1. O le ā e mananaʻo auauna uma a le Atua e fai, ma aiseā? (Tagaʻi i le ata i le faavaa.)

NA FAATONUINA e Iesu ona soo ina ia ʻō e fai tagata o nuu uma lava ma soo.’ (Mata. 28:19) E mananaʻo auauna faamaoni uma a le Atua, ina ia latou aʻoaʻoina le auala e “faia [ai] ma le māeʻaeʻa” lenei faiva ua tuuina mai iā i latou. (2 Timo. 4:5) O le mea moni, e sili atu ona tāua, aogā, ma faanatinati lenei galuega nai lo o se isi lava galuega. Peitaʻi, e ono avea o se luʻi lo tatou mananaʻo e faaalu le tele o le taimi i le faiva, ae e lē o talafeagai ma o tatou tulaga.

2. O ā tulaga faigatā e tatou te fesagaʻia a o faia la tatou faiva?

² E iai isi vala tāua o le olaga e faaaogā ai lo tatou taimi ma le malosi. Atonu e manaʻomia ona tatou faigaluega mo le tele o itula auā le tausiga o i tatou ma o tatou aiga. E tatou te ono feagai ma isi tiute tauave faaleaiga, o maʻi o le tino, le lotomafatia, po o tigā ona o le soifua matua. E faapefea la ona tatou faia ma le māeʻaeʻa la tatou faiva a o feagai ma na tulaga faigatā?

3. O le ā ua tatou aʻoaʻoina mai i le fetalaiga a Iesu o loo i le Mataio 13:23?

³ E lē tatau ona tatou lotovaivai pe afai e itiiti le taimi e mafai ona tatou faaalu i le auaunaga iā Ieova, ona o o tatou tulaga. Na silafia e Iesu e lē tutusa uma le tele o fua e tatou te fuaina mai i la tatou faiva. (Faitau le Mataio 13:23.) E matuā tāua iā Ieova a tatou taumafaiga uma o loo faia i lana auaunaga, pe afai o le mea sili lea e tatou te mafaia. (Epe. 6:10-12) Atonu e tatou te manatu e mafai ona tele mea e tatou te faia i le faiva, ona o o tatou tulaga. O lea, o le a tatou iloiloina i lenei mataupu pe e faapefea ona faamuamua la  tatou faiva, faafaigofie o tatou olaga, ma faaleleia o tatou tomai i le talaʻi ma le aʻoaʻo atu. Ae seʻi o tatou talanoa muamua, i le uiga o le faataunuuina ma le māeʻaeʻa o la tatou faiva.

4. O le ā le uiga o le faataunuuina ma le māeʻaeʻa o la tatou faiva?

⁴ Ina ia faataunuuina ma le māeʻaeʻa la tatou faiva, e tatau ona fai so tatou sao atoatoa i le galuega talaʻi ma le aʻoaʻo atu. Peitaʻi, e lē na o le taimi e faaalu i le talaʻiga le mea tāua. E tāua foʻi iā Ieova le uunaʻiga e tatou te talaʻi ai. E tatou te galulue ma le lotoatoa i la tatou faiva faa-Kerisiano, * ona o lo tatou alolofa iā Ieova ma o tatou tuaoi. (Mare. 12:30, 31; Kolo. 3:23) O le auauna ma le lotoatoa i le Atua, o lona uiga ia faaaogā lo tatou taimi ma le malosi e faia ai le mea sili i le auaunaga iā te ia. Pe a tatou talisapaia lenei faaeaga o le talaʻi atu, o le a tatou tinoū ina ia faaoo atu le tala lelei i le toʻatele e mafai ai.

5-6. Aumai se faataʻitaʻiga i le auala e mafai ai e se tasi ona faamuamua lana faiva, e ui i le itiiti o le taimi e mafai ona ia talaʻi ai.

⁵ Seʻi fai se faataʻitaʻiga i se alii talavou e fiafia e tā lana kitara i so o se avanoa e na te maua. Na maua sana galuega e tātā ai i se fale kofe i faaiʻuga o vaiaso. Peitaʻi, e lē lava le tupe na maua mai ai e totogi ai mea e na te manaʻomia. O lea, ua ia faigaluega ai o se faatauoloa mai i le Aso Gafua e oo i le Aso Faraile. E ui lava e tele lona taimi e faigaluega ai i le faleoloa, ae e sili atu lona fiafia i lana musika. E naunau lava o ia ina ia faaleleia lana taleni, ma ia avea lea ma ana galuega autū. E ui lava la e lē tele se taimi e na te maua e faia ai le mea e sili ona ia fiafia i ai, ae e na te faaaogā so o se avanoa ina ia faia ai faapea.

⁶ I se tulaga talitutusa, atonu e itiiti le taimi e mafai ona e faaalu i le galuega talaʻi. Peitaʻi, o le galuega lea e sili ona e fiafia i ai. E te taumafai malosi foʻi ina ia faaleleia lou tomai, e faaoo atu ai le tala lelei i se auala e pāʻia ai loto o tagata. Ae ona e tele mea e tatau ona faaaogā ai lou taimi, e te ono tomānatu la pe  e faapefea ona e faamuamua le galuega talaʻi i lou olaga.

7-8. E faapefea ona tatou faaaʻoaʻo i le faiva a Iesu?

⁷ Na faataatia e Iesu se faaaʻoaʻoga mataʻina i lana faiva. Na avea ma taulaʻiga autū o lona olaga le talanoa i isi e faatatau i le Malo o le Atua. (Ioa. 4:34, 35) E faitau selau maila na ia savalia ina ia talaʻi atu ai i le toʻatele e mafai ai. Na ia faaaogā so o se avanoa e molimau atu ai i tagata i nofoaga faitele ma i o latou fale. Na faamuamua i le olaga o Iesu lana faiva.

⁸ E mafai ona tatou faaaʻoaʻo iā Keriso e ala i le saʻili o avanoa e talanoa ai i isi e faatatau i le tala lelei, i so o se taimi ma so o se nofoaga talafeagai. E tatou te lotomalilie e faataulaga mea e tatou te mananaʻo i ai, ina ia mafai ona tatou talaʻi atu i isi. (Mare. 6:31-34; 1 Pete. 2:21) E iai i latou i le faapotopotoga e mafai ona auauna o ni paeonia faapito, paeonia sauatoa, po o ni paeonia lagolago. O isi e latou te aʻoaʻoina se isi gagana, pe e siitia atu foʻi i se vaipanoa o loo iai le manaʻoga. Peitaʻi, o le tele o le galuega talaʻi e faatino e i latou e lē o ni paeonia, o ē o loo faia le mea sili e latou te mafai. Po o ā lava o tatou tulaga, ae e lē o faatalitalia e Ieova mai iā i tatou se mea e tatou te lē gafatia. E finagalo o ia ina ia tatou fiafia i le auaunaga paia, a o tatou faalauiloa atu “le tala lelei mamalu a le Atua fiafia.”​—1 Timo. 1:11; Teu. 30:11.

9. (a) Na faapefea ona faamuamua e Paulo le galuega talaʻi, e ui sa ia galue i le faia o faleʻie? (e) O le ā ua taʻua i le Galuega 28:16, 30, 31 e faatatau i le vaaiga a Paulo i lana faiva?

⁹ Na faataatia e le aposetolo o Paulo se faaaʻoaʻoga lelei, e ala i le faamuamua o lana faiva i lona olaga. A o iai o ia i Korinito i lana malaga faamisionare lona lua, sa utiuti lana faasoa. O lea na ia galue ai e fai faleʻie. Peitaʻi, e leʻi avea lea ma ana galuega autū. Na ia faia faleʻie ina ia lagolagoina ai lana faiva, ma mafai ai ona folafola atu le tala lelei i tagata i Korinito “e aunoa ma se taui” mai iā i latou. (2 Kori. 11:7) E ui lava sa manaʻomia ona faigaluega Paulo, ae na faamuamua pea lana faiva, ma na ia talaʻi i Sapati uma. Ina ua lava le faasoa a Paulo, na toe faateleina lona taimi i le galuega talaʻi. Na “matuā tinoū [o ia] e talaʻi atu le upu i tagata Iutaia, e faamaonia ai o Iesu o le Keriso.” (Galu. 18:3-5; 2 Kori. 11:9) I se taimi mulimuli ane, a o saisaitia Paulo i se fale i Roma mo le lua tausaga, na ia talaʻi atu ai i ē na asiasi ane ma sa ia tusia foʻi ni tusi. (Faitau le Galuega 28:16, 30, 31.) Na maumauaʻi Paulo ina ia aua neʻi tosina ese mai i lana faiva. Na tusi o ia: “O le mea lea matou te lē faavaivai ai, talu ai ua tuuina mai iā i matou lenei faiva.” (2 Kori. 4:1) E pei o Paulo, e tusa pe e tatou te faigaluega i galuega totogi, ae e mafai lava ona faamuamua le galuega talaʻi i o tatou olaga.

10-11. E faapefea ona faia ma le māeʻaeʻa la tatou faiva e tusa pe e faalētonu lo tatou soifua mālōlōina?

¹⁰ E tusa pe e faigatā ona tatou talaʻi mai i lea fale i lea fale ona o le soifua matua po o le faalētonu o le soifua mālōlōina, e mafai lava ona tatou olioli i isi vala o le auaunaga. Na talaʻi atu Kerisiano i le uluaʻi senituri i so o se nofoaga lava na maua ai tagata. Na latou faaaogā so o se avanoa e faailoa atu ai le upu moni i so o se mea lava ʻe feiloaʻi ai’ ma tagata, e pei o le talaʻi atu mai i lea fale i lea fale, i nofoaga faitele, ma molimau lē fuafuaina. (Galu. 17:17; 20:20) Pe afai ua faafaigatā ona tatou savavali, atonu e mafai ona tatou nonofo i se nofoaga faitele ma talaʻi atu i tagata feoaʻi. E mafai foʻi ona tatou molimau lē fuafuaina,  tusia ni tusi, pe molimau atu e ala i le telefoni. Ua maua e le toʻatele o tagata talaʻi ua matuā faatapulaa mea e mafai ona fai, le tele o le fiafia ma le faamalieina mai i nei auala e talaʻi ai.

¹¹ E mafai lava ona e faia ma le māeʻaeʻa lau faiva, e tusa pe e faalētonu lou soifua mālōlōina. Seʻi toe mafaufau i le faaaʻoaʻoga a le aposetolo o Paulo, o lē na faapea mai: “O mea uma lava, ua ou maua le malosi mai iā te ia o lē na foaʻi maia iā te aʻu le mana.” (Fili. 4:13) Na manaʻomia e Paulo lenā mana i se taimi na maʻi ai a o faagasolo ana malaga faamisionare. Na ia faapea atu i Kerisiano i Kalatia: “O loʻu maʻi na ala ai ona ou muaʻi folafola atu le tala lelei iā te outou.” (Kala. 4:13) I se tulaga talitutusa, pe a e aafia i maʻi o le tino, e mafai ona e maua avanoa e folafola atu ai le tala lelei i fomaʻi, tausimaʻi, ma isi e fesoasoani i le tausiga o oe. O le toʻatele o i latou e faigaluega, ma e lē maua atu i o latou fale i taimi o talaʻiga.

12. O le ā e uiga i ai le “lelei” o lau vaai?

¹² Na fetalai Iesu: “O le molī o le tino o le mata lea. Pe afai e lelei lau vaai [pe “faafaigofie lau vaai,” fpl.], e malamalama uma ai lou tino.” (Mata. 6:22) Na uiga atu le fetalaiga a Iesu i le manaʻomia lea ona faafaigofie o o tatou olaga, pe taulaʻi atu i se sini po o se fuafuaga se tasi nai lo o le tosina i le tele o mea. Na faataatia e Iesu lenā faaaʻoaʻoga e ala i le taulaʻi atu i lana faiva, ma na ia aʻoaʻoina ona soo ina ia taulaʻi atu pea i le auaunaga iā  Ieova ma Lona Malo. E tatou te faaaʻoaʻo iā Iesu e ala i le faamuamua o le faiva faa-Kerisiano i o tatou olaga, ma ʻfaaauau ona saʻili muamua le malo ma le amiotonu a le Atua.’​—Mata. 6:33.

13. O le ā e mafai ona fesoasoani iā i tatou ina ia taulaʻi atu ai i la tatou faiva faa-Kerisiano?

¹³ O se tasi o auala e taulaʻi atu ai i la tatou faiva, o le faafaigofie lea o o tatou olaga ina ia tele ai le taimi e fesoasoani i isi e iloa lelei Ieova ma alolofa iā te ia. * O se faataʻitaʻiga, pe e mafai ona toe fetuunaʻi itula e tatou te faigaluega ai ina ia tele se taimi e tatou te faaalu i le faiva i le vaiaso? Pe e mafai ona faaitiitia nisi faafiafiaga lea atonu e alu ai le tele o lo tatou taimi?

14. O ā fetuunaʻiga na faia e se ulugalii ina ia faatele ai lo la taimi i le faiva?

¹⁴ O le mea lenā sa faia e se toeaina e igoa iā Elias ma lana avā. Ua faapea mai Elias: “E leʻi mafai ona ma paeonia, ae sa iai mea na mafai ona ma faia ina ia faatele ai so ma sao i le talaʻiga. O lea na amata ai ona ma faia ni suiga lāiti. O se faataʻitaʻiga, na faaitiitia a ma tupe faaalu ma le taimi e faaalu i faafiafiaga, ma talosaga i o ma pule mo se fetuunaʻiga i a ma aso faigaluega. O le iʻuga, na mafai ona ma auai ai i talaʻiga i le afiafi, faia nisi suʻesuʻega faale-Tusi Paia, ma na mafai foʻi ona ma talaʻi i aso e lua o le vaiaso i masina taʻitasi. O se fiafiaga tele lea mo i maʻua!”

15-16. E tusa ai ma le 1 Timoteo 4:13, 15, e faapefea ona faaleleia pea o tatou tomai o ni tagata talaʻi? (Tagaʻi foʻi i le pusa “ Sini e Fesoasoani Ina ia Faia ai ma le Māeʻaeʻa Laʻu Faiva.”)

¹⁵ O se isi auala e faia ai ma le māeʻaeʻa la tatou faiva, o le faaleleia lea o o  tatou tomai i le galuega talaʻi. I nisi o galuega i le lalolagi, e faaauau ona faia toleniga ma aʻoaʻoga ina ia faaleleia ai tomai o tagata faigaluega. E faapena foʻi tagata talaʻi o le Malo. E manaʻomia ona aʻoaʻoina pea i tatou i auala e faaleleia ai o tatou tomai i le faiva.​—Faata. 1:5; faitau le 1 Timoteo 4:13, 15.

¹⁶ E faapefea ona tatou faia faapea? E ala i le uaʻi totoʻa i faatonuga mai i la tatou Sauniga o le Faiva ma le Olaga Faa-Kerisiano, lea e faia i vaiaso taʻitasi. O lenei sauniga e aumaia ai toleniga aogā ina ia faaleleia ai o tatou tomai i le talaʻiga. O se faataʻitaʻiga, pe a aumaia e le taʻitaʻifono se fautuaga mo i latou e faia lauga i le Toleniga mo le Faiva i le Fanua, e mafai ona tatou aʻoaʻoina mai ai ni auala e faaleleia ai la tatou faiva. Ia tatou faatatauina na fautuaga pe a tatou faasoa atu i isi le tala lelei. E mafai ona tatou talosaga atu i le ovasia o le vaega mo le talaʻiga mo se fesoasoani, pe galulue faatasi foʻi ma ia po o se isi tagata talaʻi tomai, o se paeonia, po o le ovasia o le matagaluega. A o faasolosolo ina faaleleia le auala e tatou te faaaogāina ai Meafaigaluega mo le Aʻoaʻo Atu, o le a faateleina foʻi lo tatou olioli i le talaʻi ma le aʻoaʻo atu.

17. O ā ni ou faalogona pe a e faia ma le māeʻaeʻa lau faiva?

¹⁷ O se faaeaga le faataga e Ieova o i tatou ina ia avea o se ʻʻaufaigaluega faatasi ma ia’! (1 Kori. 3:9) Pe a e “faamautinoa o mea e sili ona tāua” ma taulaʻi i le faiva faa-Kerisiano, o le a mafai ai ona e “auauna atu iā Ieova ma le fiafia.” (Fili. 1:10; Sala. 100:2) I le avea ai ma auauna a le Atua, e mafai ona e mautinoa o le a ia foaʻi mai le malosi e te manaʻomia ina ia faia ai lau faiva, e tusa po o ā tulaga faigatā e tulaʻi mai. (2 Kori. 4:1, 7; 6:4) E tusa pe e itiiti pe e tele sou sao e fai i le talaʻiga ona o lou tulaga, ae “o se mea e mitamita ai” pe a e faia ma le lotoatoa. (Kala. 6:4) Pe a e faia ma le māeʻaeʻa lau faiva, e faailoa atu ai lou alofa mo Ieova ma ou tuaoi. “O le faia faapea e faaolaina ai oe lava atoa ma i latou o faalogo iā te oe.”​—1 Timo. 4:16.