1-2. O le ā le faataʻitaʻiga e fesoasoani e tatou te malamalama ai i upu o loo i le 1 Peteru 2:21?

SEʻI faapea o loo outou savavali ma nisi i se vaomatua mataʻutia e lilofia i se kiona. O loo taʻitaʻia outou e se tagata e masani lelei i lenā vaomatua. O loo muamua o ia i luma, ma o loo loga ona tulaga vae i le kiona. Ua amata ona e lē iloa atu o ia, ae e te lē o popole auā o lea e tou te mulimulituʻi i ona tulaga vae.

² Ona o i tatou o Kerisiano moni, ua pei la o loo tatou savavali i se vaomatua mataʻutia, o lenei lalolagi amioleaga. Ae ua saunia e Ieova lona Alo o Iesu Keriso, le Taʻitaʻi lelei atoatoa ina ia tatou mulimulituʻi i ona tulaga aao. (1 Pete. 2:21) E tusa ai ma se tusi faale-Tusi Paia, na faatusa e Peteru i inei Iesu o se taʻitaʻi. E pei o se taʻitaʻi o loo loga ona tulaga vae i le auala o loo savali ai, e faapena foʻi Iesu, ua ia tuua ona tulaga aao ina ia tatou mulimuli i ai. Seʻi o tatou talanoaina fesili nei e tolu, e faatatau i le mulimulituʻi i ona tulaga aao—o le ā? aiseā? ma e faapefea?

3. O le ā le uiga o le mulimuli i tulaga vae o se tasi?

³ O le ā le uiga o le mulimuli i tulaga vae o se tasi? I le Tusi Paia, o upu “savavali” ma le “vae,” e iai taimi e faasino atu ai i mea e faia e le tagata i lona olaga. (Kene. 6:9; Faata. 4:26) O le auala e ola ai le tagata, e mafai ona faasino atu i ona tulaga vae pe a savali. O lea, o le mulimuli i tulaga vae o se tasi, e uiga atu i le mulimuli i le faaaʻoaʻoga a lenā tagata pe faaaʻoaʻo iā te ia.

4. O le ā e uiga i ai le mulimuli i tulaga aao o Iesu?

 ⁴ O le ā la e uiga i ai le mulimuli i tulaga aao o Iesu? Pe a faafaigofie, e uiga atu i le faaaʻoaʻo i lana faaaʻoaʻoga. I le mau autū o lenei suʻesuʻega, na taʻua patino ai e le aposetolo o Peteru le faaaʻoaʻoga sili na faataatia e Iesu, o le tumau e ui i mafatiaga. Peitaʻi, e tele isi auala e tatou te faaaʻoaʻo ai iā Iesu. (1 Pete. 2:18-25) O le mea moni, o le olaga atoa o Iesu e aofia ai mea uma na ia fetalai i ai ma mea na ia faia, o se faaaʻoaʻoga lelei mo i tatou e mulimuli i ai.

5. Pe e mafai moni lava e ni tagata lē lelei atoatoa, ona mulimuli i le faaaʻoaʻoga lelei atoatoa a Iesu? Ia faamatala.

⁵ Ona o i tatou o ni tagata lē lelei atoatoa, pe e mafai moni lava ona tatou mulimuli i le faaaʻoaʻoga a Iesu? Ioe, e mafai. Ia manatua le augani a Peteru, ia tatou “mulimulituʻi i tulaga aao o Iesu,” ae lē i se tulaga lelei atoatoa. Pe a tatou mulimuli lelei i tulaga aao o Iesu, i le faia o le mea sili e tatou te mafaia o ni tagata lē lelei atoatoa, ua tatou utagia la upu a le aposetolo o Ioane: Ia “faaauau pea ona savali e faapei ona savali o Iesu.”—1 Ioa. 2:6.

6-7. Aiseā e faapea atu ai, e tatou te matuā vavalalata iā Ieova pe a tatou mulimuli i tulaga aao o Iesu?

⁶ O le mulimuli i tulaga aao o Iesu, e tatou te vavalalata ai iā Ieova. E faapefea? Muamua, na faataatia e Iesu se faaaʻoaʻoga mataʻina o le auala e ola ai, ina ia faafiafia ai le finagalo o le Atua. (Ioa. 8:29) O lea, o le mulimuli i tulaga aao o Iesu, e tatou te faafiafiaina ai Ieova. E tatou te mautinoa foʻi, e vavalalata lo tatou Tamā i le lagi iā i latou e taumafai malosi e avea ma ana uō.—Iako. 4:8.

⁷ Lona lua, na faaaʻoaʻo atoatoa Iesu i lona Tamā. O le māfuaaga lenā na fetalai ai Iesu: “O lē ua vaai mai iā te aʻu, ua vaai foʻi o ia i le  Tamā.” (Ioa. 14:9) Pe a tatou faaaʻoaʻo i uiga o Iesu ma le auala na ia feutagaʻi ai ma tagata, ua tatou faaaʻoaʻo foʻi la iā Ieova. O se faaaʻoaʻoga, na faaalia e Iesu le alofa mutimutivale i se lepela. Na ia faaalia foʻi le tigā alofa i se fafine na maua i se maʻi tigā, ma i latou na faavauvau. (Mare. 1:40, 41; 5:25-34; Ioa. 11:33-35) O le tele e tatou te faaaʻoaʻo ai i uiga o Ieova, o lo tatou vavalalata foʻi lenā iā te ia.

8. Ia faamatala pe faapefea i le mulimuli i tulaga aao o Iesu ona tatou “manumalo” ai i le lalolagi.

⁸ O le mulimuli i tulaga aao o Iesu, e fesoasoani iā i tatou ia lē tosina atu ai i lenei lalolagi amioleaga. I le pō mulimuli o le soifuaga o Iesu i le lalolagi, na ia fetalai ai: “Ua ou manumalo i le lalolagi.” (Ioa. 16:33) Na uiga atu Iesu e leʻi taaʻina o ia i mafaufauga, o sini ma gaoioiga a lenei lalolagi. E leʻi tosina ese foʻi Iesu mai i le māfuaaga na auina mai ai o ia i le lalolagi, ia faasilisilia Ieova. Ae ā i tatou? I lenei lalolagi, e tele mea e tatou te ono tosina ese ai. Ae pe a tatou faaaʻoaʻo iā Iesu i le taulaʻi pea i le faia o le finagalo o Ieova, o le a tatou “manumalo” foʻi la i le lalolagi.—1 Ioa. 5:5.

9. O le ā e tatau ona tatou faia, ina ia tatou tumau ai i le ala i le ola e faavavau?

⁹ O le mulimuli i tulaga aao o Iesu, e maua ai le ola e faavavau. Ina ua fesili atu se tauleʻaleʻa mauʻoa po o le ā e na te faia ina ia maua ai le ola e faavavau, na fetalai atu Iesu: “Sau . . . ma mulimuli mai iā te aʻu.” (Mata. 19:16-21) Na fetalai atu Iesu i isi tagata Iutaia e leʻi talitonu o ia o le Keriso, E mulimuli mai aʻu mamoe iā te aʻu ma ua ou foaʻi atu foʻi iā i latou le ola e faavavau. (Ioa. 10:24-29) Na fetalai atu foʻi Iesu iā Nikotemo o se tasi o le ʻau Saniterini na fiafia i ana aʻoaʻoga, o “tagata uma e faatuatua iā te ia” e “maua le ola e faavavau.” (Ioa. 3:16) E tatou te faatuatua iā Iesu, e ala i le faatatau o ana fetalaiga ma mulimuli i lana faaaʻoaʻoga. Pe a tatou faia faapea, o le a tatou tumau ai i le ala i le ola e faavavau.—Mata. 7:14.

10. O le ā e aofia ai i le “iloa” lelei o Iesu? (Ioane 17:3)

¹⁰ E tatau ona tatou iloa Iesu, a o tatou leʻi mulimulituʻi i ona tulaga aao. (Faitau le Ioane 17:3.) O le “iloa” o Iesu, o se gaoioiga e faaauau pea ona fai. E tatau ona faateleina pea lo tatou iloa o Iesu, e ala i le aʻoaʻoina o ona uiga, le auala e mafaufau ai ma ana tapulaa. Po o le ā lava le umi talu ona tatou iai i le upu moni, e tatau ona faaauau pea ona tatou iloa Ieova ma lona Alo.

11. O ā mea o loo i tusitusiga a le ʻAu Faievagelia e toʻafā?

¹¹ Na faaaofia e Ieova i lana Afioga, tusitusiga a le ʻAu Faievagelia e toʻafā ina ia fesoasoani iā i tatou e iloa ai lona Alo. O loo aofia ai i tusitusiga a Faievagelia le talaaga o le soifuaga ma le faiva a Iesu. Ua taʻu mai e na tala iā i tatou fetalaiga a Iesu, mea na ia faia ma ona faalogona. Ua fesoasoani nei Evagelia e fā, e  tatou te “manatunatu lelei” ai i le faaaʻoaʻoga a Iesu. (Epe. 12:3) O loo iai i na tala tulaga aao o Iesu. O lo tatou suʻesuʻeina la o na Evagelia, o le a faateleina ai pea lo tatou iloa o Iesu. O le iʻuga, o le a tatou mulimulituʻi ai i ona tulaga aao.

12. E faapefea ona aogā atoatoa iā i tatou tusi a le ʻAu Faievagelia?

¹² Ina ia aogā atoatoa iā i tatou tusi a le ʻAu Faievagelia, e iai isi mea e tatau ona tatou faia nai lo o le tau ina faitau i ai. E tatau ona faaalu se taimi e suʻesuʻe lelei ai na tusi ma manatunatu loloto i ai. (Faatusatusa i le Iosua 1:8.) Seʻi o tatou talanoaina ni auala se lua e fesoasoani e tatou te manatunatu loloto ai, ma faatatau mea e tatou te faitau ai i na tusi.

13. E faapefea ona pei lava o loo tutupu moni mea o loo tusia i tusi a le ʻAu Faievagelia?

¹³ Muamua, ia pei lava o loo tutupu moni tala o loo i tusi a le ʻAu Faievagelia. Ia faaāta o loo e vaai, faalogo ma lagonaina mea na tutupu. Ina ia fesoasoani iā te oe e faia faapea, fai ni au saʻiliʻiliga i lomiga ua saunia e le faalapotopotoga a Ieova. Ia iloilo le siʻomaga o le mau o loo e suʻesuʻeina, o mea na tutupu muamua atu, ma mea na tutupu mulimuli ane. Ia suʻe nisi faamatalaga atili e faatatau i tagata ma nofoaga o loo taʻua i le tala. Ia faatusatusa le tala o loo e suʻesuʻeina ma le tala lava lea e tasi o loo i isi tusi a le ʻAu Faievagelia. O nisi taimi e tusia auʻiliʻili ai e se Faievagelia se mea na tupu, ae e lē o tusia e isi Faievagelia lenā mea.

14-15. O le ā e tatau ona fai, ina ia faatatau ai i o tatou olaga mea ua aʻoaʻoina mai i tusi a Evagelia?

¹⁴ Lua, faatatau i lou olaga mea o loo i tusi a le ʻAu Faievagelia. (Ioa. 13:17) Pe a uma ona e suʻesuʻe maeʻaeʻa se tusi a le ʻAu Faievagelia, ia fesili ifo, O le ā se lesona o loo i lenei tala e mafai ona ou faatatauina i loʻu olaga? E faapefea ona ou faaaogāina lenei lesona e fesoasoani ai i se isi? Ia taumafai e mafaufau i se tagata patino, ma i se taimi talafeagai, ia faasoa atu i se auala alofa ma faautauta le lesona na e aʻoaʻoina.

 ¹⁵ Seʻi o tatou iloiloina se faaaʻoaʻoga o le auala e mafai ai ona tatou faatatau nei auala e lua. O le a tatou suʻesuʻeina le tala i le fafine mativa ua oti lana tane na mātauina e Iesu i le malumalu.

16. Ia faamatala le vaaiga o loo i le Mareko 12:41.

¹⁶ Ia pei lava o loo tupu moni le tala. (Faitau le Mareko 12:41.) Ia faaāta le mea na tupu. Iā Nisani 11, 33 T.A., ua toe o ni nai aso ona fasiotia lea o Iesu. Ua alu le aso o aʻoaʻo Iesu i le malumalu. Na tetee atu taʻitaʻi lotu iā te ia. Muamua atu, na fesiligia e nisi o taʻitaʻi lotu lana pule. O isi na taumafai e fai atu ni fesili faigatā, ina ia maileia ai o ia. (Mare. 11:27-33; 12:13-34) Ua agaʻi atu nei Iesu i le isi itu o le malumalu atonu i le nofoaga e taʻua o le Lotoā o Fafine, lea e na te iloa atu ai pusa e lafo ai tupe. Ua nofo i lalo ma mātauina tagata a o lafo a latou meaalofa i pusa. Na ia mātauina le toʻatele o tagata mauʻoa o loo lafo a latou tupe e tele. Atonu na latalata Iesu i le mea o loo iai pusa tupe, lea na ia lagona lelei ai le tatagi leotele o le paʻuʻū o tupe i totonu o pusa.

17. O le ā na faia e le fafine mativa ua oti lana tane o loo taʻua i le Mareko 12:42?

¹⁷ Faitau le Mareko 12:42. E leʻi umi ae iloa atu e Iesu se fafine. O ia o se “fafine mativa ua oti lana tane.” (Luka 21:2) Na matuā faigatā lona olaga. Atonu e lē lava ni ana tupe e faatau ai mea na ia manaʻomia mo aso uma. E ui i lea, na alu atu lenei fafine i se tasi o pusa ma lafo i ai ni tupe iti se lua, lea e tau lē lagona le tatagi a o paʻuʻū ifo i le pusa. Na silafia e Iesu le tupe na ia lafoina. O ni tupe iti se lua e taʻua o le kotane lea e matuā itiiti lava lona aogā i lenā taimi. E lē taitai lava lenā tupe e faatau ai se tamaʻi manulele mo meaʻai lea e matuā taugofie lona tau.

18. I le Mareko 12:43, 44, o le ā na taʻua e Iesu e faatatau i le foaʻi a le fafine ua oti lana tane?

¹⁸ Faitau le Mareko 12:43, 44. Na matuā maofa Iesu i lenei fafine ua oti lana tane. O lea, na valaau atu ai Iesu i ona soo ma faasino atu le fafine ua oti lana tane ma faapea atu: E “sili atu mea ua lafo e lenei fafine mativa ua oti lana tane, nai lo o i latou uma.” Na ia faamatala atu iā i latou: “O i latou uma [aemaise lava tagata mauʻoa], ua lafo atu nisi o mea mai i a latou tupe e tele, a o le fafine mativa, ua ia lafo tupe uma ua iā te ia e ola ai.” Ina ua lafoina e lenei fafine faamaoni ua oti lana tane tupe uma ua iā te ia i lenā aso, ua ia maufaatuatuaina Ieova e na te tausia o ia.—Sala. 26:3.

19. O le ā se lesona tāua e tatou te aʻoaʻoina mai i fetalaiga a Iesu, e faatatau i le fafine mativa ua oti lana tane?

¹⁹ Ia faatatau le tala i lou olaga. Ia fesili ifo, ʻO le ā se lesona tāua ou te aʻoaʻoina mai i le fafine mativa ua oti lana tane?’ Seʻi mafaufau i lenā fafine ua oti lana tane. E mautinoa na manaʻo lenei fafine ia tele sana foaʻi mo Ieova. Peitaʻi, na ia faia le mea e na te mafaia ma foaʻi atu iā Ieova le mea sili na te mafaia. Na silafia e Iesu na tautele i lona Tamā le foaʻi a lenei fafine. O le lesona tāua lenei mo i tatou. E faafiafiaina le finagalo o Ieova pe a tatou foaʻi atu iā te ia le mea e sili e tatou te mafaia, o lo tatou auauna iā te ia ma o tatou lotoatoa ma o tatou ola atoa. (Mata. 22:37; Kolo. 3:23) Maʻeu le faafiafiaina o le finagalo o Ieova a o ia silasila mai, o loo tatou faia le mea sili e tatou te mafaia! E tatou te faatatauina lenā mataupu silisili i le tele o le taimi ma le malosi e tatou te faaaluina i la tatou tapuaʻiga, e aofia ai le auai i sauniga ma talaʻiga.

20. E faapefea ona e faatatauina le lesona mai i le tala i le fafine ua oti lana tane? Aumai se faataʻitaʻiga.

²⁰ E faapefea ona e faatatauina le lesona mai i le tala i le fafine ua oti lana tane? Ia taumafai  e mafaufau i se tagata patino atonu o loo manaʻomia se faamautinoaga, o loo faafiafiaina Ieova i ana taumafaiga. O se faataʻitaʻiga, pe e te iloa se tuafafine matua atonu o loo lagona le lotovaivai ma le lē aogā, ona ua lē o toe lava lona malosi e faia ai ni mea se tele i le faiva e pei ona masani ai? Po o e mafaufau i se uso ua lotovaivai, ona ua leva ona maua i se maʻi tugā ma ua lē mafai ai ona auai i sauniga uma i le Maota mo Sauniga? Ia fesoasoani iā i latou na, e ala i le ʻfai atu o ni upu lelei e atiaʻe ai.’ (Efe. 4:29) Ia faasoa atu iā i latou se lesona faalaeiau na tatou aʻoaʻoina mai i le tala e faatatau i le fafine mativa ua oti lana tane. O au upu faalaeiau, e faamautinoa atu ai iā i latou, e finagalo malie Ieova pe a tatou faia le mea sili e tatou te mafaia. (Faata. 15:23; 1 Tesa. 5:11) Pe a tatou faamālō atu i si i le faia o le mea sili mo Ieova e tusa lava pe itiiti, ua tatou mulimulituʻi la i tulaga aao o Iesu.

21. O le ā ua e maumauaʻi e fai?

²¹ Maʻeu lo tatou lotofaafetai i tusi a le ʻAu Faievagelia, ua saunia ai le tele o faamatalaga e faatatau i le soifuaga o Iesu, lea ua mafai ai ona tatou faaaʻoaʻo iā te ia ma mulimulituʻi i ona tulaga aao! Aiseā e lē faaaofia ai i suʻesuʻega a le tagata lava ia po o tapuaʻiga a le aiga le suʻesuʻeina o tusi a Evagelia? Ina ia aogā atoatoa iā i tatou le suʻesuʻeina o tusi a Evagelia, e manaʻomia ona faaāta ia pei lava o loo tutupu moni tala o loo i na tusi ma faatatau i o tatou olaga. E lē gata e tatou te faaaʻoaʻo i mea na faia e Iesu, ae e manaʻomia foʻi ona tatou faalogo i ana fetalaiga. O le a tatou iloiloina i le suʻesuʻega o loo sosoo mai, mea e tatou te aʻoaʻoina mai i upu faaiʻu a Iesu a o leʻi maliu.