1. O ā auala e tatou te ono maua ai fautuaga, ma aiseā e tatou te manaʻomia uma ai?

E TATOU te manaʻomia uma fautuaga mai i lea taimi i lea taimi. O nisi taimi, e tausolomua ona tatou saʻili fautuaga mai i se tasi e tatou te faaaloalogia. Ae o nisi taimi atonu e aumai e se tasi se fautuaga iā i tatou, e faailoa mai ai se “laasaga sesē” o le a tatou uia e oo atu ai i faanoanoaga. (Kala. 6:1) E tatou te maua foʻi fautuaga e ala i se aʻoaʻiga pe a tatou faia se agasala matuiā. Po o le ā lava le auala e aumai ai se fautuaga, e tatau ona tatou faalogo i ai. E aogā lo tatou faia faapea, ona e faasaoina ai o tatou ola!​—Faata. 6:23.

2. E tusa ai ma le Faataoto 12:15, aiseā e tatau ai ona tatou faalogo i fautuaga?

² Ua faalaeiauina i tatou e le mau autū ina ia “faalogo i upu a ē e atamamai.” (Faata. 22:17) E leai se tagata e na te iloa mea uma. E iai lava se isi e sili atu lona iloa po o lona poto masani, nai lo o i tatou. (Faitau le Faataoto 12:15.) O lea, o le faalogo i fautuaga o se faailoga o le lotomaulalo. E faailoa atu ai e tatou te iloa mea e gata ai lo tatou malosi, ma e tatou te manaʻomia le fesoasoani ina ia ausia ai o tatou sini. Na faagaeeina e le agaga o Ieova le tupu atamai o Solomona e tusi: “O le toʻatele o le ʻau faufautua e taunuu ai mea.”​—Faata. 15:22.

3. O ā auala e tatou te ono maua ai fautuaga?

³ Atonu e tatou te maua fautuaga i se auala tuusaʻo pe e lē tuusaʻo. O le ā e uiga atu i ai fautuaga lē tuusaʻo? Atonu e tatou te faitau i se manatu mai i le Tusi Paia po o se tatou lomiga e ono taofia ai i tatou i le faia o se mea, ma uunaʻia ai i tatou e suia le auala o le a tatou uia. O lea ua uunaʻia ai i tatou e suia o tatou mafaufauga ma gaoioiga. (Epe. 4:12) E mafai  ona uiga atu lenā mea i le fautuaga lē tuusaʻo. O le ā e uiga i ai fautuaga tuusaʻo? E ono faailoa mai e se toeaina po o se uso taʻumatuaina se mea e manaʻomia ona tatou galulue i ai. O le uiga lenā o le fautuaga tuusaʻo. Pe a faailoa mai e se tasi e alofa iā i tatou se fautuaga mai i le Tusi Paia, e tatau ona tatou faaalia le talisapaia e ala i le faalogo ma faatatau le fautuaga.

4. I le Failauga 7:9, o le ā e tatau ona tatou ʻalofia pe a maua se fautuaga?

⁴ O le mea moni, e ono faigatā iā i tatou ona talia fautuaga tuusaʻo. Atonu e tatou te lē fiafia ai. Aiseā? E ui e vave ona tatou taʻutino atu e tatou te lē lelei atoatoa, ae atonu e faigatā ona tatou talia se fautuaga pe a faailoa mai e se tasi se mea sesē na tatou faia. (Faitau le Failauga 7:9.) E tatou te ono faia ni faamolemolega ma fesiligia le uunaʻiga na aumai ai le fautuaga. Pe e tatou te feita foʻi ona o le auala na aumai ai le fautuaga. E tatou te ono faitioina foʻi lē na aumai ai le fautuaga ma faapea: ʻE leai sana aiā e fautua mai ai iā te aʻu, e iai foʻi ona sesē.’ E tatou te teena se fautuaga pe a lē fetaui ma i tatou, ae saʻili se fautuaga e tatou te fiafia i ai mai i se isi tagata.

5. O le ā o le a tatou talanoaina i lenei suʻesuʻega?

⁵ I lenei suʻesuʻega, o le a tatou talanoaina ai faaaʻoaʻoga faale-Tusi Paia o i latou na teena fautuaga ma i latou na taliaina. O le a tatou iloiloina foʻi auala e fesoasoani iā i tatou, e talia ai fautuaga ma maua ai aogā.

6. O le ā e tatou te aʻoaʻoina mai i le auala na tali atu ai le tupu o Reopoamo i fautuaga na ia maua?

⁶ Seʻi o tatou iloiloina le faaaʻoaʻoga a Reopoamo. Ina ua avea o ia ma tupu o Isaraelu na talosaga atu ai ona tagata iā te ia, ina ia faamāmā le avega na faaee e Solomona lona tamā iā i latou. Na talosaga atu Reopoamo i toeaina Isaraelu mo se fesoasoani i le auala e tali atu ai i tagata. Na fautuaina e toeaina le tupu, pe a ia faia le mea o loo talosaga atu ai tagata o le a latou lagolagoina o ia. (1 Tu. 12:3-7) E leʻi faamalieina Reopoamo i fautuaga a toeaina, o lea na ia fesili atu ai i tama talavou na latou feola faatasi. O na tamāloloa e pe ā ma le taʻi 40 o latou tausaga, ma e foliga mai e iai ni o latou poto masani i le olaga. (2 No. 12:13) Peitaʻi, na latou avatu iā Reopoamo i lenā taimi se fautuaga leaga. Na latou fautuaina o ia ina ia faaopoopo le mamafa o le avega i tagata. (1 Tu. 12:8-11) Na fesagaʻia e Reopoamo ni filifiliga se lua, ma na tatau ona ia talosaga atu iā Ieova e ala i le tatalo, po o lē fea fautuaga e tatau ona ia usitaʻia. Peitaʻi, na ia filifili e talia le fautuaga na fiafia i ai, ma faalogo i tauleleʻa. E mataʻutia iʻuga na oo iā Reopoamo ma tagata Isaraelu. O lea, e lē o taimi uma e tatou te fia faalogo ai pe a fautuaina i tatou, ae afai e faavae mai i le Afioga a le Atua fautuaga e tatau la ona tatou taliaina.

7. O le ā e tatou te aʻoaʻoina mai i le faaaʻoaʻoga leaga a le tupu o Usia?

⁷ Na teena e le tupu o Usia le fautuaga. Na ia alu atu i se vaega o le malumalu a Ieova, lea e na o ositaulaga e faatagaina ai ma taumafai e faamū mea manogi. Na faapea atu ositaulaga a Ieova iā te ia: “Usia e, e leai se feʻau e te faamū ai mea manogi iā Ieova, o le feʻau lenā a . . . ositaulaga.” O le ā le tali a Usia? Pe ana talia ma le lotomaulalo le fautuaga ma vave alu ese mai le malumalu, atonu e faamagalo o ia e Ieova. Peitaʻi, na “matuā ita Usia.” Aiseā na ia teena ai le fautuaga? Na ia manatu ona o ia o le tupu, e iā te ia le aiā e faia ai so o se mea na manaʻo i ai. Ae e lē o le silasila lenā a Ieova. O le gaoioiga faamaualuga a Usia, na avea ai o ia “ma lepela e oo lava i le aso na oti ai.” (2 No. 26:16-21) Ua tatou aʻoaʻoina mai i le  faaaʻoaʻoga a Usia po o le ā lava lo tatou tulaga, ae pe a tatou teena fautuaga mai i le Tusi Paia o le a teena foʻi i tatou e Ieova.

8. Na faapefea ona tali atu Iopu i fautuaga?

⁸ E ese mai i faaaʻoaʻoga lapataʻi na tatou talanoaina, ae o loo taʻua foʻi i le Tusi Paia faaaʻoaʻoga lelei a i latou na faamanuiaina, ona na latou taliaina fautuaga. Mātau le faaaʻoaʻoga a Iopu. E ui na mataʻu i le Atua, ae e lē lelei atoatoa. Na sesē ona manatu ona o faafitauli ogaoga na oo iā te ia. O lea, na fautuaina tuusaʻo ai o ia e Eliu ma Ieova. Na faapefea ona tali atu Iopu? Na ia talia ma le lotomaulalo le fautuaga. Na ia faapea mai: “Sa ou tautala ae ou te leʻi malamalama . . . O le mea lea ou te toe faafoʻi mai ai aʻu upu, ma ua ou salamō i le efuefu ma le lefulefu.” Na faamanuia e Ieova Iopu ona o lona lotomaulalo.​—Iopu 42:3-6, 12-17.

9. Na faapefea ona faataatia e Mose se faaaʻoaʻoga lelei i le taliaina o fautuaga?

⁹ O Mose o se tasi o faaaʻoaʻoga lelei, o lē na taliaina faasaʻoga ina ua ia faia se agasala matuiā. Na iai se taimi na matuā ita ai o ia, ma lē faamamaluina ai Ieova. O lea, na ia lē maua ai le faaeaga e ulu atu i le Nuu Folafolaina. (Nu. 20:1-13) Ina ua faaalia e Mose lona lē fiafia i lenā faaiʻuga, na fetalai atu Ieova: “Aua neʻi e toe fai mai iā te aʻu i lea mataupu.” (Teu. 3:23-27) E leʻi teuloto e Mose le ita, ae na ia taliaina le faaiʻuga a Ieova ma na faaaogā pea o ia e Ieova e taʻitaʻia Isaraelu. (Teu. 4:1) O Iopu ma Mose o ni faaaʻoaʻoga o le taliaina o fautuaga, ma e ao ona tatou faaaʻoaʻo i ai. Na faasaʻo e Iopu ona manatu, ma e na te leʻi faia ni faamolemolega. Na faamaonia e Mose lona taliaina o le fautuaga a Ieova, e ala i le tumau faamaoni pea e ui e na te leʻi mauaina se faaeaga tautele na ia tulimataʻia.

10. (a) O le ā ua faailoa mai i le Faataoto 4:10-13 e faatatau i aogā o le taliaina o fautuaga? (e) O ā uiga lelei na faaalia e nisi ina ua avatu i ai fautuaga?

¹⁰ E tatou te maua aogā pe a tatou faaaʻoaʻo i le faaaʻoaʻoga na faataatia e tane faamaoni, e pei o Iopu ma Mose. (Faitau le Faataoto 4:10-13.) E toʻatele o tatou uso ma tuafāfine o loo faia faapea. Na faapea mai se uso e igoa iā Emmanuel e nofo i Congo e faatatau i se lapataʻiga na ia maua: “Na mātauina e ni uso taʻumatuaina i laʻu faapotopotoga ni lamatiaga faaleagaga o le a oo iā te aʻu, ma taumafai e fesoasoani mai. Na ou faatatauina a latou fautuaga, ma na fesoasoani iā te aʻu e ʻalofia ai le tele o faafitauli.” * Na faapea mai se paeonia e igoa iā Megan i Kanata e faatatau i fautuaga: “E lē o taimi uma ou te fia faalogo ai i fautuaga, ae o se mea na manaʻomia ona ou faalogo i ai.” Na faapea mai se uso e igoa iā Marko mai Croatia: “Na aveese loʻu faaeaga, ae ina ua ou toe mafaufau i ai na ou iloa ai o le fautuaga na ou mauaina, na fesoasoani iā te aʻu e toe faaleleia ai loʻu itu faaleagaga.”

11. O le ā na mātauina e le uso o Karl Klein e faatatau i le taliaina o fautuaga?

¹¹ O le uso o Karl Klein na avea ma sui o le Vaega Pule. O ia o se tasi o faaaʻoaʻoga lelei na mauaina aogā mai i le taliaina o fautuaga. Na taʻua e le uso o Klein i lana talaaga o le soifuaga. Na iai se taimi na avatu ai e lana uō mamae o Joseph F. Rutherford se fautuaga malosi iā te ia. Na taʻutino mai le uso o Klein, i le taimi muamua e leʻi fiafia i le fautuaga. Na faapea mai o ia: “Mulimuli ane ina ua ma feiloaʻi ma le uso o Rutherford, na ia faafeiloaʻia ma le fiafia aʻu ma faapea mai, ʻMalō Karl!’ Ae ona na tigā pea faalogona o le uso o Karl, sa na ona memu atu lava. Na faapea atu le uso o Rutherford, ʻKarl faaeteete vaai oe i puʻe e  Satani!’ Na ou faapea atu ma le māsiasi, ʻUso Rutherford, e leai ā se mea o tupu.’ Ae na ia iloa lelei ma na ia toe lapataʻi mai, ʻIa lelei, pau ā le mea ia faaeteete, vaai oe i puʻe e Satani.’ Maʻeu le saʻo o le uso! Pe a tatou teulotoina le ita i se uso, aemaise lava pe a fai mai se tala e iā te ia le aiā e faia ai . . . , ua tatou tuua ai i tatou e puʻea i mailei a le Tiapolo.” (Efe. 4:25-27) Na talia e le uso o Klein le fautuaga a le uso o Rutherford, ma na tumau pea ona avea i laʻua ma uō mamae.

12. E faapefea ona fesoasoani le lotomaulalo e tatou te talia ai fautuaga? (Salamo 141:5)

¹² O le ā e fesoasoani iā i tatou e talia ai fautuaga? E tatau ona tatou lotomaulalo e manatua e tatou te lē lelei atoatoa, ma e iai taimi e tatou te sesē ai. E pei ona tatou talanoaina muamua, na sesē le vaaiga a Iopu. Ae na toe faasaʻo ona manatu ma na faamanuia Ieova iā te ia. Aiseā? Talu ai sa lotomaulalo Iopu. Na ia faaalia le lotomaulalo e ala i le talia o le fautuaga a Eliu, e ui na matua mamao Iopu iā Eliu. (Iopu 32:6, 7) O le lotomaulalo e fesoasoani iā i tatou e faatatau ai fautuaga, e tusa lava pe tatou te lagona e lē tatau ona fautuaina i tatou, pe laʻitiiti foʻi le tagata o loo aumai ai le fautuaga. Na faapea mai se toeaina i Kanata, “Talu ai e ese le vaaiga a isi iā i tatou nai lo o i tatou lava, e faapefea la ona tatou agaʻigaʻi i luma pe a leai se isi e fautuaina i tatou?” E leai se isi o i tatou e lē manaʻo e agaʻigaʻi i luma i le atiaʻeina o fua o le agaga, ma le faataunuuina o la tatou faiva faa-Kerisiano.​—Faitau le Salamo 141:5.

13. O le ā le vaaiga e tatau ona iā i tatou pe a maua ni fautuaga?

¹³Ia vaai i fautuaga o se faailoaga o le alofa o le Atua. E finagalo Ieova ia tatou maua le mea sili i le olaga. (Faata. 4:20-22) E faaalia e Ieova lona alofa iā i tatou, pe a ia fautuaina i tatou e ala i lana Afioga, se lomiga faale-Tusi Paia, se uso po o se tuafafine taʻumatuaina. Ua faapea mai le Eperu 12:9, 10: “Ua ia faia faapea mo lo tatou lava lelei.”

14. O le ā e tatau ona tatou taulaʻi i ai pe a fautuaina i tatou?

¹⁴Ia taulaʻi i le fautuaga ae lē o le auala e aumai ai. E iai taimi e tatou te lagona ai, e lē lelei le auala na aumai ai se fautuaga. O se tasi e avatuina se fautuaga, e tatau ona taumafai e avatu i se auala e faigofie ai ona talia. * (Kala. 6:1) Ae pe afai o i tatou lea o loo fautuaina e tāua le taulaʻi atu i le feʻau, e tusa lava pe tatou te manatu sa tatau ona aumai le fautuaga i se auala e sili atu ona lelei. E tatou te ono fesili ifo: ʻE tusa pe ou te lē talisapaia le auala na aumai ai le fautuaga, pe e iai se mea e saʻo  ai lenā fautuaga? Pe e mafai ona ou ʻalofia le taulaʻi atu i le lē lelei atoatoa o le tagata na aumai ai le fautuaga, ae ia maua aogā mai i le fautuaga?’ E atamai lo tatou saʻilia o se auala e aogā ai iā i tatou so o se fautuaga e tatou te maua.​—Faata. 15:31.

15. Aiseā e tatau ai ona tatou saʻili mo fautuaga?

¹⁵ O loo faalaeiauina i tatou e le Tusi Paia ina ia saʻili mo fautuaga. Ua faapea mai le Faataoto 13:10: “E iai le atamai iā i latou o ē e soālaupule faatasi.” Maʻeu le moni o lenā manatu! O i latou e saʻili mo fautuaga, e masani lava e vave ona avea ma tagata taʻumatuaina faaleagaga nai lo i latou e lē saʻili mo fautuaga. O lea, ia tausolomua ona fesili atu mo ni fautuaga.

16. O ā tulaga e tatou te ono fesili atu ai mo ni fautuaga?

¹⁶ O ā taimi e tatou te ono fesili ai i o tatou uso ma tuafāfine talitonu mo fautuaga? Mātau nisi o tulaga nei. (1) O se tuafafine na talosaga atu i se isi tuafafine e iai le poto masani e la te ō e fai lana suʻesuʻega, ma na mulimuli ane fesili atu mo se fautuaga i le auala e faaleleia ai lana aʻoaʻo atu. (2) O se tuafafine nofofua o loo manaʻo e faatau sona ofuvae vae uumi, o lea na ia talosaga atu ai i se tuafafine taʻumatuaina mo sona manatu e faatatau i lana filifiliga. (3) O se uso ua tofia e faia sana lauga lautele mo le taimi muamua, na ia fesili atu i se failauga e iai le poto masani ina ia faalogologo lelei i lana lauga, ma ofo atu ni fautuaga i le auala e faaleleia ai. E oo lava i uso ua tele tausaga o failauga, e aogā foʻi le fesili atu i failauga e iai le poto masani mo fautuaga ma ia faatatau na fautuaga.

17. E faapefea ona tatou maua aogā mai i fautuaga?

¹⁷ I vaiaso ma masina e sosoo ai, e tatou te maua uma fautuaga tuusaʻo pe e lē tuusaʻo. Pe a tupu lenā mea, ia manatua manatu na tatou talanoaina i lenei suʻesuʻega. Ia faaauau pea ona lotomaulalo. Ia taulaʻi atu i le fautuaga, ae lē o le auala e aumai ai. Ia faatatau fautuaga e tatou te mauaina. E leai ma se isi o i tatou na fanau mai ua atamai. Peitaʻi, pe a tatou “faalogo i le fautuaga ma talia le aʻoaʻiga,” o le a tatou ʻatamamai ai’ e pei ona folafola mai e le Afioga a le Atua.​—Faata. 19:20.