1-2. (a) O le ā le silafaga a Ieova i agasala e faia ma le loto i ai? (e) O le ā le finagalo o Ieova mo tagata faimea sesē?

 E LĒ o amioga uma e talia e Ieova, ma e ʻinoʻino o ia i le agasala. (Sala. 5:​4-6) E na te faatalitalia i tatou e usiusitaʻi i ana tapulaa amiotonu, lea o loo i lana Afioga. O le mea moni, e lē faatalitalia e Ieova se tulaga lelei atoatoa mai i tagata e lē lelei atoatoa. (Sala. 130:​3, 4) Ae i le taimi e tasi, e na te lē talia ʻtagata faalēmataʻu, ua liua lona agalelei faifua, e fai ma faamolemolega e faia ai amioga faauamaaa.’ (Iuta 4) O lea, o loo taʻua i le Tusi Paia le “faaumatiaga o tagata faalēmataʻu” i le taua a le Atua iā Amaketo.—2 Pete. 3:7; Faaa. 16:16.

² Peitaʻi, e lē finagalo Ieova e faaumatia so o se tasi. E pei ona talanoaina i mataupu ua mavae, o loo faailoa manino mai i le Tusi Paia, e ʻfinagalo Ieova ia oo uma lava i le salamō.’ (2 Pete. 3:9) E faaaʻoaʻo toeaina iā Ieova, a o latou onosaʻi e fesoasoani i tagata faimea sesē ina ia suia o latou ala, ma toe maua le finagalo malie o Ieova. E ui i lea, e lē o tagata faimea sesē uma e tali lelei mai. (Isa. 6:9) E faia pea e nisi le agasala e ui i taumafaiga faifai pea a toeaina, ina ia taʻitaʻiina i latou i le salamō. O le ā la e faia e toeaina pe a tulaʻi mai tulaga faapena?

ʻIA AVEESEA LENĀ TAGATA AMIOLEAGA’

3. (a) O le ā le manatu o le Tusi Paia i le mea e fai i le tagata faimea sesē e lē salamō? (e) Aiseā e faapea atu ai o le tagata faimea sesē lava ia, na filifili e aveesea o ia mai i le faapotopotoga?

³ Pe afai e lē salamō le tagata faimea sesē, e ao la i toeaina ona mulimuli i le taʻiala o loo i le 1 Korinito 5:13: “Ia [aveesea]  lenā tagata amioleaga mai iā te outou.” O lea, e tai pei ua filifili e le tagata faimea sesē lava ia lenā faaiʻuga, ma ua ia selesele le mea na ia lūlūina. (Kala. 6:7) Aiseā ua tatou faapea atu ai? Talu ai ua ia teena taumafaiga faifai pea a toeaina e taʻitaʻia o ia i le salamō. (2 Tu. 17:​12-15) E iloa mai i ana gaoioiga, ua ia filifili e teena tapulaa a Ieova.—Teu. 30:​19, 20.

4. Aiseā e faasilasila ai i le faapotopotoga le aveesea o se tagata faimea sesē e lē salamō?

⁴ Pe a aveesea le tagata faimea sesē e lē salamō, o le a faia se faasilasilaga e faailoa atu ai i le faapotopotoga ua lē toe avea o ia ma Molimau a Ieova. E lē o le fuafuaga o lenā faasilasilaga, ina ia faalumaina ai le tagata faimea sesē. Nai lo o lea, ina ia usitaʻia ai e le faapotopotoga le taʻiala faale-Tusi Paia, e “aua le toe faifaimea faatasi” ma lenā tagata, ma “aua foʻi neʻi aai faatasi” ma ia. (1 Kori. 5:​9-11) E iai se māfuaaga lelei na saunia ai e Ieova lenā taʻiala, auā na tusi le aposetolo o Paulo, “o se fefete itiiti e faafefeteina ai le paluga atoa.” (1 Kori. 5:6) O tagata faimea sesē e lē salamō, e mafai ona taaʻina i latou o loo taumafai e ola e ōgatusa ma tapulaa amiotonu a Ieova.—Faata. 13:20; 1 Kori. 15:33.

5. O le ā le auala e tatau ona tatou vaai ai i se tasi ua aveesea mai i le faapotopotoga, ma aiseā?

⁵ O le ā la le auala e tatau ona tatou vaai ai i se uso po o se tuafafine ua aveesea mai i le faapotopotoga? E ui e tatou te lē toe faifaimea faatasi ma ia, ae e tatau ona tatou vaai pea iā te ia e pei o se mamoe ua leiloa, ae e lē pei o se tasi ua leai se faamoemoe. I le pei o se mamoe ua sē, e iai le avanoa e mafai ona ia toe foʻi mai ai i le lafu. Ia manatua, ua uma ona tuuina atu lenā tagata iā Ieova. Ae e faanoanoa, ona e lē o ola o ia e tusa ai ma lona tuuina atu, ma e na te ono melea ai lona faamoemoe e ola ai e faavavau. (Eseki. 18:31) E ui i lea, e iai le faamoemoe e mafai ona toe foʻi mai lenā tagata, ona o le alofa mutimutivale o Ieova. E faapefea la ona fesoasoani toeaina i le tagata faimea sesē ua aveesea mai i le faapotopotoga?

AUALA E FESOASOANI AI TOEAINA I Ē UA AVEESEA

6. O ā laasaga e faia e toeaina e fesoasoani ai iā i latou ua aveesea mai i le faapotopotoga?

⁶ Po o lona uiga o le a lē toe fesoasoani toeaina i sē ua aveesea mai i le faapotopotoga, ina ia toe foʻi mai iā Ieova? E leai! Pe a faailoa atu i le tagata faimea sesē o le a aveesea o ia, e faamatala atu e le komiti iā te ia laasaga e mafai ona ia faia ina ia toe foʻi mai ai. Ae e iai foʻi isi mea o le a faia e toeaina. I le tele o taimi, e latou te faailoa atu i le tagata faimea sesē, e mafai ona latou toe feiloaʻi i ni nai masina mulimuli ane, ina ia iloa ai po o iai ni suiga ua ia faia. Pe a mavae ni nai masina ae lotomalie le tagata e toe feiloaʻi ma toeaina, e mafai la ona latou faaaogā lenā avanoa e faalaeiau ai ma le alofa o ia, ina ia salamō ma toe foʻi mai. E tusa pe e na te lē faaalia le salamō i lenā taimi, ae e faatulaga e toeaina se isi taimi e latou te toe feiloaʻi ai.

7. E faapefea ona faaatagia atu e toeaina le tigā alofa o Ieova, a o feutagaʻi ma se tasi ua aveesea? (Ieremia 3:12)

⁷ E taumafai toeaina e faaatagia atu le tigā alofa o Ieova, a o latou feutagaʻi ma se tasi ua aveesea mai i le faapotopotoga. O se faaaʻoaʻoga, e leʻi faatalitali Ieova seʻiloga e salamō muamua lona nuu faalogogatatā o Isaraelu anamua. Nai lo o lea, na ia tausolomua e saunia le fesoasoani mo i latou, e ui e  latou te leʻi faaalia le salamō. E pei ona taʻua i le mataupu lona lua o lenei faasologa o mataupu, na faataʻitaʻi mai e Ieova lona tigā alofa, ina ua fai atu i le perofeta o Hosea e alu e toe faalelei ma lana avā o loo faia pea le agasala. (Ho. 3:1; Mala. 3:7) E faaaʻoaʻo foʻi toeaina iā Ieova, e ala i le faaalia o le naunau moni i le tagata faimea sesē ina ia toe foʻi mai, ma e latou te lē faafaigatā le tulaga o mea mo ia pe a toe fia foʻi mai.—Faitau le Ieremia 3:12.

8. E faapefea i le talafaatusa i le atalii faamaumauʻoa, ona tatou malamalama atili ai i le tigā alofa ma le alofa mutimutivale o Ieova? (Luka 15:7)

⁸ Ia manatua foʻi le talafaatusa a Iesu i le atalii faamaumauʻoa, lea na talanoaina i le mataupu lona lua o lenei faasologa o mataupu. O le taimi lava na vaai atu ai le tamā ua toe foʻi mai lona atalii, na “tamoʻe atu ma fusi o ia, ma sogi lemū atu iā te ia.” (Luka 15:20) Ia mātau, e leʻi faatali le tamā seʻiloga e augani mai le atalii e faamagalo o ia. Nai lo o lea, na ia tausolomua e faamagalo atu, e pei ona faia e so o se tamā alofa. E faapena foʻi le uiga e manaʻomia ona faaalia e toeaina iā i latou ua sē ese. E latou te mananaʻo i nei mamoe ua sē ese ina ia toe foʻi mai. (Luka 15:​22-24, 32) E olioli Ieova, Iesu, le ʻauagelu ma le faapotopotoga atoa, pe a toe foʻi mai se tagata faimea sesē!—Faitau le Luka 15:7.

9. O le ā ua faalaeiauina e Ieova tagata faimea sesē e fai?

⁹ E tusa ai ma manatu na tatou talanoaina, ua tatou iloa ai e lē tuufau e Ieova tagata faimea sesē e lē salamō, e faia pea le agasala. Ae i le taimi e tasi, e lē faapea ai e na te tuulafoaʻia i latou, auā e finagalo o ia ina ia latou toe foʻi mai. I le Hosea 14:​4, o loo faamatala ai faalogona o Ieova e faatatau i tagata faimea sesē ua salamō: “Ou te faamālōlōina lo latou lē faamaoni. O loʻu lotomalie ou te alofa ai iā i latou, auā ua liliuese loʻu ita.” O le malamalama o toeaina i faalogona o Ieova, e uunaʻia ai i latou e mataalia i so o se faailoga e iloa ai ua salamō le tagata. O le iloaina foʻi o lenei mea, e uunaʻia ai i latou ua tuua Ieova e toe vave foʻi mai.

10-11. E faapefea ona fesoasoani toeaina iā i latou ua leva ona aveesea mai i le faapotopotoga?

¹⁰ Ae faapefea i latou atonu ua tele tausaga talu ona aveesea mai i le faapotopotoga? Atonu e latou te lē o toe faia agasala ia na māfua ai ona aveesea i latou, pe atonu foʻi o nisi e lē o toe manatua le māfuaaga na aveesea ai. E tusa po o le ā le umi na aveese ai se tasi, ae e taumafai toeaina e saʻili i latou ma asiasi i ai. I na asiasiga, e mafai e toeaina ona fai se latou tatalo faatasi ma le tagata faimea sesē, ma faalaeiau o ia ina ia toe foʻi mai i le faapotopotoga. Pe afai ua tele tausaga talu ona aveesea o ia, e mautinoa lava la ua matuā vaivai faaleagaga. O lea, pe a faailoa mai e le tagata ua toe fia foʻi mai i le faapotopotoga, e ono faatulaga la e toeaina se tasi e faia sana suʻesuʻega faale-Tusi Paia, e ui lava e leʻi toe faaaʻe mai. Po o le ā lava le tulaga, ae o toeaina e faatulagaina se tasi e faia le suʻesuʻega a lenā tagata.

¹¹ E faaaʻoaʻo toeaina i le tigā alofa o Ieova, e ala i le saʻilia ma fesoasoani i le toʻatele e mafai ai, ina ia iloa e mafai ona latou toe foʻi mai. Pe a faaalia e le tagata faimea sesē le salamō ma lafoaʻi ona ala leaga, e mafai loa ona toe faaaʻe mai o ia.—2 Kori. 2:​6-8.

12. (a) O ā tulaga e matuā manaʻomia ona faaeteete ai toeaina? (e) Aiseā e lē tatau ai ona tatou manatu, e lē mafai ona maua e se tagata na faia se agasala patino le faamagaloga a Ieova? (Tagaʻi foʻi i le faamatalaga pito i lalo.)

 ¹² Peitaʻi, e iai tulaga patino e manaʻomia ona faaeteete ai toeaina a o leʻi faaaʻe mai se tasi. O se faataʻitaʻiga, pe afai na aveesea mai i le faapotopotoga se tasi ona o le faaleagaina o tamaiti, fulitua i le upu moni, pe faufau foʻi e faamuta se faaipoipoga, e tatau la i toeaina ona faamautinoa ua salamō moni lenā tagata. (Mala. 2:14; 2 Timo. 3:6) E tatau ona latou puipuia le faapotopotoga. I le taimi e tasi, e ao ona tatou iloa e talia e Ieova so o se tagata faimea sesē ua faaalia le salamō moni, ma e lē o toe faia  amioga leaga. E ui lava e ao ona matuā faaeteete toeaina i ē na feutagaʻi ma isi i se auala taufaaʻoleʻole e pei ona taʻua i luga, ae e lē tatau ai ona latou manatu e lē mafai e i latou na, ona maua le faamagaloga a Ieova. a—1 Pete. 2:10.

MEA E MAFAI ONA FAIA E LE FAAPOTOPOTOGA

13. O le ā le eseesega o le auala e tatou te feutagaʻi ai ma se tasi ua aʻoaʻia, ma se tasi ua aveesea mai i le faapotopotoga?

¹³ E pei ona talanoaina i le mataupu ua mavae, o nisi taimi e faia ai se faasilasilaga ua aʻoaʻia se tasi. I na tulaga, e mafai lava ona tatou faifaimea faatasi ma ia ona e tatou te iloa ua salamō ma lafoaʻia ona ala sesē. (1 Timo. 5:20) O loo avea pea o ia ma vaega o le faapotopotoga, ma e na te manaʻomia faalaeiauga e ala i le faifaimea faatasi ma le ʻauuso. (Epe. 10:​24, 25) Peitaʻi, e ese mai ai la le tulaga o le tagata ua aveesea mai i le faapotopotoga. E tatou te lē toe “faifaimea faatasi” pe “aai faatasi ma se tagata faapena.”—1 Kori. 5:11.

14. E faapefea ona faaaogā e se Kerisiano lona lotofuatiaifo ua aʻoaʻoina i le Tusi Paia, pe a feutagaʻi ma se tagata ua aveesea mai i le faapotopotoga? (Tagaʻi foʻi i le ata.)

¹⁴ Po o le uiga o manatu na tatou talanoaina, o le a tatou matuā ʻalofia le tagata ua aveesea mai i le faapotopotoga? E leai. O le mea mautinoa, e tatou te lē faifaimea faatasi ma lenā tagata. Peitaʻi, e filifili se Kerisiano e fua i lona lotofuatiaifo ua aʻoaʻoina i le Tusi Paia, pe e na te valaauliaina se tasi ua aveesea, atonu o sona tauaiga po o sana uō vavalalata, ina ia auai mai i se sauniga. Ae ā pe afai e auai mai? I le taimi ua teʻa, e leʻi mafai ona tatou faafeiloaʻia i latou. Peitaʻi, e pei ona taʻua muamua, e tatau i Kerisiano taʻitoʻatasi ona faaaogā lona lotofuatiaifo ua aʻoaʻoina i le Tusi Paia, e tusa ai o lenei mataupu. E ono filifili nisi e faafeiloaʻi  pe fai atu sina faatalofa i se tagata ua aveesea, pe a auai i le sauniga. Ae e lē tatau ona talatalanoa umi pe faifaimea faatasi ma lenā tagata.

15. O ā ituaiga o tagata faimea sesē o loo faamatalaina i le 2 Ioane 9-11? (Tagaʻi foʻi i le pusa “ Pe e Tutusa le Ituaiga o Agasala na Talanoaina e Ioane ma Paulo?”)

¹⁵ Ae atonu e taumānatu nisi, ʻAe faapefea la o lea e fai mai le Tusi Paia, o se Kerisiano e faatalofa atu i se tagata faapena, ua aufaatasi atu o ia i ana galuega leaga?’ (Faitau le 2 Ioane 9-11.) I le siʻomaga o lenā mau, e tatou te iloa ai o loo faasino atu i ē ua fulitua mai i le upu moni, ma i latou o loo faaauau ona faaauilumaina amioga leaga. (Faaa. 2:20) O lea, pe afai o loo faaauau ona faaauiluma e se tasi ni aʻoaʻoga sesē a i latou ua fulitua i le upu moni po o amioga leaga, e lē asiasi atu la toeaina iā i latou na. Peitaʻi, e tatou te faamoemoe pea o le a faaalia e lenā tagata le salamō. Ae afai e leai, e lē tatau la ona tatou faafeiloaʻi pe valaaulia o ia i sauniga a le faapotopotoga.

FAAAʻOAʻO I LE TIGĀ ALOFA MA LE ALOFA MUTIMUTIVALE O IEOVA

16-17. (a) O le ā le finagalo o Ieova mo tagata faimea sesē? (Esekielu 18:32) (e) E faapefea ona galulue faatasi toeaina ma Ieova?

¹⁶ O le ā ua tatou aʻoaʻoina mai i lenei faasologa o mataupu e lima? E lē finagalo Ieova ia faaumatia se tasi! (Faitau le Esekielu 18:32.) E finagalo o ia ina ia toe maua e se tagata faimea sesē le leleiga ma ia. (2 Kori. 5:20) O le māfuaaga lea a o faagasolo taimi, na augani atu pea lava pea Ieova i lona nuu ma tagata taʻitoʻatasi e faalogogatatā, ina ia salamō ma toe foʻi mai iā te ia. O se faaeaga i toeaina o le faapotopotoga le galulue faatasi ma Ieova, ina ia taʻitaʻiina tagata faimea sesē i le salamō.—Roma 2:4; 1 Kori. 3:9.

¹⁷ Maʻeu le olioli o le lagi pe a salamō se tagata faimea sesē! E matuā olioli lo tatou Tamā o Ieova, i taimi uma lava e toe foʻi mai ai i le faapotopotoga se tasi o ana mamoe ua leiloa. E faalolotoina pea lo tatou alofa mo Ieova, pe a tatou manatunatu i lona tigā alofa, alofa mutimutivale ma lona agalelei faifua.—Luka 1:78.