1. O le ā e mātauina e Ieova e faatatau i ona tagata?

E FIAFIA Ieova le Atua i ona tagata. (Sala. 149:4) Maʻeu le faalaeiau o lenā manatu! E mātauina e Ieova o tatou uiga lelei; e na te silafia foʻi mea e mafai ona tatou faia, ma e na te tosina atu i tatou iā te ia. Pe a tatou faamaoni pea iā te ia, o le a ia vavalalata mai iā i tatou e oo i le faavavau!—Ioa. 6:44.

2. Aiseā e faigatā ai i nisi ona talitonu e alofa Ieova iā i latou?

² Atonu e faapea mai se tasi, ʻOu te iloa e alofa Ieova i ona tagata, ae faapefea ona ou mautinoa e alofa Ieova iā te aʻu?’ O le ā le māfuaaga atonu e fesili ai faapea se tasi? Ua faapea mai Oksana *, o se tasi na faileagaina a o laʻititi: “Na matuā ou fiafia lava ina ua ou papatiso ma amata ona ou paeonia. Ae i le 15 tausaga mulimuli ane ai, na ou toe manatua ai mea tigā na tutupu i loʻu olaga. O lea, na ou manatu ai e lē o finagalo malie Ieova iā te aʻu, ma e lē tatau ona ou mauaina lona alofa.” Ua faapea mai Yua, o se tuafafine paeonia na aafia i le tele o faafitauli a o laʻititi: “Na tuuina atu loʻu ola e auauna iā Ieova, ona na ou manaʻo e faafiafia o ia. Ae na ou mautinoa, e lē mafai ona alofa Ieova iā te au.”

3. O le ā o le a tatou iloiloina i lenei suʻesuʻega?

³ E mautinoa e te alofa tele iā Ieova e pei o Kerisiano faamaoni na taʻua muamua. Peitaʻi, atonu e te masalosalo pe alofa Ieova iā te oe. Aiseā e tatau ai ona e mautinoa e alofa faapelepele  Ieova iā te oe? O le ā e fesoasoani e fesagaʻia ai ni manatu sesē ua lofitūina ai oe? Seʻi o tatou iloiloina tali o na fesili.

4. Aiseā e mataʻutia ai aafiaga o le masalosalo i le alofa o Ieova iā i tatou?

⁴ O le alofa o se uunaʻiga malosi. Pe a tatou mautinoa i le alofa o Ieova ma lana lagolagosua, o le a uunaʻia ai i tatou e auauna iā te ia ma le lotoatoa e ui i luʻi o le olaga. Peitaʻi, ʻo le a itiiti lo tatou malosi’ pe a tatou masalosalo i le alofa faapelepele o Ieova mo i tatou. (Faata. 24:10) Pe a lotovaivai ma mou atu lo tatou faatuatua i le alofa o le Atua, o le a faigofie la ona tatou aafia i osofaʻiga a Satani.—Efe. 6:16.

5. Ua faapefea ona aafia isi ona o le masalosalo i le alofa o le Atua iā i latou?

⁵ O nisi o Kerisiano faamaoni i aso nei, ua faavaivaia faaleagaga i le masalosalo. Ua faapea mai se toeaina e igoa iā James: “E ui ina ou auauna i le Peteli ma olioli i le talaʻiga i se faapotopotoga e ese le gagana, ae ou te leʻi mautinoa pe na talia moni lava e Ieova laʻu auaunaga. I se tasi taimi, na ou tomānatu ai po o faafofoga mai Ieova i aʻu tatalo.” Na faapea mai foʻi Eva o loo auauna faataimi atoa: “Na ou iloa le mataʻutia o aafiaga o le masalosalo i le alofa o Ieova, ona e tatou te paʻuʻū ai faaleagaga ma aafia ai la tatou auaunaga. O le a mou ese ai lo tatou fiafia i mea faaleagaga, ma lē toe mananaʻo ai e auauna iā Ieova.” Ua faapea mai Michael o se paeonia sauatoa ma o se toeaina: “Pe afai e te lē talitonu e alofa faapelepele le Atua iā te oe, o le a e tafetafea ese mai iā te ia.”

6. O le ā e tatau ona tatou faia, pe a oso aʻe masalosaloga e faatatau i le alofa o le Atua iā i tatou?

⁶ O mea na tutupu i uso ma tuafāfine, ua faaalia ai lo tatou matuā lamatia faaleagaga pe a iā i tatou manatu sesē. Ae o le ā e tatau ona tatou faia? Pe a oso aʻe o tatou masalosaloga e faatatau i le alofa o le Atua mo i tatou, ia vave gaoioi e teena na masalosaloga! Ia tatalo iā Ieova ia suia na masalosaloga i le filemu mai i le Atua lea e leoleoina ai o outou loto ma mafaufau. (Sala. 139:23; Fili. 4:6, 7) Ia manatua, e lē na o oe e oo i ai na masalosaloga. O loo tauivi foʻi isi uso ma tuafāfine faamaoni ma na faalogona sesē. Na feagai foʻi auauna a Ieova i le taimi ua teʻa ma  na luʻi. Seʻi o tatou iloiloina mea e tatou te aʻoaʻoina mai i le faaaʻoaʻoga a le aposetolo o Paulo.

7. O ā faafitauli na fesagaʻia e Paulo?

⁷ Pe e iai ni taimi na lofitūina ai oe ona o le tele o tiute tauave, ma ua lē mafai ona e taulimaina uma? Afai o lea, e te malamalama la i faalogona o Paulo. Na matuā popole o ia “i faapotopotoga uma.” (2 Kori. 11:23-28) Pe e iai ni taimi na mou ai lou olioli ona o aafiaga tumau i lou soifua mālōlōina? Na faaauau ona aafia Paulo i le “mea matuitui i le tino,” atonu o se maʻi na aafia ai ma na naunau o ia ina ia aveesea. (2 Kori. 12:7-10) Pe e te lotovaivai ona o ou vaivaiga? Na faapena foʻi Paulo i nisi taimi. Na taʻua e Paulo o ia o le “tagata malaia,” ona sa tauivi pea ma ona lava vaivaiga.—Roma 7:21-24.

8. O le ā na fesoasoani iā Paulo e fesagaʻia ai ona faafitauli?

⁸ Na auauna pea Paulo iā Ieova, e ui ina fesagaʻia tofotofoga eseese ma tulaga na faavaivaia ai o ia. Na faapefea ona maua e Paulo le malosi e auauna ai pea iā Ieova? E ui na iloa lelei e Paulo ona vaivaiga, ae na malosi lona faatuatua i le togiola. Na ia iloa lelei le folafolaga a Iesu, o “tagata uma e faatuatua iā [Iesu] e maua le ola e faavavau.” (Ioa. 3:16; Roma 6:23) E mautinoa o Paulo o se tasi o i latou e faatuatua i le togiola. Na mautinoa e Paulo, e nofosauni Ieova e faamagalo i latou e faia agasala matuiā pe a faaalia le salamō.—Sala. 86:5.

9. O le ā e tatou te aʻoaʻoina mai i upu a Paulo i le Kalatia 2:20?

⁹ Na faatuatua foʻi Paulo i le malosi o le alofa o le Atua e pei ona faaalia e Keriso. (Faitau le Kalatia 2:20.) Seʻi mātau upu faalaeiau o loo i le faaiʻuga o lenā fuaiupu. Ua faapea mai Paulo: O le “Alo o le Atua . . . na alofa mai iā te aʻu ma foaʻiina mai lona ola mo aʻu.” E leʻi faatapulaaina e Paulo le alofa o le Atua, e pei ua faapea mai, ʻUa ou iloa le māfuaaga e alofa ai Ieova i oʻu uso ae lē mafai ona alofa iā te aʻu.’ Na faamanatu e Paulo i tagata Roma: “Auā na maliu Keriso mo i tatou a o tatou agasala pea.” (Roma 5:8) E lē faatapulaaina le alofa o le Atua.

10. O le ā e tatou te aʻoaʻoina mai i le Roma 8:38, 39?

¹⁰ Faitau le Roma 8:38, 39. Na matuā mautinoa Paulo i le malosi o le alofa o le Atua. O lea, na ia tusi ai e leai se mea e mafai “ona faateʻaeseina i tatou mai i le alofa o le Atua.” Na  iloa e Paulo le auala na feutagaʻi ai ma le onosaʻi Ieova ma le nuu o Isaraelu. Na ia iloa foʻi le auala na faaalia ai e Ieova le alofa mutimutivale iā te ia. Atonu e mafai ona taaofaʻi le manatu o Paulo i le auala lenei, ʻOna na auina mai e Ieova lona Alo e maliu mo aʻu, pe e iai la se māfuaaga ou te masalosalo ai i lona alofa mo aʻu?’—Roma 8:32.

11. E ui na faia e Paulo ni agasala e pei ona taʻua i le 1 Timoteo 1:12-15, ae aiseā na ia mautinoa ai e alofa le Atua iā te ia?

¹¹ Faitau le 1 Timoteo 1:12-15. Atonu e iai taimi na taʻusalaina ai e Paulo o ia lava, ona o mea na ia faia a o leʻi avea ma Kerisiano. Na taʻua e Paulo o ia o se tagata na “sili” ona agasala, ma e lē o se mea e faateʻia ai i tatou. A o leʻi aʻoaʻoina e Paulo le upu moni, na ia matuā sauāina Kerisiano mai i lea aai i lea aai, tuuina isi i le falepuipui, ma lagolagoina le fasiotia o isi. (Galu. 26:10, 11) Faamata o ā faalogona o Paulo pe a feiloaʻi ma se Kerisiano talavou na ia lagolagoina le fasiotia o ona mātua? Na salamō Paulo mai i ana mea sesē, ae na ia iloa e lē mafai ona ia toe suia mea ua uma na tutupu. Na talitonu Paulo na maliu Keriso mo ia, ma na ia tusi mai ma le mautinoa: “Ona o le agalelei faifua o le Atua ua ou faapenei ai.” (1 Kori. 15:3, 10) O le ā le lesona mo i tatou? Ia mautinoa na maliu Keriso mo oe, ma ua mafai ai ona maua sa oulua faiā māfana ma Ieova. (Galu. 3:19) O le mea e sili ona tāua i le Atua, o mea e tatou te faia i le taimi lenei ma le lumanaʻi, ae e lē o mea sesē na tatou faia i le taimi ua teʻa, e tusa pe na avea i tatou ma Molimau a Ieova pe leai.—Isa. 1:18.

12. E faapefea ona fesoasoani iā i tatou le 1 Ioane 3:19, 20, pe a lagona le lē aogā po o le lē alofagia?

¹² Pe a e mafaufau e faatatau i le maliu o Iesu mo au agasala, atonu e te faapea ifo, ʻE  lē aogā iā te aʻu le maliu o Iesu.’ Aiseā e te mafaufau ai faapena? E ono faasesēina i tatou e o tatou loto lē lelei atoatoa, ma tatou lagona ai le lē aogā po o le lē alofagia. (Faitau le 1 Ioane 3:19, 20.) I taimi faapena, e tatau ona tatou manatua “e sili atu le Atua i o tatou loto.” E sili atu ona malosi le alofa o lo tatou Tamā i le lagi ma lana faamagaloga, nai lo faalogona sesē ua mauaa i o tatou loto. E tatau ona tatou faamautinoa iā i tatou lava, e alofa Ieova iā i tatou. Ina ia faia faapea, e tatau ona tatou suʻesuʻeina e lē aunoa lana Afioga, tatalo iā te ia e lē aunoa, ma faatasitasi e lē aunoa ma ana auauna faamaoni. Aiseā e tāua tele ai le faia o na mea?

13. E faapefea ona fesoasoani iā i tatou le suʻesuʻeina o le Afioga a le Atua? (Tagaʻi i le pusa “ Le Auala na Fesoasoani ai le Afioga a le Atua iā i Latou.”)

¹³ O le suʻesuʻeina o le Afioga a le Atua i aso uma, o le a e iloa lelei ai uiga matagofie o Ieova ma ona faalogona māfana mo oe. O le mafaufau loloto i se vaega o le Afioga a le Atua i aso taʻitasi, e fesoasoani iā te oe ia iai se vaaiga saʻo, ma “faasaʻo ai mea” i lou mafaufau ma lou loto. (2 Timo. 3:16) Ua faapea mai se toeaina e igoa iā Kevin na tauivi ma faalogona lē aogā: “Na fesoasoani iā te aʻu le faitauina o le Salamo 103 ma mafaufau loloto i ai, e faasaʻo ai loʻu mafaufau ma malamalama ai i faalogona moni o Ieova iā te aʻu.” Ua faapea mai Eva lea na taʻua muamua: “Ou te mafaufau loloto i faalogona o Ieova i le faaiʻuga o le aso. E aumaia ai iā te aʻu le filemu o le loto ma atiaʻe ai loʻu faatuatua.”

14. E faapefea ona fesoasoani le tatalo iā i tatou?

¹⁴ Ia tatalo e lē aunoa. (1 Tesa. 5:17) O le iai o se faauōga māfana ma se tasi, e fua i le iai o ni fesootaʻiga faifai pea ma lenā tagata. E faapena foʻi la tatou faauōga ma Ieova. Pe a faailoa atu o tatou faalogona, manatu ma o tatou popolega iā te ia i le tatalo, e faaalia ai lo tatou maufaatuatuaina o ia ma e tatou te iloa e alofa o ia iā i tatou. (Sala. 94:17-19; 1 Ioa. 5:14, 15) Na faapea mai Yua lea na taʻua muamua: “Pe a ou tatalo, ou te taumafai e taʻu atu iā Ieova le tele o mea nai lo na o mea na tutupu i lenā aso, ma sasaa atu iā te ia oʻu faalogona moni. Na faasolosolo ona ou iloa ai o Ieova o se Tamā e alofa moni i lana fanau.”—Tagaʻi i le pusa, “ Pe na E Faitau i Ai?”

15. E faapefea ona faaalia e Ieova le naunau moni iā i tatou?

¹⁵ Ia faifai mea faatasi ma uō faamaoni; o i latou o se meaalofa mai iā Ieova. (Iako. 1:17) E naunau moni lo tatou Tamā i le lagi iā i tatou, e ala i le saunia o se aiga faaleagaga o uso ma tuafāfine o ē e faaalia le “alofa i taimi uma.” (Faata. 17:17) Na taʻua e Paulo i lana  tusi i Kolose ni Kerisiano na lagolagoina o ia ma na avea o ni ē e ʻfaamalosiau iā te ia.’ (Kolo. 4:10, 11) E oo foʻi iā Iesu Keriso na ia manaʻomia, ma na ia talisapaia le lagolagosua a ana uō, o agelu ma tagata.—Luka 22:28, 43.

16. E faapefea ona fesoasoani uō faamaoni e tatou te vavalalata ai iā Ieova?

¹⁶ Po o e maua atoatoa aogā mai i le meaalofa a Ieova o uō faamaoni? E lē o se vaivaiga le faasoa atu o ou popolega i se uō taʻumatuaina, ae o se puipuiga. Seʻi mātau le faamatalaga a James lea na taʻua muamua: “O le iai o faauōga ma Kerisiano taʻumatuaina, ua fesoasoani tele iā te aʻu. Pe a lofitūina aʻu i manatu sesē, e faalogologo ma le onosaʻi nei uō pele ma faamanatu mai e latou te alolofa iā te aʻu. O la latou fesoasoani, ua ou iloa ai le alofa ma le manatu mamafa o Ieova iā te aʻu.” Maʻeu le tāua o le atiaʻe ma le faatumauina o faauōga ma o tatou uso ma tuafāfine faaleagaga!

17-18. O ai e tatau ona tatou faalogo i ai, ma aiseā?

¹⁷ E lē manaʻo Satani e tatou te tauivi pea e fai le mea saʻo. Ae e manaʻo ia tatou talitonu e lē alofa Ieova iā i tatou, ma e na te lē laveaʻia i tatou ona e leai so tatou aogā. Peitaʻi, ua tatou aʻoaʻoina e lē saʻo na manatu.

¹⁸ E alofa Ieova iā te oe ma e matuā tautele oe iā te ia. Pe a e usitaʻi iā te ia, o le a e “tumau ai i lona alofa” e pei o Iesu. (Ioa. 15:10) Aua tatou te faalogo iā Satani, po o tatou loto pe a taʻusalaina i tatou. Ae ia faalogo iā Ieova o lē e silafia mea lelei iā i tatou taʻitoʻatasi. Ia mautinoa e fiafia Ieova i ona tagata, e aofia ai ma oe.