1-2. Aiseā na matuā atuatuvale ai Iesu?

I LE aso mulimuli o le soifuaga o Iesu i le lalolagi, na matuā atuatuvale ai o ia. E lē o toe umi ona tuuina atu lea o ia ina ia fasiotia e tagata solitulafono. Ae e iai se isi mea na sili ona popole i ai Iesu. Na matuā alofa o ia i lona Tamā ma na manaʻo e faafiafia lona finagalo. O lona tutumau la ma le faamaoni e ui i le tofotofoga faigatā o le a ia fesagaʻia, o le a saosaolaumea i le faasilisilia o le suafa o Ieova. Na alofa foʻi Iesu i tagata, ma na ia silafia o loo faalagolago lo tatou faamoemoe o le ola e faavavau, i lona tumau ma le faamaoni iā Ieova seʻia oo i le oti.

² E ui lava sa matuā atuatuvale Iesu, ae na ia maua pea le filemu. Na ia faapea atu i ona aposetolo: “Ou te avatu iā te outou loʻu filemu.” (Ioa. 14:27) Na ia maua “le filemu mai i le Atua,” po o le lagona o le toʻafilemu ona o le faiā māfana a se tasi ma Ieova. O lenā filemu na fesoasoani iā Iesu ina ia faatoʻafilemu ai ona faalogona popole.​—Fili. 4:6, 7.

3. O le ā o le a tatou iloiloina i lenei mataupu?

³ E leai lava se tasi o i tatou o le a oo i ai tofotofoga ogaoga na feagai ma Iesu. Peitaʻi, o le a feagai soo uma o Iesu ma tulaga faigatā. (Mata. 16:24, 25; Ioa. 15:20) E pei o Iesu, e iai taimi o le a tatou lagona ai le atuatuvale. O le ā e mafai ona tatou faia ina ia lē lofitūina ai i tatou i faalogona popole, ma faigatā ai ona maua le filemu o le mafaufau? Seʻi o tatou iloiloina mea e tolu sa faia e Iesu a o faagasolo lana faiva i le lalolagi, ma auala e faaaʻoaʻo ai iā te ia pe a feagai ma faigatā.

4. E tusa ai ma le 1 Tesalonia 5:17, aumai ni faaaʻoaʻoga o taimi na tatalo ai e lē aunoa Iesu i le aso mulimuli o lona soifuaga i le lalolagi.

⁴ Faitau le 1 Tesalonia 5:17. I le aso mulimuli o le soifuaga o Iesu i le lalolagi, e tele taimi na tatalo ai o ia. Ina ua ia faavaeina le faamanatuga o lona maliu, na ia faia se tatalo mo le areto ma le uaina. (1 Kori. 11:23-25) A o leʻi tuua e Iesu le nofoaga sa fai ai le Paseka, na ia tatalo faatasi ma ona soo. (Ioa. 17:1-26) Ina ua latou taunuu ma ona soo i le pō lava lenā i Ketesemane, na tatalo ai e lē aunoa Iesu. (Mata. 26:36-39, 42, 44) E oo foʻi i le taimi a o leʻi tō lana mānava, na tatalo o ia i lona Tamā. (Luka 23:46) Na tatalo Iesu iā Ieova e faatatau i mea uma na tutupu i le aso mulimuli o lona soifuaga i le lalolagi.

5. O le ā le māfuaaga e leʻi tumau ai ona lototetele le ʻauaposetolo?

⁵ O se tasi o māfuaaga na mafai ai e Iesu ona onosaia tofotofoga, ona sa ia tatalo e lē aunoa i lona Tamā mo le fesoasoani. Peitaʻi, e leʻi faia faapea e ona aposetolo. E latou te leʻi tatalo faatauanau i lea pō. O le iʻuga, ina ua oo i le taimi na tofotofoina ai i latou, na mou atu lo latou lototetele. (Mata. 26:40, 41, 43, 45, 56) O lea, e na o le pau le auala e mafai ai ona tatou tutumau faamaoni i tulaga faigatā, o le faaaʻoaʻo iā Iesu ma “tatalo e lē aunoa.” O ā mea e mafai ona taʻua i a tatou tatalo?

6. E faapefea i le faatuatua ona fesoasoani iā i tatou ina ia maua pea le filemu?

⁶ E tatou te tatalo iā Ieova ina ia “faatuputeleina lo [tatou] faatuatua.” (Luka 17:5; Ioa. 14:1) E tatou te manaʻomia le faatuatua, talu ai e tofotofoina e Satani i latou uma e  mulimuli iā Iesu. (Luka 22:31) E faapefea i le faatuatua ona fesoasoani iā i tatou ina ia maua pea le filemu, e ui e tatou te feagai ma le tele o faafitauli? Pe afai ua uma a tatou taumafaiga ina ia taulima ai se tofotofoga, o le faatuatua o le a uunaʻia ai i tatou ina ia tuu atu le mataupu iā Ieova. Pe a tatou maufaatuatuaina Ieova e sili atu lana auala e taulima ai se mataupu, ona tatou maua lea o le filemu o le mafaufau ma le loto.​—1 Pete. 5:6, 7.

7. O le ā e te aʻoaʻoina mai i faamatalaga a Robert?

⁷ E fesoasoani le tatalo iā i tatou ina ia faatumauina ai pea le filemu o o tatou mafaufau, e tusa po o ā faigatā e tulaʻi mai. Mātau le faaaʻoaʻoga a Robert, o se toeaina faamaoni ua silia i le 80 ona tausaga. Ua ia faapea mai: “Ua fesoasoani le fautuaga i le Filipi 4:6, 7 iā te aʻu i le auala e taulima ai tulaga faigatā i loʻu olaga. Na ou feagai ma faafitauli tautupe, ma na ou lē toe auauna foʻi o se toeaina mo sina taimi.” O le ā ua fesoasoani iā Robert ina ia maua ai pea le filemu o le mafaufau? Ua ia faapea mai, “Ou te tatalo i le taimi lava e amata ai ona ou lagona le popole. Ou te talitonu, o le tele ou te tatalo faatauanau ai, o le filemu foʻi lenā o loʻu mafaufau.”

8. E tusa ai ma le Ioane 8:29, o le ā le isi māfuaaga na lagona ai e Iesu le filemu o le mafaufau?

⁸ Faitau le Ioane 8:29. Na lagona e Iesu le filemu o le mafaufau e ui na sauāina o ia, talu ai sa ia iloa na ia faafiafiaina lona Tamā. Na tumau ona ia usitaʻi e oo lava i le taimi na faigatā  ai ona ia faia faapea. Na alofa o ia i lona Tamā, ma faamuamua i lona olaga le auaunaga iā Ieova. A o leʻi afio mai Iesu i le lalolagi, sa avea o ia ma “tufuga poto” a le Atua. (Faata. 8:30) A o soifua ai i le lalolagi, na ia talaʻi atu ma le maelega i isi e faatatau i lona Tamā. (Mata. 6:9; Ioa. 5:17) Na maua e Iesu le tele o le olioli mai i lea galuega.​—Ioa. 4:34-36.

9. E faapefea i le pisi i le galuega talaʻi ona maua ai pea le filemu o le mafaufau?

⁹ E tatou te faaaʻoaʻo iā Iesu e ala i le usiusitaʻi iā Ieova ma “ia tele pea mea e fai i le galuega a le Alii.” (1 Kori. 15:58) Pe a tatou “matuā tinoū” i le galuega talaʻi, o le a iai iā i tatou se vaaiga saʻo i o tatou faafitauli. (Galu. 18:5) O se faataʻitaʻiga, e masani ona tugā atu faafitauli o loo fesagaʻia e i latou e tatou te feiloaʻi ai i le talaʻiga. Ae pe a aʻoaʻoina i latou ina ia alolofa iā Ieova ma faatatau ana fautuaga, o le a latou maua le fiafia ma faaleleia o latou olaga. Pe a tatou vaaia na tulaga, e atili faamalosia ai lo tatou maufaatuatuaina o le tausiga a Ieova iā i tatou. O le iʻuga, e tatou te maua ai pea le filemu o le mafaufau. Ua faamaonia e se tuafafine le moni o lea faamatalaga. Na tauivi lenei tuafafine i lona olaga atoa ma faalogona o le leai o se aogā ma le lotomafatia. Ua ia faapea mai, “Pe a ou pisi i le faiva, ou te lagona le fiafia ma le mautinoa. O le māfuaaga, ona ou te lagona le matuā vavalalata iā Ieova pe a ou auai i le talaʻiga.”

10. O le ā e te aʻoaʻoina mai i faamatalaga a Brenda?

¹⁰ Seʻi manatu i le faaaʻoaʻoga a le tuafafine o Brenda. E aafia uma i laʻua ma lana tama teine i se maʻi tugā. E faaaogā e Brenda le nofoa faataavalevale ma e itiiti mea e mafai ona ia faia. Pe a talafeagai ma lona malosi, e talaʻi atu o ia mai i lea fale i lea fale, ae o le auala autū e talaʻi ai o le tusiaina lea o tusi. Ua ia faapea mai: “Ina ua ou mautinoa e lē toe foʻi i se lelei loʻu maʻi, na ou uaʻi atoatoa atu ai loa i laʻu faiva. Pe a ou talaʻi, ou te lē mafaufau i oʻu popolega. Nai lo o lea, ou te taulaʻi i le avatuina o le fesoasoani i ē ou te talaʻi i ai. E faamanatu mai ai pea iā te aʻu le faamoemoe i le lumanaʻi.”

11-13. (a) Na faapefea ona avea le ʻauaposetolo ma isi tane ma fafine o ni uō moni a Iesu? (e) O le ā le aafiaga o uō a Iesu iā te ia?

¹¹ A o faagasolo le faiva a Iesu, na avea ona aposetolo faamaoni o ni uō moni iā te ia. O i latou o ni faaaʻoaʻoga lelei o le manatu o loo taʻua i le Faataoto 18:24: “E iai foʻi le uō e sili ona alofa faamaoni nai lo o le uso.” Na tāua i latou iā Iesu. I le taimi o lana faiva, e leʻi faatuatua ona uso moni iā te ia. (Ioa. 7:3-5) I se tasi taimi, na manatu ai le aiga o Iesu ua faalētonu lona mafaufau. (Mare. 3:21) I se faaeseesega, na faapea atu Iesu i ona aposetolo faamaoni i le pō a o leʻi maliu o ia: “Ua outou tumau iā te aʻu i taimi o oʻu puapuaga.”​—Luka 22:28.

¹² E iai taimi na lē fiafia ai Iesu i ona aposetolo. Ae nai lo o le taulaʻi atu o Iesu i o latou masei, na ia silafia lo latou faatuatua iā te ia. (Mata. 26:40; Mare. 10:13, 14; Ioa. 6:66-69) I le pō mulimuli o Iesu a o leʻi maliu, na ia fetalai atu ai i nei tane faamaoni: “Ua ou taʻua outou o uō, auā ua ou faailoa atu iā te outou mea uma na ou faalogo ai i loʻu Tamā.” (Ioa. 15:15) E lē taumatea na matuā faalaeiauina Iesu e ana uō. O la latou lagolagosua iā te ia i le taimi o lana faiva, na matuā faafiafiaina ai o ia.​—Luka 10:17, 21.

¹³ Na iai foʻi isi tane ma fafine na avea ma uō a Iesu. Na latou lagolagoina o ia i le galuega talaʻi ma fesoasoani atu i isi auala. Na latou  valaaulia o ia i o latou fale, ma faiʻaiga faatasi ma ia. (Luka 10:38-42; Ioa. 12:1, 2) O isi na faimalaga faatasi ma Iesu ma foaʻi atu a latou meafaitino mo ia. (Luka 8:3) Na maua e Iesu ni uō lelei, talu ai sa avea o ia o se uō lelei i tagata. Na ia faia mea lelei mo i latou, ma e na te leʻi faatalitalia mai i tagata ni mea e latou te lē gafatia. O Iesu o se tagata lelei atoatoa, peitaʻi, na ia talisapaia le lagolagosua a ana uō e lē lelei atoatoa. E mautinoa, na latou fesoasoani iā te ia ina ia maua pea le filemu o le mafaufau.

14-15. E faapefea ona tatou maua ni uō lelei, ma e faapefea ona latou fesoasoani iā i tatou?

¹⁴ O le iai o ni uō lelei, o le a fesoasoani iā i tatou ina ia faamaoni ai pea iā Ieova. O le auala sili la e maua ai ni uō lelei, o le avea lea o i tatou o ni uō lelei. (Mata. 7:12) O se faaaʻoaʻoga, ua faalaeiauina i tatou i le Tusi Paia ina ia faaaogā lo tatou taimi ma le malosi e fesoasoani atu ai i isi, aemaise i ē e ʻmatitiva.’ (Efe. 4:28) Pe e iai se tasi i la outou faapotopotoga e mafai ona e fesoasoani i ai? Pe e mafai ona e faia se faatau a se tagata talaʻi ua nofofale? Pe e mafai ona e saunia se taumafataga mo se aiga o loo utiuti la latou faasoa? Pe a e iloa faaaogā la tatou Upega tafaʻilagi o le jw.org^® ma le polokalame o le JW Library^®, pe e mafai ona e fesoasoani i isi i le faapotopotoga ina ia latou iloa foʻi le auala e faaaogā ai? Pe a tatou lotofesoasoani i isi, e lē taumatea o le a tatou maua le fiafia.​—Galu. 20:35.

¹⁵ O le a lagolagoina i tatou e a tatou uō i taimi faigatā, ma fesoasoani iā i tatou ina ia maua pea le filemu o le mafaufau. E pei lava o  Eliu o lē na faalogologo lelei a o faamatala i ai e Iopu ona mafatiaga, e faapena foʻi ona faalogologo lelei a tatou uō a o faamatala atu i ai o tatou popolega. (Iopu 32:4) E tatou te lē faatalitalia o le a faia e a tatou uō se faaiʻuga mo i tatou, ae o se mea atamai lo tatou faalogo i a latou fautuaga mai i le Tusi Paia. (Faata. 15:22) Na talia ma le lotomaulalo e le tupu o Tavita le fesoasoani mai i ana uō. E tatau foʻi ona tatou talia ma le lotomaulalo le fesoasoani mai i a tatou uō i taimi faigatā. (2 Samu. 17:27-29) O le mea moni, o le iai o ni uō lelei o se meaalofa mai iā Ieova.​—Iako. 1:17.

16. E tusa ai ma le Filipi 4:6, 7, o le ā le auala e mafai ona tatou maua ai le filemu? Ia faamatala.

¹⁶ Faitau le Filipi 4:6, 7. Aiseā ua fetalai mai ai Ieova e tatou te maua le filemu, “e ala iā Keriso Iesu”? Talu ai e faatoʻā tatou maua le filemu o le loto ma le mafaufau, pe a tatou malamalama ma faatuatua i le matafaioi a Iesu i le faataunuuina o le finagalo o Ieova. O se faataʻitaʻiga, e ala i le taulaga togiola a Iesu ua mafai ai ona faamagaloina a tatou agasala uma. (1 Ioa. 2:12) O se faamāfanafanaga lenā iā i tatou! I le avea ai o Iesu ma Tupu o le Malo o le Atua, o le a ia aveesea mafatiaga uma ua faapogaia e Satani ma lenei faiga o mea iā i tatou. (Isa. 65:17; 1 Ioa. 3:8; Faaa. 21:3, 4) Maʻeu se faamoemoe matagofie mo i tatou! E ui lava ua tuuina mai e Iesu se tofiga faigatā, ae o loo ia faatasi pea ma i tatou ma fesoasoani mai i nei aso e gata ai. (Mata. 28:19, 20) Ioe, o se manatu e matuā faalototeleina ai i tatou! O faamāfanafanaga, le faamoemoe, ma le lototele, o vala tāua ia e tatou te maua ai le filemu o le mafaufau.

17. (a) E faapefea ona maua pea e se Kerisiano le filemu o le mafaufau? (e) O le ā e mafai ona tatou ausiaina e tusa ai ma le folafolaga i le Ioane 16:33?

¹⁷ E faapefea la ona e maua pea le filemu o le mafaufau e tusa pe e lofitūina oe i tofotofoga ogaoga? Ia faaaʻoaʻo iā Iesu. Muamua, ia tatalo e lē aunoa. Lua, ia usitaʻi iā Ieova ma talaʻi ma le maelega e tusa pe e faigatā ona faia faapea. Tolu, ia saʻili atu mo le fesoasoani mai i au uō i taimi faigatā. O le iʻuga, o le a leoleoina lou loto ma lou mafaufau i le filemu mai i le Atua. E lē gata i lea, o le a e manumalo i so o se tofotofoga e pei ona sa faia e Iesu.​—Faitau le Ioane 16:33.