i le Aʻoga mo Tagata Talaʻi o le Malo? E ui e leʻi mafai ona faataunuuina na moomooga ae na ia faapea mai: “Ou te taumafai e fai le mea sili i laʻu auaunaga o se paeonia ma auai i vala uma o lenei auaunaga, ma ua ou matuā olioli ai.” Na faapefea ona fesagaʻia e Nick le lē fiafia ina ua lē tofia o ia o se auauna o le faiva? Na faapea mai o ia: “Na ou uaʻi atu i faaeaga na ou maua, e pei o le auai i le galuega talaʻi, ma faia ni sao faalaeiau i sauniga. Na faatumu foʻi saʻu pepa talosaga mo le auaunaga i le Peteli, ma na talia laʻu talosaga i le tausaga na sosoo ai.”

13. O ā aogā e te maua pe a e galue mamafa i faaeaga ua mafai ona e maua i le taimi lenei? (Failauga 2:24)

¹³ Po o le a tuuina atu iā te oe nisi faaeaga, pe a e galue mamafa e faatino faaeaga ua e maua i le taimi lenei? E mafai ona tupu lenā mea e pei ona tupu iā Nick. Ae afai e leai, e mafai lava ona faateleina lou olioli ma le faamalieina e pei o Melissa, pe a e faia le mea sili e auauna ai iā Ieova. (Faitau le Failauga 2:24.) E lē gata i lenā, e mautinoa o le a faateleina lou olioli i le iloaina ua faafiafiaina lo tatou matai o Iesu Keriso i au taumafaiga.

14. O le ā e tatau ona tatou manatua e faatatau i o tatou sini faaleagaga?

¹⁴ Po o le uaʻi atu i faaeaga ua tatou maua i le taimi lenei, o le a taofia ai i tatou mai i le saʻili o nisi vala e faalautele ai la tatou auaunaga iā Ieova? E leai. E mafai ma e tatau ona faatutū ni sini faaleagaga, ina ia fesoasoani iā i tatou e avea o ni tagata talaʻi ma ni faiaʻoga agavaa. Ia lotofesoasoani foʻi i o tatou uso ma tuafāfine. E tatou te ausia na sini pe a tatou atamamai ma faaalia le faamaulalo, e ala i le uaʻi atu e fesoasoani i isi nai lo i tatou lava.​—Faata. 11:2; Galu. 20:35.

15. O ā nisi sini e fesoasoani iā te oe e faateleina ai lou olioli?

¹⁵ O ā sini e mafai ona e faatutūina? Ia talosaga iā Ieova e fesoasoani iā te oe, ina ia e iloa sini e mafai moni lava ona e ausia. (Faata. 16:3; Iako. 1:5) Pe e mafai ona e ausia se sini o loo taʻua i le  palakalafa muamua o lenei suʻesuʻega, e pei o le paeonia lagolago po o le paeonia sauatoa, auaunaga i le Peteli po o le auai foʻi i faugāfale? E mafai foʻi ona e aʻoaʻoina se gagana fou ina ia faalautele atu ai le talaʻia o le tala lelei, pe talaʻi foʻi i se oganuu e ese le gagana e tautatala ai tagata. E mafai ona e aʻoaʻoina atili e faatatau i na sini, pe a faitau i le mataupu e 10 o le tusi Ua Faamaopoopo Ina ia Faia le Finagalo o Ieova, ma talanoa i toeaina o le tou faapotopotoga. * A o e galue  mamafa e ausia na sini, o le a iloa ai e isi lou agaʻigaʻi i luma ma o le a matuā faateleina ai foʻi lou olioli.

16. O le ā e mafai ona e faia pe afai e lē o mafai ona e ausia i le taimi lenei se sini na e faatūina?

¹⁶ Ae e faapefea pe afai e lē o mafai ona e ausia i le taimi lenei sini o loo taʻua i luga? Ia faatū se isi sini e mafai ona e ausia. Seʻi o tatou iloiloina mea nei.

17. I le 1 Timoteo 4:13, 15, o le ā e faia e se uso ina ia avea ai ma faiaʻoga tomai?

¹⁷ Faitau le 1 Timoteo 4:13, 15. Pe afai o oe o se uso ua uma ona papatiso, atonu e mafai ona e galue i le faaleleia o ou tomai i le tautala ma le aʻoaʻo atu. Aiseā? Pe a e “naunau” e faaleleia lau faitau, tautala ma le aʻoaʻo atu, o le a maua ai e lau ʻaufaalogologo aogā. Ia taumafai e suʻesuʻe ma faatatau tomai taʻitasi o loo taʻua i le polosiua Ia Faaleleia Atili Lau Faitau ma le Aʻoaʻo Atu. Ia suʻesuʻe se uiga se tasi o le tautala, toʻaga e faataʻitaʻi i le fale ma ia taumafai e faatatau lenā uiga i au lauga. Ia saʻili ni fautuaga mai i le faiaʻoga lagolago po o isi toeaina o loo “galulue mamafa i le upu ma le aʻoaʻo atu.” * (1 Timo. 5:17) Ia e taumafai e malamalama i le auala e atiaʻe ai lenā uiga o le tautala, ma ia faamalosia le faatuatua o lau ʻaufaalogologo pe faalaeiau foʻi i latou e faatatau mea ua latou aʻoaʻoina. O le faia faapea, o le a matuā faateleina ai lou olioli faapea foʻi lo latou olioli.

18. O le ā e mafai ona tatou faia ina ia ausia ai o tatou sini i le galuega talaʻi?

¹⁸ Ua tuuina mai iā i tatou uma lava le tofiga o le talaʻi ma le faia o isi ma soo. (Mata. 28:19, 20; Roma 10:14) Pe e te manaʻo e faaleleia ou tomai i lenei galuega e sili ona tāua? Ia  suʻesuʻe ma faatatau fautuaga o loo i le polosiua o le Aʻoaʻo Atu, ma ia faatutū ni sini maʻoti. E mafai ona e maua isi fautuaga aogā mai i La Tatou Faiva ma le Olaga Faa-Kerisiano​—Polokalame mo le Sauniga po o vitiō o taulimaga faataʻitaʻi i sauniga amata o le vaiaso. Ia faataʻitaʻi ni fautuaga eseese ina ia e iloa ai le auala e sili ona lelei mo oe ina ia faaleleia ai ou tomai i le talaʻiga. O lo tatou faatatauina o nei fautuaga, e mautinoa o le a matuā faateleina ai lo tatou olioli ona ua faaleleia o tatou tomai o ni faiaʻoga Kerisiano.​—2 Timo. 4:5.

19. E faapefea ona e atiaʻeina uiga faa-Kerisiano?

¹⁹ A o tatou iloiloina sini e mafai ona tatou ausia, aua neʻi galo le sini e sili ona tāua, o le atiaʻeina o uiga faa-Kerisiano. (Kala. 5:22, 23; Kolo. 3:12; 2 Pete. 1:5-8) O le ā e mafai ona e faia ina ia ausia ai na sini? Seʻi faapea e te manaʻo e atiaʻe se faatuatua malosi. E mafai ona e faitau i ni fautuaga aogā mai i a tatou lomiga, i auala e faamalosia ai lou faatuatua. E mautinoa e aogā foʻi iā te oe le matamata i ni vaega o le TV i le Initaneti a Molimau a Ieova, o loo faailoa mai ai auala na faaalia ai e uso ma tuafāfine le faatuatua malosi, a o feagai ma tulaga faigatā. Pe a uma, ona iloilo lea pe e faapefea ona e faaaʻoaʻo i lo latou faatuatua.

20. E faapefea ona matuā faateleina lo tatou olioli, ma tuuitiitia ai o tatou faalogona lē fiafia?

²⁰ E mautinoa e tatou te mananaʻo uma lava e fai le mea sili mo Ieova, nai lo o mea ua mafai ona tatou faia i le taimi lenei. O le a mafai ona tatou auauna atoatoa i le Atua i le lalolagi fou. Peitaʻi i le taimi lenei, o lo tatou faia o le mea sili e auauna ai iā Ieova i faaeaga ua tatou maua, o le a matuā faateleina ai lo tatou olioli ma tuuitiitia ai ni faalogona lē fiafia. Ae o le mea e sili ona tāua, o le a tatou viiviia ma faamamaluina ai Ieova, lo tatou “Atua fiafia.” (1 Timo. 1:11) O lea la, seʻi o tatou olioli i faaeaga ua tatou maua.