Na toʻaʻaga oʻu mātua i le lotu Katoliko. Ae na avea i laʻua o ni Molimau a Ieova maelega, ina ua la aʻoaʻoina mai i le Tusi Paia o Ieova le suafa o le Atua. E leʻi toe gaosia e loʻu tamā ni faatusa o Iesu. Nai lo o lea, na faaaogā e loʻu tamā ona tomai o se kamuta e suia ai le fogāfale muamua o lo matou fale, e fai ma Maota mo Sauniga muamua i San Juan del Monte, o se itumalo i Manila, o le laumua lea o Filipaina.

Na ou fanau i le 1952, ma e toʻafā oʻu uso matutua ma tuafāfine matutua e toʻatolu. Sa sogasogā o matou mātua i le aʻoaʻoina o i matou i mataupu faaleagaga. A o oʻu tuputupu aʻe, na faalaeiau aʻu e loʻu tamā e faitau se mataupu o le Tusi Paia i aso taʻitasi. Na ia faaaogā foʻi le tele o a tatou lomiga e fai ai aʻu suʻesuʻega. Na valaaulia e oʻu mātua ovasia femalagaaʻi ma uso mai i le ofisa o le lālā e api i lo matou fale. O taimi fiafia na mo lo matou aiga e maua ai faalaeiauga, a o faamatala mai e nei uso mea na tutupu i la latou auaunaga, lea na uunaʻia ai i matou uma e faamuamua le faiva i o matou olaga.

Maʻeu le lelei o le faaaʻoaʻoga na faataatia e oʻu mātua mo aʻu! Na maliu si oʻu tinā pele ona o se maʻi. Sa amata ona ma paeonia faatasi ma loʻu tamā i le 1971. Ae na maliu loʻu tamā i le 1973 ina ua 20 oʻu tausaga. Sa ou matuā mafatia lava ma lagona le tuua toʻatasi, ona ua maliliu uma oʻu mātua. Ae o le faamoemoe o loo i le Tusi Paia lea “e mautinoa ma mausalī,” na fesoasoani ina ia tumau ai ona lelei oʻu faalogona ma faamausalī ai loʻu itu faaleagaga. (Epe. 6:19) E leʻi leva ona maliu loʻu tamā, ae ou taliaina loa le tofiga e paeonia faapito i le motu maotua o Coron i le itumalo o Palawan.

Na ou taunuu i le motu o Coron i le 21 o oʻu tausaga. Talu ai na ou ola aʻe i se aai pisi, na faateʻia aʻu i le tau leai o se eletise, suāvai, po o auala o femalagaaʻiga i le motu. E ui na iai ni Molimau a Ieova i le motu, ae na ou talaʻi na o  aʻu i nisi taimi ona e leʻi iai saʻu paga paeonia. Sa ou matuā misia lava loʻu aiga ma aʻu uō i le masina muamua. A oo i pō, e maligi oʻu loimata a o oʻu vaavaai aʻe i le lagi ua lilofia i fetu. Na ou fia faamavae mai loʻu tofiga ma toe foʻi i loʻu aiga.

Na sasaa atu loʻu loto iā Ieova i na taimi faigatā. Na ou manatua ni manatu faalaeiau mai mea na ou faitau ai i le Tusi Paia ma a tatou lomiga. E masani ona tau loʻu mafaufau i le Salamo 19:14. Na ou iloa ai, pe a ou manatunatu i mea e fiafia i ai le finagalo o Ieova, e pei o ana galuega ma ona uiga, ona avea lea o ia ma ʻoʻu Papa ma Lē e togiolaina aʻu.’ Na fesoasoani tele iā te aʻu le mataupu o Le Olomatamata faa-Peretania ua faamatuaina “E Lē Tuua na o Oe.” a Na ou faitau ma toe faitau i lenā mataupu. O le mea moni, e tai pei e na o i maʻua ma Ieova i na taimi, ma na ou maua ai avanoa lelei e tatalo, suʻesuʻe ma manatunatu loloto ai.

E leʻi leva ona ou taunuu i Coron ae tofia aʻu o se toeaina. Talu ai e na o aʻu le toeaina i inā, na ou faia ai le Aʻoga o le Faiva Faatiokarate, Sauniga o le Auaunaga, Suʻesuʻega Tautusi a le Faapotopotoga, ma le Suʻesuʻega o Le Olomatamata. Na ou faia foʻi lauga o le lautele i vaiaso uma. O le pisi o laʻu faasologa, na ou lē toe lagona ai le tuua toʻatasi.

E tele iʻuga lelei o laʻu faiva i Coron, ma na papatiso nisi o aʻu suʻesuʻega faale-Tusi Paia. Ae na iai foʻi luʻi. O nisi taimi e tele itula ou te savali ai i le oganuu, ae ou te lē iloa po o fea o le a ou moe ai pe a ou taunuu. O le oganuu a le faapotopotoga e aofia ai le tele o tamaʻi motu. Na masani ona ou alu i vaaafi a o sou le sami, ae ou te lē iloa aau. E ui i nei luʻitau ae na puipuia ma tausia pea aʻu e Ieova. Na ou iloa mulimuli ane, o lea na sauniunia aʻu e Ieova mo isi luʻi faigatā i loʻu tofiga na sosoo ai.

I le 1978, na tofia ai aʻu e auauna i Papua Niu Kini lea e tū i le itu i mātū o Ausetalia. O Papua Niu Kini o se atunuu maugā. Na ou ofo ina ua ou iloa e silia ma le 800 gagana e tautatala ai le pe ā ma le tolu miliona o tagata Papua. O le mea e lelei ai, o le toʻatele o i latou e tautatala i le Tok Pisin, o le gagana Pidgin a Melanesia.

Na tofia muamua aʻu i se faapotopotoga faa-Peretania i Port Moresby, o le laumua lea o le atunuu. Mulimuli ane, na tofia aʻu i se faapotopotoga faa-Tok Pisin ma na ou auai i se vasega e aʻo ai le gagana. Na ou faaaogā mea na ou aʻoaʻoina mai i lenā vasega i le galuega talaʻi. Na fesoasoani lea iā te aʻu e vave ona aʻo ai le gagana. E leʻi umi ae ou faia se lauga i le lautele faa-Tok Pisin. Na matuā faateʻia aʻu ona e leʻi atoa le tausaga talu ona ou taunuu i Papua Niu Kini, ae tofia aʻu o se ovasia matagaluega i faapotopotoga faa-Tok Pisin i nisi o itumalo tetele.

Talu ai e vavamamao faapotopotoga, na tatau la ona ou faamaopoopoina le tele o fonotaga matagaluega, ma na tele foʻi ina ou malaga. I le taimi muamua, na ou lagona le tuua toʻatasi ona o le ese o le siʻomaga, e pei o le fou o le atunuu, gagana ma le aganuu. E toetoe o vaiaso uma na ou faimalaga ai i vaalele, ona e leʻi mafai ona ou asia le tele o faapotopotoga i se taavale ona  o le maugā ma le gaoā o laueleele. I nisi taimi, e na o aʻu lava le pasese o se tamaʻi vaalele tuai e tasi le afi. E matuā tātāvale loʻu fatu pe a ou alu i na vaalele, e tai pei foʻi o oʻu faalogona pe a ou alu i vaaafi.

E lē toʻatele nisi e iai ni telefoni, o lea na matou fesootaʻi ai ma faapotopotoga e ala i tusi. E masani ona ou taunuu muamua a o leʻi taunuu aʻu tusi, ma na manaʻomia ai ona ou fesili i tagata o le nuu po o fea fale o uso ma tuafāfine. O taimi uma ou te maua ai fale o uso, e latou te faafeiloaʻi ma le māfana aʻu, ma ou manatua ai le māfuaaga na ou faia ai nei taumafaiga uma. Na ou tofo i le lagolagosua a Ieova i le tele o auala, ma na matuā faamalosia ai la maʻua faiā.

I laʻu sauniga muamua i le motu o Bougainville, na ō mai ai se ulugalii foliga fiafia ma fesili mai: “E te manatua i maʻua?” Ou te manatua na ou talaʻi i lenei ulugalii ina ua ou faatoʻā taunuu i Port Moresby. Na ou amataina le la suʻesuʻega faale-Tusi Paia, ona tuu atu lea e faaauau e se isi uso. Ua papatiso uma i laʻua! O se tasi nei o faamanuiaga na ou tofo i ai a o oʻu auauna mo le tolu tausaga i Papua Niu Kini.

A o oʻu leʻi tuua Coron i le 1978, na ou feiloaʻi ai iā Adel o se tuafafine e amio tauagafau ma lotofesoasoani. Na paeonia sauatoa o ia ma tausia aʻe lana fanau e toʻalua o Samuel ma Shirley. I le taimi e tasi, na ia tausia foʻi lona tinā matua. Iā Me 1981, na ou toe foʻi ai i Filipaina e ma te faaipoipo ma Adel. Ina ua uma ona ma faaipoipo, na ma paeonia sauatoa ma tausia lo ma aiga.

E ui na ou tausia se aiga, ae na toe tofia aʻu e auauna o se paeonia faapito i le 1983, i le motu o Linapacan i le itumalo o Palawan. Na siitia atu lo matou aiga i lenā nofoaga maotua e leai ni Molimau a Ieova. E pe ā ma le tausaga mulimuli ane, ae maliu le tinā o Adel. Peitaʻi, o lo matou pisi i le galuega talaʻi na fesoasoani i o matou faalogona faavauvau. Na tele a matou suʻesuʻega faale-Tusi Paia na agaʻigaʻi i luma i Linapacan, ma e leʻi umi ae manaʻomia se tamaʻi Maota mo Sauniga. O lea na matou fausia ai se Maota mo Sauniga. I le tolu tausaga talu ona matou iai i inā, na matou fiafia e vaaia le toʻa 110 o tagata na auai i le Faamanatuga, ma o le toʻatele o i latou na papatiso mulimuli ane ina ua matou tuua le motu.

I le 1986, na tofia ai aʻu i le motu o Culion, lea e iai se aai o tagata lepela. Mulimuli ane, na tofia foʻi Adel o se paeonia faapito. I le taimi muamua, na ma popole e talaʻi i tagata na maua i le lepela. Ae na faamautinoa mai e le ʻautalaʻi ua uma ona togafitia tagata lepela ma e lē pepesi. Na auai nisi o i latou i sauniga na faia i le fale o se tuafafine. E leʻi umi ae teʻa o ma faalogona popole, ma na ma fiafia e faailoa atu le faamoemoe o le Tusi Paia iā i latou na, o ē na manatu ua tuulafoaʻia i latou e le Atua ma tagata. E ui ua maua i le lepela, ae na latou olioli  i le faamoemoe o le mauaina o le soifua mālōlōina lelei atoatoa i le lumanaʻi. O se fiafiaga iā i maʻua le mātau o o latou faalogona olioli.—Luka 5:​12, 13.

Na faapefea ona faamasani la ma fanau i le olaga i Culion? Na ma valaaulia ma Adel ni tuafāfine talavou se toʻalua mai i Coron e siitia mai i Culion, ina ia maua ai e le ma fanau ni uō lelei. Na taulau manuia le faiva a Samuel, Shirley ma nei tuafāfine talavou e toʻalua, ma na latou suʻesuʻe ma le toʻatele o tamaiti. Ae na ma faia ma Adel suʻesuʻega a mātua o nei tamaiti. I se tasi taimi, e 11 aiga na matou faia a latou suʻesuʻega. E leʻi umi ae agaʻigaʻi i luma le toʻatele o a matou suʻesuʻega faale-Tusi Paia, ma mafai ai ona faavae se faapotopotoga fou.

I le taimi muamua e na o aʻu le toeaina i lenā vaipanoa. O lea na talosaga mai ai le ofisa o le lālā ina ia ou faia sauniga faalevaiaso mo tagata talaʻi e toʻavalu i Culion, ona malaga lea i se vaa mo le tolu itula e faia sauniga mo tagata talaʻi e toʻaiva i le nuu o Marily. Pe a uma sauniga, e matou te savavali ma lo matou aiga i vaega maugā mo le tele o itula, ina ia faia suʻesuʻega faale-Tusi Paia i le nuu o Halsey.

Na agaʻigaʻi i luma le galuega talaʻi i Marily ma Halsey, ma na fausia ai ni Maota mo Sauniga. E pei o Linapacan, na fausia maota e uso ma tagata fiafia, ma na latou saunia le tele o meafaigaluega. Na mafai ona ofi tagata e toʻa 200 i le maota i Marily, lea na mafai ona faatelē e fai ai fonotaga.

Ina ua matutua le ma fanau, na amata ona ma galulue ma Adel i le 1993 i le galuega femalagaaʻi i Filipaina. I le 2000, na ou auai ai i le Aʻoga mo Toleniga i le Faiva, lea na toleniina ai aʻu e avea ma faiaʻoga mo na aʻoga. Na ou lagona le lē agavaa, ae na faalaeiau mai pea Adel. Na ia faamanatu mai o le a foaʻi mai e Ieova le malosi e faataunuu ai lenei tofiga fou. (Fili. 4:13) Na iloa e Adel le moni o lenei mea, talu ai na ia faataunuuina lona tofiga a o feagai ai ma faafitauli o le soifua mālōlōina.

 A o oʻu faia se aʻoga i le 2006, na maua ai Adel i se maʻi tugā e taʻua o le Parkinson lea e tetete ai le tino. Na matuā faateʻia i maʻua! Ina ua ou fai iā Adel e faamuta o ma tofiga ina ia tausia o ia, na tali mai Adel, “Faamolemole saʻili se fomaʻi e fesoasoani i loʻu maʻi, ou te iloa o le a fesoasoani mai Ieova iā i taʻua e tutumau i lo ta tofiga.” Na faaauau ona auauna Adel iā Ieova mo le isi ono tausaga, e aunoa ma le faitio. Ina ua lē mafai ona savali, na talaʻi o ia e faaaogā ai se nofoa faataavalevale. Ina ua tau lē mafai ona tautala, na tali o ia i sauniga i se upu se tasi pe lua. E masani ona lafo mai e uso ma tuafāfine ni feʻau e faaalia ai lo latou talisapaia o le faaaʻoaʻoga a Adel o le tutumau, seʻia oo lava ina maliu i le 2013. E silia i le 30 tausaga o la ma mafutaga ma Adel, o se avā faamaoni ma lotoalofa. A o lenei ua toe lofitūina foʻi aʻu i faalogona faavauvau ma le tuua toʻatasi.

Na manaʻo Adel ia ou faaauau pea i loʻu tofiga, ma o le mea lenā na ou faia. Na faaauau ona ou pisi i le auaunaga, lea na tuuitiitia ai oʻu faalogona tuua toʻatasi. E mai i le 2014 i le 2017, na tofia ai aʻu e asiasi i faapotopotoga faa-Tagalog i atunuu na faasāsā ai la tatou galuega. Ina ua uma lenā, na ou asiasi i faapotopotoga faa-Tagalog i Taiwan, le Iunaite Setete, ma Kanata. I le 2019, na ou faia ai ni vasega faa-Peretania mo le Aʻoga mo Tagata Talaʻi o le Malo i Initia ma Taialani. Na ou matuā olioli i nei tofiga uma. O le taulaʻi atoatoa i laʻu auaunaga iā Ieova, o taimi sili na ona fiafia o loʻu olaga.

E lē faigofie iā te aʻu le tuua o so o se tofiga fou ou te mauaina, ona o le māfana o loʻu alofa i uso ma tuafāfine. O taimi faapena, e tuu atoatoa ai loʻu faatuatuaga iā Ieova. Ua ou tofo e lē aunoa i le lagolagosua a Ieova, lea na fesoasoani iā te aʻu e talia ma le lotoatoa so o se suiga i oʻu tofiga. O loo oʻu auauna nei o se paeonia faapito i Filipaina. E ese loʻu talisapaia o le faapotopotoga fou ua tofia ai aʻu, o ē ua avea ma oʻu aiga e latou te tausi faapelepele iā te aʻu. O se mitamitaga foʻi iā te aʻu le vaavaai atu iā Samuel ma Shirley o faataʻitaʻi i le faatuatua malosi o lo la tinā.—3 Ioa. 4.

Ioe, ua ou tofo i le tele o luʻi o le olaga, e pei o le vaavaai atu i si aʻu avā pele o puapuagatia ma maliu i se gasegase tugā. E tele foʻi taimi na ou tau faamasani ai i ni siʻomaga fou. E ui i lea, na ou vaaia le fesoasoani a Ieova, ma “e lē o mamao o ia mai iā i tatou taʻitoʻatasi.” (Galu. 17:27) “E lē puupuu le aao o Ieova” i le lagolagoina ma le tausia o ana auauna, e aofia ai ē o loo i oganuu maotua. (Isa. 59:1) Sa faatasi Ieova ma aʻu i loʻu olaga atoa, ma o ia o loʻu Papa malosi. Maʻeu loʻu lotofaafetai iā te ia! E leai se taimi na tuulafoaʻia ai aʻu.