1. O le ā le finagalo o Ieova mo tagata uma?

 NA FOAFOAINA e Ieova tagata ma le saʻolotoga e filifili ai. E tatou te faaaogā lenā meaalofa i aso taʻitasi pe a faia ni filifiliga. O le filifiliga sili e faia e se tasi, o le tuuina atu lea o lona ola mo Ieova, ma avea ma vaega o Lona ʻauaiga o tagata tapuaʻi. E naunau Ieova i tagata uma ia latou faia faapea. Aiseā? Talu ai e alofa o ia i tagata, ma e finagalo i le mea e sili ona lelei mo i latou. O lona finagalo foʻi ia maua e i latou se faauōga ma ia, ma ola e faavavau.—Teu. 30:​19, 20; Kala. 6:​7, 8.

 2. O ā faalogona o Ieova i se tagata faimea sesē e lē salamō? (1 Ioane 2:1)

² E lē faamalosia e Ieova se tasi e auauna atu iā te ia. E na te tuu atu i tagata taʻitoʻatasi e fai lana ia lava filifiliga. Ae e faapefea pe afai e solia e se tasi ua uma ona papatiso se tulafono a le Atua, ma faia se agasala matuiā? Afai e na te lē faaalia le salamō, e tatau ona aveesea o ia mai i le faapotopotoga. a (1 Kori. 5:13) E ui i lea, e matuā naunau Ieova i le tagata faimea sesē ia toe foʻi mai iā te ia. O le mea moni, o se tasi lenā o māfuaaga tāua na ia saunia ai le togiola, ina ia faamagaloina ai agasala a tagata faimea sesē ua salamō  moni. (Faitau le 1 Ioane 2:1.) O Ieova o le Atua alofa, ma ua ia augani atu i tagata na faia agasala matuiā ina ia faaalia le salamō.—Saka. 1:3; Roma 2:4; Iako. 4:8.

 3. O le ā o le a tatou talanoaina i lenei mataupu?

³ E finagalo Ieova ia tutusa o tatou manatu ma lana silafaga i agasala, ma tagata e faia agasala matuiā. O le a tatou talanoaina i lenei mataupu auala e tatou te faaaʻoaʻo ai iā Ieova. A o tatou suʻesuʻeina lenei mataupu, ia mātau (1) le auala na taulimaina ai se agasala matuiā i le faapotopotoga i Korinito i le uluaʻi senituri, (2) le taʻiala na avatu e le aposetolo o Paulo, ina ua salamō le tagata na faia le agasala, ma le (3) o lesona mai i lenei tala e faatatau i le silafaga a Ieova i Kerisiano ua faia se agasala matuiā.

LE AUALA NA TAULIMA AI SE AGASALA MATUIĀ I LE ULUAʻI SENITURI

 4. O le ā le tulaga na tulaʻi mai i le faapotopotoga i Korinito i le uluaʻi senituri? (1 Korinito 5:​1, 2)

⁴ Faitau le 1 Korinito 5:​1, 2. I le malaga faamisionare lona tolu a Paulo, na ia faalogo ai i se tala lē lelei e faatatau i le faapotopotoga fou i Korinito. Na faia e se uso i lenā faapotopotoga amioga lē mamā taufeusuaʻiga ma le avā a lona tamā. O nei ituaiga o amioga e matuā matagā ma “e lē o faia e nuu ese.” Peitaʻi, na manatu māmā le faapotopotoga i le gaoioiga na faia e le uso ma faapea e leai se afāina. Atonu na manatu nisi o le auala lea o loo latou faaaʻoaʻo ai i le alofa mutimutivale, ma le finagalo malamalama o Ieova i tagata lē lelei atoatoa. Peitaʻi, e taʻusalaina e Ieova ona tagata tapuaʻi e faia agasala matuiā. O amioga faauamaaa a lenā tagata, na faaleagaina ai le talaaga lelei o le faapotopotoga. Na ono mafai foʻi ona taaʻina ai isi Kerisiano na latou faifaimea faatasi. O lea, o le ā na faatonuina e Paulo le faapotopotoga e fai?

 5. O le ā le faatonuga a Paulo i le faapotopotoga, ma o le ā na uiga i ai? (1 Korinito 5:13) (Tagaʻi foʻi i le ata.)

⁵ Faitau le 1 Korinito 5:13. Na faagaeeina Paulo e tusi atu i le faapotopotoga, e tatau ona aveesea lenā tagata agasala e leʻi salamō. O le ā le auala na tatau ona feutagaʻi ai Kerisiano faamaoni ma ia? Na tusi atu Paulo ina ia “aua neʻi [latou] toe faifaimea faatasi” ma ia. O le ā le uiga o lenā manatu? Na faamatala atu e Paulo, o lenei poloaʻiga e aofia ai le “aua neʻi aai faatasi ma se tagata faapena.” (1 Kori. 5:11) O le aai faatasi ma se tasi, e faigofie lava ona iʻu atu ai i le faifaimea faatasi ma lenā tagata. E manino mai la, o le uiga o le fautuaga a Paulo i  le faapotopotoga, ia aua neʻi faifaimea faatasi ma lenā tagata. O le faia faapea o le a puipuia ai le faapotopotoga mai i ana taaʻiga leaga. (1 Kori. 5:​5-7) E lē gata i lea, o le ʻalofia o le faifaimea ma lenā tagata, e ono fesoasoani ai iā te ia e iloa le tele ua ia faatigā ai iā Ieova, ma atonu o le a ia lagona ai le māsiasi ma uunaʻia ai o ia e faaalia le salamō.

 6. O le ā se aafiaga lelei o le tusi a Paulo, i le faapotopotoga ma le tagata faimea sesē?

⁶ Ina ua uma ona auina atu e Paulo lana tusi i Kerisiano i Korinito, na ia taumānatu po o le ā le auala o le a latou tali mai ai. Mulimuli ane, na sau Tito ma se tala lelei iā Paulo e faapea, na talia fiafia e le faapotopotoga lana tusi. (2 Kori. 7:​6, 7) Na latou usitaʻia ana faatonuga. E lē gata i lea, ina ua mavae ni nai masina talu ona auina atu le tusi a Paulo, na faaalia e le tagata faimea sesē le salamō mai i lana agasala! Na suia ona uiga ma ana amioga, ma amata ona ia ola e tusa ai ma tapulaa amiotonu a Ieova. (2 Kori. 7: 8-11) O le ā le isi fautuaga a Paulo na avatu i le faapotopotoga?

LE AUALA NA TATAU ONA FEUTAGAʻI AI LE FAAPOTOPOTOGA MA LĒ UA SALAMŌ

 7. O le ā le iʻuga lelei o le aveesea o le tagata faimea sesē mai i le faapotopotoga? (2 Korinito 2:​5-8)

⁷ Faitau le 2 Korinito 2:​5-8. Na faapea atu Paulo: “Ua lava le aʻoaʻiga ua avatu e le toʻatele o uso i lenā tagata.” I nisi faaupuga, ua taunuu le fuafuaga na māfua ai ona aʻoaʻia o ia. O le ā le fuafuaga? Ina ia taʻitaʻiina o ia i le salamō.—Epe. 12:11.

 8. O le ā le isi fautuaga a Paulo na avatu i le faapotopotoga?

⁸ Na faatonuina e Paulo le faapotopotoga ina ia “faamagalo atu ma le agalelei, ma faamāfanafana atu” i le uso na faia le mea sesē, ma “ia faailoa atu lo [latou] alofa mo ia.” Ia mātau foʻi, e leʻi manaʻo Paulo i le faapotopotoga e tau ina talia le tamāloa i le faapotopotoga. Nai lo o lea, ia faamaonia atu e le faapotopotoga e ala i a latou upu ma gaoioiga, ua latou matuā faamagalo le tagata ua salamō ma e alolofa iā te ia. O le faia faapea, e iloa ai e le uso ua talia fiafia o ia e le faapotopotoga.

 9. Aiseā na ono faatalatū ai nisi e faamagalo le tagata faimea sesē ua salamō?

⁹ Pe na iai nisi i le faapotopotoga na faatalatū e talia le tagata faimea sesē ua salamō? E ui e lē o taʻua i le Tusi Paia, ae atonu na iai nisi na faapena. E mautinoa o gaoioiga a le tagata faimea sesē na faatigā ai i le faapotopotoga atoa, pe atonu na faalumaina ai foʻi nisi na aafia totino ai. Na ono manatu la nisi e lē talafeagai le talia ma le agalelei o lenei uso, aemaise lava o loo latou taumafai malosi e tausia pea le mamā tauamio. (Faatusatusa i le Luka 15:​28-30.) Ae aiseā na tāua ai i le faapotopotoga ona faaalia le alofa moni i le uso ua toe foʻi mai?

10-11. O le ā na ono tupu pe ana faapea e mumusu toeaina e faamagalo le tagata faimea sesē ua salamō?

¹⁰ Faamata o le ā le mea e ono tupu pe ana mumusu toeaina e talia le tagata ua salamō i le faapotopotoga? Ae faapefea pe afai ua toe foʻi mai, ae mumusu le faapotopotoga e faaalia le alofa iā te ia? E ono lofitūina ai o ia i le “faanoanoa tele,” pe manatu ai ua leai se faamoemoe. Atonu e na te lagona ai foʻi le lotovaivai, ma lē faia ai ni ana taumafaiga e faaleleia le la faiā ma le Atua.

¹¹ O le mea e sili ona leaga, pe afai e mumusu le ʻauuso e talia le tagata faimea sesē ua salamō, o le a latou faaleagaina ai la latou lava faiā ma Ieova. Aiseā? Talu ai e latou te lē o faaalia le uiga lotofaamagalo o Ieova, ae o uiga lē alofa ma sauā o Satani. O le iʻuga, e ono faaaogā i latou e Satani e taofia le tamāloa mai i le auauna iā Ieova.—2 Kori. 2:​10, 11; Efe. 4:27.

12. O le ā le auala na faaaʻoaʻo ai le faapotopotoga iā Ieova?

¹² Na faapefea ona faaaʻoaʻo le faapotopotoga i Korinito iā Ieova ae e lē o Satani? E ala i le mulimuli i le auala e feutagaʻi ai Ieova ma tagata agasala ua salamō. Ia mātau faamatalaga a nisi o tusitala o le Tusi Paia e faatatau iā Ieova. Ua faapea mai Tavita, ʻe lelei o ia ma ua nofosauni e faamagalo.’ (Sala. 86:5) Na tusi Mika: “O ai se Atua e tusa ma oe, e faamagalo i sesē ma lē manatua solitulafono?” (Mika 7:18) Na faapea mai foʻi Isaia: “Ia lafoaʻi e le tagata amioleaga lona ala, ia lafoaʻi foʻi e le tagata faufau leaga ona manatu; ia foʻi mai o ia iā Ieova, o lē e alofa mutimutivale iā te ia, ma i lo tatou Atua, auā e na te matuā faamagaloina lava.”—Isa. 55:7.

13. Aiseā na talafeagai ai ona toe faaaʻe mai le tagata faimea sesē i le faapotopotoga? (Tagaʻi i le pusa “ O Anafea na Toe Faaaʻe ai le Tamāloa i Korinito?”)

 ¹³ Ina ia faaaʻoaʻo iā Ieova, na tatau i le faapotopotoga i Korinito ona talia ma le agalelei le tagata ua salamō, ma faamautinoa atu i ai lo latou alolofa iā te ia. O le utagia e le faapotopotoga o le fautuaga a Paulo ina ia talia le tagata faimea sesē ua salamō, ua faaalia ai lo latou “usiusitaʻi i mea uma.” (2 Kori. 2:9) E ui lava e na o ni nai masina na aveesea ai le tagata mai i le faapotopotoga, ae o lenā aʻoaʻiga na taʻitaʻiina ai o ia i le salamō. O lea, e leai la se māfuaaga e faatuai ai toeaina i le toe faaaʻe mai o le tamāloa i le faapotopotoga.

FAAATAGIA ATU LE FAAMASINOTONU MA LE ALOFA MUTIMUTIVALE O IEOVA

14-15. O le ā e tatou te aʻoaʻoina mai i le auala na taulima ai le mataupu i le faapotopotoga i Korinito? (2 Peteru 3:9) (Tagaʻi foʻi i le ata.)

¹⁴ O lenei tala e faatatau i le auala na taulima ai le mataupu i Korinito, na tusia ma faasaoina ina ia “faatonu ai i tatou.” (Roma 15:4) E tatou te iloa mai i lenei tala, e lē faatagaina e Ieova se tagata e faia se agasala matuiā ae lē salamō, ina ia iai pea i le faapotopotoga. E ono manatu nisi, o le “alofa mutimutivale” o Ieova e na te faataga ai se tagata faimea sesē e lē salamō, ina ia faifaimea faatasi pea ma ona tagata tapuaʻi. Peitaʻi, e lē o lona finagalo lenā! E ui e alofa  mutimutivale Ieova, ae e na te lē tuufau ai i latou e faimea sesē. E lē manatu māmā foʻi Ieova i ana tapulaa. (Iuta 4) O le tuu pea o le tagata faimea sesē i le faapotopotoga, o le a lē faaalia ai e Ieova le alofa mutimutivale, auā o le a aafia ai le faapotopotoga atoa.—Faata. 13:20; 1 Kori. 15:33.

¹⁵ Peitaʻi, i le taimi e tasi, e lē finagalo Ieova e faaumatia so o se tasi, ae ia faasaoina i latou. E na te faaalia le alofa mutimutivale iā i latou ua salamō moni, ma mananaʻo e toe faaleleia la latou faiā ma ia. (Eseki. 33:11; faitau le 2 Peteru 3:9.) O lea, ina ua salamō ma liliuese le tamāloa faimea sesē mai i lana agasala, na faaaogā e Ieova Paulo e faamatala i le faapotopotoga, e tatau ona faamagalo le tamāloa ma talia ma le agalelei o ia.

16. O le ā sou manatu i le auala na taulima ai le mataupu i Korinito?

¹⁶ O le auala na taulimaina ai le mataupu i Korinito, ua fesoasoani e tatou te iloa ai le alofa o Ieova, o lona amiotonu, ma lona faamasinotonu. (Sala. 33:5) Pe e lē uunaʻia ai oe e vivii atu i lo tatou Atua? O le mea moni, o tatou uma lava o tagata agasala, ma e tatou te manaʻomia lana faamagaloga. E tofu i tatou uma lava ma māfuaaga e lotofaafetai ai iā Ieova mo le togiola, lea ua mafai ai ona faamagaloina a tatou agasala. Maʻeu le faamāfanafanaloto ma se faamautinoaga i le iloaina, e alofa Ieova i ona tagata ma e naunau mo lo latou lelei!

17. O le ā o le a tatou talanoaina i le mataupu o loo sosoo mai?

¹⁷ Ae faapefea le auala e taulimaina ai mataupu mo tagata faimea sesē i aso nei? E faapefea ona faaatagia mai e toeaina o le faapotopotoga le faanaunauga o Ieova, e taʻitaʻiina le tagata faimea sesē ina ia salamō? O le ā le auala e tatau ona tali atu ai le faapotopotoga, pe a faia e toeaina le faaiʻuga e aveesea se tasi, pe toe faaaʻe mai? O le a talanoaina na fesili i le mataupu o loo sosoo mai.