1-2. (a) O le ā le agasala, ma e faapefea ona tatou manumalo mai ai? (Tagaʻi foʻi i le “Uiga o Faaupuga.”) (e) O le ā o le a tatou talanoaina i lenei mataupu ma isi mataupu o loo i lenei Olomatamata? (Tagaʻi foʻi i le vaega “Mo le ʻAufaitau” o loo i lenei lomiga.)

 O LE ā le tele o le alofa o Ieova le Atua iā te oe? E te maua le tali pe a e suʻesuʻeina mea na ia faia, ina ia laveaʻiina ai oe mai i le agasala ma le oti. O le agasala a o se fili mataʻutia, e lē mafai ona tatou manumalo ai i so tatou lava malosi. O tagata uma lava e agasala. O lea, e tatou te iʻu uma lava la i le oti. (Roma 5:12) Peitaʻi, e iai se tala lelei. Ua faamautinoa mai e Ieova, o le a ia laveaʻiina i tatou mai i le agasala ma le oti!

² Ua pe ā ma le 6,000 tausaga o fesoasoani Ieova le Atua i tagata ina ia avea ma ana uō, e ui i lo latou tulaga agasala. Aiseā? Ona e alofa Ieova iā i tatou. O le alofa tele o Ieova i tagata mai lava i le amataga, ua ia faia ai le tele o taumafaiga e fesoasoani iā i tatou uma, ina ia manumalo mai i le agasala. E silafia e le Atua o le agasala e iʻu atu i le oti. Peitaʻi, e lē finagalo o ia ina ia tatou feoti, ae ia ola e faavavau. (Roma 6:23) O le a tatou talanoaina i lenei mataupu ni fesili se tolu: (1) Na faapefea ona faailoa mai e Ieova se faamoemoe mo tagata agasala? (2) O le ā na faia e tagata lē lelei atoatoa i taimi o le Tusi Paia, ina ia maua ai le finagalo malie o Ieova? (3) O le ā na faia e Iesu e laveaʻiina ai tagata agasala?

 NA FAAPEFEA ONA FAAILOA MAI E IEOVA SE FAAMOEMOE MO TAGATA AGASALA?

 3. Aiseā na agasala ai o tatou uluaʻi mātua?

³ Ina ua foafoaina e Ieova le uluaʻi tane ma le fafine, na finagalo o ia ina ia la maua le fiafia. Na ia saunia se nofoaga matagofie e nonofo ai, le meaalofa o le faaipoipoga, ma se galuega faamalieloto. Na tatau ona la faatumuina le lalolagi i a la fanau, ma faia le lalolagi paneta e avea o se parataiso e pei o le faatoʻaga o Etena. E tasi lava le faatonuga faigofie na tuuina atu e Ieova iā i laʻua. Na ia lapataʻia i laʻua pe afai e la te lē usitaʻia lenā faatonuga, o le a la feoti. Peitaʻi, e iai se agelu leaga e leʻi alofa i le Atua po o i laʻua, na faaosoosoina i laʻua ina ia faia le agasala. Na lolo atu Atamu ma Eva i taaʻiga leaga a lenā agelu. E la te leʻi maufaatuatuaina lo la Tamā alofa, ma agasala ai. O lo la lē usiusitaʻi, na oo ai iā i laʻua le soifua matua, maʻi, ma iʻu atu ai i le oti.—Kene. 1:​28, 29; 2:​8, 9, 16-18; 3:​1-6, 17-19, 24; 5:5.

 4. (a) Aiseā e inosia ai e Ieova le agasala? (e) Aiseā e fesoasoani mai ai Ieova iā i tatou e vavalalata atu iā te ia? (Roma 8:​20, 21)

⁴ Na faamauina e Ieova lenei tala i le Tusi Paia, ina ia tatou malamalama ai i le māfuaaga e na te inosia ai le agasala. O le agasala, e faaleagaina ai la tatou faiā ma lo tatou Tamā ma māfua ai le oti. (Isa. 59:2) O le māfuaaga lea na faaosoosoina ai e Satani Atamu ma Eva, ona e fiafia e faaauiluma le agasala. Atonu na manatu Satani ua ia faalēaogāina le finagalo o Ieova mo tagata. Peitaʻi, e na te leʻi iloa le tele o le alofa o Ieova mo tagata. E leʻi suia le finagalo o Ieova mo ē na tupuga mai iā Atamu ma Eva. O lona alofa tele i tagata, na vave ai ona ia saunia se faamoemoe mo i latou. (Faitau le Roma 8:​20, 21.) Na silafia e Ieova o le a iai nisi o le a filifili e alolofa ma usiusitaʻi iā te ia. I le avea ai o ia o se Tamā ma o Lē na Foafoaina mea, ua ia saunia mai se avanoa mo i latou nei e saʻoloto ai mai i le agasala, ma mafuta vavalalata atu iā te ia. Na faapefea ona ia faia lenā mea?

 5. O le ā le taimi na faailoa mai ai e Ieova se faamoemoe mo tagata agasala? Faamatala. (Kenese 3:15)

⁵ Faitau le Kenese 3:15. Na vave lava ona faailoa mai e Ieova se faamoemoe, ina ua ia folafola mai o le a ia faaumatia Satani. Na ia faailoa mai o le a iai se “fanau” o le a laveaʻiina tagata. O lenā fanau o le a faaumatiaina Satani, ma toe faafoʻisia le tulaga o mea na iai i Etena. (1 Ioa. 3:8) Peitaʻi, o le a muamua faamanuʻalia e Satani lenā fanau, ma oo ai iā te ia le oti. O lenā mea o le a matuā mafatia ai lava Ieova. E ui lava o le a oo mafatiaga iā Ieova ma le fanau folafolaina, ae o le a iʻu atu ai i le laveaʻiina o tagata mai i le agasala ma le oti.

AUALA NA MAUA AI E TAGATA AGASALA I TAIMI O LE TUSI PAIA LE FINAGALO MALIE O IEOVA

 6. O le ā na faia e tane faatuatua e pei o Apelu ma Noa ina ia vavalalata atu ai iā Ieova?

⁶ A o faagasolo senituri, na faasolosolo ona faailoa mai e Ieova le auala e faalatalata atu ai tagata agasala iā te ia. O le tama lona lua a Atamu ma Eva o Apelu, o le tagata muamua lea na faatuatua iā Ieova ina ua mavae le fouvalega i Etena. O le alofa o Apelu iā Ieova na ia ofo atu ai se taulaga iā te ia, ona na manaʻo e faafiafia o ia ma faalatalata atu iā te ia. Talu ai o Apelu o se leoleo mamoe, na ia fasi ai ni tamaʻi mamoe ma ofo atu iā Ieova. O le iʻuga, na “finagalo malie Ieova iā Apelu ma lana taulaga.” (Kene. 4:4) Na finagalo malie foʻi Ieova i taulaga na ofo atu e isi tagata na alolofa ma faatuatuaina o ia, e pei o Noa. (Kene. 8:​20, 21) O lona taliaina o na taulaga, ua faailoa  mai ai e Ieova e mafai e tagata agasala ona maua lona finagalo malie, ma vavalalata atu iā te ia. b

 7. O le ā e tatou te aʻoaʻoina mai i le lotomalie o Aperaamo e ofo atu lona atalii e faia ai le taulaga?

⁷ O Aperaamo o se tane e mataʻina lona faatuatua. Ae na faatonuina o ia e Ieova ina ia faia se mea e sili ona faigatā, o le ofo atu lea o lona atalii o Isaako e faia ai se taulaga. E mautinoa na matuā faigatā lea mea iā Aperaamo. E ui i lea, na ia usitaʻi pea iā Ieova. Peitaʻi, na taofia e Ieova Aperaamo a o toeitiiti lava ia fasiotia lona atalii. O lenā mea na tupu, ua faailoa mai ai e Ieova i tagata faatuatua uma le mea o le a ia faia. Na finagalo malie Ieova e foaʻi mai lona Alo pele e toʻatasi e fai ma taulaga, ona o lona alofa tele i tagata.—Kene. 22:​1-18.

 8. O le ā na faaata mai i taulaga na faia i le taimi o le Tulafono? (Levitiko 4:​27-29; 17:11)

⁸ I senituri mulimuli ane ina ua tuuina mai e Ieova le Tulafono i le nuu o Isaraelu, na ia faatonuina ai i latou e ofo atu taulaga e faia i manu ina ia faamagaloina ai a latou agasala. (Faitau le Levitiko 4:​27-29; 17:11.) O na taulaga na faaata mai ai se taulaga e sili atu, lea o le a aveesea atoatoa ai agasala a tagata. Na faagaeeina perofeta a le Atua e faailoa mai o le a puapuagatia ma fasiotia le fanau folafolaina, lea na mulimuli ane faailoa mai, o se Atalii faapitoa o le Atua. O le a pei o ia o se mamoe e fasia e fai ai le taulaga. (Isa. 53:​1-12) Seʻi mafaufau i ai! Na faatulaga e Ieova lona lava Alo pele e fai ai se taulaga, ina ia laveaʻiina ai tagata e aofia ai ma oe mai i le agasala ma le oti.

O LE Ā NA FAIA E IESU E LAVEAʻIINA AI TAGATA?

 9. O le ā na faailoa mai e Ioane le Papatiso e faatatau iā Iesu? (Eperu 9:22; 10:​1-4, 12)

⁹ I le 29 T.A., na faapea mai ai Ioane le Papatiso e faatatau iā Iesu le Nasareta: “Faauta! O le Tamaʻi Mamoe a le Atua, o lē e aveeseina le agasala a le lalolagi!” (Ioa. 1:29) O nei upu faagaeeina, na faailoa mai ai o Iesu o le fanau lea ua leva ona folafolaina mai, ma o le a ia ofoina atu lona ola e fai ma taulaga. Ona o lea, ua faamautinoa atili mai ai se faamoemoe pupula mo le fanau a tagata, e faasaoina atoatoa ai mai i le agasala.—Faitau le Eperu 9:22; 10:​1-4, 12.

10. Na faapefea ona faaalia e Iesu na ʻsau o ia e valaau’ i tagata agasala?

¹⁰ Na uaʻi patino atu Iesu i ē na lofitūina i le agasala, ma valaaulia i latou ina ia avea ma ona soo. Na ia silafia o le agasala o le faapogai o mafatiaga o tagata. O lea, na ia uaʻi atu ai e fesoasoani i tagata na mafatia ona o agasala na latou faia. Na ia faaaogā se talafaatusa e faapea: “E lē manaʻomia e tagata malolosi se fomaʻi, ae na o ē mamaʻi.” Na ia toe faapea mai: “Auā ua ou sau e valaau i ē agasala ae lē o ē amiotonu.” (Mata. 9:​12, 13) Na gaoioi Iesu e ōgatusa ma ana fetalaiga. Na ia faamagaloina agasala a se fafine na mulumuluina ona vae i ona loimata. (Luka 7:​37-50) Na ia aʻoaʻoina se fafine Samaria i upu moni tāua, e ui sa ola o ia i se olaga lē mamā. (Ioa. 4:​7, 17-19, 25, 26) Na foaʻi atu foʻi e Ieova le mana iā Iesu e aveesea ai le oti lea na māfua mai i le agasala, e ala i le toe faatutūina mai o tagata e aofia ai tane, fafine, tamaiti, ma tagata matutua.—Mata. 11:5.

11. Aiseā na tosina atu ai tagata agasala iā Iesu?

¹¹ Na faigofie i tagata, e oo lava i ē na faia agasala ona tosina atu iā Iesu. E latou te leʻi  faatalatū e faalatalata atu iā te ia, ona na ia faaalia le alofa mutimutivale ma le tigā alofa. (Luka 15:​1, 2) Na faamālō atu Iesu ma tauia i latou na faatuatua iā te ia. (Luka 19:​1-10) Na ia faaatagia mai le alofa mutimutivale o lona Tamā. (Ioa. 14:9) E ala i ana upu ma gaoioiga, na ia faaalia ai le alofa mutimutivale ma le tigā alofa o lona Tamā i tagata, ma e finagalo foʻi ina ia fesoasoani iā i latou e manumalo mai i le agasala. Na fesoasoani Iesu i tagata agasala ina ia iai se faanaunauga e suia o latou ala, ma mulimuli atu iā te ia.—Luka 5:​27, 28.

12. O le ā na faailoa mai e Iesu e faatatau i lona maliu?

¹² Na silafia lelei e Iesu le mea o le a oo iā te ia. E iai taimi na ia faailoa atu ai i ona soo o le a faalataina o ia, ma tutuʻi i luga o le laau e faapuapuagatia ai. (Mata. 17:22; 20:​18, 19) Na ia iloa o lana taulaga o le a aveesea ai agasala a le lalolagi, e pei ona taʻua e Ioane ma valoia mai e le ʻauperofeta. Na faailoa mai foʻi e Iesu, pe a uma ona ofoina mai lona ola e fai ma taulaga, o le a “tosina mai tagata eseese” iā te ia. (Ioa. 12:32) O i latou e faatuatua iā Iesu ma usitaʻia ana faatonuga, o le a mauaina le finagalo malie o Ieova. O lo latou faia faapea o le a ʻtuusaʻoloto ai i latou mai i le agasala.’ (Roma 6:​14, 18, 22; Ioa. 8:32) O lea, na lotomalie ai ma lototele Iesu e onosaia se maliu e sili ona tigā.—Ioa. 10:​17, 18.

13. Na faapefea ona maliu Iesu, ma o le ā ua tatou aʻoaʻoina mai i lona maliu e faatatau iā Ieova le Atua? (Tagaʻi foʻi i le ata.)

¹³ Na faalataina Iesu, puʻea, upuleagaina,  tuuaʻia sesē, molia ma sauāina. Mulimuli ane, na tutuʻi o ia e fitafita i se laau e faapuapuagatia ai. A o ia onosaia ma le faamaoni na tulaga tigā, e iai Sē na sili atu ona lagona le mafatia. O Ieova le Atua. E ui e iai iā Ieova le mana uma lava, ma e mafai ona ia taofia mafatiaga o lona Atalii, ae e na te leʻi faia faapea. Afai e pele iā Ieova lona Alo, aiseā na ia faataga ai le oo o mafatiaga ma le oti iā te ia? O le tali faigofie, o lona alofa. Na fetalai Iesu: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, ae ia maua le ola e faavavau.”—Ioa. 3:16.

14. O le ā e te aʻoaʻoina mai i le taulaga na faia e Iesu?

¹⁴ O le taulaga a Iesu, o le faailoaga silisili lea o le alofa o Ieova i le fanau a Atamu ma Eva. E faamaonia ai le alofa tele o Ieova iā te oe. E tele faataulaga na ia faia ma onosaia le matuitui o tigā o le maliu o lona Alo, ina ia laveaʻia ai oe mai i le agasala ma le oti. (1 Ioa. 4:​9, 10) Ioe, e finagalo o ia ina ia fesoasoani mai iā i tatou taʻitoʻatasi, ina ia tetee atu i le agasala ma manumalo ai!

15. O le ā e tatau ona tatou faia, ina ia maua ai aogā mai i le meaalofa a le Atua o le taulaga togiola a Iesu?

¹⁵ Ua mafai ona faamagaloina a tatou agasala ona o le meaalofa a le Atua, o le taulaga togiola lea a lona Alo pele e toʻatasi. Ae e iai se mea e tatau ona tatou faia ina ia faamagaloina ai i tatou e le Atua. O le ā lenā mea? Ua faailoa mai e Ioane le Papatiso ma Iesu Keriso lava ia le tali: “Inā salamō ia outou, auā ua latalata mai le Malo o le lagi.” (Mata. 3:​1, 2; 4:17) O le manatu tāua, ina ia tatou vavalalata atu i lo tatou Tamā alofa ma manumalo mai i le agasala, e tatau ona tatou faaalia le salamō. Ae o le ā e aofia ai i le salamō, ma e faapefea ona fesoasoani iā i tatou ina ia faafiafiaina ai Ieova, a o tauivi ma lo tatou tulaga agasala? O le a taliina lenā fesili i le mataupu o loo sosoo mai.